STUDY ARTICLE 27
SONG 79 Teach Them Make Them Stand Well
Help Your Bible Student to Fit Decide to Serve Jehovah
“Stand strong for the faith . . . dey powerful.”—1 COR. 16:13.
WETIN WE GO LEARN?
We go learn how we fit help our Bible students to fit get strong faith and strong heart wey them need to fit change things for their life and serve Jehovah.
1-2. (a) Wetin be some things wey de make some Bible students no quick start to serve Jehovah? (b) Wetin we go talk about for this article?
WHEN you just start to study Bible, e get some things wey make you no quick start to serve Jehovah? E fit be say you de fear say people wey you de work with, your friends, or your family people no go happy with you if you become Jehovah Witness. Or maybe you de fear say you no go fit do all the things wey Jehovah want make you do. If na wetin happen to you be that, you go fit understand how some Bible students de feel and why e de hard them to come serve Jehovah.
2 Jesus know say this kind thing fit make person no serve Jehovah. (Matt. 13:20-22) Even with this one, e continue to help the people wey want follow-am, even though say some things de make them draw leg go back. Wetin Jesus do na example for us to fit help people (1) understand wetin de make-am hard for them to serve Jehovah, (2) get strong love for Jehovah, (3) know wetin suppose dey important pass for their life, and (4) to fit handle problem. For this article, we go talk about how we fit follow wetin Jesus do when we de use Enjoy Life Now and Forever! book teach our Bible student.
HELP YOUR BIBLE STUDENT KNOW THE THINGS WEY DE MAKE-AM HARD FOR-AM TO SERVE JEHOVAH
3. Wetin go don make-am hard for Nicodemus to become Jesus disciple?
3 Nicodemus na person wey get big position among Jew people. Only about six months after Jesus just start to de preach, Nicodemus already know say Jesus na the Messiah. (John 3:1, 2) Nicodemus want meet Jesus, but because e “de fear the Jew people,” na when day don dark, e hide go see Jesus. (John 7:13; 12:42) E fit be say, e de fear say if e become Jesus disciple, e go loose im big position.a
4. How Jesus help Nicodemus to fit know wetin Jehovah want make e do?
4 Nicodemus know wetin the Law wey Jehovah give Israel people talk, but e need to understand wetin Jehovah want make e do. How Jesus help-am? Jesus ready to spend time with Nicodemus, e even ready to do this one for night. Jesus still tell Nicodemus wetin e need to do to fit be im disciple. E need to repent, baptize for water, and get faith for the Son of God.—John 3:5, 14-21.
5. How we fit help our Bible student see wetin de make-am hard for-am to serve Jehovah?
5 Even if our Bible student understand Bible well, we fit still need to help-am see wetin de make-am hard for-am to serve Jehovah. For example, e fit be say na im work de take plenty of im time, or im family no want make e come serve Jehovah. Like Jesus, make you find time help your student. You fit invite-am come your house, or una fit stroll go somewhere. This kind things fit make-am easy for-am to tell you about the things wey e de face. Encourage-am to adjust anything for im life wey e need to change. And no forget to let-am know say e need to do all this things to make Jehovah happy, no be to make you happy.
6. How you fit help your Bible student do wetin Jehovah want? (1 Corinthians 16:13)
6 When your Bible student dey sure say Jehovah fit help-am to do wetin correct, this one go help-am get strong heart to do wetin e de learn. (Read 1 Corinthians 16:13.) Your work just be like teacher for school. Think about-am, when you dey school, which of your teacher you like pass? Many people de like teacher wey de help them know say them fit do the things wey de hard for them. Na so e still be for better Bible teacher. Them no just de teach wetin God want, but them still de help their Bible student see say them fit do wetin Jehovah want because Jehovah go help them. How you fit do this one?
HELP YOUR BIBLE STUDENT TO MAKE IM LOVE FOR JEHOVAH STRONG
7. How Jesus help people to love Jehovah more?
7 Jesus know say if person love Jehovah, e go want do wetin e de learn from Bible. Because of this one, e de always teach im disciples things wey go fit help them love Jehovah more. For example, e teach say Jehovah be like papa wey de give better things to im children. (Matt. 7:9-11) E fit be say some of the people wey de listen to Jesus no get this kind papa when them de grow. Imagine how them go don feel when Jesus tell them story about one papa wey really love im son and forgive-am after e waste all im papa money. This story go don help them see say Jehovah really love people and e want help them to fit worship-am.—Luke 15:20-24.
8. How you fit help your Bible student get strong love for Jehovah?
8 Like Jesus, you too fit help your Bible student love Jehovah more if you de always talk about the better-better character wey Jehovah get. Everytime wey una de study, help your Bible student understand how wetin e de learn show say Jehovah love-am. For example, when una de learn about why Jesus die for us, help-am see how this one show say Jehovah really love-am. (Rom. 5:8; 1 John 4:10) When your Bible student see say Jehovah really love-am, this one go fit help-am love Jehovah more.—Gal. 2:20.
9. Wetin help Michael change im life and baptize?
9 Make we talk about Brother Michael for Indonesia. E know the truth when e dey young, but e no gree baptize. When e dey 18 years, e travel go another country go do driver work. After some years, e later marry but e leave im family for Indonesia and e continue to work for the other country. When e still dey that country, im wife and im pikin for Indonesia start to study Bible and do wetin them de learn. After im mama die, Michael go back to Indonesia to take care of im papa. When e reach there, e start to study Bible. Wetin Michael study for “Learn More Things” for lesson 27 of Enjoy Life Now and Forever! book, really touch-am. When e think about how e go don really pain Jehovah to see Jesus as e de suffer, this one really touch-am sotey e start to cry. E really value-am say Jehovah send Jesus to die for-am and this one move-am to change im life and baptize.
HELP YOUR BIBLE STUDENT TO PUT JEHOVAH WORK AS NUMBER ONE THING FOR IM LIFE
10. Wetin Jesus do to help im disciples put Jehovah work as number one thing for their life? (Luke 5:5-11) (Still check the picture.)
10 Some of the people wey Jesus preach to, quick know say na Jesus be the Messiah. But them still need to understand say to serve Jehovah, them really need to put body for the preaching work. Peter and Andrew don de follow Jesus for some time before Jesus tell them make them leave their business and follow-am full-time. (Matt. 4:18, 19) Them be fishermen and e fit be say them de do this business with James and John. (Mark 1:16-20) Even though say their business de do well, Peter and Andrew stop the business and start to follow Jesus full-time. But them go don still arrange how them go de care for their family as them de follow Jesus. Wetin make them ready to leave their business? Jesus do one miracle wey help them see say Jehovah go provide for them if them take im work as number one thing for their life.—Read Luke 5:5-11.
Wetin we fit learn from the way Jesus help im disciples to fit put Jehovah worship as number one thing for their life? (Check paragraph 10)b
11. Wetin we fit tell our Bible student to make im faith strong?
11 We no go fit do miracle like Jesus, but we go fit talk about wetin Jehovah don do to help us or other people wey take Im worship as number one thing for their life. For example, you remember how Jehovah help you when you first start to attend meeting? E fit be say you go meet your oga and tell-am say you no go fit continue to work overtime or say you go quick de close to fit attend meeting. E go good make you de tell your Bible student about how your faith don strong because you see how Jehovah help you when you put im worship as number one thing for your life.
12. (a) Why e good make we de carry different-different brothers and sisters go study our Bible student? (b) Which other thing you fit use to help your Bible student to fit put Jehovah worship as number one thing for im life? Give example.
12 Your student go still gain when them hear how Jehovah help other brothers and sisters change some things for their life. So make you de carry different-different brothers and sisters go study your Bible student. Make them tell your Bible student how them start to serve Jehovah and wetin help them to fit put im worship as number one thing for their life. Apart from this one, make una take time de watch the videos wey dey the part wey be “Learn More Things” and you fit still select some videos from the part, “Learn Other Things” for Enjoy Life Now and Forever! book. For example, when una de study lesson 37, una fit watch this video, Jehovah Go Give Us The Things Wey We Need. When una de talk about-am, you fit help your student see say Jehovah go help-am if e take im worship as number one thing for im life.
HELP YOUR BIBLE STUDENT TO FIT HANDLE PROBLEM
13. Wetin Jesus do to help im disciples fit handle problem well?
13 Jesus tell im disciples many times say people go go against them, even their family members. (Matt. 5:11; 10:22, 36) Near the time wey Jesus go die, e tell im disciples say people fit even kill them because them de worship Jehovah. (Matt. 24:9; John 15:20; 16:2) Because of this one, e advice them say make them dey careful when them de preach. For example, e tell them say make them no argue with anybody wey de talk bad about wetin them believe. E still tell them say make them dey careful about wetin them de talk and do when them de preach.
14. How we fit help our student to fit know wetin to talk or do when people go against-am? (2 Timothy 3:12)
14 Like Jesus, we fit tell our Bible student some things wey people fit tell-am or do-am because e de study Bible. Some of this people fit be im family member, friends, or people wey e de work with. (Read 2 Timothy 3:12.) Some people wey e de work with fit start to laugh-am because e de live im life the way Jehovah want. Other people, even some of im family members, fit talk say wetin e de learn from Bible no correct. E good make we quick talk about this matter with our Bible student so that when people start to go against them, them go don already know wetin to talk and do.
15. Wetin fit help our Bible student when im family dey against-am?
15 If your student get family members wey dey against-am, help-am think about some reasons why them fit de vex because e de study Bible. Them fit de think say Jehovah Witness de deceive-am with wetin them de teach, or them fit de feel say we be bad people. Even some of Jesus family members no happy with the things wey Jesus do. (Mark 3:21; John 7:5) Teach your Bible student to dey patient and say make e no use vex talk as e de explain wetin e believe to people, even im family members.
16. How we fit help our Bible student to explain wetin e believe for better way?
16 Even when family members ask your Bible student question about Bible, e go better make e no try to explain plenty things at once. If e try to tell them plenty things from Bible, this one fit make im family members tire, and them fit no want follow-am talk about Bible again. So make you encourage your Bible student make e no de talk plenty-plenty things from Bible at once. If e do like this, im family members go fit listen to-am another time. (Col. 4:6) Your Bible student fit still tell im family members make them go jw.org. This one go help them to fit learn more about Jehovah Witness anytime wey them like and them fit still read anything wey them want for our website.
17. How you fit help your Bible student answer question wey people fit ask-am about Jehovah Witness? (Still check the picture.)
17 You fit use the articles wey dey “Questions Wey People De Ask” for jw.org to help your Bible student prepare simple answers to questions wey im family members or other people fit ask-am. (2 Tim. 2:24, 25) Anytime wey una finish any lesson for Enjoy Life Now and Forever! book, make una no forget to talk about the part wey be “Some People De Talk Say” or “Person Fit Ask You Say.” Make your student practice how e go explain to people wetin e believe. If e get some part wey e no fit explain well, try help-am see how e go fit explain-am well. If you de take time practice with-am like this, e go help-am fit explain wetin e believe to other people well.
If you de practice how to preach with your Bible student, this one go make-am easy for-am to fit preach to other people (Check paragraph 17)c
18. How you fit help your Bible student to be unbaptize publisher? (Matthew 10:27)
18 Jesus command im disciples to preach the good news. (Read Matthew 10:27.) When your Bible student start to join congregation for preaching, e go see how Jehovah go help-am for the work, and this one go make-am de trust Jehovah more. How you fit help your student do this one? If na time for campaign, make you help your student see wetin e need to do to fit qualify as unbaptize publisher and join the campaign. Explain to-am say e dey easy to start to preach when them de do campaign. Another thing wey fit help-am na if e start to de handle assignments for mid-week meeting. If e qualify to de handle assignments for meeting, this one go help-am fit talk to people for preaching.
SHOW YOUR BIBLE STUDENT SAY YOU TRUST SAY E WANT SERVE JEHOVAH
19. How Jesus show say e trust im disciples and how we fit copy im example?
19 Jesus really dey sure say im disciples want continue to follow-am. Because of this one, before e go heaven, e tell im disciples say one day all of them go dey together again. But them no understand say this one mean say them go go heaven. Even though say Jesus disciples never understand everything, Jesus dey sure say them really want serve Jehovah well. (John 14:1-5, 8) E know say them need time to fit really understand some things. For example, them need time to understand say them go go heaven. (John 16:12) Just like Jesus, we too fit let our Bible student know say we trust say them want serve Jehovah.
When your Bible student start to join congregation for preaching, e go see how Jehovah go help-am for the work, and this one go make-am de trust Jehovah more
20. How one sister for Malawi show say e trust im Bible student?
20 Trust say your Bible student want do the correct thing. Make we see the example of Sister Chifundo for Malawi. E start Bible study for Enjoy Life Now and Forever! book with one woman wey im name na Alinafe. The woman de go Catholic church. As them finish lesson 14, Sister Chifundo ask the woman wetin e think about to de use image for worship? The woman vex and talk say: “Na me go decide that one. I fit choose to use image for my worship.” This one make Sister Chifundo think say the woman no go want study again, but the woman no stop im study. Sister Chifundo continue to study the woman and trust say as time de go, the woman go understand say e no good to use image for worship. After some months, Sister Chifundo ask the woman one question for lesson 34 wey talk say: “Since you start to study Bible and to know more about the true God, Jehovah, how you don gain?” The woman talk many things wey e don learn, one of them na say, Jehovah Witness People no de do anything wey Bible say e bad. Small time after this one, the woman stop to use image for worship and qualify to baptize.
21. Wetin we fit do to help our Bible student decide say e go serve Jehovah?
21 Even though say na Jehovah “de make-am grow,” we still get things wey we fit do to help our Bible students progress. (1 Cor. 3:7) We no go only teach them wetin dey Bible, but we still need to help them love Jehovah and help them put im worship as number one thing for their life. Another thing wey we need to do, na to help them know say Jehovah go support them when people go against them. When we show our Bible student say we trust say them want really serve Jehovah, this one go give them the power to fit continue to serve-am.
SONG 55 No Fear Them!
a Two and half years after Nicodemus talk with Jesus, Nicodemus still be member of Jew people high court. (John 7:45-52) Some people talk say na after Jesus don die before Nicodemus become Jesus disciple.—John 19:38-40.
b OTHER THINGS ABOUT THE PICTURE: Peter and other fishermen leave their fish business to follow Jesus.
c OTHER THINGS ABOUT THE PICTURE: One sister de help im Bible student practice how to preach.