Animals De Go Heaven?
Wetin Bible talk
We learn for Bible say out of everything wey God create, na only human being go go heaven, and the ones wey go go no many. (Revelation 14:1, 3) Them go go there go rule as kings and priests with Jesus. (Luke 22:28-30; Revelation 5:9, 10) The plenty-plenty people wey God go bring come back to life, go live for this earth for paradise.—Psalm 37:11, 29.
E no get any place for Bible wey talk say heaven dey for any type of animal—and na for better reason. Animals no fit do the things wey go make them qualify to go heaven. (Hebrews 3:1) Before person qualify, e go need to know God, get faith for-am, and obey im commandments. (Matthew 19:17; John 3:16; 17:3) Na only human being God make to fit live forever.—Genesis 2:16, 17; 3:22, 23.
To fit go heaven, people wey don die must come back to life. (1 Corinthians 15:42) Bible talk about some people wey God don bring come back to life. (1 Kings 17:17-24; 2 Kings 4:32-37; 13:20, 21; Luke 7:11-15; 8:41, 42, 49-56; John 11:38-44; Acts 9:36-42; 20:7-12) But, na human being God bring come back to life, no be animals.
Animals get soul?
No. Bible talk say animals and human being na soul. (Numbers 31:28) When God create the first man, Adam, E no give-am soul but the man “come be soul wey get life.” (Genesis 2:7, footnote) The two things wey make up soul na: “the sand wey dey ground” and the breeze wey God blow for Adam nose wey make-am dey alive.
Soul fit die?
Yes, Bible teach say soul de die. (Leviticus 21:11, footnote; Ezekiel 18:20) When animal and human being die, them go turn to sand for the earth. (Ecclesiastes 3:19, 20) This one mean say, them no dey alive again.
Animal de sin?
No. To sin mean to think, feel, or do something wey dey against God law. For person to sin, e suppose fit know the difference between wetin good and bad, but animals no fit do this one. For the short life wey animals de live, most times, them de do things based on how their body move them. (2 Peter 2:12) Even though say animal no de sin, when time reach for them to die, them go die.
E good to treat animals for bad way?
No. God give human being power to control animals, but e no give them the right to treat them anyhow. (Genesis 1:28; Psalm 8:6-8) God care about the life of every animal—even small-small bird. (Jonah 4:11; Matthew 10:29) E command im servants to show concern for animals.—Exodus 23:12; Deuteronomy 25:4; Proverbs 12:10.