Judges
4 But after E′hud die, Israel people start to do wetin bad for Jehovah eyes again. 2 So Jehovah put them* for the hand of Ja′bin the king of Ca′naan, wey rule for Ha′zor. The person wey de control im army na Sis′e·ra, wey de live for Ha·ro′sheth of the nations.* 3 Then Israel people start to beg Jehovah, because Jaʹbin* get 900 war chariots wey get iron knives for the wheels,* and e suffer Israel people no be small for 20 years.
4 The person wey be de judge Israel that time na Deb′o·rah, wey be woman prophet and wey be the wife of Lap′pi·doth. 5 E de normally sitdown under one palm tree wey them de call Deb′o·rah palm tree wey dey between Ra′mah and Beth′el for the area wey mountains dey for E′phra·im; Israel people de go up go meet-am for there make e tell them about God judgment. 6 E send message to Ba′rak the son of A·bin′o·am wey dey Ke′desh-naph′ta·li say make e come, and e tell-am say: “No be Jehovah the God of Israel don command you? ‘March go* Mount Ta′bor, and take 10,000 men from the tribes of Naph′ta·li and Zeb′u·lun with you. 7 I go bring Sis′e·ra, the person wey de control Ja′bin army, together with im war chariots and im soldiers come meet you for the stream* of Ki′shon, and I go put-am for your hand.’”
8 Then Ba′rak tell-am say: “If you follow me go, I go go. But if you no follow me go, I no go go.” 9 So e talk say: “I go surely follow you go. But, no be you go get the praise for this fight wey you de go fight, because Jehovah go put Sis′e·ra for the hand of one woman.” Then Deb′o·rah stand up and follow Ba′rak go Ke′desh. 10 Ba′rak call Zeb′u·lun people and Naph′ta·li people to come Ke′desh, and 10,000 men waka follow-am go. Deb′o·rah still follow-am go up.
11 Now e happen say, He′ber wey be Ken′ite person don comot from where other Ken′ite people de stay. This Ken′ite people na the children-children of Ho′bab, wey be Moses father-in-law, and He′ber don put im tent near the big tree for Za·a·nan′nim, wey dey for Ke′desh.
12 Them tell Sis′e·ra say Ba′rak the son of A·bin′o·am don go up to Mount Ta′bor. 13 At once Sis′e·ra gather all im war chariots, wey be 900 chariots wey get iron knives for their wheels,* and all the soldiers wey dey with-am from Ha·ro′sheth of the nations, make them go the stream* of Ki′shon. 14 Deb′o·rah come tell Ba′rak say: “Get up, because today na the day wey Jehovah go put Sis′e·ra for your hand. No be Jehovah dey your front de go?” And Ba′rak come down from Mount Ta′bor with the 10,000 men wey de follow-am. 15 Then Jehovah confuse Sis′e·ra and all im war chariots and all im army for front of Ba′rak sword. At last, Sis′e·ra come down from im chariot and use leg run. 16 Ba′rak pursue the war chariots and the army go reach Ha·ro′sheth of the nations. So e use sword kill all Sis′e·ra army; no one out of all of them remain.
17 But Sis′e·ra use leg run go the tent of Ja′el wey be the wife of He′ber wey be Ken′ite person, because peace dey between Ja′bin the king of Ha′zor and the family of He′ber wey be Ken′ite person. 18 Then Ja′el come out come meet Sis′e·ra and tell-am say: “Come inside my lord, come inside here. No fear.” So e enter Ja′el tent and Ja′el cover-am with blanket. 19 Then e tell Ja′el say: “Abeg, give me small water make I drink, because my throat don dry.” So Ja′el open one skin bottle of milk and give-am milk to drink, after, e use the blanket cover Sis′e·ra again. 20 Sis′e·ra tell-am say: “Stand for the domot of the tent and if anybody come ask you say, ‘Any man dey here?’ tell-am, ‘No!’”
21 But Ja′el the wife of He′ber take tent pin and carry hammer for hand. Then when e don sleep go far as e don tire, Ja′el waka small-small go meet-am and nack the pin enter the side of im head and the pin come out from the other side enter ground, and Sis′e·ra die.
22 Ba′rak go there as e de find Sis′e·ra, and Ja′el come out come meet-am and tell-am say: “Come, and I go show you the man wey you de find.” So e follow-am enter and see say Sis′e·ra don die for the place wey e lie down, and the tent pin dey inside im head.
23 So that day, God win Ja′bin the king of Ca′naan for front of Israel people. 24 The hand of Israel people come de strong more-more against Ja′bin the king of Ca′naan, until them destroy Ja′bin the king of Ca′naan.