Wetin Be the Kingdom of God?
Wetin Bible talk
God Kingdom na real government wey Jehovah don form. For Bible, them still de call “the kingdom of God” the “kingdom wey dey heaven” because this Kingdom go de rule from heaven. (Mark 1:14, 15; Matthew 4:17) God Kingdom resemble human government for different ways, but e better pass human government by far.
Rulers. God don choose Jesus Christ as King of the Kingdom, and e don give-am plenty authority pass the authority wey any human ruler fit get. (Matthew 28:18) Jesus de use im power to do only good things, and e don already prove-am say e be the kind Leader wey de show pity and wey we fit trust. (Matthew 4:23; Mark 1:40, 41; 6:31-34; Luke 7:11-17) God don direct Jesus to choose people wey come from every nation to “rule as kings over the earth” with-am for heaven.—Revelation 5:9, 10.
How long e go rule. God Kingdom no go be like human governments wey de come and go, instead e go last forever and ‘nothing go fit scatter-am.’—Daniel 2:44.
People wey the Kingdom go rule. Anybody wey do wetin God want go dey among the people wey the Kingdom go rule, no matter where the person family come from or where them born-am.—Acts 10:34, 35.
Laws. The laws wey God Kingdom de give people wey e de rule no de only tell them wetin them no go do, instead e still de make the character of the people de better more-more. For example, Bible talk say: “‘You must love Jehovah your God with all your heart and with all your soul and with all your mind.’ This na the first commandment and na im dey important pass. The second one wey be like this one, na: ‘You must love your neighbor as yourself.’” (Matthew 22:37-39) Because the people wey the Kingdom de rule love God and their neighbor, e de make them do things wey de benefit other people.
Education. God no de only give the people wey the Kingdom de rule laws wey them go obey, instead e still de teach them how to obey those laws.—Isaiah 48:17, 18.
Wetin the Kingdom go do. The people wey de rule for the Kingdom no go de enjoy, when the people wey them de rule go de suffer. Instead, na wetin God want them go do, and them go make the earth paradise as God don promise people wey love-am say them go live forever for paradise.—Isaiah 35:1, 5, 6; Matthew 6:10; Revelation 21:1-4.