How You Fit Make Your Prayer Better

1-2. (a) Wetin be some things wey fit make us no tell Jehovah how we de really feel when we de pray? (b) How we know say Jehovah de listen to our prayer?

E GET anytime wey you don notice say you de always talk the same thing for your prayer and say you no de really tell Jehovah how you de feel? If na so e be, know say no be only you e de happen to. Because all of us dey busy well-well, sometimes we de rush our prayers. Or e fit be say because of our sin, e de hard us to tell Jehovah wetin dey our mind and how we de really feel.

² Bible let us know say wetin really dey important to Jehovah no be how our prayer sweet for ear, but e want make we carry body down and make we pray from our heart. Jehovah de hear “the thing wey humble person de ask.” (Ps. 10:17) E de listen to every word wey we de talk because e really want help us.—Ps. 139:​1-3.

3. Which questions we go answer for this article?

³ For this article, we go answer this questions. Why we suppose dey free to talk to Jehovah for prayer? Wetin we fit learn from the prayers of servants of Jehovah wey them write for Bible, and how them fit help us make our prayer better? Wetin we go do if problems don make us tire sotey we no know how we go tell Jehovah wetin really dey our mind?

NO ALLOW ANYTHING MAKE YOU NO PRAY TO JEHOVAH

4. Wetin fit help us dey free to pray to Jehovah? (Psalm 119:145)

⁴ If we understand say Jehovah na our friend and say e really love us, this one go make us dey free to pray to-am and tell-am how we de feel. The person wey write Psalm 119 do im best to get that kind friendship with Jehovah. E face some problems for im life. For example, some wicked people lie against-am. (Ps. 119:23, 69, 78) Apart from this one, e still feel bad because of some mistake wey e make. (Ps. 119:5) But even with all this one, e no fear to pray to Jehovah and tell-am how e de really feel.—Read Psalm 119:145.

5. Why we no suppose allow anything make us no pray to Jehovah? Give example.

⁵ Jehovah even want people wey don commit serious sin to pray to-am. (Isa. 55:6, 7) So make we no allow anything make us stop to pray to Jehovah. To understand this one, make we talk about one example. Think-am say person lost for road as e de go one important place, e go talk say because e de shame e no go ask people wey know the road to help-am? No! Na so e still be, even if we don commit serious sin or if some things don make us confuse for life, make we still pray to Jehovah.—Ps. 119:​25, 176.

HOW WE FIT MAKE OUR PRAYER BETTER

6-7. When we think about Jehovah better-better character, how this one fit help us make our prayer better? Give example. (Still check footnote.)

⁶ When we de tell Jehovah for prayer how we de really feel and the things wey dey our mind, this one go make us de near Jehovah more. So wetin go help us fit do this one?

⁷ De think about Jehovah better-better character.a The more we de think about the better-better character wey Jehovah get, the more we go dey free to talk to-am. (Ps. 145:8, 9, 18) Make we talk about the example of Sister Kristine. Im papa get serious hot temper and e de beat them well-well for house. Because of this one, e hard Sister Kristine to talk to Jehovah and to believe say Jehovah na Papa wey really love-am. Apart from this one, because of some mistake wey e make, e feel say Jehovah no go fit love-am and say E go leave-am. So wetin help-am? E talk say: “Jehovah love wey no de fail really help me. I know say e no go ever leave me. Even if I make mistake, e go help me and continue to show me love. When I think about this better character wey Jehovah get, e de help me to dey free to tell Jehovah things wey de make me happy and the ones wey de make me really dey sad.”

8-9. Wetin you go gain if you de first think about wetin you go talk before you pray? Give example.

⁸ Think about wetin you go talk. To know wetin you go talk for prayer, you fit ask yourself some questions before you go start to pray. For example: ‘Wetin be some problems wey I de face now? E get anybody wey I need to forgive? E get any new problem wey I de face wey I go need Jehovah to help me?’ (2 Ki. 19:​15-19) Another thing wey we fit do na to think about wetin Jesus teach us about prayer and follow im example. Jesus teach us make we pray about Jehovah name and Im Kingdom, and wetin Jehovah want.—Matt. 6:9, 10.

⁹ When one sister wey im name na Aliska hear say im husband get serious brain cancer wey them no go fit cure, e really hard for-am to pray. The sister talk say: “The problem really tire me sotey when I try to pray, I no de even know wetin to talk.” So wetin help Sister Aliska? E talk say: “I de try take some time to think about wetin I go talk before I pray. This one don help me make sure say I no de pray only about myself or my husband sickness. And because of this one, I de fit dey calm when I de pray and I de fit pray to Jehovah about different-different things.”

10. Why e good make we de spend time for our prayer? (Still check the picture.)

¹⁰ No rush your prayer. Even though say short prayer fit still make us near Jehovah, the truth be say na when we really spend time for prayer we go fit really tell Jehovah everything wey dey our mind.b Sister Aliska husband talk say: “I de try pray to Jehovah many times everyday, and because I de spend long time for prayer, this one don make me near Jehovah more. Jehovah no de hurry as e de listen to wetin I de talk, so I de take my time when I de pray.” Try find place and time wey you go fit pray for long time, wey nobody go disturb you as you de pray, and wey go even fit allow you talk come out as you de pray. Make you de always try pray for this way.

THINK ABOUT THE PRAYERS OF SERVANTS OF JEHOVAH FOR BIBLE TIME

11. Wetin be some things wey we fit gain if we de think deep about the prayers of servants of Jehovah wey them write for Bible? (Still check the box “Your Condition Be Like This People Own?”)

¹¹ If you take time think about the prayers and the holy songs of servants of Jehovah wey them write for Bible, this one go help you fit make your prayer de better. When you see how them dey free to tell Jehovah everything wey dey their mind, this one go move you to do the same thing. Their prayer fit help you learn new things wey you fit tell Jehovah for your prayer. You fit even see some prayers wey them talk things wey fit your condition.

12. Which questions we fit ask ourself as we de think about any prayer of servant of Jehovah wey dey for Bible?

¹² When you de think about any prayer of servant of Jehovah wey dey for Bible, make you ask yourself: ‘Who pray this prayer and which condition e dey when e pray this prayer? The things wey e talk for the prayer resemble wetin I de face? Wetin I fit learn from the prayer?’ You fit need to do research to get the answer to all this questions and you go really gain if you do-am. Make we see some example.

13. Wetin be one thing wey we fit learn from Hannah prayer? (1 Samuel 1:​10, 11) (Still check the picture.)

¹³ Read 1 Samuel 1:​10, 11. Hannah de face two serious problem the time wey e say the prayer wey dey this verse. The two problem be say, e no fit born pikin and Peninnah wey be im husband second wife, de make life hard for-am. (1 Sam. 1:​4-7) If you self de face problem wey don de make life hard for you for long time, wetin you go fit learn from Hannah prayer? E spend time for prayer and e tell Jehovah how e de really feel and this one really make im mind come down. (1 Sam. 1:​12, 18) Our mind go fit come down too if we de “throw all [our] worry to Jehovah.” We fit do this one if we de tell Jehovah exactly how we de feel and the problems wey we de face.—Ps. 55:22.

14. (a) Wetin be another thing wey we fit learn from Hannah example? (b) If we de think about the prayers wey them write for Bible, how this one fit make our prayer better? (Check footnote.)

¹⁴ When Samuel still be small pikin, Hannah wey be im mama carry-am go meet Eli so that e go de serve for the temple. (1 Sam. 1:​24-28) For im prayer, Hannah tell Jehovah how e de really feel and e really thank Jehovah because of how e de protect and care for im servants wey no leave-am.c (1 Sam. 2:1, 8, 9) Na true say Hannah still get some problems for im life when e de talk this prayer, but e put mind for how Jehovah don bless-am. Wetin we fit learn from this one? We go fit endure the problems wey we de face if we de put mind for the things wey Jehovah don do to help us.

15. Wetin we fit learn from prophet Jeremiah example if people de treat us for bad way or if we de see say wicked people de succeed? (Jeremiah 12:1)

¹⁵ Read Jeremiah 12:1. E get one time wey prophet Jeremiah de really feel bad because e de see say wicked people de succeed. E still feel bad because other Israel people de treat-am for bad way. (Jer. 20:7, 8) We self fit understand how e feel if we de see wicked people wey de succeed or if people de treat us for bad way. Jeremiah tell Jehovah how e de feel because of the things wey e see, but e no blame Jehovah. And when e see how Jehovah correct the people for Israel wey de do bad, this one help-am trust Jehovah more. (Jer. 32:19) We too fit tell Jehovah the things wey de make life tire us, but make we trust say Jehovah go correct all this things for the correct time.

16. Wetin we fit learn from the Levite wey write Psalm 42 if we no fit do some things wey we for like to do for Jehovah? (Psalm 42:​1-4) (Still check the picture.)

¹⁶ Read Psalm 42:1-4. The person wey write the song for this verse na one Levite wey no fit go temple go worship Jehovah with other Israel people because e dey another land. Wetin e talk for this psalm show how e de feel. We self fit feel like this Levite if we no fit comot from our house because we de sick or if them put us for prison because we de worship Jehovah. Because of all this things, sometimes the way we de feel fit just change and we go dey sad. But no matter how we de feel, e go good make we tell Jehovah about-am for prayer. This one fit help us understand why we de feel exactly the way we de feel or e fit even correct the way we de feel and help us put mind for wetin really dey important. For example, this Levite come see say e go still get other new ways to praise Jehovah. (Ps. 42:5) E still think deep about how Jehovah de care for-am. (Ps. 42:8) True-true, if we de tell Jehovah wetin really dey our mind and how we de feel, this one fit help us understand why we de feel the way we de feel, make our mind come down, and help us continue to endure.

17. (a) Wetin we fit learn from prophet Jonah prayer? (Jonah 2:1, 2) (b) How the things wey them write for the book of Psalms fit help us when we de face problem? (Check footnote.)

¹⁷ Read Jonah 2:1, 2. Prophet Jonah talk the prayer wey dey this verse when e dey inside the belle of the big fish. Even though say e no obey Jehovah before, Jonah dey sure say God go still hear im prayer. Many of the things wey Jonah talk dey inside the book of Psalms.d E dey clear say Jonah really know the things wey dey this place for Bible well-well. So as e de remember them and de think about them, this one help-am dey sure say Jehovah go help-am. Na so e still be today. If we know some Bible verse for head, we fit remember them when we de face problem and them fit make our mind come down as we de pray to Jehovah.

CONTINUE TO NEAR JEHOVAH AS YOU DE PRAY TO-AM

18-19. How Romans 8:​26, 27 fit make our mind come down if e de hard us to tell Jehovah how we de feel when we de pray? Give example.

¹⁸ Read Romans 8:​26, 27. Sometimes, the problems wey we de face fit tire us sotey we no go know how to tell Jehovah how we de feel. But e get something wey fit help us. For this kind time, Jehovah holy spirit de “beg” for us. How? Na Jehovah spirit move people to write the prayers wey dey for Bible. So when e de hard us to tell Jehovah how we de really feel, Jehovah fit accept some of this prayers for Bible as things wey we for like to tell-am, and e fit answer them for us.

¹⁹ Na this one help one sister from Russia wey im name na Yelena. Them arrest-am because e de pray and de read Bible. The problem wey e de face really tire-am sotey e really hard-am to know how e go tell Jehovah how e de feel. The sister talk say: “I remember say when things tire me and I no know wetin I go talk for prayer, Jehovah go fit take some prayers wey im servants don talk wey dey for Bible . . . as things wey I go like to pray for. . . . This one really make my mind come down for this time wey things really hard for me.”

20. When problem de worry us for mind, how we fit prepare our mind before we go pray?

²⁰ If problems de worry us for mind, our mind fit comot from the prayer wey we de talk and we fit start to think of other things. To prepare our mind before we go pray, we fit read or listen to the Bible book of Psalms. Like King David, we fit still try to write how we de feel. (Ps. 18, 34, 142; superscriptions.) The truth be say, you fit still do other things to prepare your mind before you go pray. (Ps. 141:2) Do the one wey go better pass for you.

21. Why we fit pray to Jehovah with all our heart?

²¹ E de really make us happy to know say Jehovah know how we de feel even before we talk anything. (Ps. 139:4) But even with this one, Jehovah de really happy when we de tell-am how we de feel and how we trust-am reach. So no let anything make you stop to pray to your Papa for heaven. You fit make your prayer better if you de learn from the prayers wey dey for Bible. Make you pray with your whole heart and tell Jehovah the things wey de make you happy and the things wey de really make you feel bad. Jehovah na your real friend and e go always dey there for you!