Make the Things Wey You First Learn Continue to Help You

1. How the things wey you first learn help you?

THE things wey we first learn before we baptize change our life. For example, when we learn say God name na Jehovah, this one move us to be im friend. (Isa. 42:8) When we learn say dead people no sabi anything, this one make us no de worry about wetin de happen to our person wey don die. (Eccl. 9:10) And when we learn about Jehovah promise to make this earth Paradise, we stop to de worry about our future. We come dey sure say we no go only live for 70 or 80 years, but forever.—Ps. 37:29; 90:10.

2. How 2 Peter 1:12, 13 show say even mature Christians fit still gain from the things wey them first learn from Bible?

² Make we no ever forget how important the first things wey we learn from Bible be. Apostle Peter write im second letter to Christians wey don already “stand well for the truth.” (Read 2 Peter 1:​12, 13.) But by the time wey e de write this letter, plenty wicked people dey for congregation wey want make brothers and sisters comot from the truth. (2 Pet. 2:​1-3) Peter want help im brothers and sisters to fit protect theirself from the lie-lie things wey this people de teach for congregation. So e remind them about some things wey them don learn before. This things go help them continue to hold Jehovah tight.

3. Why e good make all of us continue to think deep about the things wey we first learn from Bible? Give example.

³ Even if we don de serve Jehovah for many years, we fit still gain from the things wey we first learn when we start to study Bible. For example, person wey de learn how to cook and another person wey don de cook for many years, fit use the same ingredients when them de cook one particular food. But the person wey don de cook for many years don learn how to use this ingredients well and even how to use them cook different type of food. Na so e still be with the things wey we de learn from Bible. If we don de serve Jehovah for long time, we fit learn many lesson from one Bible portion. Why e be like that? E fit be say we don do many assignments for Jehovah organization and maybe other things for our life no be the same with when we just baptize. When we use the things wey we don learn before to handle things wey we de face now, we go see new ways wey them go fit help us. Make we talk about three things wey we first learn from Bible and see wetin Christians wey don de serve Jehovah for long time fit learn from them.

NA JEHOVAH MAKE EVERYTHING

4. Wetin we don gain as we know say na Jehovah make everything?

⁴ “The person wey make everything na God.” (Heb. 3:4) We know say the God wey make this earth and everything wey dey inside get sense well-well and e really get power. Because na im make us, e really know us well. But wetin better pass be say e really care about us. E know wetin good for us. Because we know say na Jehovah make us, this one don change our life and e de help us live better life now.

5. Wetin be one thing wey we learn when we start to study Bible wey fit help us now to de carry body down? (Isaiah 45:​9-12)

⁵ When we start to study Bible, we learn say na Jehovah make everything. This thing wey we learn, fit still teach us to de carry body down. Think about Job example. One time, Job talk wetin no correct about Jehovah. This one happen because e de think too much about imself and e de try to prove say e dey correct. But Jehovah remind-am say na im be the person wey make everything. (Job 38:​1-4) This one help Job remember say everything wey Jehovah de do correct. In fact, prophet Isaiah later write say make we no ever think say we get sense pass the God wey make us.—Read Isaiah 45:9-12.

6. Wetin fit happen to person wey don de serve Jehovah for many years, and wetin fit help-am? (Still check the picture.)

⁶ When person don serve Jehovah for many years, e fit start to de trust wetin e de think instead to de follow advice wey come from Jehovah and im organization. (Job 37:​23, 24) So wetin fit help-am? E need to think deep about Jehovah, the God wey make everything, and about the kind power and sense wey e get. (Isa. 40:22; 55:8, 9) This one go make-am de carry body down and e go help-am see say Jehovah advice better pass im own idea.

7. Wetin Sister Rahela do to fit accept new direction wey come from Jehovah organization?

⁷ Sister Rahela wey de live for Slovenia don see say when e de remember say na Jehovah make everything, this one de help-am fit accept any new direction wey come from Jehovah organization. E talk say: “Sometimes, e de hard for me to accept new direction from Jehovah organization. For example, even after I don watch the 2023 Governing Body update #8, e still shock me the first time when I see brother wey carry beard-beard de give talk. So I pray to Jehovah make e help me accept this direction.” Sister Rahela understand say because na Jehovah make us, e go always know the best way to guide im organization. If e de hard you to accept new direction or understanding from Jehovah organization, make you take time think deep about the kind power and sense wey Jehovah get.—Rom. 11:​33-36.

WHY GOD DE ALLOW PEOPLE TO SUFFER?

8. Wetin we don gain as we know why God de allow people to suffer?

⁸ Why God de allow people suffer? Some people wey no know the answer don vex for God and other ones don even talk say God no dey at all! (Prov. 19:3) But we don learn say no be Jehovah de make us suffer, instead, we de suffer because of the sin wey we inherit and because we no dey perfect. We don still learn say because Jehovah dey patient, this one de give people chance to learn about Jehovah and how e go comot suffer kpatakpata. (2 Pet. 3:9, 15) This thing wey we don learn from Bible de make our mind come down and e don make us near Jehovah more.

9. Which time we really need to think about why Jehovah de allow people to suffer?

⁹ As we de wait for Jehovah to end suffer, we need to dey patient. But, when person wey we love die, or when we or our family de face problem or people de treat us for bad way, we fit start to feel bad and even vex say Jehovah de delay to end suffer-suffer. (Hab. 1:2, 3) If this kind thing happen, e go good make we think about why Jehovah de allow people to suffer.a (Ps. 34:19) We fit still think about the time wey Jehovah go comot suffer forever.

10. Wetin help Sister Anne when im mama die?

¹⁰ As we don know why God de allow people suffer, this one de help us endure. Sister Anne wey de live for Mayotte island talk say: “My mama die some few years ago and this one really make me feel sad. But, I de always remind myself say no be Jehovah de make us suffer. E even de hungry-am to comot all kind of suffer and to bring people wey don die back to life. My mind de come down anytime wey I think about this things.”

11. As we know why God de allow people to suffer, how this one fit help us continue to de preach?

¹¹ Because we know why God de allow people to suffer, this one de help us continue to preach. After Peter write say Jehovah dey patient because e want make people repent, e talk say: “Make una think about the kind person wey una suppose be and wetin una suppose do wey go show say una dey holy and una hold God tight.” (2 Pet. 3:11) One of this things wey we “suppose do wey go show say [we] hold God tight” na the preaching work. Jehovah really love people and we love them too and we want make them live for Paradise. Jehovah dey patient with the people for your area. E de give them time to fit learn about-am. You get the big honor to work with Jehovah to help people come learn about-am before the end go come!—1 Cor. 3:9.

WE DE LIVE FOR THE “LAST DAYS”

12. Wetin we dey sure of as we know say we de live for the last days?

¹² Bible talk about the kind character wey people go get for the “last days.” (2 Tim. 3:​1-5) As we de see how people de behave for this our time, e dey clear say wetin Bible talk na true. As people character de worse more-more, this one de make us dey sure say we fit trust wetin Bible talk.—2 Tim. 3:​13-15.

13. How the story wey Jesus talk for Luke 12:​15-21 fit help us?

¹³ Because we know say we de live for the last days, this one de make us use our time for the best way. We fit learn why e dey important to do this one for the example wey Jesus give for Luke 12:​15-21. (Read-am.) For that example wey Jesus use, why God talk say the rich man “no get sense?” No be because the man get plenty money and property, but na because e no use im time do wetin dey important pass. E “de gather things keep for imself but e no be rich man for God eye.” E make big mistake as e use im time like this because e no get long time to live. In fact, God tell the man say: “This night them go take your life from you.” How this story fit help us? This Satan world go soon end, so e good make we ask ourself say: ‘The plans wey I get de show say I de use my time well? Wetin I de plan for my children de show say I want make them use their time well? The way I de use my time, power, and money de show say wetin dey important pass for me na to get better friendship with Jehovah, or na to gather things for myself?’

14. How Sister Miki story show say e dey important for us to remember say we de live for the last days?

¹⁴ If we really take time think about the things wey show say we de live for the last days, this one go help us know the best way to live our life. Na wetin happen to one sister wey im name na Miki. The sister talk say: “When I finish secondary school, I really want go university go study about animals. But I really like to pioneer and to serve where them need more publishers to preach. Some brothers and sisters for my congregation advice me say make I think-am well if e go dey possible for me to study about animals and still de pioneer or serve where them need more publishers. Them remind me say this world go soon end. Them still remind me say for the new world I go fit study all the animals wey I like to learn about. So I decide to learn another thing wey no go take plenty time and wey go help me fit support myself. Wetin I learn help me fit get work wey allow me take care of myself and to pioneer. Later, I move go Ecuador where them need more publishers to preach.” Sister Miki and im husband de do circuit work for Ecuador now.

15. How James example help us see why we no suppose tire for people wey never accept the good news? (Still check the picture.)

¹⁵ Make we no tire when people no gree accept the good news. People fit change. Make we see the example of James wey be Jesus brother. E see as Jesus grow until e become the Messiah and e still see say nobody sabi teach like Jesus. Even with all this one, James no gree follow Jesus for many years. Na after Jesus don die and come back to life James become im disciple and e really put body for the work! b (John 7:5; Gal. 2:9) So if some of your family members never accept the good news, make you no feel say them no go ever accept-am, make you continue to preach to people wey no gree listen to you before. Remember say we de live for the last days, plenty time no dey again so we need to preach. E fit be say them go later think about wetin you tell them and come serve Jehovah. This one fit even happen after the great tribulation don start.c

CONTINUE TO VALUE THE THINGS WEY JEHOVAH DON TEACH US

16. How you don gain from the things wey Jehovah don teach us? (Still check the box “Use Wetin Bible Teach Help Other People.”)

¹⁶ Our organization de prepare some things to teach people wey no be Jehovah Witness. Some of this things na public talks, some articles and videos for our website, and some of our books. But we self still de gain from all this things. Them de help us love Jehovah more, get strong faith for Bible, and de help us fit teach Bible well.—Ps. 19:7.

17. When we really need to think about the things wey we first learn when we start to study Bible?

¹⁷ For those of us wey don de serve Jehovah for long time, we de happy when them adjust the way we understand something for Bible. But we still value the first things wey we learn wey make us start to serve Jehovah. As we don learn for this article, the things wey we first learn when we start to study Bible fit still help us now. If we receive direction from the organization but we de think say na our own idea better pass, e go good make we remember say the God wey make us really dey wise and e get power and na im de direct this organization. If we or person wey we love de suffer, e go good make we dey patient and think about the reason why God de allow people to suffer. And when we de think about how we go use our time and other things wey we get, e go good make we remember say this last days go soon end. Make all this things wey we don learn continue to make us wise and help us to fit de serve Jehovah well.