Choose to Worship God for the Correct Way

1, 2. E good make you ask yourself which question? And why e dey important?

AS YOU de study Bible, you don learn say many people de teach and do the things wey God hate. This people de claim say them de serve God. (2 Corinthians 6:17) That na the reason why Jehovah talk say make we comot from lie-lie religion, or “Babylon the Great.” (Revelation 18:2, 4) Wetin you go do? We need to choose, and e good make we ask ourself say, ‘I want worship God for the way e want? Or I want continue for the way I de do before?’

² If you don already comot for lie-lie religion, na the right thing be that. But e fit be say, inside your heart, some things dey wey you still like about lie-lie religion. Make we talk about some of the things wey lie-lie religion de do and why e dey important make we de see-am as Jehovah de see-am.

TO WORSHIP IDOL AND DEAD PEOPLE

3. (a) Why e fit hard some people to worship God if they no get idol? (b) Wetin Bible talk about this matter?

³ Some people get different-different idol or shrine for their house. Them de use-am worship God. If na so e be for you, e fit de worry you or even hard you to serve God without this things. But remember say Bible don teach us the correct way to worship God. And e talk-am clear say Jehovah no want make we de use idol for our worship.​—Read Exodus 20:4, 5; Psalm 115:4-8; Isaiah 42:8; 1 John 5:21.

4. (a) Why e no good make we de worship people wey they don die for our family? (b) Why Jehovah tell the Israelites make they no talk with dead people?

⁴ Some people de spend plenty time, money and them de do different things for people wey they don die for their family. They talk say they want make them happy. They fit even worship them. But we don learn say when person die, e no fit help us or do any bad thing to us. They no de live for another place. True, if we de try talk with dead person, we de put our life for danger. E go be like say na the person de talk, but na demons really de talk. Na the reason why Jehovah tell the Israelites make they no talk with dead people, or put their hand for anything wey e concern demon.​—Deuteronomy 18:10-12; check Endnote 26 and 31.

5. If you want stop to de use idol worship God, or stop to de worship people wey they don die for your family, wetin fit help you?

⁵ If you want stop to de use idol worship God, or stop to de worship people wey they don die for your family, wetin fit help you? E good make you de read Bible and think deep about how Jehovah feel about this things. Jehovah really hate-am. (Deuteronomy 27:15) If you want de worship God for the correct way and de see things the way God de see-am, de pray every day. Tell Jehovah make e help you. (Isaiah 55:9) Make you dey sure say Jehovah go give you power and you go fit remove anything wey e concern lie-lie religion from your life.

E GOOD MAKE WE DE CELEBRATE CHRISTMAS?

6. Why they choose December 25 to celebrate the birthday of Jesus?

⁶ Plenty people for the whole world de celebrate Christmas. They think say na that day they born Jesus. But na lie-lie religion Christmas come from. One book talk say for December 25, pagan people for Rome de celebrate the birthday of the sun. As leaders for church be want make plenty people change to Christians, they come decide say they go de celebrate the birthday of Jesus for December 25, even though say no be that day they born Jesus. (Luke 2:8-12) The disciples of Jesus no celebrate Christmas. One book wey they call-am Sacred Origins of Profound Things talk say 200 years after they born Jesus, “nobody know, and they no even care about the day wey they born Jesus.” After Jesus go back to heaven, plenty years pass before people start de celebrate Christmas.

7. Why correct Christian no de celebrate Christmas?

⁷ For Christmas time, people de do party and de share gift. Plenty people know say na pagan start Christmas and the things wey them de do for Christmas time. For example, for England and some place for America, e get one time wey they no gree make people celebrate Christmas because na pagan people start-am. If anybody celebrate-am, they go punish the person. But later, people start de celebrate Christmas again. Why correct Christian no de celebrate Christmas? Because they want make Jehovah happy with everything wey them de do.

E GOOD MAKE WE CELEBRATE BIRTHDAY?

8, 9. Why the first-first Christians no do birthday?

⁸ Another thing wey plenty people de celebrate na their birthday. E good make Christian de celebrate birthday? Na only two people do birthday for Bible, and the two of them no worship Jehovah. (Genesis 40:20; Mark 6:21) That time, people de celebrate birthday to worship their fake god. The World Book Encyclopedia talk say the first-first Christians no do birthday because they “see say birthday na thing wey pagan people de do.”

⁹ Rome and Greek people for olden days believe say every day get e own god. They think say for any day wey they born person, na the god of that day go de protect the person. And say if the person want protection from the god, e must de celebrate e birthday.

10. Why Christians no de celebrate birthday?

¹⁰ You think say Jehovah go like-am if we de celebrate something wey e come from lie-lie religion? (Isaiah 65:11, 12) No, e no go like-am. This na the reason why we no de celebrate birthday or any other thing wey e come from lie-lie religion.

E REALLY MEAN ANYTHING?

11. Why some people de celebrate birthday? Wetin dey important pass for you?

¹¹ Some people know say Christmas and other things wey people de celebrate come from lie-lie religion, but they still continue de celebrate-am. They feel say this kind time na correct time to spend with their family. Na so you feel too? E no bad say we want spend time with our family. Na Jehovah make family and e want make we dey together with them. (Ephesians 3:14, 15) But, na our friendship with Jehovah dey important pass, so we no go do anything wey Jehovah no like because we want make people for our family dey happy. Na this one make apostle Paul talk say: “Make wuna continue to de make sure say wetin wuna de do na wetin the Lord want.”​—Ephesians 5:10.

12. Why Jehovah no like some things wey people de celebrate?

¹² Many people feel say how the thing wey them de celebrate start no concern them. But no be so Jehovah de feel. Jehovah no like-am make we de celebrate something wey e come from lie-lie religion or something wey e de make people or country feel say na them better pass. For example, people for Egypt de celebrate different things for their gods. After the Israelites comot for Egypt, they copy one of the things wey the people for Egypt de celebrate and they talk say na “festival for Jehovah.” But Jehovah punish them. (Exodus 32:2-10) Prophet Isaiah tell us for Bible say make we “no touch anything wey e no clean!”​—Read Isaiah 52:11.

DE TALK AND DO THINGS FOR FINE WAY

13. When you stop to de celebrate things wey Jehovah no like, which kind questions you fit de ask?

¹³ When you stop de celebrate things wey Jehovah no like, you fit de ask plenty questions like: Wetin I go do if people for my workplace ask me why I no de celebrate Christmas with them? Wetin I go do if person give me Christmas gift? Wetin I go do if my husband or my wife want make I celebrate this things? How I fit help my children make they no feel bad say they no de celebrate things like birthday?

14, 15. Wetin you go do if person greet you “Happy Christmas” or “Happy New Year” or them give you gift?

¹⁴ E good make you de use sense when you want choose the thing wey you go talk or do for this kind matter. For example, if person greet you say “Happy Christmas” or “Happy New Year,” make you no pretend like say you no hear. You fit just talk say, “Thank you.” But if the person want know more, you fit explain why you no de join them celebrate. E good make you de talk-am for fine way, de use sense, and de show respect. Bible talk say: “Make wuna talk de sweet all the time, make e get salt. So that wuna go know how to answer any person.” (Colossians 4:6) You fit explain say you like to de enjoy with other people and give them gifts but you don choose say you no go do-am for the time wey people de celebrate things like Christmas.

¹⁵ Wetin you go do if person give you gift? Bible no give us law about this one, but e talk say make we get good conscience. (1 Timothy 1:18, 19) E fit be say the person no know say you no de join them celebrate. Or the person fit even talk say, “I know say you no de join us celebrate, but I still want give you this gift.” When the matter be like this, you fit choose whether you go collect the gift or you no go collect-am. But no matter wetin you choose, no do something wey e go worry your conscience. Make we no do anything wey e go spoil our friendship with Jehovah.

YOU AND YOUR FAMILY

16. Wetin you go do if your family want make you join them celebrate things like Christmas?

¹⁶ Wetin you go do if your family want make you join them celebrate things like Christmas? Make you no quarrel with them. Remember say they get right to choose anything wey they want. Talk for fine way and respect wetin they don choose, just as you want make they respect wetin you don choose. (Read Matthew 7:12.) But wetin you go do if your family want make you spend time with them when them de celebrate things like Christmas? Before you decide wetin you go do, pray make Jehovah help you choose the correct thing. Think about the matter, and check the things wey Bible and other books don talk. Remember say to make Jehovah glad na the thing wey e dey important pass.

17. Wetin you fit do to help your children make they no feel say them de miss the things wey people de celebrate?

¹⁷ Wetin you fit do so that e no go pain your children say they no de do things like Christmas or birthday? Sometimes, you fit arrange things wey your children go enjoy. You fit even surprise them with gift. And one of the best gift wey you fit give your children na to spend time with them and show say you love them.

WORSHIP GOD THE WAY E WANT

18. Why e good make we de go Christian meeting?

¹⁸ If we want make Jehovah happy, we go leave lie-lie religion, and all the different things wey them de do or celebrate. We need to de worship God the way e want. How? One way na when we de go Christian meeting every time. (Read Hebrews 10:24, 25.) Meeting really dey important if we want serve Jehovah for the correct way. (Psalm 22:22; 122:1) When we de come meeting, we go fit de help each other get strong faith.​—Romans 1:12.

19. Why e dey important make you tell other people the things wey you don learn?

¹⁹ Another way to worship God for the way e want na to de tell other people the things wey you don learn from Bible. Plenty people no dey happy because of the wicked things wey de happen for this world. You fit even know some people wey de feel like that. Tell them about the fine-fine things wey we go enjoy for Paradise. As you de go meeting and de tell people about the truth for Bible, you go see say your heart go de comot from lie-lie religion and you no go want de do the things wey them de do. If you choose to worship Jehovah for the correct way, e go bless you and you go dey happy.​—Malachi 3:10.