You Know?
Wetin priests de do with the blood of animals wey them sacrifice for temple for Jerusalem?
EVERY year, the priests for Israel de sacrifice plenty animals for the altar of the temple. Josephus na one man wey de talk about the history of Israel people. E talk say for Passover, e pass 250,000 sheep wey priests de kill as sacrifice, and because of this one, plenty blood de flow for the altar. (Lev. 1:10, 11; Num. 28:16, 19) Wetin de happen to all the blood?
People wey de dig ground to know wetin happen for past don dig the area around the temple wey Herod build. Na this temple Israel people de use for sacrifice when Jesus dey this earth. For the area wey them dig, them see one place wey the blood de pass comot from the temple.
Make we talk about two things wey them see around the altar:
Holes dey under the altar: One old book wey de talk about the laws and traditions of Jew people, wey them write after year 200, talk about wetin them do to de comot water and blood from the altar. E talk say two holes dey for one corner of the altar, and the water wey them use wash the altar and the blood of the animals wey them sacrifice, de pass the holes go Kidron valley.
People wey de study things wey them dig comot from ground to know wetin don happen for past agree with wetin that old book talk. One book wey the name na The Cambridge History of Judaism explain say people wey de study things wey them dig comot from ground see some things near the temple wey fit be wetin de carry water and blood comot from the altar.
Plenty water dey for there: The priest need plenty water to make sure say the altar and the holes dey clean. To fit do this one, the priests de get the water wey them need from the city. Them dig some place and build some things to carry water from the city go the temple. And them de keep the water for pool and other things. One man wey de dig ground to know history of wetin happen for past wey im name na Joseph Patrich talk say: “E no get any other temple that time, wey get this kind better way wey them de take make water flow go temple and comot dirty water.”