Study Book for Our Life and Preaching Meeting
MAY 6-12
FINE-FINE LESSON FROM BIBLE | 2 CORINTHIANS 4-6
“We Go Endure Reach the End”
(2 Corinthians 4:16) Because of this one, we go continue to endure. Even though our body de old and de weak, the truth be say the kind person wey we be for inside de receive new power every day.
w04 8/15 25 ¶16-17
Even If We Tire, We Go Endure
16 E really dey important make our friendship with Jehovah dey strong. But sometimes, person wey e really love Jehovah fit tire, but e no go ever tire to worship Jehovah. Na Jehovah de “give power to person wey e don tire. And e de make person wey e don weak, really get power.” (Isaiah 40:28, 29) Apostle Paul receive this kind help from Jehovah, and e talk say: “We go continue to endure. Even though our body de old and de weak, the truth be say the kind person wey we be for inside de receive new power every day.”—2 Corinthians 4:16.
17 This word, “every day” for this Bible verse, show say every day, we must use things wey Jehovah don give us. One sister wey e don do missionary work for 43 years talk how e manage endure when e body tire and e no de enjoy e work again. E talk say: “I don make-am part of my life to get up early morning so that before I start any work, I go pray and read Bible. As I de do this one every day, e don really help me endure till now.” If we always pray to Jehovah, and de think about the kind God wey e be and things wey e promise us, we dey sure say Jehovah go continue de give us power “every day.”
(2 Corinthians 4:17) Even though the problem wey we de face na only for short time and e small, e go make us get blessing wey we no fit compare with anything and this blessing go last forever.
it-1 724-725
De Endure
E still dey important make we no ever forget the hope say for future, we go get everlasting life, and body wey e no get sin. Even if people kill us because we de worship Jehovah, they no fit kill our hope. (Ro 5:4, 5; 1Th 1:3; Re 2:10) When we compare things wey we de suffer now with the fine hope wey we get, we go see say the suffer no reach anything at all. (Ro 8:18-25) When we think about the everlasting life wey we go get, anything wey we de suffer now, even if e serious, e no go be anything. (2Co 4:16-18) If person remember say problem no de last, and say hope dey for servants of Jehovah, e go fit endure any problem. And e no go ever do wetin go make Jehovah vex.
(2 Corinthians 4:18) So, we de think about things wey we never see, no be things wey we de see. Because things wey we de see no de last, but things wey we never see go last forever.
Fine-Fine Things Wey You See for Bible
(2 Corinthians 4:7) But we get this better thing inside clay pot, to show say power wey e pass normal power na from God, no be from us.
w12 2/1 28-29
“Make Jehovah Glad”
Brother David Splane na member of Governing Body and e explain this verse. (2 Corinthians 4:7) E ask say: “Wetin be this better thing? Na something wey person don learn or na deep sense wey person get? E answer say “No.” “The better thing wey Paul de talk about na the preaching work wey we de use teach people the truth.” (2 Corinthians 4:1, 2, 5) Brother Splane tell all the student say the five month wey they use study na to prepare them for the work wey they go do for future. They no go take this work play.
E talk say the “clay pot” na our body. E talk how pot wey they use clay make different from the one wey they use gold make. No be every time people de use pot wey they make with gold. But na pot wey they make with clay, people de really use. If we put better thing for inside pot wey they use gold make-am, we fit de think more about the pot, instead of the better thing wey e dey inside the pot. Then Brother Splane tell all the student say: “Make wuna no do over-sabi. As missionary, wuna be like clay pot, so make wuna de direct people to Jehovah.”
(2 Corinthians 6:13) So I de talk with wuna like my children, make wuna treat us the way we treat wuna, make wuna really open wuna heart.
w09 11/15 21 ¶7
Make Your Love for Your Brothers Continue to De Strong
7 What about us? How we fit “really open our heart” to show our brothers love? E easy for people of the same age or wey they come from the same tribe to be friend. And e dey easy for people wey they like to play the same game and sport to spend time together. But if things wey we and some brothers de like, de separate us from other brothers, we really need to “open our heart.” E go good make we ask ourself say: ‘E de hard me to preach with or enjoy good time with brothers and sisters wey they no dey close to me? For Kingdom Hall, e de hard me to do things with new people, because I believe say they must work hard before they fit be my friend? I de greet old people and young people for Kingdom Hall?’
MAY 13-19
FINE-FINE LESSON FROM BIBLE | 2 CORINTHIANS 7-10
“We De Help Brothers and Sisters When They Get Trouble”
(2 Corinthians 8:1-3) And now brothers, we want tell wuna about the things wey the congregations for Macedonia do because of the favor wey they receive from God. 2 Even with serious test of faith and suffer, they show say they really get joy and open-hand even though they really poor. 3 They give everything wey they fit give, yes, I go fit talk say they even give pass wetin they get.
w98 11/1 25 ¶1
“God Love Person wey E Get Open-hand”
Paul first tell the brothers for Corinth about brothers for Macedonia. E talk about the fine example wey this brothers show as they use all their heart support brothers for Jerusalem. Paul talk say: “Even with serious test of faith and suffer, they show say they really get joy and open-hand even though they really poor.” They no force this brothers make they contribute. Na e make Paul talk say: “They no force them, but they use all their heart de beg us make they get the honor to fit give, and to join help the holy ones.” The one wey de touch person pass be say even as they “really poor,” they still de happy to give.—2 Corinthians 8:2-4.
kr 209 ¶1
We De Help Brothers and Sisters When They Get Trouble
The year na around 46 C.E., food no really dey for Judea. Some disciples de live for there, and they be Jews. Na small food dey, and the prize really high. Because of this one, they no fit buy food. So, when you see them, you go know say hunger don really suffer them. But small time, Jehovah go show them say e still de care for them. E go protect them as e never protect the disciples before. So wetin Jehovah go do?
(2 Corinthians 8:4) And they no force them, but they use all their heart de beg us make they get the honor to fit give, and to join help the holy ones.
kr 209-210 ¶4-6
We De Help Brothers and Sisters When They Get Trouble
4 For e second letter to the brothers for Corinth, Paul explain say Christians de do two main work. Na true say, na anointed Christians Paul write to, but the letter still concern the “other sheep.” (John 10:16) One part of our work na “the work wey we de do to bring people back to God.” And this one na our preaching and teaching work. (2 Cor. 5:18-20; 1 Tim. 2:3-6) The other part na the work wey we de do to help our brothers. For this letter, Paul talk about the work wey we de do to help our brothers. (2 Cor. 8:4) We don first talk about “work wey we de do to bring people back to God” and “work wey we de do to help our brothers.” The “work” for this two word, come from the Greek word, di·a·ko·niʹa. Why e dey important?
5 As Paul use this Greek word for the two work wey Christians de do, e mean say Paul add the work wey we de do for our brothers with other work wey we de do for congregation. Paul don first talk say: ‘Different-different work dey, but we get only one Lord; and different-different things dey, wey God de help people do.’ (1 Cor. 12:4-6, 11) In short, Paul connect all the work wey congregation de do to our worship of Jehovah. (Rom. 12:1, 6-8) Na e make Paul feel say na important thing for him to use part of e time, “work for the holy ones.”—Rom. 15:25, 26.
6 Paul help Christians for Corinth see say to help brothers and sisters na part of their work and worship to Jehovah. E talk say Christians de do this one because they want obey the good news about Jesus Christ. (2 Cor. 9:13) So, them de help their Christian brothers and sisters because they want do wetin Jesus teach them. This good things wey they do for their brothers and sisters, de show the brothers say Jehovah really love them. (2 Cor. 9:14; 1 Pet. 4:10) Na e make when the December 1, 1975 Watchtower de talk about to help our brothers wey they need help especially for time of trouble, e talk say: “Make we no ever doubt-am say Jehovah and Jesus de see this kind work as work wey e really dey important.” True-true to help our brothers for time of trouble, na fine way to worship God.—Rom. 12:1, 7; 2 Cor. 8:7; Heb. 13:16.
(2 Corinthians 9:7) Make each person do just as e decide for e heart, make e no complain or do-am by force, because God love person wey e de glad as e de give.
kr 196 ¶10
How We De Get Money Wey We De Use for Our Work?
10 First, we de contribute money because we love Jehovah and we want do wetin e like. (1 John 3:22) When servant of Jehovah give with all e heart, Jehovah de happy with the person. Make we see wetin Paul talk about how Christians suppose de give. (Read 2 Corinthians 9:7.) They no de force true Christian make e give and e no de complain when e de give. But e de give because e don “decide for e heart” to do-am. This one mean say before e give, e go first think about the problem, and how e go solve-am. This kind person dey special to Jehovah. Bible talk say, “God love person wey e de glad as e de give.” Another Bible translation talk say: “God love people wey they love to give.”
Fine-Fine Things Wey You See for Bible
(2 Corinthians 9:15) Make we thank God for e free gift wey we no know how we go describe-am.
w16.01 12 ¶2
Show Say You Really Like the Free Gift From God
2 Paul know say because Jesus Christ die for our sin, all the good things wey Jehovah don promise us go surely happen. (Read 2 Corinthians 1:20.) So this “free gift wey we no know how we go describe-am,” na the death of Jesus Christ, and all the blessing wey we de get from Jehovah. The gift really good sotey nobody fit really describe-am. Wetin this special gift go make us do? Wetin we go do to show say this gift really touch our heart as we de prepare for Memorial on Wednesday, March 23, 2016?
(2 Corinthians 10:17) “But if anybody de proud, make e de proud because of Jehovah.”
g99 7/8 20-21
E Bad Make Person De Proud?
For the part of Bible wey they write for apostles their time, they use the word kau·khaʹo·mai. When they translate this word, e mean, “to de proud, de happy or de boast. They fit use this word for good way and for bad way. For example, Paul tell brothers for Rome say make they “happy” because God go bless them for future. E still talk say: “If anybody de proud, make e de proud because of Jehovah.” (Romans 5:2; 2 Corinthians 10:17) This one mean say we go de proud say Jehovah na our God. This one go make us happy for e good name and the kind God wey e be.
MAY 20-26
FINE-FINE LESSON FROM BIBLE | 2 CORINTHIANS 11-13
“Problem Wey E Be Like Chuku-Chuku for Paul”
(2 Corinthians 12:7) because of the plenty wonderful things wey the Lord show me. So that I no go de too proud, they give me chuku-chuku for body, one angel of Satan make e de slap me, so that I no go over proud.
w08 6/15 3-4
Jehovah Make Paul Strong
Apostle Paul na another person wey e worship Jehovah well. But e get problem wey be like chuku-chuku for e body. Bible no talk wetin this problem be. But like chuku-chuku, the problem go don affect the joy wey Paul de get as e de worship Jehovah. Paul even talk say e just be like say person de slap him. So e beg Jehovah three times to remove the problem. Jehovah answer Paul say: “My favor dey enough for you, because I de give you complete power when you dey weak.” Jehovah no remove the problem. But e leave-am make Paul continue to struggle with-am. Na e make Paul talk say: “When I dey weak, na that time I de get power.” (2 Cor. 12:7-10) Wetin this one mean?
(2 Corinthians 12:8, 9) Because of this one, I beg the Lord three times make e remove the chuku-chuku. 9 But e tell me say: “My favor dey enough for you, because I de give you complete power when you dey weak.” So, I de proud to talk say I dey weak, so that the power of Christ go still cover me like tent.
w06 12/15 24 ¶17-18
When We Beg Jehovah for Holy Spirit, E Go Give Us
17 When Paul pray about e problem, Jehovah tell Paul say: “My favor dey enough for you, because I de give you complete power when you dey weak.” Then Paul talk say: “So, I de proud to talk say I dey weak, so that the power of Christ go still cover me like tent.” (2 Corinthians 12:9; Psalm 147:5) So Jehovah use Jesus protect Paul, just as tent de protect person when rain de fall or breeze de blow. Na the same way Jehovah de answer our prayer, today. E de protect us the way tent de protect person.
18 Na true say, tent no de stop rain make e no fall or make breeze no blow, but e fit protect person from this things. Na so e still be with the way “the power of Christ” de protect us. E no go stop problem or other bad things make they no happen. But e de protect us from Satan and anything for this world wey e fit spoil our friendship with Jehovah. (Revelation 7:9, 15, 16) So, even if you get problem, and the problem no gree leave you, make you dey sure say Jehovah know how you de struggle with the problem. And make you know say Jehovah don do something to help you. (Isaiah 30:19; 2 Corinthians 1:3, 4) Paul write say: “God no de fail, and e no go allow the temptation pass wuna power. But as the temptation de come, e go help wuna make wuna fit endure-am.”—1 Corinthians 10:13; Philippians 4:6, 7.
(2 Corinthians 12:10) So, because of Jesus Christ, I de enjoy-am when I dey weak, when people de insult me, when I no get things wey I need, when people de suffer me, and when things hard for me. Because when I dey weak, na that time I de get power.
w18.01 9 ¶8-9
“Jehovah De Give Power to Person Wey E Don Tire”
8 Read Isaiah 40:30. No matter how we think say we strong, e still get things wey we no fit do with our own power. This one na one thing wey all servant of God must know. Paul na strong man, but e still get problem. This problem no allow Paul do everything wey e be want do. E pray to God about e problem, but God tell Paul say: “I de give you complete power when you dey weak.” Paul understand wetin God talk, and e talk say: “When I dey weak, na that time I de get power.” (2 Cor. 12:7-10) Wetin Paul mean?
9 Paul see say if God no help him, e no go fit do plenty things. Na the holy spirit go fit give Paul the power wey e need. No be only that one, the holy spirit fit still give Paul the power to complete work wey e for no fit finish with e own power. Na the same thing with us today. If the power wey we get na from Jehovah, we go really dey strong!
Fine-Fine Things Wey You See for Bible
(2 Corinthians 12:2-4) I know one man 14 years ago and na follower of Christ wey they carry go the third heaven. Whether e go with e body or e no go with e body, I no know, but God know. 3 Yes, I know the man—whether e go with e body or e no go with e body, I no know but God know— 4 wey they carry go paradise and e hear words wey person no fit talk and wey man no suppose talk about.
Question Wey Some People Don Ask
“The third heaven” wey 2 Corinthians 12:2 talk about fit be the Kingdom of God wey Jesus Christ and the 144,000 go rule, and na the “new heavens.”—2 Pet. 3:13.
Bible call-am “the third heaven” because the Kingdom na the kind of government wey e high pass.
The “paradise” wey “they carry” Paul go for the vision fit be (1) the Paradise wey e de come for this earth, (2) the spiritual paradise wey e go dey for new world, this one go big pass the spiritual paradise wey we get now, and (3) “the paradise of God” for heaven wey e go dey together for the same time with the other two paradise for new world.
(2 Corinthians 13:12) Make wuna greet each other with holy kiss.
it-2 177
Kiss
“Holy Kiss.” For the apostles time, the congregation de greet with “holy kiss” (Ro 16:16; 1Co 16:20; 2Co 13:12; 1Th 5:26) or “kiss of love.” (1Pe 5:14) E fit be say woman go kiss woman and man go kiss man. Hebrew people before the time of Jesus de greet with kiss. E fit be say na this style of greeting the congregation that time, de follow. Bible no talk plenty things about this greeting. But this “holy kiss” or “kiss of love,” de show the kind love and unity wey e dey the congregation that time.—Joh 13:34, 35.
MAY 27–JUNE 2
FINE-FINE LESSON FROM BIBLE | GALATIANS 1-3
“Paul Correct Peter”
(Galatians 2:11-13) But, when Ce′phas come Antioch, I correct Ce′phas for e front because wetin e de do no good. 12 Before some people wey James send, come, e de eat with people wey no be Jew; but when they come, e stop to de eat with them and e stop to de do things with them because e de fear people wey talk say person must circumcise. 13 The other Jews still join Ce′phas de pretend, and this one even make Bar′na·bas join them de pretend.
w17.04 27 ¶16
You Go Follow the Way Jehovah De Judge?
16 Read Galatians 2:11-14. Peter start to fear because of wetin people fit talk. (Prov. 29:25) Peter know the way Jehovah de feel about the Christians wey they no be Jew. But, e start to fear say the Christians wey they be Jews and wey come from Jerusalem, no go respect him again because e de do things with Christians wey they no be Jews. Apostle Paul tell Peter say wetin e de do no good because e de pretend. Why? Because for the meeting wey they do for Jerusalem, for 49 C.E, Paul dey there when Peter de defend Christians wey they no be Jews. (Acts 15:12; Gal. 2:13, ftn.) Wetin this brothers go do as Peter do this kind thing? They go allow this mistake wey Peter make stop them to worship Jehovah? As Peter make this mistake, e go still continue to be apostle?
(Galatians 2:14) But when I see say, they no de follow the truth wey we learn from the good news, for front of everybody I tell Ce′phas say: “If you, wey you be Jew de do like people of the nations and no be like Jew people, so why you want make people wey they no be Jew do like Jew people?”
w13 3/15 5 ¶12
If We Love Jehovah, Nothing Go Make Us Leave Him
12 Peter make some mistakes because e de fear people, but e no leave Jehovah and Jesus. For example, Peter deny Jesus three time for public. (Luke 22:54-62) Another time, Peter no behave like Christian. E treat Christians wey they be Jew like say they better pass Christians wey they no be Jew. But, apostle Paul know say this kind thing no good. E know say nobody better pass another person for congregation. The way Peter behave really bad. Na e make Paul no waste time to correct Peter, so that this kind thing no go spoil the congregation. (Gal. 2:11-14) Peter vex because of this one, and stop to worship Jehovah? No! E take time think about wetin Paul talk, e do the correct thing, and e continue de worship Jehovah.
Fine-Fine Things Wey You See for Bible
(Galatians 2:20) They nail me and Christ for the same torture stake. So, I no de live for myself again, but I de live my life to show say me and Christ na one. True-true, na my faith for the Son of God, I de use live my life now, because e love me and sacrifice e life for me.
w14 9/15 16 ¶20-21
Worship Jehovah Well Even If ‘Problem Plenty’
20 What about problem wey e no de come direct? Wetin we go do when we no de happy again as we de worship Jehovah? One important way to handle this problem na to de think about the sacrifice of Jesus. Na the same thing Paul do. Sometimes, Paul de feel say e dey useless. But e know say Jesus die for sinners, no be perfect people. And Paul na one of this sinners. Na e make Paul write say: “Na my faith for the Son of God, I de use live my life now, because e love me and sacrifice e life for me” (Gal. 2:20) True-true, Paul accept this sacrifice. E know say Jesus die for him.
21 You too go really gain if you understand say Jehovah don give you special gift as e allow Jesus die for you. This one no mean say the way we de feel go just stop. Some of us go continue de struggle with this problem until we enter paradise. But no forget say: Jehovah go bless us if we no leave him. The time wey the Kingdom go come, don really near. Na that Kingdom, go bring peace and make all the people wey they worship Jehovah well, dey perfect. Decide for your heart say, you go enter the Kingdom of God even if your problem plenty.
(Galatians 3:1) Galatia people, wuna no get sense! Na who deceive wuna like this, after we don describe to wuna the way they nail Jesus Christ for torture stake?
it-1 880
Letter to the Congregations for Galatia
For this verse, Paul talk say Galatia people no get sense. But this one no mean say na only one tribe wey e come from the North side of Galatia, Paul get for mind. (Ga 3:1) But, na some brothers for the Galatia congregations Paul de vex for. Why e de vex for them? Na because they start de believe wetin some Jew people for their congregations de teach. This Jews de want prove say, they righteous because them de follow the Law of Moses. They no gree say na their faith for Jesus go make them righteous. (2:15–3:14; 4:9, 10) For “the congregations of Galatia” (1:2) wey Paul be write letter to, they get Jew people and People wey they no be Jew. Some of this people wey they no be Jew, don first circumcise and change to Jew religion before they become Christians. The rest na people wey they no circumcise before they become Christian and some of them come from Western Europe. (Ac 13:14, 43; 16:1; Ga 5:2) Na all of them, be the Christians for Galatia because Galatia na the name of the area wey them de stay. For the whole letter wey Paul write, e clear say e write to brothers wey e really know for the south part wey Rome government de control. E no write to people for the north side because e fit be say e no ever go the north side.