The First Book of Chronicles

12 Na this men come meet David for Zik′lag for the time wey e de hard for-am to waka about as e like because of Saul wey be son of Kish, and them dey among the strong soldiers wey help-am for war. 2 Them carry bow, and them fit use right hand and left hand shoot stones with sling* or shoot arrow with bow. Them be Saul brothers, from the tribe of Benjamin. 3 Their leader na A·hi·e′zer, with Jo′ash, and two of them na the sons of She·ma′ah wey be Gib′e·ah person; Je′zi·el and Pel′et the sons of Az′ma·veth, Ber′a·cah, Je′hu wey be An′a·thoth person, 4 Ish·ma′iah wey be Gib′e·on person, im na strong soldier wey dey among the thirty, and na im de control the thirty. Other people wey still dey na: Jeremiah, Ja·ha·zi′el, Jo·ha′nan, Jo′za·bad wey be Ge·de′rah person, 5 E·lu′zai, Jer′i·moth, Be·a·li′ah, Shem·a·ri′ah, Sheph·a·ti′ah wey be Ha′riph person, 6 El·ka′nah, Is·shi′ah, Az′ar·el, Jo·e′zer, and Ja·sho′be·am, them come from the family of Ko′rah; 7 and Jo·e′lah and Zeb·a·di′ah wey be the sons of Je·ro′ham wey come from Ge′dor.

8 Some of the people wey come from the tribe of Gad go join David for the safe place wey dey the wilderness. Them be strong soldiers, soldiers wey them train to fight war, wey stand and ready with big shield and lance* wey dey their hand, their face be like lions, and them de fast like gazelles* wey dey ontop mountains. 9 Na E′zer be the leader, the second one na O·ba·di′ah, the third one na E·li′ab, 10 the fourth one na Mish·man′nah, the fifth one na Jeremiah, 11 the sixth one na At′tai, the seventh one na E′li·el, 12 the eighth one na Jo·ha′nan, the ninth one na El·za′bad, 13 the tenth one na Jeremiah, the eleventh one na Mach′ban·nai. 14 This people come from the tribe of Gad, them be people wey de control the army. The one wey weak pass among them fit fight 100 soldiers, and the one wey strong pass fit fight 1,000 soldiers. 15 Na this men cross River Jordan for the first month, when the river don full sotey e de flow enter land, and them pursue all the people wey de live for the lowlands* comot, to the east side and to west side.

16 Some of the men of Benjamin and Judah still come meet David for the safe place. 17 Then David comot go meet them and tell them say: “If una really come in peace to help me, my heart go dey as one with una. But if una come to put me for the hand of my enemies when I no do any bad thing, make the God of our papa-papa them see-am and judge the matter.” 18 Then the spirit enter A·ma′sai body,* wey be the leader of the thirty and e talk say:

“We be your people, O David, and we dey with you, O son of Jes′se.

So David welcome them and choose them to dey among the people wey de control the soldiers.

19 Some people wey come from the tribe of Ma·nas′seh still join David side when e come with Phi·lisʹti·a people to fight war against Saul; but e no help Phi·lisʹti·a people, because after the lords of Phi·lisʹti·a people don do meeting together, them pursue-am comot. Them talk say: “E go join the side of Saul wey be im lord and we go pay with our heads.” 20 When e go Zik′lag, na this people wey come from the tribe of Ma·nas′seh join im side: Ad′nah, Jo′za·bad, Je·di′a·el, Mi′cha·el, Jo′za·bad, E·li′hu, and Zil′le·thai, na them be the oga of the groups of one-one thousand men for the tribe of Ma·nas′seh. 21 Them help David fight the group of people wey come attack them, because all of them na strong men wey no de fear. Them come dey among the people wey de control the army. 22 Everyday, people de come meet David to help-am, sotey e come be camp wey people plenty like the camp of God.

23 This na the number of the oga of the soldiers wey ready for war, wey come meet David for Heb′ron to make-am replace Saul as king, just as Jehovah command. 24 The men of Judah na 6,800. Them carry big shields and lance* them, and them ready for war. 25 The people wey come from the tribe of Sim′e·on na 7,100 strong soldiers wey no de fear.

26 The people wey come from the tribe of Leʹvi na, 4,600. 27 Na Je·hoi′a·da be the leader of the sons of Aaron, and na 3,700 people dey with-am, 28 and Za′dok, wey be strong young man wey no de fear, with 22 oga them wey come from im papa family group.

29 The people wey come from the tribe of Benjamin, wey be Saul brothers na, 3,000, and the people wey be de support Saul family* before, na them plenty pass among them. 30 The people wey come from the tribe of E′phra·im na, 20,800 strong men wey no de fear, and wey people know well-well among their papa family groups.

31 The people wey come from the half tribe of Ma·nas′seh na 18,000 people wey them don choose according to their names say make them come make David king. 32 The people wey come from the tribe of Is′sa·char, wey be leaders, na 200. Them understand how things de go, and them know wetin Israel people suppose do. Na them de tell all their brothers wetin to do. 33 The people wey come from the tribe of Zeb′u·lun, na 50,000 people wey fit go war, and wey fit arrange theirself to fight war with all the weapons wey them de use fight war. All of them join David and support-am with all their heart.* 34 The people wey come from the tribe of Naph′ta·li, na 1,000 people wey de control army, and 37,000 people dey with them wey de use big shield and spear. 35 The people wey come from the tribe of Dan wey arrange theirself to fight war na 28,600. 36 The people wey come from the tribe of Ash′er, wey fit join army and wey ready for war na 40,000 people.

37 The people wey come from the other side of the Jordan, from the tribe of Reu′ben, the tribe of Gad, and the half tribe of Ma·nas′seh, na 120,000 soldiers wey get all kinds of weapons wey them fit use fight war. 38 All this people na soldiers wey ready to go fight war, them come Heb′ron with all their heart to make David king wey go rule all Israel, and all the other people for Israel still get one mind* to make David king. 39 And them stay there with David for three days, de chop and de drink, because their brothers don arrange things for them. 40 The people wey near them, and even people wey come from far place like the land of Is′sa·char, Zeb′u·lun, and Naph′ta·li, still use donkeys, camels, mules,* and cows carry food come. Them bring flour, cakes wey them make with dry figs* and raisins, wine, oil, and cow and sheep wey plenty well-well, because the people de happy no be small for Israel.