Exodus

27 “You go use acacia wood make the altar, e go long reach five cubits* and wide reach five cubits. The altar go be square shape and e go high reach three cubits. 2 You go make horns ontop im four corners; the horns go be part of the altar, and you go cover the altar with copper. 3 You go make buckets wey them go use de comot im ashes,* together with shovels, bowls, forks, and things wey them go de use hold fire, and you go make all the things wey you go use for the altar with copper. 4 You go use copper rods cross ontop each other for the altar to form copper net, and ontop the net, you go put four rings wey them make with copper for im four corners. 5 You go set-am make e dey under the rim of the altar, and the net go enter reach the middle of the altar. 6 You go use acacia wood make poles for the altar, and cover them with copper. 7 You go put the poles inside the rings so that the poles go dey for the two sides of the altar when them carry-am. 8 You go use planks make the altar make e be like box wey get deep hole for middle. You go do-am just the way E show you ontop the mountain.

9 “You go make compound for the tabernacle. For the left side, wey face left,* the compound go get curtains wey de hang wey them make with quality linen wey them twist. One side go long reach 100 cubits. 10 E go get 20 pillars with 20 copper base. You go use silver make the hooks of the pillars and the things wey them go use connect them.* 11 The curtains wey de hang for the right side go still long reach 100 cubits, together with im 20 pillars and their 20 base, with silver hooks and things wey them use de connect things for the pillars.* 12 Curtains wey de hang go dey for the back of the compound, and e go wide reach 50 cubits from one side of the compound to the other side, with ten pillars and ten base. 13 The front side* of the compound, wey de face the side where sun de come out from, go wide reach 50 cubits. 14 Curtains wey de hang, wey long reach 15 cubits go dey for one side, with three pillars and three base. 15 And for the other side, curtains wey de hang wey long reach 15 cubits, with three pillars and three base go dey there.

16 “The domot of the compound go get screen* wey long reach 20 cubits, wey them use all this things weave together: blue thread, purple wool, red material, and quality linen wey them twist, with four pillars and their four base. 17 All the pillars wey surround the compound go get silver things wey them de use hold something together, and silver hooks, but their base go be copper. 18 The compound go long reach 100 cubits, wide reach 50 cubits, and high reach 5 cubits. Na quality linen wey them twist you go use make the curtains, and e go get base wey them make with copper. 19 All the things wey them de use do work for the tabernacle and im tent pins and all the pins wey them de use for the compound, you go make them with copper.

20 “You go command Israel people to bring pure oil from olive wey them pound, wey you go use for the light, so that the lamps go continue to shine everytime. 21 For inside the tent of meeting, for outside the curtain* wey dey near the Testimony, Aaron and im sons go arrange and make sure say the lamps continue to shine from evening go reach morning for front of Jehovah. This one na law wey go last for long time, wey Israel people go de follow for all their generations.