E Good Make We Pray to Saints?

The answer wey Bible give

No. Bible say make we pray only to God, for the name of Jesus. Jesus tell e disciples say: “Na like this wuna go de pray: Our Papa for heaven, make your name dey holy.” (Matthew 6:9, New American Bible) Jesus no ever tell e disciples say make them de pray to saints, angels, or any person, but only to God.

Jesus still tell e disciples say: “I be the road, the truth, and the life. Nobody fit come meet the Father if e no pass through me.” (John 14:6, NAB) Na only Jesus get the right to beg God for us.—Hebrews 7:25.

What if I pray to God and still de pray to saints?

For the Ten Commandments, wey God give Israel people, e talk say: “Me, the LORD, your God, I be jealous God.” (Exodus 20:5, NAB) Wetin Bible mean when e talk say God dey “jealous”? The footnote for the New American Bible talk say God want make we “worship only-am.” God want make we give-am all our worship—even our prayer.—Isaiah 48:11.

We de make God vex when we pray to other people, even to saints or holy angels. When apostle John try to worship one angel, the angel stop John and talk say: “No do-am! Like you, I be servant for you and your brothers wey de talk about Jesus. Worship God.”—Revelation 19:10, NAB.