Why They Kill Plenty People for Europe? And Why God No Stop-Am?
Plenty people wey de ask this question don suffer plenty things and they want comfort. Other people talk say as they kill plenty people for Europe (Holocaust), na the most wicked thing wey people don ever do before and this one de make-am hard for them to believe say God dey.
Wrong ideas about God and the way they kill plenty people for Europe that time
The truth: People wey get strong faith don ask God why e de allow make bad things happen. For example, prophet Habakkuk ask God say: “Why you allow make people everywhere de fight, no de obey law, de do bad thing and dey wicked?” (Habakkuk 1:3, Contemporary English Version) God no vex for Habakkuk, instead e allow make they write the questions wey e ask for Bible so that we fit read-am.
The truth: God no like wicked people and the suffer wey them de cause. (Proverbs 6:16-19) For the time of Noah, God “really feel pain for heart” because of the wicked things wey people de do for the earth. (Genesis 6:5, 6) So e clear say, God really feel pain when they kill plenty people for Europe that time.—Malachi 3:6.
The truth: God allow make Rome people destroy Jerusalem for the time of the apostles. (Matthew 23:37–24:2) But since that time, God no de show special favor or punish people wey come from any particular place. For God, “Jew people no dey different from people for other nations.”—Romans 10:12, Good News Translation.
The truth: Even though say God no de ever make us suffer, sometimes e de allow make we suffer for short time.—James 1:13; 5:11.
Why God allow make they kill plenty people for Europe that time?
God allow make they kill plenty people for Europe that time for the same reason wey e allow make people de suffer today: to answer some important questions wey they don ask for long time. Bible show-am clear say na Devil de rule this world now, no be God. (Luke 4:1, 2, 6; John 12:31) Two important truths from Bible fit explain why God allow make they kill plenty people for Europe.
God make people with freedom to choose. God tell the first people for this earth, Adam and Eve, wetin e want make they do, but e no force them make they obey. They decide to choose wetin good and wetin bad for theirself, and their bad decisions with the bad decisions wey people de make today don bring plenty trouble for people. (Genesis 2:17; 3:6; Romans 5:12) As the book Statement of Principles of Conservative Judaism talk: “Plenty of the suffer wey people de suffer for this world today na because people no use the freedom wey God give them to choose well.” Instead make God take back the freedom, God don give people time to rule theirself.
God get the power to remove all the suffer wey the plenty killing don cause and e go do-am. God don promise to bring plenty-plenty people back to life, even the ones wey they kill for Europe. God go remove the pain wey people wey survive the plenty killing wey happen for Europe de feel as them de remember how e happen. (Isaiah 65:17; Acts 24:15) The love wey God get for us de make us dey sure say e go do all this things wey e don promise.—John 3:16.
Plenty people wey survive the killings wey happen for Europe don make their faith strong and get meaning for life because they understand why God allow make bad things de happen and wetin God go do to remove-am.