Bible Fit Help You Cope With Serious Sickness Wey No Gree Go?

The answer wey Bible give

Yes. When servants of God de sick, e de care for them. Bible talk about one faithful servant of God say: “Jehovah go help the person when e dey for e sickbed.” (Psalm 41:3) If you get any serious sickness and e no gree go, this three things wey we go talk for under go comfort you:

1. Pray make God give you power to endure. You fit get “the peace wey God de give” wey “pass anything wey person fit understand,” and this peace go help you cope with your situation.—Philippians 4:6, 7.

2. De think about good things. Bible talk say: “When you always dey happy, e de make your body strong. But to dey sad all the time, e de kill small-small.” (Proverbs 17:22, Good News Translation) Try de laugh about your situation, because this one fit make you no dey sad again and fit make your body strong.

3. Get hope say wetin God promise about the future go happen. If you get better hope for the future, e fit give you joy even as you get serious sickness. (Romans 12:12) Bible talk say time de come when ‘nobody go talk say: “I de sick.”’(Isaiah 33:24) God go cure all the serious sickness wey doctors today no fit cure. Bible talk say old people go young again and their body go strong again. E talk say: “Make e body fresh pass when e dey young. Make e go back to the time when e dey young and get power.”—Job 33:25.

Know say: Even as Jehovah Witness people agree say God de help person when e de sick, we still de go hospital for treatment when we get serious sickness. (Mark 2:17) But we no de force people make them take one particular treatment when them de sick; na each person go make e decision about which treatment e want when e de sick.