How to Help Your Pikin Make E Result De Better

E be like your pikin no like school, e no de read e book and e no de do e homework. So wetin go happen? E result for school and behavior de bad more-more. How you fit help your pikin make e result de better?

• Wetin you need to know

• Wetin you fit do

Wetin you need to know

If you de force pikin, the problem go worse. If you de force pikin to do things, this one fit make the pikin de fear for school and for house! To remove this fear, the pikin fit lie, hide e report card, fake signature of e mama or papa for e report card, or e no go even go school. This one go only make the problem worse.

Sometimes to promise pikin something if e get good result fit no help. One papa wey e name na Andrew talk say: “We de give something to our daughter when e get good result so that e go do better, but this one de make the pikin to focus only for the thing wey we want give her. When e no get good result, e go de feel bad because e know say e no go get something, instead of to feel bad say e no get good result.”

E no go help your pikin if you de blame the teachers. This one fit make your pikin de think say to get good result, e no need to do anything. E fit make the pikin start to blame other people for the mistakes wey e de make and de expect say other people go solve e problems. This one fit make your pikin no learn important thing wey e fit use-am for e life when e don grow​—wey na to accept say e don make mistake.

Wetin you fit do

Control how you de feel. If you de vex, no talk about school result with your pikin that time. One papa wey e name na Brett talk say, “Me and my wife don really help our pikin when we dey calm and de try to understand and feel for our pikin.”

Try know wetin be the real problem. Some things de make pikin them no de get good results. This things fit be trouble from school mates, fear for exams, family problems, the pikin no de sleep well, e no get study time table, or e no de put mind for wetin teacher de teach or wetin e de read. No just de feel say your pikin lazy.

Arrange good place for your pikin to study. Make time table for your pikin to do homework and read. Arrange place wey your pikin go de do homework and make things like television and phones no dey for this place. No talk say your pikin go do plenty homework for one time, make e do-am small-small, plenty times. This one go help the pikin understand wetin e de learn. One papa from Germany wey e name na Hector talk say, “If my pikin get test, we go start to read small-small every day, we no go wait until the day come reach before we read with our pikin.”

Encourage your pikin make e de learn. When you help your pikin to understand the gain wey e de get now as e de go school, e go like to learn. For example, maths go help the pikin know how e fit use e money.

Something wey you fit do: Help your pikin with e homework, but no do-am for your pikin. One papa wey e name na Andrew talk say, “Our daughter just trust say we go find answers for e homework and e no de even try to find the answers by e self.” Teach your pikin how e fit do e own homework by e self.