Jehovah Witness People Don Change Wetin Dey Bible to Agree With Wetin Them Believe?
No, we no change-am. Instead, we de change wetin we believe when we see say e no agree with wetin Bible talk.
Long time before we start to produce the New World Translation of the Holy Scriptures for 1950, we first study the Bible. Na the translation wey dey that time we use form our belief. Make we see some example of some of the things wey Jehovah Witness people don believe for long time and check for yourself whether e really match with wetin dey Bible.
Wetin we believe: God no be Trinity. July 1882 Zion Watch Tower talk say: ‘People wey de read our publication know say we believe say Jehovah, Jesus, and the holy Spirit dey, but we no believe say them be three God inside one person or, as some people talk-am, one God inside three person’
See wetin Bible talk: ‘Jehovah our God na one Jehovah.’ (Deuteronomy 6:4, The Holy Bible, wey Robert Young write) ‘Na only one God dey, wey be the Father, wey everything come from, and na one Lord dey, Jesus Christ, wey God use create everything.’ (1 Corinthians 8:6, American Bible Union Version) Jesus talk by imself say: ‘The Papa big pass me.’—John 14:28, Douay-Rheims Version.
Wetin we believe: Hell fire wey them go punish people forever no dey. The title of June 1882 Zion Watch Tower na “The Wages of Sin Is Death,” and them carry-am from Romans 6:23 from King James Version. The magazine talk say: ‘Wetin the verse talk dey clear and simple. So e de surprise us say many people wey de claim say them believe say the Bible na the Word of God de talk wetin dey against this verse. Instead of them to accept say the result of sin na death, this people believe and teach say the result of sin na say the person go suffer forever for hell fire.’
See wetin Bible talk: ‘The soul wey sin go die.’ (Ezekiel 18:4, 20, King James Version) The final punishment for people wey dey against God no be everlasting suffer for hell fire, but na ‘destruction forever.’—2 Thessalonians 1:9, King James Version.
Wetin we believe: God Kingdom na real government, no be just the condition of the heart. December 1881 Zion Watch Tower talk say: ‘When God go start this kingdom, e go comot all the kingdoms wey dey this earth.’
See wetin Bible talk: ‘For the time wey those kings de rule, the God for heaven go start im kingdom, wey nothing go fit destroy: and them no go pass the kingdom give other people, but e go destroy other governments wey de rule, and na only-am go stand forever.’—Daniel 2:44, King James Version.
Na Only New World Translation Bible Jehovah Witness people De Use Explain Wetin Them Believe?
No, we de use many Bible translations for our preaching work. In fact, even as we de give the New World Translation for free as part of our free Bible study program, we still de happy to study with people wey like to use other translations.