They Think Say Na E Be the Pastor

Osman with e wife and daughter de preach with preaching cart for front of one cemetery for Chile. Na so some group of people reach there. They come bury person for the cemetery and them de play loud music. Some of the people think say na Osman be their church pastor, so they meet-am, hug-am and talk say, “Pastor, thank you as you quick come, we be de expect you!”

Even as Osman de try to make them know say e no be pastor, this people no really hear wetin e de talk because the noise really plenty. Small time after the people enter the cemetery, some of them come back and tell Osman say, “Pastor, we de wait for you inside cemetery.”

As the noise don go down, now Osman fit explain to them who e be and why e dey for there. After the people talk say them de vex for their pastor because e no come, they ask Osman say, “You go like come, to tell everybody some things from the Bible?” Osman agree.

As them de go the place wey they want bury the person, Osman ask them some questions about the person wey don die and e think about some Bible verse wey e fit share with them. When e reach the graveside, e tell all the people who e be and e explain to them say as e be one of Jehovah Witness, e de join the preaching work to share good news with people.

Then e read Revelation 21:3, 4 and John 5:28, 29, and e explain to them say God no ever want make people de die. E tell them say, small time, God go bring people wey don die back to life and they go get the chance to fit live forever for earth. When Osman finish, many of the people hug-am and thank-am for “the message of good news from Jehovah.” After, Osman go back to continue e preaching with the preaching cart.

After the burial, some of the people wey de cry come meet Osman and e family for the preaching cart and they ask them questions about the Bible. They really discuss for long time, and the people collect almost all the books and magazines wey dey for the preaching cart.