Numbers

10 Then Jehovah tell Moses say: 2 “Make two trumpets for yourself; use silver make them with hammer, and use them to call the people and to tell them to move the camps. 3 When una blow the two of them, everybody must come meet you for the domot of the tent of meeting. 4 If na just one of them una blow, na only the chiefs wey be the heads of the thousands of Israel go come meet you.

5 “When una blow the trumpet to produce different-different sound, make the camps of people wey dey the east side comot. 6 When una blow the trumpet to produce different-different sound for the second time, make the camps of people wey dey the south side comot. Make them blow the trumpet like this anytime wey one of them de comot.

7 “Now when una de call the people* together, make una blow the trumpets, but make e no be with different-different sounds. 8 Make Aaron sons wey be priests blow the trumpets, and the way una de use them go be law wey go last for long time for una for all una generations.

9 “If una want fight war for una land against una enemy wey de give una trouble, make una use the trumpets blow war sound, and Jehovah una God go remember una and save una from una enemies.

10 “And for una occasions wey de bring joy—una festivals and for the beginning of una months—una go blow the trumpets ontop una offerings wey them de burn and una peace sacrifice them; them go make God remember una. I be Jehovah una God.”

11 Now for the second year, for the second month, for the 20th day of the month, the cloud comot from ontop the tabernacle of the Testimony. 12 So Israel people start to comot from the wilderness of Si′nai according to the way them don arrange make them comot, and the cloud stay for the wilderness of Pa′ran. 13 This one na the first time wey them comot according to the command wey Jehovah don give through Moses.

14 So the group of three tribes for the camp of the sons of Judah first comot according to their groups* and Nah′shon wey be the son of Am·min′a·dab dey in charge of im group. 15 Ne·than′el the son of Zu′ar dey in charge of the group for the tribe of the sons of Is′sa·char. 16 E·li′ab the son of He′lon dey in charge of the group for the tribe of the sons of Zeb′u·lun.

17 When them bring down the tabernacle, the sons of Ger′shon and the sons of Me·rar′i, wey carry the tabernacle, comot.

18 Then the group of three tribes for the camp of Reu′ben comot according to their groups,* and E·li′zur the son of Shed′e·ur dey in charge of im group. 19 She·lu′mi·el the son of Zu·ri·shad′dai dey in charge of the group for the tribe of the sons of Sim′e·on. 20 E·li′a·saph the son of Deu′el dey in charge of the group for the tribe of the sons of Gad.

21 Then the people from the family of Koʹhath wey carry the things wey them de use for the holy place, comot. The tabernacle suppose don set by the time wey them reach there.

22 Then the group of three tribes for the camp of the sons of E′phra·im comot according to their groups,* and E·lish′a·ma the son of Am·mi′hud dey in charge of im group. 23 Ga·ma′li·el the son of Pe·dah′zur dey in charge of the group of the tribe of the sons of Ma·nas′seh. 24 Ab′i·dan the son of Gid·e·o′ni dey in charge of the group for the tribe of the sons of Benjamin.

25 Then the group of three tribes for the camp of the sons of Dan comot according to their groups,* them dey back de protect all the camps, and A·hi·e′zer the son of Am·mi·shad′dai dey in charge of im group. 26 Pa′gi·el the son of Och′ran dey in charge of the group for the tribe of the sons of Ash′er. 27 A·hi′ra the son of E′nan dey in charge of the group for the tribe of the sons of Naph′ta·li. 28 Na this arrangement Israel people and their groups* follow when them de comot.

29 Then Moses tell Ho′bab the son of Reu′el* wey be Mid′i·an person, the father-in-law of Moses, say: “We de go the place wey Jehovah talk about say, ‘I go give-am to una.’ Make you follow us go and we go treat you well, because Jehovah don promise to do good things for Israel.” 30 But e tell-am say: “I no go go with una. I go go back to my own country and to my family people.” 31 With this one e talk say: “Abeg make you no leave us, because you know where we suppose put our camp for the wilderness, and you fit show us road.* 32 And if you follow us go, any good thing wey Jehovah do for us, we go surely do for you too.”

33 So them start to march from the mountain of Jehovah for journey wey go take three days, and them carry the ark of Jehovah agreement for their front for the three days journey, to find place wey them go rest. 34 And Jehovah cloud de lead them* for daytime when them want start to move comot from camp.

35 Anytime wey them move the Ark, Moses go talk say: “Stand up, O Jehovah, and make your enemies scatter and make people wey hate you run comot from your front.” 36 And when them bring-am down, e go talk say: “Come back, O Jehovah, to the thousands of Israel people wey them no fit count.”*