The Second Book of Chronicles
19 Then Je·hosh′a·phat wey be king of Judah come back to im own house* for Jerusalem and nothing happen to-am.* 2 Je′hu the son of Ha·na′ni wey de see vision comot go meet King Je·hosh′a·phat and ask-am say: “Na wicked person you suppose de help, and na people wey hate Jehovah you suppose love? Because of this one, Jehovah de vex for you. 3 But God don see good things inside you, because you don comot the idol poles* from the land and you don decide for your heart say you go find the true God.”
4 Je·hosh′a·phat continue to stay for Jerusalem, and e comot go meet the people as e de do before from Be′er-she′ba go reach areas wey mountain dey for E′phra·im, to help them come back to Jehovah the God of their papa-papa them. 5 E still choose judge them everywhere for the land, for all the strong cities wey get protection for Judah, city by city. 6 And e tell the judge them say: “Make una dey careful for wetin una de do, because una no de judge for man but na for Jehovah, and e dey with una when una de judge any matter. 7 Now make una de fear Jehovah. Make una dey careful about wetin una de do, because Jehovah our God no ever like make people bend case, do partial, or take bribe.”
8 For Jerusalem, Je·hosh′a·phat still choose some of the Levites and the priests and some of the leaders of family group for their papa side for Israel to work as judge them for Jehovah, and to settle case for the people wey de stay for Jerusalem. 9 And e command them say: “This na work wey una suppose do as people wey de fear Jehovah, de obey-am and use all una heart serve-am: 10 Anytime wey una brothers wey de stay for their cities bring case wey concern say them kill person or question about law, commandment, directions, or judgments, make una warn them so that them no go do wetin Jehovah no like; if una no do-am like that, e go vex for una and una brothers well-well. This na wetin una suppose do so that una no go bring sin ontop una head. 11 Am·a·ri′ah the chief priest dey here wey go direct una about every matter of Jehovah. Zeb·a·di′ah wey be the son of Ish′ma·el na leader of the house of Judah for every matter wey concern the king. And the Levites go work for una as overseers. Make una dey strong and do the work, and make Jehovah dey with people wey de do wetin good.”*