The First of Kings
14 That time, A·bi′jah wey be the son of Jer·o·bo′am come de sick. 2 So Jer·o·bo′am tell im wife say: “Abeg, get up, do make people no know say you be my wife, and make you go Shi′loh. See! A·hi′jah wey be prophet dey there. Na im talk say I go be king wey go rule this people. 3 Carry ten loaves of bread, cakes, and container of honey, and make you go meet-am. E go tell you wetin go happen to the boy.”
4 Jer·o·bo′am wife do wetin e talk. E get up go Shi′loh and reach the house of A·hi′jah. A·hi′jah eyes just de look straight and e no de see because e don old.
5 But Jehovah be don tell A·hi′jah say: “See the wife of Jer·o·bo′am de come meet you to ask you about im son wey de sick. I go tell you wetin you go tell-am.* When e go come, e go do make you no know say na im.”
6 As A·hi′jah just hear the sound of the woman leg as e de pass the door enter, A·hi′jah talk say: “Jer·o·bo′am wife, come inside. Why you de do make them no know say na you? God don send me make I tell you one strong message. 7 Go tell Jer·o·bo′am say, ‘This na wetin Jehovah the God of Israel talk: “I raise you from among your people, so that I go make you leader wey go rule my people Israel. 8 Then I comot the kingdom from the family* of David and give-am to you. But you no be like my servant David wey obey my commandments and wey serve me with all im heart, and na only wetin correct for my eye e do. 9 But you don do bad pass all the people wey dey before you, and you make another god and different-different image wey them make with metal* for yourself to make me vex, and na me you reject. 10 Because of this one, I go bring big problem for Jer·o·bo′am family, and I go kill every man* wey come from Jer·o·bo′am family, even the ones for Israel wey no fit help theirself and wey dey weak, and I go sweep Jer·o·bo′am family comot, just the way person de sweep animal shit until e don sweep everything comot! 11 Anybody wey come from Jer·o·bo′am family wey die for city, dogs go chop-am, and anybody wey die for bush, birds wey de fly for up go chop-am, because Jehovah don talk-am.”’
12 “Now make you stand up go your house. When you just de reach the city, the pikin go die. 13 All Israel people go mourn-am and bury-am, and for Jer·o·bo′am family, na only-am them go bury for inside grave, because na im be the only person for Jer·o·bo′am family wey Jehovah the God of Israel don see better thing for im body. 14 Jehovah go choose king for imself wey go rule Israel, and wey go destroy Jer·o·bo′am family* when the time reach. Yes, the time don already reach. 15 Jehovah go destroy Israel people and them go be like tall grass for inside water wey breeze de blow up and down, and e go uproot Israel people from the good land wey e give their papa-papa them, and e go scatter them go far, even pass the River,* because them don make idol poles,* and this one de make Jehovah vex. 16 And e go abandon Israel people because of all the sin wey Jer·o·bo′am don sin, and wey e don make Israel people sin.”
17 Na so Jer·o·bo′am wife stand up and comot de go until e reach Tir′zah. As e just reach the domot of the house, the boy die. 18 So them bury-am and all Israel people mourn-am just as Jehovah don use im servant prophet A·hi′jah talk.
19 And the other story about Jer·o·bo′am, how e fight war and how e rule, them write-am for the book wey talk about the things wey happen for the time of Israel kings. 20 Na 22 years Jer·o·bo′am rule, and after this one, e die like im papa-papa them, and im son Na′dab start to rule as king after-am.
21 As this one de happen, Re·ho·bo′am wey be Sol′o·mon son don be king for Judah. Re·ho·bo′am dey 41 years when e start to rule as king, and e rule for 17 years for Jerusalem, the city wey Jehovah don choose out of all the tribes for Israel as the place wey e go put im name. The name of Re·ho·bo′am mama na Na′a·mah wey be Am′mon person. 22 And Judah people de do wetin bad for Jehovah eyes, and their sin come even make-am vex pass the ones wey their papa-papa them do. 23 Them too continue to build high place* them for theirself, plus idol pillars and idol poles.* Them build them ontop every high hill and under every big fine tree. 24 Men wey be temple prostitutes be dey the land too. Judah people do all the serious bad things wey the nations wey Jehovah don pursue comot for Israel people, be de do.
25 For the fifth year of King Re·ho·bo′am, King Shi′shak of Egypt come fight against Jerusalem. 26 E take the better-better things wey dey Jehovah house, and the better-better things wey dey the king house.* E take everything, even all the gold shields wey Sol′o·mon make. 27 So King Re·ho·bo′am make copper shields to replace them, and e put them for the hand of the people wey de control the guards* wey de protect the place wey them take de enter the king house. 28 Anytime wey the king come the house of Jehovah, the guards go carry the shields, after, them go carry them go back to the house of the guards.
29 And the other story about Re·ho·bo′am, everything wey e do, them no write-am for the book wey talk about the things wey happen for the time of Judah kings? 30 Na everytime Re·ho·bo′am and Jer·o·bo′am de fight war. 31 Then Re·ho·bo′am die like im papa-papa them, and them bury-am with im papa-papa them for the City of David. The name of im mama na Na′a·mah wey be Am′mon person, and im son A·bi′jam* start to rule as king after-am.