Leviticus

8 Jehovah continue to talk to Moses say: 2 “Take Aaron and im sons, the cloths, the anointing oil, the bull of the sin offering, the two rams, and the basket of bread wey no get yeast, 3 and make all the people gather together for the domot of the tent of meeting.”

4 Then Moses do just as Jehovah don command-am, and the people gather together for the domot of the tent of meeting. 5 Then Moses tell the people say: “This na wetin Jehovah don command us to do.” 6 Then Moses bring Aaron and im sons come near and wash them with water. 7 After that one, e wear-am the long cloth for im body, e tie-am with cloth wey them de tie like belt, wear-am coat wey no get hand, wear-am the eph′od, and tie-am with eph′od belt* wey them weave. E tie-am make e dey tight for im body. 8 The next thing wey e do be say, e put the breastpiece* ontop-am and put the U′rim and the Thum′mim inside the breastpiece. 9 Then e put the special headtie ontop im head, and for front of the special headtie, e put gold wey them make flat wey de shine, the holy sign of dedication,* just as Jehovah don command Moses.

10 Then Moses take the anointing oil and anoint the tabernacle and everything wey dey inside-am and make them holy. 11 After that one, e splash some of-am seven times ontop the altar and anoint the altar and all the things wey them de use for the altar, and the basin and the basin stand, to make them dey holy. 12 For the end, e pour some of the anointing oil ontop Aaron head and anoint-am to make-am dey holy.

13 Then Moses bring the sons of Aaron near and wear them long cloths and tie the cloth wey them de tie like belt for their body, and put* headtie ontop them, just as Jehovah don command Moses.

14 Then e bring the bull of the sin offering, and Aaron and im sons put their hands ontop the head of the bull of the sin offering. 15 Moses kill-am and take the blood with im finger and put-am ontop the horns of the altar for all the sides, and e make the altar dey clean from sin, but e pour the rest of the blood for the down part of the altar, to make-am dey holy so that them fit do sacrifice ontop-am for sin. 16 After that one, e take all the fat wey dey ontop the intestines, the fat wey dey ontop the liver, and the two kidneys and their fat, and Moses burn them to make smoke comot from ontop the altar. 17 Then e burn the rest of the bull, im skin, im flesh, and im shit with fire for outside the camp, just as Jehovah don command Moses.

18 Then e bring the ram of the offering wey them de burn come near, and Aaron and im sons put their hands ontop the head of the ram. 19 Then Moses kill-am and sprinkle the blood for all the sides of the altar. 20 E cut the ram to pieces and Moses burn the head, the pieces, and the fat* to bring out smoke. 21 E wash the intestines and the legs* with water, and Moses burn the whole ram to make smoke comot from ontop the altar. This one na offering wey them de burn wey get better smell.* Na offering wey them make with fire to Jehovah, just as Jehovah don command Moses.

22 Then e bring the second ram, the ram wey them de use appoint priests, and Aaron and im sons put their hands ontop the ram head. 23 Moses kill-am and take some of im blood and put-am ontop the down part of Aaron right ear, and ontop the thumb of im right hand and ontop the big toe of im right leg. 24 The next thing wey Moses do na to bring the sons of Aaron come front and put some of the blood ontop the down part of their right ear, and ontop the thumb of their right hand and ontop the big toe of their right leg; but Moses sprinkle the rest of the blood for all the sides of the altar.

25 Then e take the fat, the fat from the tail, all the fat wey be dey ontop the intestines, the fat wey dey ontop the liver, the two kidneys and their fat, and the right leg. 26 E bring out one bread wey no get yeast and wey get ring shape, bread wey get ring shape wey them put oil, and one wafer, from the basket of bread wey no get yeast wey be dey for Jehovah front. Then e put them ontop the animal fat and the right leg. 27 After that one, e put all of them ontop the palms of Aaron hand and the palms of im sons hand, and start to wave them go back and front as offering wey them de wave for front of Jehovah. 28 Then Moses take them from their hand and burn them to make smoke comot from ontop the altar, ontop of the offering wey them de burn. Them be sacrifice wey them de use appoint priest, and e get better smell.* This one na offering wey them make with fire to Jehovah.

29 Then Moses take the breast and wave-am go back and front as offering wey them de wave for front of Jehovah. The breast from the ram wey them de use appoint priest come be Moses share, just as Jehovah don command Moses.

30 And Moses take some of the anointing oil and some of the blood wey be dey ontop the altar and splash-am ontop Aaron and im cloths and ontop im sons and the cloths of im sons wey dey with-am. So e make Aaron and im cloths and im sons and their cloths dey holy.

31 Then Moses tell Aaron and im sons say: “Boil the flesh for the domot of the tent of meeting, and una go chop-am for there with the bread wey dey inside the basket wey them de use when them de appoint priest, just as God don command me say, ‘Aaron and im sons go chop-am.’ 32 The thing wey remain from the bread and the flesh, make una burn-am with fire. 33 Make una no comot from the domot of the tent of meeting for seven days, until the days wey them go appoint una as priests don complete, because e go take seven days to appoint una as priests.* 34 Na Jehovah command say make we do wetin we don do today, to use the sacrifice make una dey clean. 35 Una go stay for the domot of the tent of meeting, day and night for seven days and do everything wey Jehovah don talk, so that una no go die; because na so God don command me.”

36 And Aaron and im sons do all the things wey Jehovah don command through Moses.