Wetin You Fit Do If Your Pikin Want Kill Imself?

For some country, the number of young people wey de kill theirself de go up more-more. Why e be like that? You know whether your pikin get this kind thing for mind?

For this article we go talk about:

• Why papa and mama need to take this matter serious?

• How you fit know if your pikin de plan to kill imself?

• Wetin you fit do if your pikin de plan to kill imself?

Why papa and mama need to take this matter serious?

From 2009 to 2019 for United States, the number of young people wey dey for secondary school wey no de happy with their life, or wey life don tire don go up almost times two. And between that time, the number of people wey kill theirself still go up.a

“The problem wey young people de face dey different from wetin we know before . . . And all this problem no de make them fit think well again.”—Vivek H.Murthy, U.S. Surgeon General.

Bible advice: “Person wey im spirit don weak no go get power.”—Proverbs 17:22.

How you fit know if your pikin de plan to kill imself?

Think about the things wey we want talk about now.

• Wetin fit don happen? Bad thing happen to your pikin? For example, person don tell-am say e no want-am or make-am feel say e no like-am? Person wey e love break im heart? E don try to do something but e no succeed? Or person wey e love don die? If any of this things don happen to-am, you know if e fit de affect-am pass as you think?

• How e de behave? Your pikin don stop to do things with im friends or people for family? Or e don stop to do things wey e like to do before? E dash people some of the things wey e value well-well?

• Wetin e de talk? Your pikin de talk say e want die, or e de talk something like, “E for better if I no dey alive”? E de talk say e no want be load to you?

  Na true say your pikin fit no mean everything wey e de talk. (Job 6:3) But other things wey e de talk fit mean say e want make person help-am. So no think say your pikin de play or e no mean-am when e talk something wey show say e want die.

If your pikin talk say e don come im mind before to kill imself, you fit ask-am say, “You don think about the time or how you want do-am?” Wetin e talk go help you know wetin you need to do quick-quick before water pass garri.

“Papa and mama fit de fear to ask their children this kind question because them de fear say them fit talk something wey them no expect. But if wetin your pikin talk na how e de feel, e no go better make e talk-am come out?”—Sandra.

Bible advice: “The things wey person de think be like water wey dey for deep well, but the person wey get sense go fit draw-am come out.”—Proverbs 20:5, Good News Translation Bible.

Wetin you fit do if your pikin de plan to kill imself?

• Sofri find out wetin your pikin de think and how e de feel. First of all, thank your pikin as e talk wetin dey im mind. Then you fit tell-am say: “I want know the problem wey you de face and how e de make you feel. Tell me wetin de happen for your life wey I no know” or “You fit explain how you de feel, you fit describe-am for me?”

  

  Listen well-well as your pikin de talk. No feel say na small pikin sense de worry-am or quick tell-am say you go “solve” im problem.

  Bible advice: “Be person wey ready to listen, wey no de quick talk, and wey no de quick vex.”—James 1:19.

• Plan wetin you go do so that nothing go happen to your pikin. Make we talk about some of the things wey you fit help your pikin know and write:

  Wetin de show say danger dey. When e de think of to kill imself, wetin e de do or wetin e de think about?

  Things wey fit help-am. Wetin e like to de do wey de make im mind come down, and wey fit help-am stop to think of how to kill imself?

  People wey fit help-am. Your pikin get people wey e fit talk to when e de face problem? E fit be you, another mature person wey e trust, doctor wey de treat mental problem, or organization wey de help people wey de think of to kill theirself.

  

  Bible advice: “When people work hard, their plans go surely succeed.”—Proverbs 21:5.

• Make your eye de reach ground. Continue to de check how your pikin dey even after e be like say things don better.

  “When my son tell me say e no de think of to kill imself again, I be think say the problem don end. That na big mistake, because something fit just happen wey fit make-am start to think of to kill imself again.”—Daniel.

  

  Help your pikin to fit de see how e de feel for the correct way: The way person de feel de change. One book wey them de call, The Whole-Brain Child talk say, “The way person de feel, just be like weather. For example, when rain de fall, e no go make sense for person to stand inside the rain and de pretend like say the rain no de beat-am. But e no go still make sense for person to feel say sun no go ever shine again because say rain de fall.”

• Make your pikin mind come down: Tell your pikin say you love-am and say you always ready to help-am anytime e need help. You fit still tell-am say, “I go do everything wey I fit do to help you fit face this problem.”

  Bible advice: “Real friend de show love all the time, and na brother wey you fit trust when problem dey.”—Proverbs 17:17.