Wetin You Fit Do When Them De Treat You or Other People for Bad Way?

1-2. (a) How plenty people de feel when them treat them or other people for bad way? (b) Wetin we go learn for this article?

FOR this our time, them de treat many people for bad way. E fit be because of the color of their skin, because them dey poor, because of the place wey them come from, or for other reason. And plenty people de suffer because rich business people and government de only care about how to make money. Wetin this people wey de only care about theirself de do fit don affect us or make person wey we know suffer.

² Many people for this our time de really vex because them no de treat them well or because them de see how people de treat other people for bad way. The truth be say, all of us want make them treat us well and we want get peace of mind. Because of this one, some people don try to do some things to solve the problems wey them de see for their country or for the whole world. Them de protest against government and government law, or them de vote for leaders wey promise to solve their problems. But as Christians, we don learn from Bible say we “no be part of the world” and say na only God Kingdom go fit solve our problem. (John 17:16) Even with this one, e still de make us sad and we de feel pain when we see as them de treat people for bad way. Wetin you fit do if you de feel like this? E get anything wey you fit do now to correct the way them de treat people for bad way? To answer this questions, make we first learn about how Jehovah and Jesus de feel as them de see how people de treat other people for bad way.

JEHOVAH AND JESUS NO DE EVER TREAT PEOPLE FOR BAD WAY

3. Why e no de make us happy when them treat us for bad way or when we see as them de treat other people for bad way? (Isaiah 5:7)

³ Bible tell us the reason why we no de happy when them treat us for bad way or when we see as them de treat other people for bad way. Bible explain say God create us for im image, and God “love wetin dey righteous and judgment wey partial no dey.” (Psalms 33:5; Genesis 1:26) E no go ever treat people for bad way and e no want make anybody treat other people for bad way. (Deut. 32:3, 4; Mic. 6:8; Zech. 7:9) For example, for the time of prophet Isaiah, Jehovah hear as plenty Israel people de “cry” because other Israel people de treat them for bad way. (Read Isaiah 5:7.) So Jehovah punish the people for Israel wey disobey im law as them de treat other people for bad way.—Isa. 5:5, 13.

4. Which example for Bible show how Jesus de feel when them no treat person well? (Still check the picture.)

⁴ Just like Jehovah, e no de make Jesus happy when them treat people for bad way. E get one time wey Jesus see one man wey one of im hand don die. Jesus feel pity for the man and e heal-am. But when the leaders for Jew people religion see wetin Jesus do, them really vex. Instead make them happy say the man don well, them say Jesus de break Sabbath law. How Jesus feel about wetin them talk? E “pain-am well-well say their heart strong like stone.”—Mark 3:​1-6.

5. Wetin we suppose remember when the bad way wey them de treat people de vex us?

⁵ E de pain Jehovah and Jesus when them see as people de treat other people for bad way. So e no bad for us to vex if we see as people de treat other people for bad way. (Eph. 4:26 and check “Be wrathful” for study note for nwsty) But make we remember say no matter how we vex, e no fit comot the suffer wey people de face, so we must control the way we de vex. The truth be say, if we continue to vex for long time, e fit make us sick or even make life tire us. (Ps. 37:1, 8; Jas. 1: 20) So wetin we fit do when them no treat us well or when them treat other people for bad way? To fit answer this question, make we learn from Jesus example.

WETIN JESUS DO WHEN E SEE AS THEM DE TREAT PEOPLE FOR BAD WAY?

6. When Jesus dey this earth, wetin be some problems wey people face? (Still check the picture.)

⁶ When Jesus dey this earth, e see as them de treat many people for bad way. E see as leaders for religion de make plenty laws wey de make life hard for the people. (Matt. 23:​2-4) Jesus still know say government for Rome that time de treat people wey them de rule for bad way. Many Jew people really want dey free from Rome government. Some Jew people even form groups like the one wey them de call Zealots to fight Rome government. But Jesus no join any group wey de fight to change government. And when people want make-am king, Jesus no gree.—John 6:15.

7-8. Why Jesus no comot suffer kpatakpata when e dey this earth? (John 18:36)

⁷ When Jesus dey this earth, e no put hand for politics to fit solve the problems wey people de face. Why? Because human being no get the right or the power to rule theirself. (Ps. 146:3; Jer. 10:23) And them no get the power to comot wetin de cause suffer. Na Satan de rule this world, e wicked well-well and many people for this world dey under im control. (John 8:44; Eph. 2:2) Even people wey get good mind no fit solve the problem of this world because them no dey perfect and sometimes, them fit treat people for bad way too.—Eccl. 7:20.

⁸ Jesus know say na only God Kingdom go fit comot our problem kpatakpata. Na im make-am use im time and power “de preach and de tell people the good news about the Kingdom of God.” (Luke 8:1) E comfort people wey really want see the time wey suffer and partial go end. (Matt. 5:6 and check study note for nwtsty; Luke 18:7, 8) No government for this world go fit do that one, na only God Kingdom go fit do-am, and that Kingdom “no be part of this world.”—Read John 18:36.

COPY JESUS WHEN YOU SEE PEOPLE DE SUFFER

9. Wetin make you dey sure say na only God Kingdom go fit comot all the things wey de make people suffer?

⁹ For this our time, people de treat other people for bad way even pass the time wey Jesus dey this earth. But we know say na Satan and the people wey e de control still de cause the problems wey people de suffer for this “last days.” (2 Tim. 3:​1-5, 13; Rev. 12:12) Like Jesus, we know say na only God Kingdom go fit remove wetin de really cause suffer. Because we don use all our heart support this Kingdom, we no de join people wey de protest or trust say people for government go fit remove suffer. See the example of one sister wey im name na Stacy.a Before Stacy learn the truth, e de always join people to protest against government. But after some time, Stacy start to doubt if wetin them de do go really change anything. E talk say: “When I dey for protest, I de always ask myself whether I dey for the correct side. But now wey I de support God Kingdom, I know say na the correct side I dey. I know say the way Jehovah go fight for people wey them de treat for bad way, go better pass anything wey I fit do to fight for them.”—Ps. 72:1, 4.

10. As e dey for Matthew 5:​43-48, why we no de join people wey de fight against government? (Still check the picture.)

¹⁰ Many people today de join people wey de fight against government. As them de do this one, many of them de vex sotey them no de obey government law and them even de do bad things to other people. This one no be wetin Jesus teach us. (Eph. 4:31) One brother wey im name na Jeffrey talk say: “I know say even when people talk say them just de protest no be to fight, before you know, e fit turn to fight-fight and them go de destroy people things, thief people property, and even kill people.” But Jesus teach us say make we treat everybody with love, even people wey dey against us or people wey de suffer us because of our faith. (Read Matthew 5:​43-48.) As Christians, we de do our best to copy Jesus example.

11. Why e fit no easy for us sometimes to copy Jesus example?

¹¹ Even though we know say na God Kingdom go comot all the things wey de make people suffer for this world, sometimes, e fit hard us to copy Jesus example when them no treat us well. Make we see wetin happen to Sister Janiya when people treat-am for bad way because of im skin color. The sister talk say: “Wetin the people talk really pain me. E make me vex sotey I want make them punish them. Then I decide say I go join one group wey de fight against people wey de treat other people for bad way because of their skin color. I be de think say if I do like this, things go change.” But after some time, Janiya see say e need to change the way e de think. E still talk say: “I notice say instead make I de trust Jehovah, I don start to believe wetin people de talk and de trust them. So I decide say I go leave the group and no join any other group wey de do this kind thing.” Even though say e de pain us when people treat us or treat other people for bad way, we need to de control the way we de vex and dey careful make we no put hand for politics matter or any other thing wey people de think say fit change this world.—John 15:19.

12. Why e good make we dey careful about wetin we de read, watch, or listen to?

¹² How we fit control how we de feel when people no treat us well or when them de treat other people for bad way? One thing wey we fit do na to dey careful about wetin we de read, watch, or listen to. Some story wey them de put for Internet na to shock people and make them start to complain about government. And plenty times, wetin them de talk for news fit dey different from wetin really happen. Even if wetin them de talk correct, if we continue to think about-am we go fit solve the problem? The truth be say, if we continue to use our time to listen or read this kind information, e fit make us sad, make us de vex, or even make life tire us. (Prov. 24:10) In fact, e fit make us forget say na only God Kingdom go fit comot everything wey de make us suffer.

13. When we de read Bible everyday and de think deep about-am, how this one fit help us know wetin we fit do when people no treat us well?

¹³ To de read Bible everyday and de think deep about-am go help us know wetin we fit do when people no treat us well or when we see as them de treat other people for bad way. When one sister wey im name na Alia see how people de treat other people for bad way for im area, this one really make-am sad. E pain-am say the people wey de do this kind thing no de get the punishment wey them suppose get. Sister Alia talk say: “I ask myself say ‘I really believe say Jehovah go solve all this problems?’ Na around that time I read Job 34:​22-29. This verses remind me say Jehovah de see everything wey de happen. And say na only Jehovah fit judge people well and na only Jehovah fit solve all our problems.” But as we de wait for God Kingdom to solve all our problems, wetin we fit do now?

WETIN WE FIT DO NOW

14. Wetin be one thing wey we fit do now? (Colossians 3:​10, 11)

¹⁴ We no fit change the way people go treat other people, but we fit make sure say we treat other people well. As we don talk before, we de copy Jesus example as we de show love to everybody. That love go move us to dey kind to everybody, even to people wey no de treat us well. (Matt. 7:12; Rom. 12:17) E de really make Jehovah happy when we no de do partial and when we de treat everybody for kind way.—Read Colossians 3:​10, 11.

15. How we de help people when we teach them the truth from Bible?

¹⁵ The best way wey we fit help people wey de treat other people for bad way na to teach them about Jehovah. Why we talk like that? Because “the knowledge of Jehovah” fit help person wey like fight-fight to change and become person wey dey kind and de show love. (Isa. 11:6, 7, 9) Before one brother wey im name na Jemal start to serve Jehovah, e be join one group wey de fight to change the government for im country because e feel say them no de treat people well. E talk say: “You no fit change people by force. But when them learn the truth for Bible, them fit change. This one na wetin help me change.” Wetin Brother Jemal learn from Bible move-am to stop to de fight. So when we teach people the truth from Bible, e fit help them to stop to de treat other people for bad way.

16. Why you go like tell people wetin God Kingdom go do?

¹⁶ Like Jesus, e de hungry us to tell people say na God Kingdom be the only solution to all our problem. This hope fit encourage people wey them don treat for bad way. (Jer. 29:11) Sister Stacy wey we talk about before talk say: “Because I know say God go soon remove everything wey de make us suffer, that one de help me dey calm when people no treat me well or when them de treat other people for bad way. E dey clear say Jehovah de use Bible de comfort us.” To fit comfort people with the message from Bible, we need to prepare well. The more we dey sure say wetin Bible teach about why we de suffer na true, the more we go fit use sense to discuss this matter with people wey we meet for school, for work place, or any other place.b

17. How Jehovah de help us fit endure when them treat us for bad way?

¹⁷ Because na Satan be “the ruler of this world,” people go continue to suffer. But we get hope because Jehovah don promise say e go help us now and say e go comot Satan and end all our problem for future. (John 12:31) For example, e don tell us for Bible why suffer-suffer full this world and how e de feel when them treat us for bad way. (Ps. 34:​17-19) We don learn from Jesus how to behave when them treat us for bad way. And we don still learn say for God Kingdom, people no go de treat other people for bad way. (2 Pet. 3:13) Make we continue to use all our heart to preach the good news about the Kingdom as we de wait for the time when people no go de treat other people for bad way and everybody for this earth go de do “wetin dey correct.”—Isa. 9:7.