What if I Want Kill Myself?

“Some years before this time, I get plenty things wey de really worry me sotey e come be like say I de struggle to quench plenty fire wey de burn. That time, e come de do me like say make I kill myself. The truth be say, I no want die. I just want make my suffer end.”—Jonathan, 17.

Research don show say for the last 12 months, nearly 1 out of 5 for 14,000 secondary school student, don really think about to kill theirself.a If you de feel like say you no get any reason to dey alive, wetin you fit do?

• Wait. Decide say you no go rush do as your body want. Na true say your problem fit be like something wey you no fit handle, but better advice dey wey fit help you learn how to manage the problem.

You fit de feel like say you no go fit solve your problem. But the way you de feel fit no be how the problem really be. You fit handle your problem for other better way. With the correct help wey you need, e no go take long for you to fit handle your problem.

• Advice for Bible: “Problem surround us from all side, but we still de move; we confuse, but e no mean say we no get hope.”—2 Corinthians 4:8.

  Wetin You Fit Do: If you de always think about to kill yourself and if the feeling dey strong, e go good make you find out wetin fit help you. E fit be hospital emergency room phone number or telephone number wey people wey de feel like that fit call for help. They don train this people to know wetin them fit do, and them go really like to help you.

• Talk to person. People dey wey really care about you and them really want help you. Some of them fit be your friends and your family member, and them fit no know the kind thing wey you de face unless you tell them.

Some people need eyeglass so that them go fit see things well. Better friend fit still be like that. E fit help you see say your problem no really big reach as you de see-am, and e fit help you see better reason why you need to dey alive.

• Advice for Bible: “Real friend . . . na brother wey you fit trust when problem dey.”—Proverbs 17:17.

  Wetin You Fit Do: If you want talk to person, you fit say: “For some time now, bad things don de really enter my mind. E go dey ok if I tell you about-am?” Or you fit say: “I get some problem wey I no fit handle by myself. You go like to help me?

• Make you go see doctor. Worry-worry and depression na sickness wey fit make person want kill e self. But the good news be say, this kind condition get treatment.

Just as sickness de make food tire person, na so depression de make life tire person sotey person go want kill e self. But the truth be say all of them get treatment.

• Advice for Bible: “People wey dey strong no need doctor, but na sick people need-am.”—Matthew 9:12.

  Wetin You Fit Do: Try make you de really sleep well and de do exercise. De always chop better food. The way you de care for your body fit affect the way you de see life.

• Pray. Bible talk say the Person Wey Create Us “big pass our heart by far and e know everything.” (1 John 3:20) Why you no pray to God today? Use e name wey be Jehovah when you de pray, and tell-am everything wey dey your mind.

Some load fit really dey heavy for only you to carry. The Person Wey Create You wey be Jehovah really dey ready to help you.

• Advice for Bible: ‘De tell [God] everything wey wuna want; then the peace wey God de give go protect wuna heart and how wuna de think through Jesus Christ.’—Philippians 4:6, 7.

  Wetin You Fit Do: No be only your problem you go de tell Jehovah. E go good make you still try think of one good thing wey you fit thank-am for today. (Colossians 3:15) If you de always talk thank you for any good thing wey happen to you, this one go help you see better reason wey go make you want dey alive.

If you believe say you no get any reason to live, look for who go help you. Na wetin Jonathan wey we talk about for the beginning do be that. E talk say: “I come need to de talk well-well with my papa and mama and I go see doctor. But things don de better for me now. Even though say no be everytime things de go well for me, I no de think say e go good to end my life again.”