Study Book for Our Life and Preaching Meeting
JANUARY 6-12
FINE-FINE LESSON FROM BIBLE | GENESIS 1-2
“Na Jehovah Make Everything for This Earth”
(Genesis 1:3, 4) So God talk say: “Make light dey.” Then light come dey. 4 After this one, God see say the light good, and small-small God separate light from darkness.
(Genesis 1:6) Then God talk say: “Make the water divide into two part, and make big space dey between the two water.”
(Genesis 1:9) Then God talk say: “Make the water wey dey under the sky, gather for one place, and make dry land appear.” And na so e happen.
(Genesis 1:11) Then God talk say: “Make the earth make grass grow, and make plant wey de produce seed and tree wey de produce fruit, grow according to their type. Make them de produce fruit and seed for the earth.” And na so e happen.
it-1 527-528
Na Jehovah Make Everything
When God talk for Day One say, “Make light dey,” cloud still cover the whole earth. But e clear say the light pass the cloud reach this earth. If person be dey this earth that time, e go see say everywhere bright but e no go know where the light de come from. E be like say the light come small-small as one translator wey e name na J. W. Watts, write-am. E talk say: “And small-small, light come dey.” (Ge 1:3, A Distinctive Translation of Genesis) Then God separate the light and the darkness. E call the light Day, and darkness Night. This one de show say the earth de turn as e de go round the sun, so that half of the earth, wey face the sun that time, go enjoy light but the other part go dey for darkness.—Ge 1:3, 4.
For Day Two, God divide the water for this earth into two part, and e make big space dey between the two water. E make one part of the water go up and e leave the other part for this earth. The water wey God raise go up really plenty pass the one wey e leave for down. God call the space wey dey between the water, Heaven or Sky. We know say this heaven na sky, because Bible no talk say the water wey God raise go up, cover the stars, moon, sun and other planets.—Ge 1:6-8; see EXPANSE.
For Day Three, God use e power make all water for this earth gather together and dry land come out. Then God call the dry land, Earth. Na that same day God put life for things inside ground, and that one make tree wey de bear fruit, grass and other plant, start to grow. This things no come on their own or happen by chance. And God still make them fit produce other ones wey be like them.—Ge 1:9-13.
(Genesis 1:14) Then God talk say: “Make things wey de produce light, dey for the sky to separate day time and night time, and them go dey there to show different-different season, days and years.
(Genesis 1:20) Then God talk say: “Make plenty things wey get life full the water, and make things wey de fly, start de fly for up, for the sky.”
(Genesis 1:24) Then God talk say: “Make the earth produce different-different things wey get life, kind by kind. Animal wey de stay with people, animal wey de creep for ground and animal wey de stay for bush. Make them dey kind by kind.” And na so e happen.
(Genesis 1:27) So, God make man for e image, na for e image e make man; and na man and woman e make.
it-1 528 ¶5-8
Na Jehovah Make Everything
E good make we know say the Hebrew word wey they use for Genesis 1:16 na ʽa·sahʹ and e mean “to make something.” This one show say Jehovah don already make the sun, the moon, and stars before Day Four. But na that day, Jehovah “make” the light from sun, moon and stars, shine direct for this earth. Bible talk say, ‘God put the sun, moon and stars for the sky to shine ontop this earth.’ This one show say if person be dey earth that time, e go fit see the sun, moon and stars, like say na sky them dey. And God still put them there as sign “to show different-different season, days and years.” And after God make man, this things help man know the correct time to do things.—Ge 1:14.
For Day Five, God make things wey de fly and things wey de live inside water. God no make one thing wey go later change to other things, but na plenty different-different things God use e power make. Bible talk say: “God make big-big animal for inside sea and everything wey de waka and swim inside water, kind by kind, and everything wey de fly, kind by kind.” God really happy for the things wey e make, so e bless them and talk say make them “plenty.” This one fit happen because, God don give all this different-different things wey e make, the power to fit born.—Ge 1:20-23.
For Day Six, “God make the animals wey de stay for bush, kind by kind, and the animal wey de stay with people, kind by kind, and all the animal wey de creep for ground, kind by kind.” And just like other things wey God don make, this one still good.—Ge 1:24, 25.
Near the end of Day Six, God make something wey different from other things wey e don make for this earth. E make man, and man high pass animals. But angels high pass man. God make man for e image. Genesis 1:27 just talk say God make man and woman. But another Bible verse wey talk about this matter na Genesis 2:7-9. For there, Bible show say Jehovah use dust from ground make man and blow the breath of life inside e nose, and the man come be living person. And God put the man for fine place wey get different-different kind of food. This verse make-am clear say God use things from this earth make man. And after, God make woman from man. The main thing wey God use make the woman na rib from Adam. (Ge 2:18-25) As God make woman, na that time, the family of man complete, because man and woman fit come together and born their own children.—Ge 5:1, 2.
Fine-Fine Things Wey You See for Bible
(Genesis 1:1) For the beginning, God make heaven and earth.
w15 6/1 5
How Science Don Help You?
How many years this earth, sun and other planet dey?
Science people talk say this earth dey around 4 billion years, and say the sun and other planet dey around 13 to 14 billion years. But Bible no talk the date wey Jehovah make the sun and other planet. E no talk how many years this earth dey, whether na some years or plenty thousand years. The first verse for Bible talk say: “For the beginning, God make heaven and earth.” (Genesis 1:1) So this one give science people freedom to decide how many years the earth dey according to wetin they don study.
(Genesis 1:26) Then God talk say: “Make we make man for our image, to be like us, and make e dey in charge of the fish for sea, the things wey de fly for up, animals wey de stay with people, and all the animal wey de creep for ground. And make e dey in charge of the whole earth.”
it-2 52
Jesus Christ
Jesus no be Creator like Jehovah. Because Jesus join Jehovah make things, no mean say Jesus na creator. The power to make things na from God through e holy spirit. (Ge 1:2; Ps 33:6) And since na Jehovah dey give life, the life of everything come from Jehovah. From the smallest ant go reach the angel wey get power pass. (Ps 36:9) So, Jesus no be Creator, na Jehovah be Creator. But Jehovah use Jesus when e de make other things. Jesus talk by e self say na Jehovah make everything, and na so Bible still talk-am.—Mt 19:4-6; see CREATION.
JANUARY 13-19
FINE-FINE LESSON FROM BIBLE | GENESIS 3-5
“The Bad Result of the First Lie”
(Genesis 3:1-5) For all the animal wey Jehovah make, na the snake dey careful pass. So e tell the woman say: “God really talk say make wuna no chop fruit from all tree for the garden?” 2 So the woman tell the snake say: “We fit chop fruit from the trees for the garden. 3 But for the fruit of the tree wey dey middle of the garden, God talk say: ‘Make wuna no chop-am, no, make wuna no touch-am, if wuna chop-am, wuna go die.’” 4 So the snake tell the woman say: “Wuna no go die at all. 5 Because God know say the day wey wuna chop-am, wuna eye go open and wuna go be like God, wuna go know good and bad.”
w17.02 5 ¶9
Wetin Jehovah Get for Mind Must Happen!
9 Satan use snake deceive Eve to disobey Jehovah. (Read Genesis 3:1-5; Rev. 12:9) E ask Eve say: “God really talk say make wuna no chop fruit from all tree for the garden?” E just be like say e de tell Eve say, ‘God no want make wuna do wetin wuna like.’ Then, e lie say: “Wuna no go die at all.” E still give Eve reason to disobey God. E talk say: “God know say the day wey wuna chop-am, wuna eye go open.” Wetin Satan talk, mean say Jehovah no want make they chop the fruit because if they chop-am, they go get sense like God. Satan even promise say: “Wuna go be like God, wuna go know good and bad.” But this one na big lie!
(Genesis 3:6) So, the woman see say the tree good for food and na something wey fine for eye, yes, the tree fine to look. So, the woman come de take the fruit de chop-am. Later, e give some of the fruit to e husband when them dey together, and e husband come de chop-am.
w00 11/15 25-26
We Fit Learn From Adam and Eve
Eve for fit avoid this sin? Yes! Just imagine say you be Eve. How you go feel if stranger tell you say person wey you love and trust, de lie? Wetin the snake talk na complete opposite of wetin God and Adam talk. So wetin Eve for do? E suppose believe the snake? E for vex and no listen to the snake. After all, who the snake be to talk say Jehovah and Adam de lie? If Eve be really see Adam as head of the family, e for talk with Adam first, before e decide wetin e go do. So, make we always remember this one, if we hear something wey dey different from wetin we don learn about Jehovah. But Eve believe wetin the snake talk. E really want get power to decide wetin good and wetin bad, by e self. The more e de think about-am, the more e de like-am. See the kind mistake wey Eve make as e continue de think about this bad thing! E for stop to think about-am or talk the matter with Adam, wey be head of the family.—1 Corinthians 11:3; James 1:14, 15.
Adam Do Wetin E Wife Talk
Small time, Eve make Adam join for the sin. Why Adam Join Eve for this sin? (Genesis 3:6, 17) One problem wey Adam be face na, ‘which person side e go stand?’ E go obey Jehovah wey give-am everything, even this woman wey e love? E go ask Jehovah for help? Or e go join e wife? Adam know say the thing wey Eve de think say go happen when e chop the fruit, no go ever happen. Na e make apostle Paul write say: ‘Satan no deceive Adam, but e really deceive the woman and the woman come be sinner.’ (1 Timothy 2:14) So, Adam know say wetin e want do na sin, but e still do-am. The love wey e get for e wife really strong pass the faith wey e get say Jehovah fit handle the problem.
(Genesis 3:15-19) I go make you and the woman be enemy. And your pikin and e pikin go still be enemy. E go scatter your head and you go bite e heel.” 16 Then e tell the woman say: “I go really increase the pain wey you de feel when you get belle; and you go feel pain when you de born, and e go de hungry you to dey with your husband, and your husband go de control you.” 17 And e tell Adam say: “Because you do wetin your wife talk and you chop from the tree wey I first tell you say, ‘Make you no chop from,’ I don curse the ground because of you. You go really suffer before you chop the things wey ground go produce, all your life. 18 E go produce chuku-chuku and grass for you, and you must chop the things wey ground produce. 19 You go sweat before you get food wey you go chop until you go back to ground, because na from ground I make you. You be dust and when you die, you go return to the dust.”
w12 9/1 4 ¶2
God De Really Care for Women?
God Curse Women?
No, God no “curse” women, but na the snake, wey be Satan the Devil, God “curse.” (Revelation 12:9; Genesis 3:14) As God say Adam go de “control” e wife, e no mean say God give man power say make e de control and oppress e wife anyhow. (Genesis 3:16) Jehovah only de talk about the bad result wey Adam and Eve go get as they sin.
w04 1/1 29 ¶2
Lesson From the Book of Genesis—I
3:17—How God curse the ground and when the curse end? The curse wey God curse the ground mean say farm work go really hard. Because of the curse wey God curse the ground, chuku-chuku grow from ground. Adam pikin them really suffer because of this curse. Na e make Lamech wey be Noah papa talk about the pain wey them de get as them de work, because God curse the ground. (Genesis 5:29) After the heavy rain, Jehovah bless Noah and e children. E tell them say make they born children and full the earth. (Genesis 9:1) E be like say after, God remove the curse wey e curse the ground.—Genesis 13:10.
it-2 186
Labor Pain
This one na pain wey woman de feel when e want born. After Adam and Eve sin, God tell Eve wetin go happen when e de born as e don sin. If Eve no sin, e for continue de enjoy blessing from God. When e de born, na only happy e for de happy, e for no de feel pain, because “the blessing of Jehovah de make person rich, and e no de add suffer join-am.” (Pr 10:22) But now, sin don come and body no perfect again, so, pain go come. Na this one make God talk say (plenty times, the things wey God allow make e happen, some Bible verse de talk-am like say na God do-am): “I go really increase the pain wey you de feel when you get belle; and you go feel pain when you de born.”—Ge 3:16.
Fine-Fine Things Wey You See for Bible
(Genesis 4:23, 24) Then Lamech write this song for e two wife, Adah and Zillah. E write say: “Make wuna hear wetin I want talk, wuna wey be my wife; Make wuna listen to me: I kill one man because e wound me, Yes, I kill the young man because e blow me. 24 If na 7 times they go punish person wey kill Cain, Then na 77 times they go punish person wey kill Lamech.”
it-2 192 ¶5
Lamech
This song wey Lamech write for e wife them (Ge 4:23, 24) de show say people that time, de like fight-fight and kill-kill. Lamech write say: ‘My wife them, make wuna hear wetin I want talk; Make wuna listen to me: I kill one man because e wound me, yes, I kill the young man because e blow me. If na 7 times they go punish person wey kill Cain, then na 77 times they go punish person wey kill Lamech.’ E clear say Lamech use this song, de talk say e no plan to kill the person, like Cain wey kill Abel. But na when e de defend e self, e kill this man because of wetin the man do. So e use this song de beg anybody wey de plan to revenge the death of the man, say e no be get-am for mind to kill the man.
(Genesis 4:26) Seth come get another son and e call e name Enosh. Na that time people start to call the name of Jehovah.
it-1 338 ¶2
To Talk Bad About God
This call wey people start to call the name of Jehovah for Enosh time, no be better one. Why we talk so? Because many years before Enosh time, we dey sure say when Abel de talk with God, e call the name of God. (Ge 4:26; Heb 11:4) Some professor talk say that time, them de give the name of God to people or image. If this one na true, e mean say this people really use the name of God for bad way.—See ENOSH, ENOS.
JANUARY 20-26
FINE-FINE LESSON FROM BIBLE | GENESIS 6-8
“E Do-am Just as Jehovah Talk”
(Genesis 6:9) Na the story of Noah be this. Noah na righteous person. Among all the people wey dey alive for e time, Noah show say e dey different. Noah do wetin the true God want.
(Genesis 6:13) After that one, God tell Noah say: “I don decide to destroy everything wey get flesh, because fight-fight don full the whole earth because of them, so I go destroy them together with this earth.
w18.02 4 ¶4
Obey God and Get Faith like Noah, Daniel, and Job
4 Which Problems Noah Face That Time? For the time of Noah great grandpapa wey e name na Enoch, people don really wicked. Them even de talk “bad things” about Jehovah. (Jude 14, 15) Fight-fight and trouble de increase more and more. Infact, Bible talk say for the time of Noah, ‘fight-fight full the whole earth.’ Bad angels change to people and start to marry women. The children wey them born really wicked and them strong pass normal people. (Gen. 6:2-4, 11, 12) But Noah show say e different from people that time. Bible talk say: “Jehovah see Noah as righteous person. . . . Among all the people wey dey alive for e time, Noah show say e dey different. Noah do wetin the true God want.”—Gen. 6:8, 9.
(Genesis 6:14-16) So make you use strong wood build ark for yourself. Make you make different-different room inside the ark and cover the ark with tar inside and outside. 15 You go build-am like this: Make the ark long reach 300 cubit, wide reach 50 cubit, and high reach 30 cubit. 16 Make you put window for the ark so that light fit enter, and make e dey one cubit from the roof. Make you put the door of the ark for one side of the ark and make the ark get first floor, second floor, and third floor.
w13 4/1 14 ¶1
Noah Do Wetin Jehovah Talk
Na plenty years Noah use do this work. E reach about 40 to 50 years. E go cut plenty tree down, carry them, cut them to different different size and shape, and e go still join them together. The ark go be three storey buliding, e go get different-different room, and the door go dey one side of the ark. E clear say different-different window dey near the roof of the ark. The roof be like the type wey people de build now, wey water dey pass two side come down when rain de fall.—Genesis 6:14-16.
(Genesis 6:22) And Noah do all the things just as God don command. Na so e just do-am.
w11 9/15 18 ¶13
Endure as You De Worship Jehovah
13 Wetin help all this servants of Jehovah fit endure and run reach the end? Think of wetin Paul write about Noah. (Read Hebrews 11:7.) Jehovah say e go use heavy rain destroy everything wey get life for this earth. And Noah never see this thing before. (Gen. 6:17) Heavy rain never fall before. But Noah believe wetin Jehovah talk. Why e believe? Because e get faith say anything wey Jehovah talk say e go do, e go do-am. Noah no feel say the work wey Jehovah say make e do, too hard. Instead, as Bible talk, Noah do everything wey Jehovah say make e do. (Gen. 6:22) When you think about all the things wey Noah do—e build ark, e gather the animals, e arrange and put food inside the ark wey them and all the animals go chop, e preach to warn people, and e continue to make the faith of e family strong—you go know say e no easy to do everything, exactly the way Jehovah say make e do them. Because Noah get faith and e endure, and complete the work, Jehovah bless Noah and e family. E save them when e destroy the bad people.
Fine-Fine Things Wey You See for Bible
(Genesis 7:2) You must enter the ark with seven of every kind of clean animal, seven male and seven female; and for every kind of animal wey no clean, take only two, male and female;
w04 1/1 29 ¶7
Lesson From the Book of Genesis—I
7:2—Wetin be the difference between the clean animal and the one wey no clean wey this verse talk about? The difference between the clean animal and animal wey no clean, wey this verse de talk about, no be whether them de chop-am or no de chop-am. But na whether them fit use-am do sacrifice to Jehovah. Before the heavy rain fall, people no de chop animal. Na when Jehovah give Israel people Law of Moses, them start to call animal wey Jehovah say them fit chop, “clean animal,” and the one wey e say make them no chop, “animal wey no clean.” (Acts 10:9-16; Ephesians 2:15) E clear say Noah know the correct animal wey e suppose use do sacrifice to Jehovah. Bible talk say as Noah just come out from the ark, e “build altar for Jehovah and e take some of the different-different kind of clean animal and clean bird, and e burn them ontop the altar as sacrifice to Jehovah.”—Genesis 8:20.
(Genesis 7:11) For the second month of the year wey Noah complete 600 years, for the 17th day of that month, that very day, [God] release all the plenty water for up and e open the door of the water wey dey the sky.
w04 1/1 30 ¶1
Lesson From the Book of Genesis—I
7:11—Which water form the rain wey fall for the time of Noah? For Day Two when God de make things, e divide the water wey dey the earth that time, into two part. And e make big space dey between the two water. So, e make one part of the water go up, and make the other part remain for earth. (Genesis 1:6, 7) The water wey God raise go up, really plenty pass the one wey remain for earth. Na this water wey God raise go up, fall for the time of Noah.
JANUARY 27–FEBRUARY 2
FINE-FINE LESSON FROM BIBLE | GENESIS 9-11
“All People for the Earth That Time De Speak One Language”
(Genesis 11:1-4) That time everybody for the earth de speak one language and de use the same words. 2 As people de travel go east, they see one valley for the land of Shinar, and they start to live there. 3 Then they start to tell each other say: “Make wuna come, make we mold brick and use fire make-am strong.” So they use brick instead of stone, and they use tar as cement. 4 Then they talk say: “Make wuna come, make we build city for ourself and tower wey go high reach heaven, and make we make big name for ourself, so that we no go scatter go different-different part of the earth.”
it-1 239
Babylon the Great
The Way the Olden Days City of Babylon Be. Na the same time wey they start to build the city of Babylon for the valley of Shinar, they start to build the Tower of Babel. (Ge 11:2-9) The main reason why they start to build this city and tower, na to make name for theirself, no be to honor the name of God. When people wey de find old-old things for inside ground, go the area for Mesopotamia wey that city first dey, them dig plenty tower come out. This towers na four corner tower wey get temple ontop. Them still see this kind tower for other part of Mesopotamia. This towers wey they see, de show say people wey build that first tower, build-am to worship lie-lie gods. But Jehovah no allow the people for Babel complete the temple wey them de build. This one show say e condemn the city because na there lie-lie religion start. The Hebrew name for this city, na Babel and e mean “Confusion.” But the name wey Sumeria people de call-am na (Ka-dingir-ra) and Akkad people de call-am (Bab-ilu). This two name mean “Gate of God.” So, the people wey remain for the city change the name of the city. They do-am so that people no go remember say the original meaning of the name, show say God condemn the city. But even the new name still show say na there lie-lie religion start.
it-2 202 ¶2
Language
The story wey dey Genesis chapter 11, de talk about things wey people wey live after the heavy rain, do. They start to do work wey dey against wetin Jehovah tell Noah and e three sons. (Ge 9:1) Instead for them to go different-different part of the earth and full the earth as Jehovah talk, they decide say them go stay for just one part of the earth. Today, people de call the place wey they choose to stay, valley of Shinar for Mesopotamia. And e clear say, they still plan to make this place, city wey get tower to worship lie-lie gods.—Ge 11:2-4.
(Genesis 11:6-8) Then Jehovah talk say: “See! This people de do things as one and de speak one language, and see the work wey they don start to do. So nothing wey they get for mind to do, wey they no go fit do. 7 So, make we go there and confuse their language so that they no go understand each other.” 8 So Jehovah scatter them from that place go every corner for the earth, and small-small, they stop to build the city.
it-2 202 ¶3
Language
Jehovah no just sitdown de look this people. E scatter their wicked plan. E confuse their language so that them no go de understand each other again. Because of this one, they no fit do the work again, so they scatter go different-different part of the earth. And because of this confusion, even if they plan this kind wicked plan again, e go really hard them to do-am because (1) now they no fit think and do things as one, like before; (2) their different-different language go make-am hard for them to learn from each other. This things wey them go learn no be from God but na things wey they don know as them de work together. (Compare Ec 7:29; De 32:5.) Na true say as people no de speak the same language today, them no dey as one. But, this one don help us because e don make people no fit join-hand do bad things wey fit even destroy them. (Ge 11:5-9; compare Isa 8:9, 10.) Today, people sabi plenty things. But they no de use their sense for good things. Instead, them de use-am do wicked things. When we think about this one, e go make us understand why Jehovah stop the wicked work of people for Babel. E know say, as time de go, people go sabi plenty bad things. And they go use-am for evil way, like the people for Babel.
(Genesis 11:9) Na e make they call the place Babel, because na there Jehovah confuse the language wey all the people for the earth de speak, and Jehovah scatter them from there go all part of the earth.
it-2 472
Different-Different People
Now, as they no fit understand each other again, the group of people wey fit understand theirself form their own culture, art, custom, character, and religion. And they start to do things for their own way. (Le 18:3) As the people don dey far from God, them start to make plenty image of their different-different gods.—De 12:30; 2Ki 17:29, 33.
Fine-Fine Things Wey You See for Bible
(Genesis 9:20-22) So Noah start to do farm work, and e plant vine for e farm. 21 But when e drink the wine wey come from the vine, e drunk, and e naked e self inside e tent. 22 When Ham, the papa of Canaan see say their papa dey naked, e go tell e two brothers for outside.
(Genesis 9:24, 25) When Noah wake up after the wine don clear from e eye and hear wetin e last pikin do, 25 e talk say: “E no go better for Canaan. Make e become ordinary slave to e brothers.”
it-1 1023 ¶4
Ham
E fit be say Canaan see wetin happen, but e papa, Ham no correct Canaan. Or e fit be say Jehovah use e spirit make Noah talk about the bad life wey the children of Cannan go live. Because that time, Ham don show say e get bad character, and e be like say Canaan too de behave like e papa. So, the children of Canaan go still get that kind behavior. Israel people come from the family of Shem. So, part of this curse happen when Israel people win Canaan people for war. The ones wey they no kill for the war (for example, the children of Gibeon [Jos 9]) become slave to Israel people. Plenty years after, this curse still happen even pass the first time. E happen when Medo-Persia, Greece, and Rome world powers wey come out from the family of Japheth, start to rule over the people of Canaan.
(Genesis 10:9, 10) E come be strong hunter wey dey against Jehovah. Na e make them de tell some people say: “You just be like Nimrod, the strong hunter wey dey against Jehovah.” 10 The four city wey e use start e kingdom na, Babel, Erech, Accad, and Calneh. And this four city dey the land of Shinar.
it-2 503
Nimrod
The four city wey Nimrod first form when e start e kingdom, na Babel, Erech, Accad, and Calneh. All this city be dey the land of Shinar. (Ge 10:10) So, e be like say na Nimrod direct the people to start de build the city of Babel and the tower. This thing wey we talk, agree with the way Jew people see-am. One Jew person wey e name na Josephus write say: ‘Na small-small, [Nimrod] change things and make e self wicked ruler. E talk say the only way to make people stop de worship God, na if e make them de feel say e get the power to help them. Nimrod even talk say if God try again to destroy people with water, e go revenge. E go build tower wey go high pass the level wey water fit reach, and e go revenge the death of e grandpapa them. The people really like wetin [Nimrod] talk and them ready to follow e advice. They even talk say to worship God just be like say them be slave. So, they start to build the tower . . . and the speed wey they use raise the wall of the city, really fast.’—Jewish Antiquities, I, 114, 115 (iv, 2, 3).