The Things Wey John See

When apostle John dey prison for the island wey dey Patmos, Jesus show am things wey go happen for front one by one. The things wey e see reach 16. All of dem show how Jehovah name go take dey holy, how im Kingdom go take come, and how everything wey e get for mind go happen for earth as e be for heaven.

One of the thing wey John see be sey, e see Jehovah for im throne for heaven. The throne fine well well and 24 elders dey around am. Dem wear white cloth and dem wear crown wey dem make with gold for their head. Lightening dey shine for the throne, and thunder follow. The 24 elders bow down to worship Jehovah. John still see many people wey person no fit count. The people come from different different place and dem dey speak different different language. All of them dey worship Jehovah. Jesus Christ wey be the Lamb, come dey carry dem go where water dey. This water dey give life wey no dey end. John come still see sey Jesus and the 24 elders start to dey rule for heaven. E still see Jesus dey fight the dragon wey be Satan, and all im demon. Jesus come drive dem comot for heaven come earth.

John come see one fine picture of the Lamb and the 144,000 people wey go follow am rule. Dem stand for the mountain wey dey Zion for heaven. E still see one angel wey dey fly round the earth. The angel dey tell people sey make dem fear God and praise am.

The next thing wey John see na the war of Armageddon. For the war, Jesus and im soldier win Satan and im people. The last thing wey John come see be sey, peace dey heaven and earth. Dem kill Satan and the people wey dey support am. Everybody for heaven and earth come dey make God name holy, and dem come dey worship only Jehovah.