Study Book for Our Life and Preaching Meeting
JANUARY 4-10
FINE-FINE LESSON FROM BIBLE | LEVITICUS 18-19
“De Live Clean Life”
How We Fit Protect Ourself From One of the Traps Wey Satan De Use
Jehovah talk the bad-bad things wey the nations around Israel people de do, and e warn Israel people say: “Make wuna no ever do the things wey the people for Canaan de do, the place wey I go take wuna go. . . . The land no clean, and I go punish the land for e sin.” The things wey Canaan people de do really dey bad sotey for the eye of the holy God of Israel, the land wey them de live dey corrupt and e no clean.—Lev. 18:3, 25.
w17.02 20 ¶13
Jehovah De Direct E People
13 The kings for Israel wey obey Jehovah really different from the kings wey rule other nations. The kings for other nations use their own sense rule their people. And them do things wey affect the future of their people. For example, the kings for Canaan and their people really do bad things. People from the same family de sleep with each other, man de sleep with man, woman de sleep with woman. And people even de sleep with animals, de sacrifice their children, and de worship plenty idols. (Lev. 18:6, 21-25) Even self, kings for Babylon and Egypt no follow the law wey Jehovah give Israel people about how to dey clean. (Num. 19:13) But no be the same with the kings for Israel wey obey Jehovah. They encourage their people to worship Jehovah for the correct way, to live clean life and keep their body clean. So e clear say, na Jehovah direct Israel people.
w14 7/1 7 ¶2
Wetin God Go Do Wicked People?
What of people wey no gree change their wicked life? Just think about wetin Jehovah promise us for Bible. E talk say: ‘Na only righteous people go stay for this earth, and na innocent people go remain for inside. But as for wicked people, God go destroy them, and e go remove all lie-lie people from this earth.’ (Proverbs 2:21, 22) Wicked people no go dey again to cause trouble. That time, peace go dey everywhere. And small-small, Jehovah go remove the sin wey e people don get from Adam and Eve.—Romans 6:17, 18; 8:21.
Fine-Fine Things Wey You See for Bible
w06 6/15 22 ¶11
“I Really Love Your Law!”
11 Another part of the Law wey show say Jehovah de care for e people na when e give poor people right to collect wetin remain from people farm. E tell Israel people say when them de harvest for their farm, make they no harvest everything. So that poor people fit come harvest from the one wey remain. Jehovah tell farmers say make they no harvest everything for the corner of their farm, or pick grape or olive fruit wey remain for their farm. E still tell them say if they harvest their corn and they forget-am for farm, make they no go back to collect-am. This arrangement show say Jehovah love poor people, strangers, people wey no get papa and mama, and people wey their husband don die. Na true say to go pick things wey remain for people farm na big work. But, if they do-am they no go beg for food.—Leviticus 19:9, 10; Deuteronomy 24:19-22; Psalm 37:25.
JANUARY 11-17
FINE-FINE LESSON FROM BIBLE | LEVITICUS 20-21
“Jehovah Want Make E People Dey Different”
w04 10/15 11 ¶12
Paradise Na for You?
12 But something dey wey we no suppose ever forget. God tell Israel people say: “Wuna must obey all the commandment wey I de command wuna today, so that wuna go dey strong and fit enter the land and take-am as wuna own.” (Deuteronomy 11:8) Leviticus 20:22, 24 still talk about that same land. That verse talk say: “Wuna must obey all my Laws, and wuna must do everything wey I don decide, so that the land wey I want put wuna, no go vomit wuna. Na e make I tell wuna say: ‘As for wuna, wuna go take their land as wuna own, and as for me, I go give wuna the land as wuna own, land wey milk and honey de flow.’” So, for Israel people to fit take the Promise Land, they must de worship Jehovah for the correct way. Because Israel people no gree obey Jehovah, e allow Babylon people fight them, win them, and carry them comot from the Promise Land.
it-1 1199
Inheritance
This na any property wey person die leave for e pikin or other people wey get right to get the property. E fit still be anything wey person take over from e papa-papa or person wey first dey in charge of the thing. The main Hebrew word for inheritance na na·chalʹ (noun, na·chalahʹ). E mean to give, take, or inherit property. And this one na normally from papa to pikin. (Nu 26:55; Eze 46:18) Sometimes them de use the word ya·rashʹ, to talk about ‘pikin wey take over from e papa.’ But most times, them de use this word for ‘person wey take over property’ even if e no be pikin from the family. (Ge 15:3; Le 20:24) E still mean to “drive person comot and take over e property” by force. (De 2:12; 31:3) The Greek word wey them de use describe inheritance connect with kleʹros. The first meaning of kleʹros, na “lot” but later e come mean “share” and now e mean “to inherit something.”—Mt 27:35; Ac 1:17; 26:18.
it-1 317 ¶2
Birds
After the heavy rain for the time of Noah, Noah use some “clean birds” and other animals for sacrifice. (Ge 8:18-20) After, God talk say people fit de chop bird, but na only the blood they no go chop. (Ge 9:1-4; compare Le 7:26; 17:13.) So e dey clear say some kind birds wey dey “clean” for the time of Noah, na the birds wey God don show say e go accept-am when they use-am for sacrifice. Bible show they be de chop all bird until God give Israel people Law say some bird ‘no dey clean’ to chop. (Le 11:13-19, 46, 47; 20:25; De 14:11-20) Bible no talk direct how person fit know wetin make some bird dey “unclean.” Most of the bird wey Bible call “unclean” na bird wey de chop other animals or wey de chop rotten animals. But some of the “unclean” bird no dey for this group of birds. (Go check HOOPOE.) The new covenant cancel the Law wey talk say some birds ‘no dey clean’ to chop, as God show Peter for vision.—Ac 10:9-15.
Fine-Fine Things Wey You See for Bible
it-1 563
To Cut-Cut Body
For the Law wey God give Israel people, e tell them say make they no ever cut their body when person die. (Le 19:28; 21:5; De 14:1) The reason na because Israel people dey holy to Jehovah, they be e special property. (De 14:2) Because of this one, Israel people no go do anything wey people wey de worship other gods de do. Another thing na say, Israel people know the truth about person wey don die, and they know say Jehovah go fit bring the person back to life. (Da 12:13; Heb 11:19) So e no go make sense if them de cut their body and wound theirself because their person don die. And as God Law no allow them cut their body or wound theirself, e go don make them know say e dey important make they no treat the body wey God give them, anyhow.
JANUARY 18-24
FINE-FINE LESSON FROM BIBLE | LEVITICUS 22-23
“Festivals Wey Israel People Do and Their Meaning for Us”
it-1 826-827
Festival Wey Israel People De Do With Bread Wey No Get Yeast
The first day of this festival na holy assembly, and na still sabbath. For the second day wey be Nisan 16, they go bring the first bundle of barley wey they harvest for the land, and give the priest. Na barley them de first harvest for Palestine. Before they do this festival, nobody go chop new barley, barley bread, or even barley wey they roast. The priest go wave this first bundle of barley back and front as sacrifice to Jehovah. Then the priest go sacrifice one year old ram, wey the body complete as burnt offering to Jehovah. E go still offer grain offering wey they mix with oil, and drink offering. (Le 23:6-14) Jehovah no tell the priests make they burn any of the barley or barley flour for the altar. But na wetin the priest them start to do after. For this festival, the priest go do the firstfruit offering to Jehovah for the whole nation. But each family or person go still do thanksgiving sacrifice to Jehovah from the things wey e get.—Ex 23:19; De 26:1, 2; go check FIRSTFRUITS.
Why This Festival Dey Important. The people de chop bread wey no get yeast for this festival because na wetin Jehovah tell Moses say make they do. For Exodus 12:14-20, especially for verse 19, Jehovah give this direct command say: ‘For seven days, make wuna no keep any yeast for wuna house.’ For Deuteronomy 16:3, they call this bread wey no get yeast, ‘the bread of suffer.’ Every year this bread de remind Israel people of the way they hurry comot for Egypt (as they be no get time to put yeast for their bread [Ex 12:34]). So, this one help Israel people remember the suffer and slave life wey Jehovah don save them from. Even Jehovah tell them say they go do this festival, ‘so that they go remember the day wey they come out from the land of Egypt, all their life.’ This festival na the first one out of the three main festivals wey Israel people de do every year. And the people de do-am because now they don be free people, and to thank Jehovah wey save them from Egypt.—De 16:16.
it-2 598 ¶2
Pentecost
The way Israel people de do the first bundle of wheat wey they harvest for the land, different from the way them de do the firstfruit of barley. They go take 4.4 liter of fine wheat flour, add yeast and use-am bake two bread. They go bring this bread ‘from their house.’ This one mean say they no need to bake the bread like the holy bread for temple. But they go bake-am like the one wey them de chop every day. (Le 23:17) They go still do burnt offerings, sin offering and communion sacrifice when them de do this festival to Jehovah. Na two male lamb they go use for the communion sacrifice. The priest go wave the bread and the lambs as sacrifice to Jehovah. The priest go put e hand under the bread and the pieces of the lamb, and wave them back and front to show say e don give them to Jehovah. After this one, the priest go chop the bread and the lamb as communion sacrifice.—Le 23:18-20.
w14 5/15 29 ¶11
You De Follow Jehovah Organization as E De Move?
11 Jehovah organization de show say they really care about us when they tell us to follow the advice wey apostle Paul give. E talk say: “Make we de think about how we go help each other so that we go show love and do better work. Make we no de miss our meeting as some people de do, but make we de encourage ourself, especially as the day don de near.” (Heb. 10:24, 25) The festivals wey Israel people do every year and other times wey them gather to worship God, really make their faith strong. Another thing be say, this festivals de make the people happy. For example, the special Festival of Booths wey the people do for Nehemiah time, really make them happy. (Ex. 23:15, 16; Neh. 8:9-18) Na so we too de gain when we go our meetings, assembly, and conventions. So, make we no de miss this meetings so that our faith go dey strong and we go de happy.—Titus 2:2.
Fine-Fine Things Wey You See for Bible
No Tire to Hold Jehovah Tight!
3 For person wey de serve God, wetin integrity mean? E mean say the person love Jehovah with all e heart, and e no go ever leave Jehovah. So the number one thing for the person life na how to make Jehovah happy for everything wey e de do. Make we talk about how Bible use the word integrity. For Bible, the Hebrew word for integrity mean: something wey complete, wey full, or wey dey sound. For example, Israel people use animals do sacrifice to Jehovah. The Law talk say the animals need to dey sound. (Lev. 22:21, 22) God no allow e people bring sick animal and animal wey one leg, one eye, or one ear, no dey. Na important thing to Jehovah say make the animal dey sound, or complete. (Mal. 1:6-9) We fit understand why e dey important to Jehovah make something dey sound or complete. When we buy something like fruit, book, or tool for work, we no want the one wey get big hole for body or wey some parts de miss. We want the one wey dey sound, complete, or full. Na so God de feel about us too. The way we love Jehovah, and the way we hold Jehovah tight suppose to dey complete, or sound.
JANUARY 25-31
FINE-FINE LESSON FROM BIBLE | LEVITICUS 24-25
“The Year of Freedom for Israel and Our Freedom for Paradise”
it-1 871
Freedom
The God Wey De Give Freedom. Na Jehovah de give freedom. E free Israel people as slave from Egypt. E promise them say as far say they obey all e commandments, they go dey free from poverty. (De 15:4, 5) David talk say people wey de live inside Jerusalem, ‘no need to fear anything.’ (Ps 122:6, 7) For the original Hebrew language, they fit still translate wetin David talk as ‘freedom from anything wey e fit make person fear.’ But the Law talk say incase person come dey poor, e fit make e self slave so that e fit take care of e self and e family. The Law still talk say the man go dey free for the seventh year wey e become slave. (Ex 21:2) For the year of Freedom (wey be every 50 years), they go announce say everybody for Israel, don dey free. Every Israel person wey be slave go get freedom and e go go back to e family land.—Le 25:10-19.
it-1 1200 ¶2
Inheritance
For Israel, family land must remain for the family from generation to generation. Because of this one, they no fit sell the land to another person forever. When Israel person sell e family land, e just be like say e rent the land out for farm work. And them de rent the land base on wetin the land fit produce. The price wey person go pay for the land, go depend on how many years remain to the next year of Freedom. For the year of Freedom, the family go take their land back if they never fit pay to take-am before the year of Freedom reach. (Le 25:13, 15, 23, 24) This Law still concern house wey dey all the city wey they no fence, because them de see-am as open land. But for the house wey dey city wey they fence, na only one year the owner get to buy-am back. If e no fit buy-am back before one year end, na the person wey buy-am, go get-am forever. But if na for the city of Levite the house dey, the Levite get the right to buy the house back anytime, because Levites no de inherit any land.—Le 25:29-34.
it-2 122-123
Year of Freedom (Jubilee)
When Israel people obey the Law wey concern the year of Freedom, e de help the whole nation. E de help them make they no get the kind money problem wey plenty country today de get; wey e go be like say na only two group of people dey those country, over rich people and over poor people. No be only one person de gain from the Law, but na the whole nation. Because nobody go poor sotey e no get wetin e need for e work and to care for e self or e family. So everybody fit use e power and hand work support the nation. As Jehovah de bless their land, and teach them and them de obey e commandment, they go enjoy perfect government and plenty good things wey de only come from God.—Isa 33:22.
Fine-Fine Things Wey You See for Bible
w09 9/1 22 ¶4
When Person Make You Vex
If two Israel people de fight, and one blind the other one, the Law talk say make they give the correct punishment without partial. But no be the person wey they blind e eye go pay the other person or e family member back. The Law talk say make the person go report the matter to the people wey de handle case for the city. Na them go know the correct punishment wey they go give the other person. When the people know say any wicked thing wey them do, they go still do-am to them back, e de really make the people behave well. But, the matter no end for here.
FEBRUARY 1-7
FINE-FINE LESSON FROM BIBLE | LEVITICUS 26-27
“How We Fit Get Blessings From Jehovah?”
w08 4/5 4 ¶8
Reject ‘Useless Things’
8 How Money fit become god to person? For example, think about one big stone wey dey inside bush for the land of Israel. They fit use this kind stone build house or fence. But if person carry the stone and turn-am to idol, e go make the person leave Jehovah. (Lev. 26:1) Just like the stone, money get e own work. We need money to buy some of the things wey we need and we fit still use-am support Jehovah organization. (Eccl. 7:12; Luke 16:9) But if money come dey important pass the worship of Jehovah, e mean say money don become our god. (Read 1 Timothy 6:9, 10.) For this world, na money dey important pass for plenty people, so we must dey careful so that money no go become our god.—1 Tim. 6:17-19.
it-1 223 ¶3
Fear and Deep Respect
Moses really show fear and deep respect (Heb., moh·raʼʹ) for Jehovah for the front of Israel people. This na because e don really work with Jehovah. (De 34:10, 12; Ex 19:9) The people of Israel wey get faith show deep respect for Moses as their leader. E dey clear to them say Jehovah de use Moses talk to them. And Jehovah still talk say make Israel people show deep respect for e house of worship. (Le 19:30; 26:2) This one mean say they go worship for the tabernacle with respect and worship Jehovah the way e want. And they go obey all the commandment wey Jehovah don give them.
w91 3/1 17 ¶10
Make “the Peace of God” Protect Your Heart
10 Jehovah tell the people of Israel say: “If wuna de follow all my law, and de obey all my commandment, and de do them, I go give wuna rain for the correct time, and wuna land go really produce, and the trees go bear fruit. I go give wuna peace for wuna land, and nobody go make wuna fear when wuna de sleep; I go remove wicked animal from wuna land and war no go happen for wuna land. I go dey with wuna and be wuna God, and wuna go be my people.” (Leviticus 26:3, 4, 6, 12) Israel people go enjoy peace because they no go de fear their enemy them, they go get plenty good things and they go be friends of Jehovah. But all this things go happen only if they obey all the Law wey Jehovah give them.—Psalm 119:165.
Fine-Fine Things Wey You See for Bible
it-2 617
Disease
Disease Wey Israel People Suffer Because They No Obey Jehovah. Jehovah warn the people of Israel say if they no keep the agreement wey e make with them, e go ‘send serious disease to their land.’ (Le 26:14-16, 23-25; De 28:15, 21, 22) Bible de normally connect good health with blessing from Jehovah. This one fit mean say person dey strong for body or e friendship with Jehovah dey strong. (De 7:12, 15; Ps 103:1-3; Pr 3:1, 2, 7, 8; 4:21, 22; Re 21:1-4) But e de connect disease with sin and imperfection. (Ex 15:26; De 28:58-61; Isa 53:4, 5; Mt 9:2-6, 12; Joh 5:14) Na true say sometimes, Jehovah strike some people with disease. For example Jehovah strike Miriam, Uzziah, and Gehazi with leprosy. (Nu 12:10; 2Ch 26:16-21; 2Ki 5:25-27) But plenty times, e be like say the sickness and disease wey some people or nations get na because of the bad things wey they do. Na the thing wey they use their own hand cause for theirself. They be suffer because of their bad life. (Ga 6:7, 8) When apostle Paul de talk about people wey de do all kind of sex wey Jehovah hate, e talk say God ‘allow them to de do wetin no clean, so that their body no go bring honor to them . . . and so that they go receive the full punishment for their sin.’—Ro 1:24-27.
FEBRUARY 8-14
FINE-FINE LESSON FROM BIBLE | NUMBERS 1-2
“Jehovah De Arrange E People Well”
w94 12/1 9 ¶4
To Worship Jehovah Na Number One Thing for Your Life?
4 If you be dey for high place de look Israel people as them dey their camp for wilderness, wetin you for see? You for see plenty tent wey they arrange well, with about three million or more people for there. They divide them into four group for north, south, east, and west. Na three tribe for Israel dey each of the four different group. But if you look well, you go still see another four small-small group of tent wey dey near the middle of the camp. Na there people from the family of Levi stay. For the center of the camp, you go see the tabernacle. They fence-am round with cloth. Jehovah use Israel people wey get better hand work build this tabernacle the way e want.—Numbers 1:52, 53; 2:3, 10, 17, 18, 25; Exodus 35:10.
it-1 397 ¶4
Camp
The people wey dey the camp of Israel really plenty. They get 603,550 men wey Moses register wey fit fight. They still get women, children, old people, handicaps, 22,000 Levites, and plenty other people wey follow them comot from Egypt. If we add all of them together, them dey around 3,000,000 or they fit even pass. (Ex 12:38, 44; Nu 3:21-34, 39) How you think say their camp go don big reach? We no really know because people don talk different-different things about-am. When their camp be dey opposite Jericho for the Plains of Moab, Bible talk say they cover “from Beth-jeshimoth to Abel-shittim.”—Nu 33:49.
Fine-Fine Things Wey You See for Bible
it-2 764
Registration
That time, they register Israel people according to their name, their family, and their tribes. This registration no be only to know the number of people for Israel. Bible help us understand say they do this registrations for plenty reason, like for tax, to know people wey fit go war, or to know the Levites wey fit work for the tabernacle or temple.
FEBRUARY 15-21
FINE-FINE LESSON FROM BIBLE | NUMBERS 3-4
“The Work Wey Levites Do”
it-2 683 ¶3
Priest
For the Time of the Law Covenant. When Israel people be slave for Egypt, Jehovah use the number ten punishment kill all the first son of Egypt people. Then, Jehovah make all the first son of Israel people e own. (Ex 12:29; Nu 3:13) And because they be Jehovah own, Jehovah go use them only for special work. All the first son for Israel suppose be priests and caretakers for the house of Jehovah. But Jehovah decide to choose all the male for the tribe of Levi for this work instead of all the first son for Israel. Because of this one, Jehovah allow the nation use all the male for the tribe of Levi replace all the first son for the other 12 tribe (two tribe for Israel come from Ephraim and Manasseh, the two sons of Joseph). Jehovah say make Moses count all the male for the tribe of Levi from one month go up and all the first son for the other tribes, from one month go up. When e count-am, e see say all the first son plenty pass all the male for the tribe of Levi with 273. So Jehovah come talk say they go pay five shekels ($11) for each of the 273 first sons, to buy them back. And they go give the money to Aaron and e sons. (Nu 3:11-16, 40-51) But before this one, Jehovah don already choose all the male for the family of Aaron from the tribe of Levi, to be priests for Israel.—Nu 1:1; 3:6-10.
it-2 241
Levites
Their Work. The Levites come from three family. The family of Gershon (Gershom), Kohath, and Merari wey be the three sons of Levi. (Ge 46:11; 1Ch 6:1, 16) For the wilderness, they give each of this family their own place near the tabernacle. Aaron wey come from the family of Kohath stay with e family for the front of the tabernacle for the east. The other people for Kohath family stay for south, the family of Gershon stay for west and the family of Merari, stay for north. (Nu 3:23, 29, 35, 38) Na the Levites de remove the different-different part of the tabernacle, carry them and rearrange them again. When they want move go another place, Aaron and e sons go remove the curtain wey separate the Holy from the Most Holy. They go cover the ark of the covenant, the altars, and other holy things for the tabernacle. Then the sons of Kohath go carry this things. The sons of Gershon go carry the tent cloths, coverings, screens, courtyard hangings, and tent ropes (this one na all the rope wey they use make the tabernacle e self), and the sons of Merari go carry the panel frames, pillars, socket pedestals, tent pins and ropes (the rope wey they use for the fence wey surround the tabernacle).—Nu 1:50, 51; 3:25, 26, 30, 31, 36, 37; 4:4-33; 7:5-9.
it-2 241
Levites
For the time of Moses, na when Levite don reach 30 years e go start to do the complete work of Levite, like to carry things for the tabernacle when they want move-am. (Nu 4:46-49) When Levite reach 25 years, e fit de do some work for the tabernacle. But no be heavy work like to carry different-different parts of the tabernacle when they want move. (Nu 8:24) When King David be king, e reduce the age to 20 years. E talk say na because they no go need to move the tabernacle again (small time, na for temple they go de worship Jehovah). When Levite reach 50 years, e no go do this work again. (Nu 8:25, 26; 1Ch 23:24-26; go check AGE.) The Levites suppose really sabi the law well because plenty times, na them de read and teach other people the law.—1Ch 15:27; 2Ch 5:12; 17:7-9; Ne 8:7-9.
Fine-Fine Things Wey You See for Bible
w06 8/1 23 ¶13
Show Say You Get Sense—Fear God!
13 Jehovah help David plenty time when e de face problem. This one make David really fear God and put more faith for God. (Psalm 31:22-24) But three different times, David no show say e fear Jehovah and this one really cause serious problem. The first one na when e arrange make they carry the ark of the covenant go Jerusalem. Instead make the priest carry the ark for their shoulder as the Law talk, David arrange make they use wagon carry-am. When Uzzah wey de lead the wagon, hold the Ark make e no fall, e die at once because wetin e do no show respect for Jehovah. Na true say wetin Uzzah do really bad, but na because David no show respect for God Law, na e make this bad thing happen. So, to fear Jehovah mean say we go do things the way e don arrange-am.—2 Samuel 6:2-9; Numbers 4:15; 7:9.
FEBRUARY 22-28
FINE-FINE LESSON FROM BIBLE | NUMBERS 5-6
“How You Fit Copy the Example of the Nazirites?”
it-2 477
Nazirite
Na three main things Jehovah say make people wey be Nazirite no do: (1) Make they no drink anything wey get alcohol; or chop any kind of grape, whether e ripe, e no ripe or e don dry. And make they no drink grape juice whether na fresh one or the one wey fit make person drunk. (2) Make they no shave the hair for their head. (3) Make they no touch dead body, even if na dead body of their family member whether na their papa, mama, brother or sister.—Nu 6:1-7.
Special Promise. When person make this special promise, e go ‘live e life as Nazirite to Jehovah.’ This one mean say e don give e self to Jehovah. E no de live as Nazirite to show say e too dey holy so that people go praise-am. But, e de do-am to show say e dey holy to Jehovah.—Nu 6:2, 8; compare Ge 49:26, ftn.
So, e mean say the things wey Jehovah say make Nazarites no do, dey important and get special meaning for the worship of Jehovah. Just as the high priest no suppose touch any dead body, because of e holy work, even if na e family member die, na so too with Nazarite. Because of the serious work wey the high priest and other priests de do, Jehovah tell them say make they no drink wine or anything wey get alcohol, when them de do their work for tabernacle.—Le 10:8-11; 21:10, 11.
Another thing be say, Nazirite (Heb., na·zirʹ) must leave e hair make e grow long to ‘show say e dey holy.’ When people see e long hair, they go quick know say e na Nazirite. (Nu 6:5) Na the same Hebrew word (na·zirʹ ) Bible use describe the way vine wey they no ‘cut’ de be, for the holy Sabbath and the years of Freedom or Jubilee. (Le 25:5, 11) Then, another point be say Bible call the flat gold wey dey the front of the high priest turban, “the holy sign of dedication [Heb., neʹzer, from the same Hebrew word, na·zirʹ].” They carve the words, “Jehovah na holy God” for the flat gold. (Ex 39:30, 31) Na the same thing too with the crown wey anointed kings for Israel de wear. They still de call-am neʹzer. (2Sa 1:10; 2Ki 11:12; go check CROWN; DEDICATION.) Apostle Paul tell the brothers for Corinth say Jehovah don give woman long hair as head-tie. This one de remind woman say e no dey the same position with man. So, woman suppose de always remember the position wey e dey for God arrangement. As Jehovah say make Nazirite no cut their hair (e no normal for man to keep long hair), no drink wine, and no touch dead body, e teach them say e dey important for them to leave some things because of Jehovah and do everything wey Jehovah want make they do.—1Co 11:2-16; go check HAIR; HEAD COVERING; NATURE.
Fine-Fine Things Wey You See for Bible
w05 1/15 30 ¶2
Question Wey Some People Don Ask
The kind Nazirite wey Samson be, different from other people own. Before they born Samson, Jehovah angel tell e mama say: “See! You go get belle and you go born boy. Make no razor blade touch e head, because the pikin go be Nazirite of God from the day wey you born-am. Na this pikin go dey front to save Israel people from the hand of Philistia people.” (Judges 13:5) So, Samson no promise Jehovah say e want be Nazirite. Na Jehovah choose Samson as Nazirite. And e go be Nazirite all e life. The command wey Jehovah give say make Nazirite no touch dead body, no concern Samson. If this command concern Samson and e touch dead body by mistake, e mean say e go need to start as Nazirite from beginning again. But how this one fit happen when e be say na from the day wey they born-am e become Nazirite? So, e clear say, wetin Jehovah want from people wey be Nazirite from the time wey they born them, different somehow from wetin e want from people wey choose to be Nazirite.