Serious Problem for Politics Wey Show Say Wetin Bible Talk De Happen

Today, people no de agree for politics matter. Them no de happy when government make law wey them no like and them de vex when them de talk how them de feel about-am. For government, people wey de make law and other people no de gree for each other and them no ready to follow wetin other people talk. This one de cause serious problem and de make-am hard for government to do im work well.

The one wey suppose concern us pass, na the serious problem for politics wey de happen for United States and for Britain (wey them still de call United Kingdom). Why e be like that? Because Bible talk say, na when this serious problem de happen for inside each of this two country, na that time God go use im Kingdom for heaven change the bad condition wey de happen for the earth.

Serious problem for politics wey de happen for the last part of the last days

God use prophet Daniel write one important message about the things wey go happen for the last part of the last days. This things wey Daniel write de talk about wetin go happen for this our time.​—Daniel 2:28.

God show the king of Babylon this things for dream. For the dream, the king see one big image wey them make with different-different metal. After, prophet Daniel explain say from the head of the image go reach the feet, de represent different-different government wey go rule the world, and after sometime, their rulership go end.a Finally, one big stone wey represent God Kingdom or government, go scatter and destroy-am.​—Daniel 2:​36-45.

Wetin prophet Daniel write show say God Kingdom go replace all government for this earth. Na this Kingdom Jesus teach im disciples make them de pray for when e talk say: “Make your Kingdom come.”​—Matthew 6:10.

But where Bible take talk say serious problem go dey for politics? You remember wetin Bible talk about the feet of the image? E talk say, some ‘part na iron and some part na clay.’ (Daniel 2:33) As them make the feet of this image with iron and clay, e make-am dey different from other parts of the image wey them make with different type of metal. This one show say the world power wey the feet of the image de represent go dey different from the other ones. How? Bible talk say:

According to wetin Bible talk, the world power wey the feet of the image de represent go get serious problem for politics. The people wey this world power de rule go make-am hard for-am to continue to dey strong.

How wetin Daniel write de happen for this our time?

The feet of the image represent the government wey get power pass for this our time, wey be United States and Britain as them de join hand do things together. How the things wey de happen now de show say this one na true?

The feet of the image dey weak because them make-am with iron and clay. (Daniel 2:42) Today, the power wey United States and Britain get dey weak because the people wey dey each of this country no de agree with their government. For example, different-different groups for each of this country de get problem with theirself. Another thing be say, people de protest and fight for their right. People wey them put to represent them for government no de agree with each other for different-different matter. Because the people wey them de rule no dey as one, the two government no de fit do wetin them get for mind.

Make we still learn more about wetin prophet Daniel talk, wetin e mean and how e de happen today:

Wetin Bible talk: “Na so the kingdom go take divide. But some part of-am go strong like iron.”​—Daniel 2:41.

Wetin e mean: Even though say United States and Britain get different-different problem for politics wey them de face for their own country, na them get army wey strong pass for the whole world. Because of this one, them fit do things wey fit affect the whole world.

How e take happen

For 2023, the money wey United States and United Kingdom spend alone for their army big pass the money wey other 12 big country spend for their army.​—Stockholm International Peace Research Institute.

“The agreement between the United Kingdom and the United States to protect and defend their country, . . . don become the friendship wey strong pass wey two country don ever get. We de use the latest technology and ideas . . . to work together, to support each other, and fight together.”​—Strategic Command, U.K. Ministry of Defence, April 2024.

Wetin Bible talk: “And as e be say the toes for the leg na iron wey them mix with clay, the kingdom go strong for one way and still weak for another way.”​—Daniel 2:42.

Wetin e mean: Even though say United States army and Britain army strong well-well, them no go fit do everything wey them want because of the way their government be. If most people no agree with the idea wey government get, e fit make-am hard for government to do wetin them want. Them need the support of people for their country to fit do the things wey them plan.

How e take happen

“Different-different party for America government de make-am hard for the United States, to fit do wetin e promise the whole world say e fit do for matter wey concern business and security.”​—“The Wall Street Journal.”

“Britain don get plenty serious problem for politics wey them never get before, and this one de make-am hard for government workers to fit do wetin them get for mind to make things better for the people.”​—Institute for Government.

Wetin Bible talk: ‘The government go mix with the people; but them no go fit join together.’​—Daniel 2:43.

Wetin e mean: For the type of government wey the people for the country de choose who go rule them, the common people get some power to control the government, and this one no de make people for government and other people happy.

How e take happen

“Today, plenty people for America de see government and people for government as bad people.”​—Pew Research Center.

“The way people for Britain trust their government and politicians now don low well-well pass as e be 50 years ago.”​—“National Centre for Social Research.”

How wetin Daniel talk go happen for future

According to wetin Daniel talk, na United States and Britain go de rule when God Kingdom go destroy human being government.​—Daniel 2:44.

For the book of Revelation, Bible show say “the kings for the whole world” go gather together to fight Jehovahb God for the war of Armageddon, this na “the war of the great day of God the Almighty.” (Revelation 16:​14, 16; 19:​19-21) For this war, Jehovah go destroy all the governments for this earth and all the other world powers wey the different-different parts of the image represent wey prophet Daniel talk about.

To learn more, check the article “Wetin Be the War of Armageddon?”

Wetin we fit learn from wetin Daniel talk about the serious problem for politics?

Bible don talk about the serious problem for politics wey de happen for United States and Britain, and if you learn about wetin Bible talk, e go help you know the real reason why all this things de happen.

• E go help you understand why Jesus no want make im disciples put hand for politics matter for this world. (John 17:16) You go still understand why Jesus wey God don choose as King of Im Kingdom talk say: “My Kingdom no be part of this world.”​—John 18:36.

• E go help you dey sure say God Kingdom go soon change everything for this world and bring wonderful blessing for human being just as God don promise.​—Revelation 21:​3, 4.

• You no go fear wetin go happen for future and you no go worry say problem wey dey between governments go destroy the whole world.​—Psalm 37:​11, 29.

Wetin Daniel talk show say United States and Britain de work together. Na them the feet of the image de represent, and na them go be the last world power to rule. The next government na God Kingdom, e dey perfect and e go rule from heaven!

To learn more about wetin God Kingdom go do for human being, watch the video Wetin Be God Kingdom?