WHEN YOU DE START DISCUSSION
LESSON 4
De Carry Body Down
Advice: “Make una de carry body down and de see other people as people wey better pass una.”—Phil. 2:3.
The Thing Wey Paul Do
1. Watch the VIDEO, or read Acts 26:2, 3. Then think about this questions:
How Paul show say e de carry body down for the way e talk to King Agrippa?
How Paul make people think about Jehovah and Bible instead of imself?—Check Acts 26:22.
Wetin We Learn From Paul?
2. People go like our message more when the way we de talk de show say we carry body down and we get respect.
Copy Paul
3. No de show say you better pass other people. No make the person wey you de talk to feel say you know everything and say e no know anything. Show respect for the way you de talk to the person.
4. Make-am dey clear say the truth wey you de teach people na from Bible. The message for Bible de touch people for heart. When we use Bible de talk to them, we de make their faith de strong like house wey person build ontop correct foundation.
5. Always dey gentle. No de try to show say you dey correct. We no want argue. When you dey gentle and you know when to leave the person, you de show say you de carry body down. (Prov. 17:14; Titus 3:2) If you dey gentle for the way you de answer the person, this one fit make-am listen to our message another time.