QUESTIONS WEY YOUNG PEOPLE DE ASK
How I Fit Endure the Pain When Person Wey I Love Die?
Your friend or family member just die? If na so, this article fit help you endure the pain.
For this article
I too de feel sad because the person wey I love die?
Many people de feel strong pain when their person die, and this pain fit last for long time.
“No day de pass when I no de think about my grandpapa. Even though e don reach two years wey e die, E still de hard me to talk about-am make I no cry.”—Olivia.
“My grandmama na person wey de always support the plan wey I get for life, but e no dey alive to see me do the things wey I plan for my life. Anytime I succeed to do wetin I plan, e de pain me because my grandmama no dey there to see-am.”—Alison.
When you de endure when person wey you love die, you fit de feel different-different pain. For example:
“When my uncle die, I no fit believe-am, e shock me for long time. Na the first time wey person wey dey close to me don die, e just be like say na big truck jam me.”—Nadine.
“When my grandpapa die, I vex for-am because e no take care of im body, even though say we beg-am plenty times make e take care of imself.” —Carlos
“Na only me and my sister no dey when my grandpapa die. After that time, my heart start to condemn me because I feel say I suppose dey there to tell my grandpapa bye-bye.”—Adriana
“One husband and wife wey our family dey close to die for motor accident. After that time, anytime any of my family member de comot for house, I go start to fear because I de feel say e fit die too.”—Jared
“Three years ago when my grandmama die, I regret say I no too spend time with-am when e dey alive.”—Julianna
To feel shock, to vex, for person heart to condemn-am, to de fear and to regret na normal way person de feel when im person die. If you de feel like this, dey sure say as time de go, the way you de feel go de reduce small-small. But for now, how you fit endure when you de feel pain because your person die?
How I fit endure the different-different pain wey I de feel?
Talk to one of your friend wey you trust. The Bible talk say real friend na brother wey we fit trust “when problem dey.” (Proverbs 17:17) When you talk to person about how you de feel, e go help you reduce the pain wey you de feel.
“E dey normal to feel pain when your person die. Sometimes, you fit encourage yourself but you feel start to feel say your condition no go improve. Na this one make-am good to talk to somebody.”—Yvette
Remember the person wey you love. Bible talk say, “good person get good things wey e save for im heart.” (Luke 6:45, Easy-to-Read Version, 1992) You fit write about the good things wey una don do together or gather different-different pictures of your person wey don die to fit remember-am.
“I decide to write all the things wey my friend teach me before e die, and this one help me to continue to gain from im better example. To write things down help me endure the pain wey I de feel.”—Jeffrey
Take care of your health. Bible show say gain dey to exercise. (1 Timothy 4:8) Make sure say you de eat well, de exercise and de get the rest wey your body need.
“The pain wey you de feel when your person die fit make you no de think well. No stop to eat and get enough rest.”—Maria
Help other people. Bible talk say “Na when person de give e go happy pass when e de receive.”—Acts 20:35.
“Try to de do things for other people especially people wey their person don die too. This one fit help you remember say no be only you de feel pain because their person don die.”—Carlos
Tell Jehovah how you de feel for prayer. Bible talk say Jehovah God na “Person wey de hear prayer.” (Psalm 65:2) Bible still talk say Jehovah de “heal people wey something de worry them for mind; e de bandage their wound”—Ps. 147:3.
“Beg Jehovah make e support and encourage you. Some days fit hard pass other days, but Jehovah go always dey there to help us.”—Jeanette
No expect too much from yourself. Remember say the way one person de endure pain fit dey different from the way another person go endure-am. Bible talk say Jacob “no gree make they comfort-am when e de feel say im pikin don die. (Genesis 37:35) Make e no surprise you if you continue to feel pain for long time.
“Plenty different things de remind me of my grandmama sister even though e don reach 15 years wey e don die.”—Taylor
For example, think-am say your bone break. E go really pain you and e fit take some time before e heal. But the doctor go give you advice about wetin you fit do so that your body go well again.
Na so e just be when you de try to recover from the pain wey you de feel when the person wey you love die. E de take time before the pain go reduce. So dey patient. Sofri check all the advice wey dey this article so that you go fit know the one wey go help you.