“Make Una Choose for Unaself Who Una Go Serve”

1. Wetin we go do if we really want dey happy, and why? (Isaiah 48:​17, 18)

OUR Papa for heaven really love us, and e want make we enjoy life now and for future. (Eccl. 3:​12, 13) When Jehovah create us, e give us the sense to fit do some wonderful things by ourself. But e no give us the sense to rule ourself or to decide wetin dey right or wetin dey wrong. (Eccl. 8:9; Jer. 10:23) E know say for us to dey happy, we go need to serve-am and obey im laws.—Read Isaiah 48:​17, 18.

2. Wetin Satan want make we believe, but wetin Jehovah do to prove say Satan de lie?

² Satan want make we believe say we no need God for our life to fit dey happy, and say people go fit rule theirself well. (Gen. 3:4, 5) To prove say Satan de lie, Jehovah don allow make people rule theirself for some time. E really clear say people don fail to rule theirself well. But Bible talk about plenty men and women wey live better life because them serve Jehovah. Number one among this people na Jesus Christ. For this article, we go learn why Jesus choose to serve Jehovah, and why na only Jehovah we suppose worship. We go still talk about some reasons why we don choose to serve Jehovah.

WHY JESUS CHOOSE TO SERVE JEHOVAH

3. Wetin Satan promise to give Jesus, but wetin Jesus choose?

³ Jesus choose who e go serve when e dey for this earth. Small time after Jesus baptize, Satan talk say e go give Jesus all the kingdoms for this earth if e worship-am just one time. Jesus answer Satan say: “Comot from here Satan! Because them write-am say: ‘Na Jehovah your God you must worship, and na only-am you must do holy work for.’” (Matt. 4:​8-10) Why Jesus make that decision? Make we see some reasons.

4-5. Give some reasons why Jesus choose to serve Jehovah?

⁴ The number one reason why Jesus choose to serve Jehovah na love. The love wey Jesus get for im Papa Jehovah, really strong and deep. (John 14:31) Apart from that one, Jesus serve Jehovah because e know say na the correct thing to do. (John 8:​28, 29; Rev. 4:11) E know say na Jehovah give us life, say we fit trust-am, and say Jehovah de open hand give us plenty-plenty good things. (Ps. 33:4; 36:9; Jas. 1:17) Jesus know say Jehovah de always talk true and say na Jehovah don give-am everything wey e get. (John 1:14) But Satan na the opposite of who Jehovah be. E de make people sin and die. Satan na liar, e get long throat, and e de think about only imself. (John 8:44) So Jesus really know Jehovah well and e know Satan well. E no ever want be like Satan and turn against Jehovah.—Phil. 2:​5-8.

⁵ Another reason why Jesus choose to serve Jehovah na because e put mind for the plenty good things wey go happen if e hold Jehovah tight reach the end and complete the work wey Jehovah give-am. (Heb. 12:2) E know say if e dey faithful reach the end, e go make im Papa name dey holy and still make-am possible for sin and death wey Satan don cause to comot kpatakpata.

WHY WE SUPPOSE WORSHIP JEHOVAH

6-7. Why plenty people for this our time no de serve Jehovah, but why we suppose worship Jehovah?

⁶ Plenty people for this our time never start to serve Jehovah because them no know the fine-fine character wey e get, and the better-better things wey e don do for them. Them just be like the people wey apostle Paul preach to for Athens wey no know God.—Acts 17:​19, 20, 30, 34.

⁷ Apostle Paul explain to this people for Athens say na the true God “de give everybody life, and air to breathe, and everything.” E still talk say: “Because of God, we get life and we de waka and we dey.” Na God create us, and “na from one man e make all the nation of people,” so na only God we suppose worship.—Acts 17:​25, 26, 28.

8. Wetin Jehovah no go ever do? Explain.

⁸ Because na Jehovah create us and na im get the right to rule, e get the power to force people to serve-am if e want. But Jehovah no go ever do like that. Instead, e don do plenty things to show us say e dey real and say e get strong love for each of us. Jehovah want make plenty people be im friend forever. (1 Tim. 2:3, 4) This na the reason why Jehovah don train us to teach people about the good things wey e go do for people and how e go do-am. (Matt. 10:​11-13; 28:​19, 20) E don still give us congregations where we fit worship-am and get help from elders wey love us.—Acts 20:28.

9. How Jehovah don show love to everybody?

⁹ Jehovah de show the kind love wey e get as e de give good things to people wey no want believe say e dey. Think about-am: For many-many years, instead of people to obey Jehovah, plenty of them don choose wetin them think say dey right or wrong for their own eye. Even with this one, Jehovah no stop to give them wetin them need to dey alive and to enjoy life. (Matt. 5:​44, 45; Acts 14:​16, 17) Because say Jehovah de care for them, them fit get friends and family wey love them, them fit get children, and them fit work and enjoy their life. (Ps. 127:3; Eccl. 2:24) This one make-am clear say our Papa for heaven really love people. (Ex. 34:6) Now, make we discuss some reasons why we de serve Jehovah and how Jehovah de bless people wey choose to serve-am.

WHY WE DON CHOOSE TO SERVE JEHOVAH

10. (a) Wetin be the number one reason why we de serve Jehovah? (Matthew 22:37) (b) How you don gain from the way Jehovah de forgive? (Psalm 103:​13, 14)

¹⁰ Like Jesus, we de serve Jehovah because we get deep love for-am. (Read Matthew 22:37.) When we learn about the fine-fine character wey Jehovah get, e de move us to draw near-am. For example, make we see how Jehovah dey ready to forgive. When Israel people disobey-am, e beg them say: “Abeg, make una turn back from una bad ways.” (Jer. 18:11) Jehovah remember say we no dey perfect and say we be ordinary sand-sand. (Read Psalm 103:​13, 14.) When you think deep about the plenty times wey Jehovah don forgive you and the fine-fine character wey e get, this one no de make you want serve-am forever?

11. Wetin be some other reasons why we choose to serve Jehovah?

¹¹ We choose to serve Jehovah because na the correct thing to do. (Matt. 4:10) Apart from that one, we know say if we continue to serve Jehovah well, many good things go happen. We go fit help to make Jehovah name dey holy, to prove say Satan na liar, and we go fit make Jehovah happy. And if we continue to hold Jehovah tight, we go get the chance to serve Jehovah forever!—John 17:3.

12-13. Wetin you learn from the example of Jane and Pam?

¹² When we still dey young, we fit learn to get deep love for Jehovah and this love go de strong more-more as we de grow. Make we see the example of two sisters from the same papa and mama wey their name na Jane and Pam.a Jane dey 11 years and Pam dey 10 years when them first start to study Bible. Na true say their papa and mama no de study, but them allow make them de study Bible with Jehovah Witness people so far them go continue to follow the family go church for weekend. Jane talk say: “Wetin Jehovah Witness people teach me from Bible don help me make I no join my mates take drugs, or put hand for sex wey no clean.”

¹³ After some years, Jane and Pam come be publishers. After, them start to pioneer and still de care for their papa and mama wey don de old. Jane explain how e feel about all the things wey Jehovah don do for them. E say: “I see-am clear say Jehovah no de ever fail to care for im friends and say, as 2 Timothy 2:19 talk, ‘Jehovah know people wey be im own.’” True-true, Jehovah de always care for people wey choose to love and worship-am!

14. How we fit defend Jehovah name? (Still check the picture.)

¹⁴ We want make people know the truth about the lie-lie things wey them don hear about God. Think-am say you get one tight friend wey dey kind, get open hand, and de always forgive. One day, you hear as person de talk bad about your friend say e wicked and say im way no straight. Wetin you go do? You go want defend your friend. Na so e still be. When Satan and the people wey e de control de spoil Jehovah name with all the lie-lie things wey them de talk about Jehovah, we de defend Jehovah as we de tell people the truth about Im name. (Ps. 34:1; Isa. 43:10) We de show with wetin we de talk and wetin we de do say we love Jehovah and say we don choose to serve-am.

15. How apostle Paul gain as e change some things for im life? (Philippians 3:7, 8)

¹⁵ We dey ready to change some things for our life so that we go fit make Jehovah happy and fit do more for im service. For example, apostle Paul leave important position to fit be disciple of Jesus and serve Jehovah. (Gal. 1:14) Because of this one, e enjoy plenty things as e de serve Jehovah and get the chance to rule with Christ for heaven. E no ever regret the decision wey e make to serve Jehovah, and we too no go regret-am if we choose to serve Jehovah.—Read Philippians 3:7, 8.

16. Wetin we learn from Julia example? (Still check the picture.)

¹⁶ If we put the service of Jehovah as the number one thing for our life, Jehovah go bless us now and for future. Make we talk about the example of one sister wey im name na Julia. Before Julia learn the truth, e don start to sing for church from when e dey small. One person wey be oga for music notice say Julia sabi sing well, so e decide to train-am. After small time, people come know Julia as pikin wey really sabi sing well-well and e start to sing for big-big music halls. When Julia dey one music school, im classmate start to talk to-am about God and explain say God get name, and that name na Jehovah. E no tey, Julia start to study Bible two times every week. Last-last, Julia choose to use im life serve Jehovah instead of music. That decision no easy. Julia talk say: “Plenty people tell me say I de waste my talent, but wetin I really want na to use all my life serve Jehovah.” How Sister Julia de feel about the decision wey e make more than 30 years ago? E talk say: “I get peace of mind, and I trust say Jehovah go give me everything wey I want for future.”—Ps. 145:16.

CONTINUE TO SERVE JEHOVAH

17. (a) Wetin people wey never start to worship Jehovah need to do, and why? (b) Wetin people wey de serve Jehovah need to get for mind?

¹⁷ We don really near the end of this world wey Satan de control. Apostle Paul write say: “Na just ‘small time,’ and ‘the person wey de come go come and e no go waste time.’” (Heb. 10:37) Wetin this one mean? E mean say time no too dey again for people wey never start to serve Jehovah, so them need to make decision quick-quick to serve Jehovah. (1 Cor. 7:29) And if we don already choose to serve Jehovah, we know say we go need to endure problems, but make we get-am for mind say na just for “small time.”

18. Wetin Jesus and Jehovah want make we do?

¹⁸ Jesus encourage people to become im disciples and continue to follow-am. (Matt. 16:24) So if we don de serve Jehovah for many years, make we make up our mind to continue to serve-am. We need to work hard to fit continue to serve Jehovah. Na true say e no go easy, but we go dey happy and enjoy plenty blessings as we de serve Jehovah even now!—Ps. 35:27.

19. Wetin we learn from wetin happen to Gene?

¹⁹ Some people feel say if them de serve Jehovah, them no go fit enjoy their life. If you be young person, you de feel say e get some enjoyment wey you de miss as you de serve Jehovah? One young brother wey im name na Gene talk say: “I be feel say I no fit really enjoy myself because I be Jehovah Witness. E just be like say the children wey we grow up together de enjoy theirself as them de go party, get boyfriend or girlfriend, and de play fight-fight video games, but na to go meeting and preaching be the only thing wey I de do.” How the way Gene be de think affect-am? E talk say: “I start to hide de do some bad-bad things wey other young people de do, and I enjoy myself for some time. But the happiness no last. I start to think about the gain wey person de get when e obey wetin Bible talk and I decide to come back to Jehovah with all my heart and serve-am. Since that time, e just be like say Jehovah de answer all my prayers.”

20. Wetin we suppose make up our mind to do?

²⁰ One of the people wey write the book of Psalms sing to Jehovah say: “Person wey you choose and wey you carry near you to come stay for your temple go dey happy.” (Ps. 65:4) So make we make up our mind and continue to serve Jehovah like Joshua when e talk say: “But for me and my family, na Jehovah we go serve.”—Josh. 24:15.