Wetin Fit Make Your Family Happy?

1. Why marriage de make family happy?

Na Jehovah give us the good news. Jehovah na happy God and e want make every family dey happy. (1 Timothy 1:11) Na God start marriage. Marriage wey they register as law want-am de make family happy because e go help papa and mama work together to train their pikin well. Make all Christians de respect the law about marriage for their country.​—Read Luke 2:1, 4, 5.

How God want make marriage be? E want make husband and wife no leave each other. Jehovah no want make husband sleep with woman wey no be e wife, and e no want make wife sleep with man wey no be e husband. (Hebrews 13:4) E no want make marriage scatter. (Malachi 2:16) But Bible still show say Christians fit end their marriage (divorce), and marry again if one of them sleep with another person.​—Read Matthew 19:3-6, 9.

2. How husband and wife go treat each other?

Jehovah make man and woman so that they go de support theirself for marriage. (Genesis 2:18) As husband be the head of the family, e must de give e family wetin they need and de teach them about God. E must do everything wey e fit do to love e wife. Husband and wife must love and respect theirself. Since all husband and wife de make mistake, if they try to de forgive, their family go really dey happy.​—Read Ephesians 4:31, 32; 5:22-25, 33; 1 Peter 3:7.

3. If your marriage no de sweet you again, you go run comot?

If husband and wife get problem for their marriage, make they do everything wey they fit do so that love go still dey for their marriage. (1 Corinthians 13:4, 5) Bible no talk say make husband and wife separate if problem dey their marriage.​—Read 1 Corinthians 7:10-13.

4. If you be pikin, wetin God want for you?

Jehovah want make you dey happy. E de give the best advice to help you enjoy life. E want make you gain from the good example wey your papa and mama de show you. (Colossians 3:20) As you de work for Jehovah and Jesus, you go de happy and na wetin Jehovah want.​—Read Ecclesiastes 11:9–12:1; Matthew 19:13-15; 21:15, 16.

5. Wetin papa and mama fit do to make their pikin happy?

Make papa and mama work hard so that they go fit give their pikin food, cloth and house to sleep. (1 Timothy 5:8) If papa and mama want make their pikin de happy, make they teach the pikin to love and learn about God. (Ephesians 6:4) If papa and mama really love God, their pikin go follow their example. If them de use Bible teach their pikin, e go help the pikin be better person.​—Read Deuteronomy 6:4-7; Proverbs 22:6.

E good to praise and encourage pikin them because e de help them. E still good make papa and mama de correct their pikin. This one go help them de behave well, and e go make them happy. (Proverbs 22:15) But, when papa and mama de correct their pikin, make them no do-am with vex.​—Read Colossians 3:21.

Jehovah Witness them get some special books for papa and mama. They even get the one wey fit help pikin them. Na wetin Bible talk dey for this books.​—Read Psalm 19:7, 11.