Wetin Bible Talk About Nuclear War?
For this our time e clear say nuclear war fit start anytime. This one na because plenty strong-strong country for this world, get nuclear weapon and them de continue to produce more. This one de make people worry because the more nuclear weapon different-different country de get, the more e go easy for them to use-am start nuclear war. Another thing be say people de fear say if one country use-am small, this one fit make other country use-am take de fight big war. If this kind things happen e go be serious wahala for the whole world. No wonder one book wey them de call Bulletin of the Atomic Scientists talk say, “Na this our time the risk of nuclear war high pass.”
E de possible for nuclear war to start? If e start e go destroy this earth kpatapkata? And wetin go help us make we no over worry about nuclear war? Wetin bible even talk about-am?
For this article we go answer this questions
Bible talk-am down say nuclear war go happen?
Bible no talk-am direct say different-different country go fight nuclear war. But the things wey Bible talk say go de happen and the way people go de behave fit cause nuclear war.
Compare wetin this Bible verse them talk to the things wey de happen for this world today:
Bible verse: Jesus disciples ask-am say: “when this things go happen, and wetin go be the sign say you don dey around and say we dey the last days of this world?” Jesus answer them say: “nation go de fight nation, and kingdom go de fight kingdom.”—Matthew 24:3, 7.
Things wey de happen for this world today: Different-different Country wey get and still de produce nuclear weapon de fight against each.
“For some time now different-different countries de like to fight each other pass before: war don increase well-well.”—The Armed Conflict Location & Event Data Project.
Bible verse: “For the time of the end, the king of the south go struggle with the king of the north.”—Daniel 11:40.
Things wey de happen for the world today: Just as Bible talk, different-different country de drag with each other as them de produce more weapon to make sure say na them get power pass. Na true say the country wey get nuclear weapon pass fit no attack another country direct but them continue to produce nuclear weapon wey get power pass the one wey them get before.
“Since 10 year now, we don see say more country don de fight war against each other. And some country wey get power de support the one wey be their friend.”—The Uppsala Conflict Data Program.
Bible verse: “for last days, serious hard time wey no go dey easy to handle, go dey. People go de . . . them no go want get any agreement with people, go de lie to spoil the name of another person, no go de control theirself, them go really wicked.”—2 Timothy 3:1-3.
Things wey de happen for this world today: Just as many people for this our time no de agree with each other, na so leaders for the world no de agree with each other. And instead make them sofri settle the matter, them go like use force or threaten the other country to surrender. This kind thing fit even lead to nuclear war.
“If we no do our best to make sure say we de work together, war go de bad more-more.”—S. Saran and J. Harman, World Economic Forum.
God go allow nuclear war happen?
Bible no tell us. But e talk say things wey de make people fear, go de happen for our time. (Luke 21:11) One example na when them use Nuclear bomb for the time of world war II. Bible tell us why God allow make war de happen. If you want learn more, watch the video wey the title na Why God Live-am Make Bad Things De Happen?
This Earth go destroy kpatakpata?
No. Even if government for this world use nuclear weapon again, God no go allow them use-am destroy the whole world kpatakpata. Bible no only talk say this world go survive the danger wey e de face now, but e still talk say people go live for this earth forever.
Some people de even imagine say for future, na only some people go dey for this earth de try survive because of Nuclear weapon wey people use destroy the earth. But Bible help us see say, God go repair and remove all the bad things and the damage wey war don cause for this Earth.
God want make we enjoy happy live for Paradise
God do-am make this earth fit de repair e self when something try to damage-am. But time de come, when God go use im power repair the earth, and e go be better place for all of us to stay forever.—Psalm 37:11, 29; Revelation 21:5.
Wetin go help you no over worry about “nuclear war”?
Some people fit de worry or fear because of “nuclear war,” and the “problem wey e fit cause.” The promise and advice for Bible fit help people wey get this kind fear to reduce the fear wey them get for nuclear war, and to fit enjoy normal life. How them fit do-am?
If you learn about the things wey Bible teach about our future, e go be “like anchor for your life” and help you reduce this kind fear-fear. For example, Bible don tell us say better future de wait for this earth and for people. (Hebrews 6:19, footnote) We fit reduce our worry-worry if we no de put mind for wetin fit happen for future, but when we de live our life step by step everyday. Just as Jesus talk, “Every day get im own trouble.”—Matthew 6:34.
E de important well-well make all of us de take care of ourself, so that we go fit de think well and de calm. To fit do this one, we no go too de put ear, read or talk about things wey concern nuclear war and nuclear weapon, wey go fit de make us de over worry. But this one no mean say we go close our ear and our eye to the things wey de happen around us. But e mean say we don choose say we no go de put mind for things wey we no go fit control or wey fit no even happen.
De put mind for the good things wey de happen around you and free yourself from the bad news about things wey de happen for the world.
Bible give us better hope about the future
When you learn about the things wey God promise, e go give you hope, make you happy, and make your mind come down.
When Bible talk about Armageddon na nuclear war e de talk about?
Some people think say when Bible talk about Armageddon say e de talk about the nuclear war wey them go fight for the whole earth. And when them think about the kind problem or wahala wey that kind nuclear war fit cause e de really make them fear.
But na the war between God and the kings for the whole earth or Government for this world Bible de talk about when e de talk about “Armageddon”.a (Revelation 16:14, 16) Armageddon no go destroy people anyhow just the wey nuclear weapon de destroy people and property and cause plenty problem for the whole world. Instead, for Armageddon God go destroy only wicked people and this one go really make peace dey and fear no go dey again.—Psalm 37:9, 10; Isaiah 32:17, 18; Matthew 6:10.
How Bible talk say war go take end?
Jehovahb go use im power make all the country wey de fight war stop to de fight and destroy all their weapon wey them de use fight war. Na im Kingdom e go use do this one. After that one, God Kingdom go start to rule for the whole earth.—Daniel 2:44.
For God Kingdom everybody go learn how to dey in peace with each other. And because na only one government go dey for the whole world, quarrel-quarrel and fight-fight no go dey between country again and people no go learn how to fight war again! (Micah 4:1-3) When this one happen, “Each one of them go sitdown, for e own farm and under e own fig tree, and nobody go make them fear.”—Micah 4:4.
a See the article “Wetin Be the War of Armageddon?” and
b Jehovah na God Personal Name. (Psalm 83:18) still check the article “Who Be Jehovah?”