Jehovah Fit Help Us to Really Dey Happy

1-2. (a) How plenty people de feel today? (b) Wetin we go talk about for this article?

PLENTY people today de try do different-different things to fit dey happy, but even with all this one, them no still de happy. Many people dey sad, and them de feel say things no go ever better and sometimes, some of us wey de worship Jehovah de feel like that too. Because we de live for the “last days,” we fit face some problems wey fit make us dey sad or wey fit make us de overworry.—2 Tim. 3:1.

² For this article, we go talk about some things wey fit make us feel sad and wetin fit help us to start to dey happy again. But first, make we see who fit help us to really dey happy.

JEHOVAH FIT HELP US TO REALLY DEY HAPPY

3. Wetin we learn about Jehovah from the things wey e make? (Still check the picture.)

³ Jehovah de always happy and e want make im servants happy too. Na the reason why e don make plenty things wey de make us happy. For example, we de really happy when we de see the fine-fine colors of the different-different things wey dey this our earth, we de enjoy-am when we de look animals as them de play, and we still de happy when we de chop that sweet food wey we really like. True-true, God really love us, and e want make we enjoy life.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Even though say Jehovah de see all the problems wey people de face for this world, why e still de happy? (b) Wetin Jehovah don give us? (Psalm 16:11)

⁴ Even though say Jehovah na “happy God,” e de see all the problems wey people de face for this world. (1 Tim. 1:11) But e no allow all this one make-am stop to de happy. Why? Because e know say all the problems wey people de face go soon end. In fact, e don set the date wey all the problems go end, so e dey patient de wait for the time when e go comot all pain and suffer forever. But for now, Jehovah understand wetin we de face and e want help us. How Jehovah de help us? One way wey Jehovah de do this one na as e de give us joy for our life. (Read Psalm 16:11.) Make we see how e do this one for im Son, Jesus.

5-6. Why Jesus de always happy?

⁵ After Jehovah, na Jesus be the second person wey de happy pass. Why we talk like that? Make we see two reasons. (1) Jesus “na the image of the God wey people no fit see” and this one make-am be like im Papa and na why e de always happy. (Col. 1:15; check “happy” for nwtsty study note for 1 Timothy 6:15.) (2) Jehovah na the God wey de give joy, and im Son, Jesus, don spend plenty time with-am pass any other person.

⁶ Jesus de happy because e de always do wetin im Papa want. (Prov. 8:​30, 31; John 8:29) Because e de always obey Jehovah, na this one de make Jehovah de always happy with-am.—Matt. 3:17.

7. Wetin fit help us to de really happy?

⁷ Like Jesus, we too go de happy if we continue to near Jehovah. The more we de spend time de learn about Jehovah and de copy im example, the more we de happy. Apart from this one, if we de do wetin Jehovah want, and we know say Jehovah de happy with us, we go de happy.a (Ps. 33:12) What if sometimes you no de happy, or maybe for long time now you no de happy, that one mean say Jehovah no de happy with you? No! The truth be say, because we no dey perfect, sometimes we de feel pain, dey sad, and de feel like say life don tire us. Jehovah really understand this one. (Ps. 103:14) But now, make we talk about some things wey fit make us feel sad and wetin we fit do to start to happy again.

NO ALLOW ANYTHING MAKE YOU STOP TO HAPPY

8. Wetin fit happen to us when we get problem?

⁸ Number 1: When we get problem. You de suffer because you de worship Jehovah, because natural disaster affect your area, because you dey poor, because of one sickness wey no gree go, or because you don old? This kind problem fit really make us dey sad especially when we no fit do anything about our condition. In fact, Bible agree say when person “dey sad e go dey weak.” (Prov. 15:13) Brother Babis wey be elder feel like this. After im senior brother die, e no tey im mama and papa die too. E talk say: “I just feel like say I dey alone and say nobody fit help me. Sometimes, I de really feel sad because I no fit dey with my papa, mama and brother before them die even though say I for like to spend time with them.” Like Brother Babis, sometimes, some problem fit really dey hard sotey them fit make us tire and feel sad.

9. Wetin fit help us start to de happy again? (Jeremiah 29:​4-7, 10)

⁹ Wetin fit help us to dey happy again? We fit start to de happy again if we stop to worry about things wey we no fit change, and try to value wetin we de enjoy now. The world de make people feel say everything for their life go need to go well before them go fit happy, but that one no be true. Bible teach us say even if our condition no sweet as we be want-am, we fit still de happy. For example, Jehovah tell Jew people wey them carry go Babylon as slaves say, make them accept their new condition for where them dey and do their best to enjoy their life for there even though say things no easy. (Read Jeremiah 29:4-7, 10.) Wetin this one teach us? Try to de see the good things wey de happen for your life and value them. Remember say Jehovah no go ever leave you, e go always help you. (Ps. 63:7; 146:5) When Sister Effie get accident wey make-am no fit waka again, e talk say: “Jehovah, my family and brothers and sisters for congregation help me no be small. This one make me see say e no go good if I tire for life because of my condition. I want show Jehovah and everybody wey help me say I really value wetin them do for me.”

10. Why we fit de happy even when we de face problem?

¹⁰ Even when we de face problem or if bad thing happen to us or our family members, we fit still dey happy.b (Ps. 126:5) Why we talk so? Na because wetin de give us true joy no get anything to do with the condition wey we dey. One sister wey im name na Maria, wey be pioneer talk say: “When you de face problem, to continue to de happy no mean say you de hide how you de feel. Instead, e mean say you never forget all the things wey Jehovah promise. Our Papa for heaven fit help us to continue to de happy no matter the problem wey we de face.” Remember say, no matter the kind problem wey we de face now, e no go remain like this forever. Small time, Jehovah go remove everything wey de make us feel sad.

11. How the example of apostle Paul de encourage you?

¹¹ Sometimes, we fit de feel say we de get plenty problems for our life because Jehovah no de happy with us again. If you de feel like this, e go good make you think about servants of Jehovah wey don face serious problems before. Make we see the example of apostle Paul. Jesus choose apostle Paul to preach the good news “to people of the nations and to kings and to people of Israel.” (Acts 9:15) Even though say na important work Jesus give apostle Paul, e still face plenty problem for im life. (2 Cor. 11:​23-27) But because say apostle Paul face plenty problem, this one mean say Jehovah no de happy with-am again? No. Even though say life no easy for apostle Paul, e dey clear say Jehovah happy with-am because Jehovah help-am fit endure. (Rom. 5:​3-5) Like apostle Paul, you still de continue to serve Jehovah even though say you de face plenty problems. So, dey sure say Jehovah de happy with you because e de help you fit endure.

12. Wetin fit happen if we no fit do wetin we plan to do for Jehovah?

¹² Number 2: When you no fit do wetin you plan to do for Jehovah. (Prov. 13:12) Because we love Jehovah and we de happy for the things wey e don do for us, this one de move us to want do plenty things for Jehovah work. But if we de try to do some things wey we no go fit do because of our condition, this one fit make us no happy. (Prov. 17:22) One sister wey de pioneer wey im name na Holly talk say: “I be want go School for Kingdom Evangelizers, go preach for another country, or join build Bethel for United States. But my condition change, and I no come fit do the things wey I be plan to do before. This one pain me well-well.” Many servants of Jehovah de feel like that when them no fit do the things wey them for like do for Jehovah.

13. No matter how our condition be now, which things we fit do now for Jehovah?

¹³ Wetin fit help us to de happy again? Remember say Jehovah no de tell us to do wetin pass our power. No be the plenty work wey person de do for Jehovah de make-am dey important to Jehovah. Instead, e de happy with us when e see say we de continue to worship-am and de do where we fit do reach. (Mic. 6:8; 1 Cor. 4:2) The thing wey dey important pass to Jehovah na the kind person wey we be, no be just wetin we de do for-am. So, e no go make sense for us to de try do pass wetin Jehovah expect say we go fit do.c So if your condition no allow you to fit do the things wey you for like do for Jehovah, think about the one wey you fit do now. For example, you fit de use your time to train young people for congregation or help old people to continue to hold Jehovah tight. Or you fit plan to visit person, or call-am for phone or send-am message to encourage-am. Know say Jehovah go bless you and e go help you continue to de happy if you de do this kind things. And know say for future, you go get the chance to do better-better things for Jehovah wey you no even expect. This na wetin help Sister Holly wey we talk about before. E talk say: “Anytime wey I de feel sad about the things wey I no fit do now, I de remember say I go live forever and I go get the chance to fit do everything wey I want do for Jehovah.”

14. Which other thing fit make us no dey happy?

¹⁴ Number 3: If we think say na money or other things go make us happy. We fit see some people for Internet and think say them de always happy because them de enjoy some good things for life. We fit start to think say wetin go make us happy na if we de do the things wey we de enjoy, buy the things wey we want, and travel go different-different place. The truth be say, e no bad for us to enjoy this things. In fact, Jehovah want make we enjoy life. But many people don see say this things wey them be de think say go make them happy, no be wetin de really make person happy. Sister Eva wey be pioneer talk say: “If you de only think about things wey you go do to enjoy yourself, you no go ever dey okay.” The truth be say, if person de use all im time try to do things wey e de enjoy, e no go fit really dey happy.

15. Wetin we fit learn from King Solomon example?

¹⁵ Make we see wetin we fit learn from King Solomon example about wetin fit happen to person wey de try to do only the things wey go make-am happy. King Solomon try different-different things to see if them go fit make-am happy. E chop different-different food, listen to sweet music, and e buy anything wey money fit buy for im time. But all this things no really make-am happy. E talk say: “Eye no de tire to see; and ear no de tire to hear.” (Eccl. 1:8; 2:​1-11) Some people think say if them get money and them do wetin them like, this one go make them happy. But this one na lie because this things no de give true happiness.

16. Wetin we de gain when we help other people? (Still check the picture.)

¹⁶ Wetin fit help us to de happy again? Jesus teach us say: “Na when person de give e go happy pass when e de receive.” (Acts 20:35) One elder wey im name na Alekos talk say: “I de put my mind to do simple-simple things for other people. The more I de give, the more I no de think too much about myself, and this one de make me happy.” Wetin you fit do for other people? If you see anybody wey life don tire, try to encourage-am. Na true say you fit no solve the problem wey the person get, but you go comfort-am as you de sofri listen to-am and de show-am love and remind-am to leave im problem for Jehovah. (Ps. 55:22; 68:19) You fit still help-am know say Jehovah never leave-am. (Ps. 37:28; Isa. 59:1) You fit still do some things to show-am love, like to prepare food for-am or the two of una fit comot go somewhere. You fit invite-am to join you for preaching, and this one go really make-am happy. Allow Jehovah use you to help other people. When you de think about wetin you fit do for other people instead of to de think about only yourself, this one go make you happy.—Prov. 11:25.

17. Wetin we fit do to really make us happy? (Psalm 43:4)

¹⁷ We fit really dey happy if we continue to near our Papa for heaven. Bible make-am clear say Jehovah de give us “plenty joy.” (Read Psalm 43:4.) So, no matter the condition wey we de face for life, we fit dey sure say Jehovah go care for us. So make we continue to put our mind for Jehovah, the Person wey de give us joy.—Ps. 144:15.