Use Bible Like Mirror

The disciple James compare Bible to mirror wey fit help us to see the kind person wey we really be. (Jas. 1:​22-25) How we fit use Bible well like mirror?

Sofri read Bible. If we just hurry look ourself for mirror, some dirty fit dey our body wey we fit no see. Na so e still be when we de read Bible. If we read Bible quick-quick, we fit no see wetin we need to change for our life. Because of this one, we need to sofri read Bible.

Put mind for wetin you need to change for your life no be for other people life. Sometimes, when we de look mirror, we fit see the way other people dey for the mirror and this one fit make us put mind for wetin them need to change. Na so e still be when we de read Bible, we fit de see wetin other people need to change for their life. But this one no go fit help us change the things wey we need to change for our own life.

No expect too much. If we look mirror and na only the things wey we no like we de see, e fit make us no happy. Because of this one, when we de read Bible, we need to dey careful make we no de expect pass wetin Jehovah de expect from us.—Jas. 3:17.