Young People—Continue to Grow as Christian After Wuna Baptize

1. Which better things plenty young people don do?

EVERY year, plenty young brothers and sisters de baptize. You don baptize? If you don baptize, your brothers and sisters for congregation really happy for you and Jehovah de happy too! (Prov. 27:11) Take small time think about the good things wey you don do. For example, you don take time study Bible for many years. Wetin you study don make you believe say Bible na really the Word of God. But the one wey sweet pass be say, you don come know and love Jehovah wey give us Bible. Your love for Jehovah don grow sotey you decide to give-am your life and baptize. This na really better decision!

2. Wetin we go talk about for this article?

² Before you baptize, you don face many problem wey make-am hard for you to hold Jehovah tight. But as you de grow, you go face new things wey fit test your faith. Satan go try to make your love for Jehovah weak and go want make you stop to serve Jehovah. (Eph. 4:14) Make you no ever allow-am happen. Wetin fit make you hold Jehovah tight and do wetin you promise-am before you baptize? You must continue to work hard till you mature as Christian. (Heb. 6:1) But how you fit do that one?

WETIN YOU FIT DO TO GROW AS MATURE CHRISTIAN?

3. Wetin all Christians need to do after they don baptize?

³ After we don baptize, all of us need to follow the advice wey apostle Paul give Christians for Ephesus. E encourage them make they continue to grow and mature as Christians. (Eph. 4:13) This one mean say e de tell them say make they ‘continue to make progress.’ So Paul talk say the way we de grow as Christians just be like the way pikin de grow. When papa and mama just born pikin, them de really happy. But the pikin no go be pikin forever. As time de go, e must stop to behave “like small pikin.” (1 Cor. 13:11) Na so e just be for Christians. After we baptize, we must continue to grow as Christians. Now, make we see some things wey fit help us do that one.

4. Wetin fit help you to continue to grow as Christian? Explain. (Philippians 1:9)

⁴ Do wetin go make your love for Jehovah grow. Na true say you really love Jehovah, but you fit make your love for Jehovah strong pass as e dey now. How you fit do-am? Apostle Paul talk one way for Philippians 1:9. (Read-am.) Paul pray say make the love wey the Christians for Philippi get de grow more-more. We fit make our love for Jehovah grow, if we continue to learn the truth from Bible and really understand-am. The more we know Jehovah, the more our love for Jehovah go grow. This one go make us value the fine-fine character wey e get, and the way e de do things. We go still like to do things wey go make-am happy, and we no go ever want do anything wey e no like. We go do our best to do wetin e want make we do and still know how e want make we do-am.

5-6. Explain how we fit make our love for Jehovah grow.

⁵ Jesus really copy the fine-fine character wey Jehovah get. So the more we know Jesus the more our love for Jehovah go grow. (Heb. 1:3) The best way to know Jesus na to study the Bible book of Matthew, Mark, Luke, and John. If you never de read Bible everyday, make you start now. You fit start with this Bible book them. As you de read about Jesus from this Bible book them, take time think about the fine-fine character wey e get. People like to come near Jesus. E love small children and like to de carry them. (Mark 10:13-16) Jesus disciples dey free for where e dey and they no de fear to talk their mind. (Matt. 16:22) This one show say Jesus copy e Papa example. Jehovah want make people come near-am. We fit pray to Jehovah and tell-am everything wey dey our mind and we dey sure say e no go judge us. E really love us and e really care about us.—1 Pet. 5:7.

⁶ Jesus de feel for people. Matthew write for Bible say: “As e see the crowd, e pity for them because they be like sheep wey they don peel their skin, sheep wey de waka about and wey no get shepherd.” (Matt. 9:36) How Jehovah de feel about people? Jesus talk say: “My Father for heaven no go like-am make even one of this small ones die.” (Matt. 18:14) Wetin Jesus talk make us happy because e show say Jehovah really love us. As we de know Jesus more-more, the love wey we get for Jehovah go de grow.

7. How you go gain when you spend time with brothers and sisters wey de do well for congregation?

⁷ You fit learn to de show love more-more and to grow as Christian when you de spend time with brothers and sisters for your congregation. If you spend time with them, you go see say them de really happy. They no de regret-am at all say they choose to serve Jehovah. Ask them wetin them de enjoy as them de serve Jehovah. When you want make serious decision, you fit meet them for advice. Remember say, “when many people give advice, e de bring good result.”—Prov. 11:14.

8. Wetin you go do if you ever get doubt about wetin Bible talk?

⁸ Clear the doubt wey dey your mind. As we talk for paragraph 2, Satan go try to stop you make you no get strong faith for Jehovah and near-am. One way e fit do this one be say, e fit make you start to doubt whether some of the things wey you learn for Bible na true. For example, some people go try to make you believe say no be God make things, but say they come by theirself. When you dey small, you fit never think about-am. But now wey you don grow, they don de teach you about-am for school. And this one fit make sense to you. The truth be say, people wey de teach this things fit never really check if God dey wey make everything. Remember wetin dey Proverbs 18:17, e say: “Na the first person to report matter de be like say e correct until the other person come ask question to know the true story.” No just believe everything wey them de teach you for school. Instead, make you take time check wetin Bible talk. You fit use our book do research. You fit talk to brothers and sisters wey believe before say God no dey. Ask them why they believe now say God dey and say e really love us. This kind talk fit help you see say God really dey wey make everything.

9. Wetin Melissa story teach us?

⁹ One sister wey e name na Melissa do research about whether God dey wey make everything and this one help-am clear the doubt wey e get for mind.b E say: “For school when them de teach say things come by theirself, e go just be like say na true. Before I be no really want do research, because I de fear say e go make me believe say no be God make things. I remember say Jehovah want make we get better reason for the things wey we believe about-am. So I start to do research. I read the book wey e name na Is There a Creator Who Cares About You? and the brochure wey e name na Was Life Created? and The Origin of Life—Five Questions Worth Asking. Na wetin I really need be this. I wish say I quick do-am.”

10-11. Wetin go help you fit run from sex wey Jehovah hate? (1 Thessalonians 4:3, 4)

¹⁰ Run from sex wey Jehovah hate. When you still de grow, e dey easy for your body to push you to want do sex wey Jehovah hate. And sometimes, other people fit want make you do this kind thing. Na wetin Satan still want make you do be that. Wetin go help you fit run from sex wey Jehovah hate? (Read 1 Thessalonians 4:3, 4.) When you de pray, tell Jehovah how you de feel and beg-am make e help you dey strong so that you no go fall for Satan trap. (Matt. 6:13) No forget say Jehovah want help you, no be to judge you. (Ps. 103:13, 14) Bible still fit help you. Melissa wey we talk about before, really do e best to comot e mind from sex wey Jehovah hate. E talk say: “To de read Bible everyday help me no tire to fight the bad things wey de come my mind. E continue to help me remember say I don give my life to Jehovah, and say na Jehovah I want serve.”—Ps. 119:9.

¹¹ Make you no try to handle your problem by yourself. Tell your papa and mama about wetin you de face. Na true say e no dey easy to tell your papa and mama about this kind matter, but e really dey important to tell them. Melissa talk say: “After I pray make Jehovah give me strong heart, I tell my papa about the problem. That one really make my mind come down. I know say Jehovah really happy with me.”

12. Wetin go help you fit make better decision?

¹² De follow wetin Bible talk. As you de grow, your papa and mama go de allow you choose wetin you want do. Plenty things still dey wey you go need to learn. But wetin go help you no make the kind mistake wey go spoil your friendship with Jehovah? (Prov. 22:3) One sister wey e name na Kari talk wetin help-am de make better decision. E see say if person don grow as Christian, e no need person to tell-am everything wey e go do. E talk say: “I need to understand how Jehovah de see things, no be just to de follow law.” When you de read Bible, ask yourself say: ‘Wetin this place wey I de read de teach me about how Jehovah de see things? How wetin I de read fit help me do the correct thing? Wetin I go gain if I follow wetin e talk?’ (Ps. 19:7; Isa. 48:17, 18) E go dey easy to make better decision wey go make Jehovah happy when you de read Bible and de think deep about wetin you read. As time de go, you go see say you no need person to de tell you everything wey you go do, because you don know how Jehovah de see things.

13. How good friends fit affect you? (Proverbs 13:20)

¹³ Make friend with people wey love Jehovah. As we talk before, the kind friends wey you get fit affect how you de grow as Christian. (Read Proverbs 13:20.) E get one time wey one sister wey e name na Sara stop to happy, but something happen wey make-am start to happy again. Sara talk say: “I meet good friends just when I need them. Me and one young sister start to meet every week to study Watchtower together. Another of my friend help me fit start to answer question for meeting. The support wey I get from my friends, make personal study and prayer dey important to me pass before. This one make my friendship with Jehovah really strong, and I start to happy again.”

14. Wetin help Julien make better friends?

¹⁴ How you fit make friend with people wey go help you be better person? Brother Julien wey be elder now talk say: “When I dey young pass as I dey now, I make good friends as I de follow brothers and sisters go preach. Them no de play with preaching, and they help me see say preaching really sweet. That one make me want enter full-time service. I start to see say the reason why I no get plenty good friends na because I de only make friend with people wey dey my age. Later, I still get better friends for Bethel. Their better example help me to dey more careful when I de choose wetin I de watch, read, or listen to, and this one make me near Jehovah more.”

15. Which warning Paul give Timothy about some people for congregation? (2 Timothy 2:20-22)

¹⁵ Wetin you go do if you see say to make friend with somebody for congregation go spoil your friendship with Jehovah? Apostle Paul know say some people for congregation fit no get better character, na e make e warn Timothy say make e no be friend to this kind people. (Read 2 Timothy 2:20-22.) Our friendship with Jehovah dey special! So we no go allow anybody spoil this friendship wey we get with Jehovah. Because we don work hard to get this friendship with our Papa for heaven.—Ps. 26:4.

HOW THE DIFFERENT-DIFFERENT PLAN WEY YOU GET FIT HELP YOU GROW AS CHRISTIAN?

16. Which kind better plan you fit get for yourself?

¹⁶ Get better plan. Get plan wey go make your faith strong and help you grow as mature Christian. (Eph. 3:16) For example, you fit decide say you no go ever miss your Bible reading and personal study. (Ps. 1:2, 3) You still fit plan to de pray well-well pass before and to de do-am with all your heart. E fit be say you go need to dey careful about the things wey you de use enjoy yourself, and how you de use your time. (Eph. 5:15, 16) Jehovah go really happy as you de try your best to grow as Christian.

17. How you fit gain if you de help other people?

¹⁷ You go grow as Christian when you de help other people. Jesus talk say: “Na when person give, e go dey happy pass when e receive.” (Acts 20:35) You go really happy if you use some of your time and power help other people. For example, you fit plan to help old people and people wey de sick for your congregation. You fit help them do wetin them want make you help them do, or show them how to use phone or computer. If you be brother, you fit plan to become ministerial servant so that you go fit help brothers and sisters more-more. (Phil. 2:4) Another thing be say, when you de preach to people about the Kingdom of God, you de show say you love them. (Matt. 9:36, 37) If e dey possible for you, you fit plan to join full-time service.

18. How full-time service fit help you near Jehovah more-more?

¹⁸ Full-time service fit help you near Jehovah more-more. If you be pioneer, e fit open the chance for you to attend School for Kingdom Evangelizers. You fit still serve for Bethel or join people wey de build for Jehovah organization. One young sister wey be pioneer wey e name na Kaitlyn talk say: “After I baptize, one of the main thing wey help me near Jehovah more-more na as I de spend time with mature brothers and sisters for preaching. Their example help me study Bible more-more and make the way I de teach better.”

19. Which blessing you go enjoy as you continue to grow as Christian?

¹⁹ As you continue to grow as Christian, Jehovah go really bless you. You no go waste your time for things wey no get gain. (1 John 2:17) You no go get the pain wey people de get when them make bad decision. But you go really happy and you go succeed. (Prov. 16:3) Your better example go encourage everybody for congregation. (1 Tim. 4:12) And the one wey better pass be say, you go get real peace of mind as you know say Jehovah dey happy with you and say you be e tight friend.—Prov. 23:15, 16.