Wetin the Book of Revelation Mean?
Wetin Bible talk
Many of the things wey dey inside the Bible book of Revelation never happen. E go happen for future. The Greek word for the Bible book of Revelation na, A·po·kaʹly·psis (apocalypse), wey mean to “Know” or “Understand” something. This one help us understand the meaning of Revelation. E de help us understand things wey we no know before, and e talk about things wey go happen long time before e happen.
Wetin dey the of book of Revelation?
Things wey dey the beginning of the Bible book of Revelation.—Revelation 1:1-9.
Message wey Jesus send to seven congregation.—Revelation 1:10–3:22.
Vision about God for im throne for heaven.—Revelation 4:1-11.
Different-different vision wey de come one by one:
Seven seal.—Revelation 5:1–8:6.
Seven angels blow seven trumpet, and the last three trumpet wey them blow show say big trouble de come.—Revelation 8:7–14:20.
Seven bowl wey the punishment of God dey inside wey them go pour ontop the earth.—Revelation 15:1–16:21.
Visions wey show how God go destroy im enemy them.—Revelation 17:1–20:10.
Visions wey show blessing wey God go bring for heaven and earth.—Revelation 20:11–22:5.
How the book of Revelation take end.—Revelation 22:6-21.
Things wey go help us understand the book of Revelation
Many people de fear the book of Revelation because when them hear the word “apocalypse” wey mean Revelation, them de think of big trouble. But no be so e be with people wey de serve God, the book of Revelation de give them hope. The Bible book of Revelation talk for the beginning and the ending say people wey de read wetin dey the book, de understand-am, and de follow wetin e talk go de happy.—Revelation 1:3; 22:7.
The book of Revelation use many “signs” and numbers wey stand for something.—Revelation 1:1.
Plenty of the things wey the book of Revelation talk about dey other place for Bible:
Jehovah—“na the true God for heaven” and na im make everything.—Deuteronomy 4:39; Psalm 103:19; Revelation 4:11; 15:3.
Jesus Christ—na “the Lamb of God.”—John 1:29; Revelation 5:6; 14:1.
Satan wey be Devil—na God enemy.—Genesis 3:14, 15; John 8:44; Revelation 12:9.
Babylon the Great—E just be like Babylon (Babel) for Bible time, na enemy of Jehovah and im people. And na im still be the mama of all lie-lie religion.—Genesis 11:2-9; Isaiah 13:1, 11; Revelation 17:4-6; 18:4, 20.
“The sea”—mean wicked people wey dey against God.—Isaiah 57:20; Revelation 13:1; 21:1.
Things wey them de use worship God for tabernacle for Bible time, like—the ark of agreement, the sea wey be like glass (wey be basin wey them de put water wey them de use wash), lamps, things wey them de use burn incense, and altar wey them de use do sacrifice.—Exodus 25:10, 17, 18; 40:24-32; Revelation 4:5, 6; 5:8; 8:3; 11:19.
The big wicked animal—wey mean government for the world.—Daniel 7:1-8, 17-26; Revelation 13:2, 11; 17:3.
Numbers wey get another meaning.—Revelation 1:20; 8:13; 13:18; 21:16.
The visions wey John see for the book of Revelation start to happen for “the Lord day.” The Lord day start for 1914, the year wey God Kingdom start to rule for heaven and na Jesus be the King. (Revelation 1:10) So the main part for the book of Revelation go happen for this our time.
To understand the book of Revelation, we need the same things wey de help us understand the other part for Bible. This things na sense from God and help from people wey already understand the things wey dey inside Bible.—Acts 8:26-39; James 1:5.