You Dey Precious to Jehovah

1-2. Wetin fit help us dey sure say we really dey important to Jehovah?

JEHOVAH servants dey important to-am. But sometimes, some of them de see theirself as people wey no get value. This one fit happen because people don treat them for bad way, or make them feel say them no dey important. You don ever feel like this before? If na so, wetin go help you dey sure say Jehovah really value you?

² One thing wey fit help you na to de read and think about story for Bible wey show how Jehovah want make them de treat people. When Jesus dey this earth, e show people respect and e treat them for kind way. Wetin Jesus do show say people wey de see theirself like say them no be anything, really dey important to Jehovah and to Jesus. (John 5:19; Heb. 1:3) For this article, we go learn: (1) how Jesus help people to understand say them really get value for Jehovah eye, and (2) how we fit really dey sure say we get value for Jehovah eye.—Hag. 2:7.

HOW JESUS HELP PEOPLE KNOW SAY THEM REALLY GET VALUE

3. How Jesus treat the people for Galilee wey come meet-am?

³ When Jesus de preach for Galilee, plenty people come meet-am to listen to-am. E teach them and e cure them. Jesus talk say “them be like sheep wey them don peel their skin, and them de waka about because them no get shepherd.” (Matt. 9:36; check nwtsty study notes.) The leaders for religion de see them as people wey no dey important and them even de talk say them be “people wey them don curse.” (John 7:​47-49; nwtsty study note.) But Jesus treat them well as e take time teach them and cure them from their different-different sickness. (Matt. 9:35) Another thing wey e do to help people be say, e train im apostles to fit do the preaching work and e give them the power to cure sick people.—Matt. 10:​5-8.

4. Wetin we learn from the way Jesus treat people wey other people de see as nothing?

⁴ As Jesus treat this people wey come listen to-am for kind way, this one show say Jesus and Jehovah de see people wey other people de see as nothing, as people wey dey important. If you de serve Jehovah but you de feel say you no be anything, make you think about the better way wey Jesus treat people wey come meet-am to learn from-am. This one go help you know say you really dey important for Jehovah eye.

5. Wetin happen to the woman wey Jesus meet for Galilee?

⁵ Jesus no only teach group of people, but e still teach and help some people one by one. For example, when Jesus de teach for Galilee, e meet one woman wey get one sickness wey make blood de comot from im body for 12 years. (Mark 5:25) According to the Law wey Jehovah give Israel people, anybody wey get this kind sickness no dey clean. Because of this one, anybody wey touch this woman no go dey clean too. This one go don make the woman no de fit dey with other people. Apart from this one, e no go fit worship Jehovah with other people for synagogue or when them de do festival. (Lev. 15:​19, 25) E clear say this sickness go don suffer the woman well-well, and e go don dey alone and de feel sad for long time.—Mark 5:26.

6. Wetin the woman wey de sick do so that e go fit well?

⁶ This woman don really suffer and e want make Jesus heal-am, but e no meet Jesus to tell-am make e heal-am. Why? E fit be say shame de catch-am because of im condition. Or e fit be say e de fear say Jesus go vex for-am because as e no dey clean, e no suppose dey where other people dey. So the woman just touch Jesus cloth because e believe say even if na only im cloth e touch, e go well. (Mark 5:​27, 28) True-true, as the woman touch Jesus cloth, e just well. Then Jesus ask the people say who touch-am, and the woman tell Jesus wetin e do. Wetin Jesus go do?

7. How Jesus treat this woman wey don suffer well-well? (Mark 5:34)

⁷ Jesus treat the woman for kind way and with respect. E notice say the woman “de fear and de shake.” (Mark 5:33) So Jesus sofri talk to-am and encourage-am. Jesus even call the woman ‘my daughter,’ and this one show say e love, respect, and dey kind to the woman. (Read Mark 5:34.) This na the only time for Bible wey Jesus call any woman ‘daughter.’ E fit be say e call this woman ‘daughter’ because of the kind condition wey this woman dey and because the woman de really fear. Just think how this woman go don feel! E go don really happy because Jesus treat-am for kind way and show-am love. If to say Jesus no talk to the woman for kind way, the woman for still well, but e for no happy and im mind go de judge-am because e go where people dey when e no dey clean. Jesus no just want heal the woman, but e still want make the woman de see imself as Jehovah precious daughter wey E really love.

8. Which problem one sister for Brazil face?

⁸ Today too, some servants of Jehovah get some kind sickness wey de make them feel sad and feel say them no get any value. One sister for Brazil wey im name na Maria,a na regular pioneer. When them born-am, e no get leg and na only one hand e get. The sister talk say: “Them de always laugh me for school because of my condition. In fact, them de call me different-different yeye name. And sometimes, the way my family de treat me, de make me feel say I no be anything.”

9. Wetin help Sister Maria to know say Jehovah really value-am?

⁹ Wetin help Sister Maria? When e become Jehovah Witness, brothers and sisters comfort-am and help-am de see imself the way Jehovah de see-am. Sister Maria talk say: “If I say make I write the name of all the brothers and sisters wey don help me, my book no go fit contain-am, I really thank Jehovah with all my heart as e don give me brothers and sisters wey just be like family to me.” This brothers and sisters really help Sister Maria to feel-am say Jehovah really value-am.

10. Which problem Mary Magdalene face? (Still check the picture.)

¹⁰ Make we see another person wey Jesus help. That person na Mary Magdalene. E get one time wey seven demons dey im body! (Luke 8:2) The demons go don make Mary de behave for some kind way and because of this one, people no go like to near-am. For this time for Mary life, Mary really suffer. E fit de fear and de feel say nobody love-am and say nobody go fit help-am. Jesus comot the demons from Mary body, and Mary Magdalene become im disciple. But which other things Jesus do to help Mary Magdalene know say e dey important to Jehovah?

11. How Jesus help Mary Magdalene see say e dey precious to Jehovah? (Still check the picture.)

¹¹ Jesus give Mary Magdalene the honor to de travel with-am and im disciples go preach for different-different place.b Because of this one, Mary continue to gain well-well as e de hear as Jesus de teach other people. Jesus still appear to Mary the day wey e come back to life. Mary na one of the first disciples wey Jesus talk to that day. Jesus even tell Mary say make e go tell im apostles say e don come back to life. All this one really help Mary see say e really dey precious to Jehovah!—John 20:​11-18.

12. Wetin make Sister Lidia feel say nobody go fit love-am?

¹² Just like Mary Magdalene, many people today de feel say other people no love them and say them no be anything. One sister from Spain wey im name na Lidia talk say, when im mama get im belle, e be want comot-am. Sister Lidia remember how im mama no de care for-am when e still be small pikin and how im mama de always shout for-am and talk wetin go really pain-am. E talk say: “Because my mama no show me love, I really want make other people love me and make them be my friend. But I de always fear say no matter wetin I do, people no go fit love me, because my mama de always make me feel say I be bad person.”

13. Wetin help Sister Lidia understand say Jehovah really value-am?

¹³ When Lidia start to study Bible, e come understand say Jehovah really value-am. Wetin help-am understand this one? E start to pray to Jehovah, de read Bible, and brothers and sisters de tell-am better-better words and de treat-am for better way. Sister Lidia talk say: “My husband de always tell me say e really love me. E de always tell me about the better-better character wey I get. And other brothers and sisters de do the same thing.” E get anybody wey you know wey you go fit help to understand say Jehovah really value-am?

WETIN GO HELP US TO SEE OURSELF THE WAY JEHOVAH DE SEE US?

14. How 1 Samuel 16:7 fit help us to de see ourself the way Jehovah de see us? (Still check the box “Wetin Make Jehovah De Really Value Im Servants?”)

¹⁴ Remember say Jehovah no de see you the way people for the world de see you. (Read 1 Samuel 16:7.) Plenty people for the world de see person wey fine, or wey get money, or wey go school well-well as important person. But no be so Jehovah de do. (Isa. 55:8, 9) So, instead make you de see yourself the way the world de see you, try see yourself the way Jehovah de see you. You fit read story for Bible about some servants of Jehovah wey doubt if Jehovah really value them. Some of them na Elijah, Naomi, and Hannah. As you de read their story, make you put mind for how Jehovah help them understand say e really love and value them. You fit still write some things wey don happen for your life wey show you say Jehovah really love and care about you. Another thing wey you fit do be say, you fit study different-different articles for our publication wey go help you really understand say you get value for Jehovah eye.c

15. Why Jehovah really love and value Daniel? (Daniel 9:23)

¹⁵ De always remind yourself say because you dey faithful to Jehovah, Jehovah really value you. E get one time wey life really tire prophet Daniel and e fit be say e don almost reach 100 years that time. (Dan. 9:​20, 21) Wetin Jehovah do to encourage-am? Jehovah send angel Gabriel to remind Daniel say e be “special person” and say e don hear im prayers. (Read Daniel 9:23.) Wetin make Jehovah really love and value Daniel? One of the things be say, Daniel love wetin correct for Jehovah eye and e dey faithful to Jehovah. (Ezek. 14:14) Jehovah put this story for Bible to comfort us. (Rom. 15:4) Because you de do wetin correct for Jehovah eye, and you dey faithful to-am, you dey precious to Jehovah. And just as Jehovah listen to Daniel prayer, e go listen to your prayer too.—Mic. 6:8, ftns.; Heb. 6:10.

16. Wetin fit help you to de see Jehovah as Papa wey really love you?

¹⁶ De see Jehovah as Papa wey really love you. Jehovah want help you, no be your mistake e de look for. (Ps. 130:3; Matt. 7:11; Luke 12:6, 7) When many people wey de feel say them no get any value think about this one, e don really help them. For example, make we talk about one sister from Spain wey im name na Michelle. The sister de feel say e dey useless because for many years, im husband de always talk to-am anyhow and de use bad-bad words wey de pain-am. The sister talk say: “Anytime wey I de feel say I dey useless, I de try to see myself say Jehovah de carry me for im hand, and e de show me say e love me and care for me.” (Ps. 28:9) Another sister wey im name na Lauren, wey come from South Africa, de always remind imself of the kind love wey Jehovah don show-am. E de always tell imself say: “If Jehovah don draw me to imself, and e don help me dey close to-am for all this years, and e de even use me to teach other people Bible, then e clear say Jehovah really love me.”—John. 6:44.

17. Wetin fit help you dey sure say Jehovah de happy with you? (Psalm 5:12) (Still check the picture.)

¹⁷ Dey sure say Jehovah de happy with you. (Read Psalm 5:12.) David compare wetin we de gain when Jehovah de happy with us to “big shield” wey de protect righteous people. If we know say Jehovah de happy with us, this one go fit help us anytime wey we start to feel say we no get value. But how you fit know if Jehovah de really happy with you? As we don learn, Jehovah de use Bible to let you know how e de feel about you. Apart from this one, Jehovah de use the elders, brothers and sisters, and other people to remind you say e really value you. So wetin you go do when other people tell you better things about yourself?

18. Why e good make you accept-am when people tell you better things about yourself?

¹⁸ When people wey know you and love you tell you better things about yourself, abeg take-am as them talk-am. No think say them just de talk-am to make your head big. Make you know say Jehovah fit de use them to help you know say e de really happy with you. Sister Michelle wey we talk about before talk say: “Small-small, I don de try to accept the better-better words wey other people de tell me about myself. This one no dey easy for me to do, but I know say na wetin Jehovah want make I do.” The elders don really help Sister Michelle to know say Jehovah really love-am. Now, e de serve as regular pioneer and remote volunteer for Bethel.

19. Why you fit really dey sure say Jehovah really value you?

¹⁹ For Bible, Jesus remind us say we really dey important to our Papa for heaven. (Luke 12:24) So make we dey sure say Jehovah really value us. Make we no ever forget this one! And make we continue to do our best to help people see say, Jehovah really value them!