I Fit Get Comfort From Bible?
The answer wey Bible give
Yes. (Romans 15:4) See some place for Bible wey don comfort many people and don help them when them de feel bad and de face problem.
For this article
Problem
Psalm 23:4: “Even though say I de waka for valley wey over dark, I no de fear any danger, because you dey with me.”
Meaning: When you pray to God and trust Bible to guide you, you go fit face problem with strong mind.
Philippians 4:13: “For everything I get the power because God de give me power.”
Meaning: God fit give you the power to cope with any problem.
When person wey you love die
Ecclesiastes 9:10: “You no fit work, or plan, or learn, or think inside Grave.”
Meaning: People wey don die no de suffer and they no fit do us anything, because they no know anything.
Acts 24:15: “People. . . go come back to life.”
Meaning: God fit resurrect our people wey we love wey don die.
Over regret for past sin
Psalm 86:5: “You, O Jehovah,a you good and you ready to forgive; your love no de fail for people wey put their heart for you.”
Meaning: God de forgive people wey really dey sorry for the mistake wey them don make before, and wey don make up their mind say they no go repeat-am.
Psalm 103:12: “As morning dey far from evening, na so e don put our sins far from us.”
Meaning: When God forgive us, e dey put our sin far from us well-well. E no de bring-am come back again or use-am punish us.
When you dey sad
Psalm 31:7: “You don see my suffer; you know the thing wey de really worry me.”
Meaning: God know everything wey you de suffer. E really understand how you de feel—even when other people no understand.
Psalm 34:18: “Jehovah dey near people wey de feel say their own don finish; E de save people wey life don tire.”
Meaning: God promise to support you when you de feel sad. E fit give you the power to cope with your pain.
Sickness
Psalm 41:3: “Jehovah go help the person when e dey for e sickbed.”
Meaning: God fit give you power, e fit help you endure, e fit give you sense and peace of mind to make better decision wey fit help you manage serious sickness.
Isaiah 33:24: “Nobody for there go talk say: ‘I de sick.’”
Meaning: God promise say time de come wey everybody go get good health.
Stress and worry-worry
Psalm 94:19: “When things de worry me for heart, you comfort me and you make me get joy.”
Meaning: God fit make our mind come down if we turn to-am when we de face stress.
1 Peter 5:7: “So make wuna throw all wuna problem give-am, because e de care for wuna.”
Meaning: God de care for us when we dey suffer. E de invite us to tell-am our problem for prayer.
War
Psalm 46:9: “E de end all war for the whole earth.”
Meaning: God Kingdom go soon comot war.
Psalm 37:11, 29: “But God go give humble people the earth, and they go happy well-well because peace go dey everywhere. . . . Na righteous people go stay for this earth, and them go stay inside forever.”
Meaning: Good people go enjoy peace for this earth forever.
To de worry about the future
Jeremiah 29:11: “‘I really know wetin I get for mind for wuna, na to give wuna peace, no be problem, to give wuna hope and correct future.’”
Meaning: God promise e people say they fit get happy future.
Revelation 21:4: “And e go wipe all the tears from their eye, and they no go die again, people no go de cry again, pain no go dey again. The old things don pass.”
Meaning: God promise say e go remove all the bad things wey you dey see and wey you dey face today.
a Jehovah na God name. (Psalm 83:18) Check the article “Who Be Jehovah?”