Wetin Bible Talk About Water Problem Wey Dey the Whole World?
All of us need clean water to fit live. António Guterres wey be UN Secretary-General warn say, “as people de need water more-more for the whole world, we go face water problem.” E no dey easy for Billions of people for the world today to get clean water wey them go drink.
Strdel/AFP via Getty Images
Enough water go ever dey for everybody? Or na so we go always suffer because of water? Wetin Bible talk?
Wetin Bible promise about water problem
Bible talk say one day water problem no go dey again. In fact, clean water go dey for everywhere.
“Because water go de flow for dry ground, and river go dey for dry ground wey nothing de grow. Ground wey heat don dry go be pool wey get plant, and ground wey don dry go be where water de come from.”—Isaiah 35:6, 7.
Why we fit believe this thing wey Bible promise? See wetin Bible talk about the way God arrange this earth.
Wetin Bible talk about the earth and how water de go up and come down
‘God no just make the earth for nothing, e want make people de stay for inside.’—Isaiah 45:18.
Because God make the earth so that things wey get life go fit survive, e arrange-am make the earth fit de produce plenty clean water.
‘God de draw water go up small-small; the water de gather to form rain; then, e go pour down from the cloud ontop people.’—Job 36:27, 28.
This Bible verse talk about how Jehovah don arrange make the earth de produce clean water and make the water no finish. Water de comot from land and sea go up to form cloud and later fall as rain, this one de make-am possible say we go always get clean water for human being and animals.—Ecclesiastes 1:7; Amos 5:8.
“I go give una rain for the correct time, and the land go produce and the trees for the land go produce their fruit.”—Leviticus 26:4.
God promise Israel people say e go bless the things wey them plant, and e go always give them water so that their harvest go plenty. Because e know say them need rain for their plants to fit produce well.
Wetin God do for Israel people that time, e go soon do-am for everywhere for this earth. (Isaiah 30:23) But today, for different-different place for this world, water problem continue to increase and part of the problem na because rain no de too fall. Which other thing Bible talk say be the solution to this water problem?
How water problem go take end
Bible show say God go use im Kingdom remove all the problem wey de affect this earth, even water problem. (Matthew 6:9, 10) God Kingdom na government for heaven wey go rule this earth. (Daniel 2:44; Revelation 11:15) God Kingdom go do wetin human being government no fit do wey be, to remove all the things wey de cause water problem.
Problem: Weather wey de change still join wetin de make-am hard for people to always get water. And this one de cause problem like, serious dry season, serious flood wey heavy rain de cause or when water for sea overfull.
Solution: God Kingdom go repair the things wey human being don spoil for the earth, so that e go be as God first make-am. God don promise say: “See! I de make everything new.” (Revelation 21:5) Dry ground go de bring plenty water wey go make things grow, even for place wey people no de stay now. (Isaiah 41:17-20) When God Kingdom go rule this earth, Jesus go control everything wey God make for the earth well.
When Jesus dey this earth, e control bad weather, and e use this one show the kind power wey God don give-am. (Mark 4:39, 41) When Jesus don de rule as King for God Kingdom, natural disaster no go happen again. People go enjoy real peace and them no go fear any kind of natural disaster again.
Problem: People wey de only think about theirself, and different-different company de spoil the river wey dey this earth and where them de save water for underground. This one de make-am hard to get clean water.
Solution: God go clean the earth and repair all the river, sea, and land. The earth go turn to paradise. Bible talk wetin go happen that time like poem, e talk say: ‘Wilderness and dry land go happy, and desert go happy and fine like saffron.’—Isaiah 35:1.
Wetin go happen to people wey no care about our earth and other people? God don promise “to destroy the people wey de destroy the earth.”—Revelation 11:18, footnote; Proverbs 2:21, 22.
Problem: Human being de use the water wey dey the earth anyhow, because of this one, them de waste more water pass wetin the earth fit produce.
Solution: God Kingdom go make wetin God want happen, no be wetin human being want go “happen for this earth.” (Matthew 6:9, 10) God Kingdom go teach people wey e de rule for the best way. “The knowledge of Jehovah go surely full the whole earth,” Isaiah 11:9.a With wetin this Bible verse talk, and because we really love Jehovah and all the things wey e make, this one go help human being really care for this earth wey fine well-well and all the things wey dey inside.
To know more things wey God Kingdom go do, read the article wey the title na, “Wetin God Kingdom Go Do?”
Read Isaiah, chapter 35, to see how God go change this earth to paradise.
Watch the video wey the title na, Why God Make This Earth? to learn more about wetin God get for mind for this earth and for human being.
a Jehovah na God name. (Psalm 83:18) Read the article wey the title na, “Who Be Jehovah?”