“The Brothers Encourage Paul and E Thank God”

When the congregation for Rome hear say Paul de come, they send some brothers go meet Paul for road. E reach about 40 miles (64 km) wey they travel before they meet Paul. How this love wey they show affect Paul? As e see them, this one really encourage him and e thank God. (Ac 28:15) Even though they know Paul as person wey de encourage brothers, for this particular time, na the brothers encourage Paul because e na prisoner.—2Co 13:10.

Today, circuit overseers de visit different-different congregation so that they go encourage the brothers and sisters. Just like us, sometimes them de tire, things fit worry them, and they fit no happy for their work. How you fit encourage circuit overseer and e wife the next time wey they visit wuna congregation? This one go make wuna encourage each other.—Ro 1:11, 12.

• 

  No miss meeting for field service. When publishers adjust their time so that they fit support the circuit week, e de encourage circuit overseer. (1Th 1:2, 3; 2:20) You go fit do auxiliary pioneer for the month of circuit overseer visit? You fit work with circuit overseer or e wife for preaching, or take one of them go study your Bible student? Circuit overseer and e wife like to work with different-different publisher, even if na new publisher, or publisher wey e feel say e no know how to preach.

• 

  Show say you love them. You fit give them room wey they go sleep as they visit your congregation. You fit still cook for them. This one go make the circuit overseer and e wife know say you love them. They no de expect plenty things or big-big things from you.​—Lu 10:38-42.

• 

  Follow the advice of the circuit overseer. Circuit overseer de help us know how we fit make the way we de worship Jehovah fine pass before. Sometimes, e go need to give strong correction. (1Co 5:1-5) We de make e heart glad when we do thing wey e talk.​—Heb 13:17.

• 

  Thank them. Make the circuit overseer and e wife know say you really enjoy their visit. You fit tell them by yourself, write letter give them, or give them greeting card.​—Col 3:15.