Special Campaign to Help Us Start More Bible Study for September

For the month of September, we go do our best to use Enjoy Life Now and Forever! brochure start Bible study for every house. Publishers fit choose to do auxiliary pioneer for September and report 30 hours. How we go do this special campaign?

• The First Time: Use the question wey dey back of the brochure start the discussion so that the person go like our message, and try show-am how we de study Bible with people. No forget people wey don first show say they like our message, and people wey be your return visit. Even if they no gree study Bible before, they fit like the new way wey we de use study Bible with people and our new brochure. No leave the brochure for house wey you no meet anybody and no put-am for letter send to person wey never show say e go like study Bible with us. The Congregation Service Committee fit arrange for extra days wey the congregation go go field service for the month of September.

• Other Ways Wey We Fit Use Start Bible Study: If wuna congregation de use literature cart, make wuna put the Enjoy Life Now and Forever! brochure for the cart make people de see-am. Tell anybody wey collect the brochure say we go like use the brochure study Bible with-am for free. You fit still show the person at once how we de use the brochure study with people, or arrange to show-am later. Service overseer fit arrange make some publishers go business area for the campaign and try start Bible study with people for there. Make e choose publishers wey go really fit do-am well. You fit still try to use the brochure start Bible study with people for your workplace or people wey you preach to for any other place or any other time.

Jesus command us say make we “go make disciples,” and “teach them.” (Mt 28:​19, 20) We pray say make this special campaign help us fit use this Enjoy Life Now and Forever! brochure do wetin Jesus command us.