How the Death of Jesus Pay the “Price to Free Plenty People”?
The answer wey Bible give
God use the death of Jesus to save or free people from sin and death. Bible talk say the blood of Jesus na the ransom price wey e pay. (Ephesians 1:7; 1 Peter 1:18, 19) So, Jesus talk say e come “to give e life as sacrifice for plenty people.”—Matthew 20:28, King James Version.
Why they need to give “sacrifice for plenty” people?
When God make the first man, Adam, e no get sin for body. E get the hope to live forever, but e lost that hope when e decide say e no go obey God. (Genesis 3:17-19) When e born children, e transfer the sin to them. (Romans 5:12) As e do this one, Bible talk say Adam “sell” e self and e children to sin and death. (Romans 7:14) Nobody from the children of Adam fit buy back wetin Adam don lost because all of them get sin for body.—Psalm 49:7, 8.
God pity the children of Adam because e see say they no get hope. (John 3:16) But because God de always do the correct thing, e no go just leave their sins like that. (Psalm 89:14; Romans 3:23-26) Because God love people, e arrange how e go forgive their sins, and for future, e go help them make they no sin again. (Romans 5:6-8) Na the death of Jesus be that thing wey e arrange to help them.
How the death of Jesus fit help us?
For Bible, the world “ransom” get three parts:
To pay for something.—Numbers 3:46, 47.
To free or buy something back.—Exodus 21:30.
Na the exact price of wetin they pay for.a
See how the death of Jesus Christ do this three things.
To pay. Bible talk about Christians say “e cost something to buy wuna.” (1 Corinthians 6:20; 7:23) That price na the blood of Jesus, wey e use “to buy people for God from every tribe and language and people and nation.”—Revelation 5:8, 9.
To free. The sacrifice of Jesus “free us from sin.”—1 Corinthians 1:30; Colossians 1:14; Hebrews 9:15.
The exact price. The sacrifice of Jesus na the exact thing wey Adam lost—and that thing na one perfect life. (1 Corinthians 15:21, 22, 45, 46) Bible talk say: “Just as many people become sinner because of one man [Adam] wey disobey, na so many people go become people wey de do wetin right because of one man [Jesus Christ] wey obey.” (Romans 5:19) This one explain how the death of one man fit buy back the death of plenty sinners. The truth be say, the death of Jesus na “the exact price to save everybody” wey do something to gain from this sacrifice.—1 Timothy 2:5, 6.
a For Bible, the word wey they use to translate “ransom” fit mean price, or something wey get value wey they pay for. For example, the Hebrew verb ka·pharʹ mean “cover.” (Genesis 6:14) Sometimes, e fit mean to cover sin. (Psalm 65:3) Another word wey be like this word na koʹpher wey mean the price wey they pay to cover for something or buy back something. (Exodus 21:30) Na the same thing with the Greek word lyʹtron, wey they translate as “ransom,” e fit still mean the “price to buy back something.” (Matthew 20:28; The New Testament in Modern Speech, by R. F. Weymouth) People wey de write for Greek language de use this word when them de talk about the price wey them de pay to free prisoner or to free slave.