The Second of Kings
21 Ma·nas′seh dey 12 years when e start to rule as king, and e rule for Jerusalem for 55 years. Im mama name na Heph′zi·bah. 2 E do wetin bad for Jehovah eyes, just like the serious bad things wey the nations wey Jehovah don pursue comot from Israel people front be de do. 3 The high place* them wey im papa Hez·e·ki′ah be don destroy, e build them back, and e build altars for Ba′al and make idol pole,* just like A′hab the king of Israel be do. And e bow down to all the stars for the heavens* and worship them. 4 E still build altars for Jehovah house, the place wey Jehovah be don talk about say: “Na for Jerusalem I go put my name.” 5 And e build altars to all the stars for the heavens* for two compounds wey dey Jehovah house. 6 And e burn im own son for fire as sacrifice;* e do magic, e look for signs to know wetin go happen for future, and e choose people wey go de talk with spirits, and wey go de talk wetin go happen for future. E do wetin bad well-well for Jehovah eyes to make-am vex.
7 E put the image of the idol pole wey e carve for inside the house wey Jehovah be don tell David and im son Sol′o·mon about say: “Na for this house and for Jerusalem, wey I don choose out of all the tribes for Israel, I go put my name forever. 8 And I no go ever again make Israel people leg comot from the land wey I give their papa-papa them, as long as them sofri obey everything wey I command them, the whole Law wey my servant Moses command them say make them follow.” 9 But them no obey, and Ma·nas′seh continue to deceive them, de make them de do wicked things pass the nations wey Jehovah be don destroy and remove for Israel people.
10 Jehovah continue to use im servants the prophets, de talk say: 11 “Ma·nas′seh wey be king of Judah don do all this serious bad things; e don do wicked things pass all the Am′or·ite people wey dey before-am, and e don use im rubbish idols* make Judah people sin. 12 So this na wetin Jehovah the God of Israel talk: ‘See I de bring big problem for Jerusalem and Judah, the kind one wey be say e go shock the two ears of anybody wey hear about-am. 13 And I go use the measuring rope wey I use for Sa·mar′i·a measure Jerusalem, and use the leveling tool* wey I use for the house of A′hab for-am, and I go wash Jerusalem make e clean just as person de wash bowl make e clean. I go wash-am and turn-am upside down. 14 I go forget my property wey remain and I go put them for the hand of their enemies, and all their enemies go suffer them and collect the things wey them get, 15 because them do wetin bad for my eyes, and them don continue to make me vex from the day wey their papa-papa them come out of Egypt till today’”.
16 Ma·nas′seh still kill plenty-plenty innocent people sotey their blood come full Jerusalem from one side go reach the other side. Apart from the sin wey e don make Judah people sin as them de do wetin bad for Jehovah eyes. 17 As for the other story about Ma·nas′seh, and everything wey e do, and the sins wey e commit, them no write-am for the book wey talk about the things wey happen for the time of Judah kings? 18 Then Ma·nas′seh die like im papa-papa them and them bury-am for the garden wey dey im house, for Uz′za garden; and im son A′mon start to rule as king after-am.
19 A′mon dey 22 years when e start to rule as king, and e rule for Jerusalem for two years. Im mama name na Me·shul′le·meth wey be the daughter of Ha′ruz wey come from Jot′bah. 20 E continue to do wetin bad for Jehovah eyes, just as im papa Ma·nas′seh be don do. 21 E continue to do all the things wey im papa do and e continue to worship and bow down to the rubbish idols wey im papa be worship. 22 So e leave Jehovah the God of im papa-papa them, and e no follow the things wey Jehovah talk. 23 At last, A′mon servants plan against-am and kill the king for im own house. 24 But the people for the land kill all the people wey plan against King A′mon and them make im son Jo·si′ah king after-am. 25 As for the other story about A′mon, wetin e do, them no write-am for the book wey talk about the things wey happen for the time of Judah kings? 26 So them bury-am for im grave, for Uz′za garden, and im son Jo·si′ah come start to rule as king after-am.