Study Book for Our Life and Preaching Meeting
JANUARY 3-9
FINE-FINE LESSON FROM BIBLE | JUDGES 15-16
“To Deceive Person Wey Trust You Na Really Bad Thing!”
w12 4/15 8 ¶4
To Betray Person Na Wicked Sign of This Last Days!
Make we first talk about Delilah. Samson wey be judge for Israel really love Delilah, but Delilah deceive Samson. Samson really want fight Philistia people so that e go save God people. The five lords for Philistia fit don know say Delilah no really love Samson. So, they tell Delilah say they go give-am plenty money if e help them find out wetin de give Samson power. This one go help them fit kill Samson. Because Delilah get long throat for money, e gree. E try three times to know Samson secret, but e fail. So, e continue to worry Samson, de complain every time and de disturb-am, sotey Samson no fit endure-am again. Because of this one, Samson tell Delilah say razor blade never touch e hair before. And say if they cut e hair, e no go get power again. As Delilah know where Samson power come from, e call person to barb Samson hair when Samson de sleep for e lap. After this one, e hand over Samson to e enemy them make they do-am anything wey they want. (Judg. 16:4, 5, 15-21) Delilah really wicked! Because of long throat for money, e betray Samson wey really love-am.
w05 1/15 27 ¶5
Lessons From the Book of Judges
14:16, 17; 16:16. To de use cry-cry and too much complain to get wetin we want, fit spoil friendship.—Proverbs 19:13; 21:19.
w12 4/15 11-12 ¶15-16
To Betray Person Na Wicked Sign of This Last Days!
How people wey don marry fit hold their marriage tight? Bible talk say: “Make you happy with the wife [or husband] wey you marry when you dey young” and ‘Enjoy life with your wife [or husband] wey you love.’ (Prov. 5:18; Eccl. 9:9) As husband and wife de old, they must do everything to make sure say their marriage continue to dey strong. This one mean say they must take care of each other, spend time with each other and continue to love each other. The main thing wey they must get for mind na to protect their marriage and their friendship with Jehovah. To fit do this one, they must de study Bible together, de always preach together, and de pray together make Jehovah bless them.
CONTINUE TO HOLD JEHOVAH TIGHT
Some people for congregation don do something wey really bad and they give them “strong correction so that they go stand well for the faith.” (Titus 1:13) But for some people, they disfellowship them because of their bad character. For people wey learn from this strong correction, e don help them de worship Jehovah well again. (Heb. 12:11) What if they disfellowship our family person or our tight friend? This one fit test who we really hold tight, whether na Jehovah or na the person. Jehovah de watch us to see whether we go obey e command say make we no do anything with anybody wey them disfellowship.—Read 1 Corinthians 5:11-13.
Fine-Fine Things Wey You See for Bible
w05 3/15 27 ¶6
Jehovah help Samson Win!
Na only one thing Samson get for mind, to fight Philistia people. So, as e stay for the house of the prostitute for Gaza, wetin dey e mind na to fight the enemy of God people. Samson need where e go sleep for Gaza wey be enemy city. But the only place wey e see, na for this prostitute house. Samson no go there to sleep with the woman. E comot for the woman house for midnight, uproot the city gate and the iron wey dey the two side and carry them go ontop one mountain near Hebron. And this mountain na about 37 miles [60 km] from Gaza. Na wetin Jehovah want, Samson do and na Jehovah give-am the power to do-am.—Judges 16:1-3.
JANUARY 10-16
FINE-FINE LESSON FROM BIBLE | JUDGES 17-19
“We Go Enter Problem If We No Obey God”
it-2 390-391
Micah
1. Micah come from Ephraim. Micah no obey the number eight commandment for the Ten Commandment (Ex 20:15), when e thief 1,100 pieces of silver from e mama. When e confess and return the money, e mama talk say: “I must give Jehovah this money so that my son go use-am make image wey be wood and the one wey be iron. And now I de give you back the money.” So, Micah mama take 200 pieces of silver from the money and give-am to person wey de use silver make things. The person make two image, one with wood and another one with iron. After, they put this image them for Micah house. Micah get house for idols, and e make ephod and teraphim and still make one of e son to become e priest. Even though wetin Micah do be like say e de honor Jehovah, na something wey Jehovah really hate. Micah break Jehovah law wey say make e people no worship idol. (Ex 20:4-6) And Micah no follow Jehovah arrangement about the correct place of worship wey be tabernacle and the correct person to be priest. (Jg 17:1-6; De 12:1-14) Later, one Levite wey e name na Jonathan start to stay for Micah house. Jonathan na from the family of Gershom wey be Moses pikin. So Micah make this young man e priest. (Jg 18:4, 30) Micah feel say na Jehovah help-am get Levite as priest, so e talk say: “Now I know say Jehovah go bless me.” (Jg 17:7-13) But this one na big mistake! Micah don add to e sin because Jonathan no come from the family of Aaron, so e no even qualify to be priest.—Nu 3:10.
it-2 391 ¶2
Micah
After some time, Micah and some men run after the people of Dan to catch them. When they reach where the people of Dan dey, Micah ask them say: “Wuna don carry the gods wey I make, and wuna don still carry my priest, wetin come remain for me?” The people of Dan come warn Micah say they go kill-am if e continue to follow them and de complain. When e see say they strong pass-am, e go back to e house. (Jg 18:22-26) Later, the people of Dan fight against Laish and burn the city, then they build the city of Dan for there. Jonathan and e sons come be priest for people of Dan. The people of Dan “arrange the idol wey Micah make, for theirself and de worship-am, and e remain there all the days wey the house of the true God [the tabernacle] dey Shiloh.”—Jg 18:27-31.
Fine-Fine Things Wey You See for Bible
w15 12/15 10 ¶6
Bible Translation Wey De Touch the Heart
The things wey show say God name suppose dey inside Bible, de plenty more-more. The name of God dey for the 2013 New World Translation Bible, 7,216 times. This one mean say the name dey for 2013 New World Translation Bible six times pass 1984 edition. Five place out of the six place wey they add the name na 1 Samuel 2:25; 6:3; 10:26; 23:14, 16. The reason why they add the name for this place them, na because the name dey this verse them for Dead Sea Scrolls. And this scrolls use more than 1,000 years old pass Hebrew Masoretic text. They still add this name for Judges 19:18 because of the research them wey they do for olden days Bible document.
JANUARY 17-23
FINE-FINE LESSON FROM BIBLE | JUDGES 20-21
“Continue to Ask Jehovah for Direction”
w11 9/15 32 ¶2
You Fit Copy Phinehas Example When You De Face Problem?
After the men of Gibeah wey come from the tribe of Benjamin rape and kill the wife of one Levite, the other tribes arrange to go fight the tribe of Benjamin. (Judg. 20:1-11) Before they go fight the people of Benjamin, they first pray make Jehovah help them win. But the people of Benjamin win them two times and they kill plenty people. (Judg. 20:14-25) They go think say Jehovah no answer their prayer? You think say Jehovah really want make they go fight Benjamin people because of wetin they do?
w11 9/15 32 ¶4
You Fit Copy Phinehas Example When You De Face Problem?
Wetin this one fit teach us? Some problem for congregation fit continue even though elders don do their best and pray make the problem stop. If this kind thing happen, make elders remember wetin Jesus talk for Luke 11:9, e say: “So I de tell wuna say, continue to ask [or pray], and wuna go get-am; continue to find-am and wuna go see-am; continue to de knock and e go open.” Even if e be like say Jehovah no quick answer the prayers, make elders get-am for mind say Jehovah go answer their prayer for the correct time.
Fine-Fine Things Wey You See for Bible
w14 5/1 11 ¶4-6
You Know?
How them be de use sling fight war for Bible time?
Na sling David use kill Goliath. E fit be say David learn how to use sling when e still be young boy wey de care for e papa sheep.—1 Samuel 17:40-50.
For Bible time, Egypt and Assyria people de draw sling for their drawing. Sling de get two rope and cloth or leather for the center. The person wey de use the sling go put smooth or round stone for the place wey the leather or cloth dey. The stone fit big reach two or three inches (5 to 7.5 cm) and heavy reach 250 grams. Then the person go turn-am or wine-am round well-well, and leave one of the rope, so that the stone go fly comot with heavy force and speed.
For some place wey they dig for Middle East, they see plenty slingstone wey they use fight war for olden days. Warrior wey really sabi use sling fit use-am throw stone wey the speed reach 100 to 150 miles per hour (160 to 240 km/h). Even though say some professor no gree say stone from sling fit reach the speed of arrow, the truth na say the speed of the stone reach to kill person.—Judges 20:16.
JANUARY 24-30
FINE-FINE LESSON FROM BIBLE | RUTH 1-2
“Always De Show Love Wey No De Fail”
w16.02 14 ¶5
Copy Example of People Wey Be Jehovah Tight Friends
E for easy Ruth to think about e family for the land of Moab, say e mama and family people go welcome-am, and care for-am. Ruth na Moab person. The culture of Moab people na e culture, their language na e language and the people for Moab, na e people. Naomi no fit promise Ruth say e go give Ruth all this things if e follow-am go Bethlehem. In fact, e advice Ruth say make e stay for Moab. Naomi fear say e no go fit give e two daughter-in-law another husband or family. So wetin Ruth go do? See how wetin Ruth do, different from wetin Orpah do. Orpah “go back to e people and to e gods.” (Ruth 1:9-15) But Ruth no go back to worship the gods of Moab.
w16.02 14 ¶6
Copy Example of People Wey Be Jehovah Tight Friends
E fit be say Ruth learn about Jehovah from e husband or from Naomi. Jehovah no be like the kind gods wey Moab people de worship. Ruth know say na Jehovah e suppose worship and love. Wetin Ruth need no be only to know the kind God wey Jehovah be. E still need to make decision. E go choose to worship Jehovah? Ruth make better decision. E tell Naomi say: “Your people go be my people, and your God go be my God.” (Ruth 1:16) E de really touch our heart when we think about the kind love wey Ruth get for Naomi. But the one wey dey important pass na the love wey Ruth get for Jehovah. Boaz praise Ruth as e come hide under the wings of Jehovah. (Read Ruth 2:12.) This one fit make us think about small bird wey hide under e mama wings so that e go protect-am. (Ps. 36:7; 91:1-4) Na that kind protection Jehovah give Ruth. Jehovah really bless Ruth because of the faith wey e show. And Ruth no ever regret say e choose to worship Jehovah.
Fine-Fine Things Wey You See for Bible
w05 3/1 27 ¶1
Lessons From the Book of Ruth
1:13, 21—Na Jehovah make life hard for Naomi? No, and Naomi no talk say Jehovah do any bad thing. But because of all the things wey don happen to-am, Naomi think say Jehovah dey against-am. E no happy at all and life tire-am. Another thing be say, for their time, when person born pikin, them de see-am as blessing from God. But if person no fit born, people de see-am as curse. So, as Naomi no get any grand pikin and e two son don die, e fit be say na wetin make Naomi believe say na Jehovah bring this shame ontop-am.
JANUARY 31–FEBRUARY 6
FINE-FINE LESSON FROM BIBLE | RUTH 3-4
“Make Good Name and Do Your Best to Keep-am”
w12 10/1 22 ¶5
‘Ruth Na Better Woman!’
Boaz answer Ruth. And we dey sure say the way wey e sofri talk with Ruth, make Ruth mind calm down. E tell Ruth say: “Make Jehovah bless you, my pikin. You don show love wey no de fail this time pass the first time, because you no go meet any of the young men, whether them rich or poor.” (Ruth 3:10) “The first time” wey Boaz talk about, concern the love wey Ruth show Naomi when e follow-am come back to Israel and de help-am. The love wey Ruth show “this time” na as Ruth come beg Boaz to claim them back. Boaz know say as Ruth still young, e for easy for Ruth to go find young man marry, whether the person rich or poor. But no be wetin Ruth do. Ruth decide say e go do good for Naomi and Naomi husband wey don die, so that they no go forget the name of the man for Israel. This one show say Ruth no just de think about only e self. No wonder Boaz agree to help Ruth.
w12 10/1 23 ¶1
‘Ruth Na Better Woman!’
Ruth go don really happy when e think about wetin Boaz talk say all e people know say Ruth na “better woman”! E clear say Ruth get this kind good name because e choose to learn about Jehovah and worship-am. Another thing be say, Ruth don really help Naomi and e de respect Naomi and e people. And e use all e heart de follow Israel people their laws and traditions even though say no be wetin e sabi before. If we get the kind faith wey Ruth get, we go really de respect other people, their culture and traditions. If we de do like this, we too go get good name like Ruth.
w12 10/1 24 ¶3
‘Ruth Na Better Woman!’
Boaz marry Ruth. And Bible later talk say: ‘Jehovah bless Ruth and e get belle and born boy.’ The women for Bethlehem praise Naomi and Ruth, and talk say Ruth better pass seven sons to Naomi. Later, Bible talk say the pikin wey Ruth born come be grandpapa to King David. (Ruth 4:11-22) And David come be Jesus Christ great grandpapa.—Matthew 1:1.
Fine-Fine Things Wey You See for Bible
w05 3/1 29 ¶3
Lessons From the Book of Ruth
4:6—Why the first man wey suppose claim Ruth and Naomi back, talk say if e do-am this one go “spoil” e own inheritance? The first reason be say, if poor person sell the land wey e inherit, and e family person wey get the right to buy the land back want buy-am, the money wey the person go pay go depend on how many years remain before the next Jubilee year. (Leviticus 25:25-27) This one go make the value of e own land reduce. Another thing be say, if e marry Ruth, and Ruth born boy, na the boy go inherit the land wey e buy back, no be any of e close family member.
FEBRUARY 7-13
FINE-FINE LESSON FROM BIBLE | 1 SAMUEL 1-2
“Tell Jehovah How You De Feel for Prayer”
ia 55 ¶12
Hannah Tell Jehovah How E De Feel When E De Pray
The way Hannah pray na the way all servants of Jehovah suppose de pray. When we de pray, Jehovah want make we de tell-am everything wey de worry us, the way small pikin wey trust e papa de do. (Read Psalm 62:8; 1 Thessalonians 5:17.) Jehovah use e holy spirit direct apostle Peter to write this words wey go move us to pray. E talk say: “Throw all wuna problem give [Jehovah], because e de care for wuna.”—1 Pet. 5:7.
w07 3/15 16 ¶4
Wetin Give Hannah Peace of Mind?
Wetin all this one teach us? When we de pray to Jehovah about our problems, make we tell-am how we de feel and use all our heart beg-am to help us. If we don do everything wey we fit do to solve our problem, but the problem no gree go, make we leave the rest for Jehovah. This na the best thing to do.—Proverbs 3:5, 6.
Fine-Fine Things Wey You See for Bible
w05 3/15 21 ¶5
Lessons From the Book of First Samuel
2:10—Why Hannah pray say make Jehovah give “e king power” when e be say no king de rule Israel that time? Jehovah don first talk-am for the Law wey e give Israel people say they go get person wey go become their king. (Deuteronomy 17:14-18) Just before Jacob die, e talk say: “The scepter [this one na the sign of authority wey king de get] no go comot from the tribe of Judah.” (Genesis 49:10) Another thing na say, Jehovah tell Sarah—Israel people great grandmama—say: “Kings go come from-am.” (Genesis 17:16) So, Hannah de pray about that future king.
FEBRUARY 14-20
FINE-FINE LESSON FROM BIBLE | 1 SAMUEL 3-5
“Jehovah De Care About How We De Feel”
Na Almighty But E De Care About People
Samuel young well-well when he begin work for Jehovah for tabernacle. (1 Sam. 3:1) One night after Samuel don sleep, something happen. (Read 1 Samuel 3:2-10.) He hear one voice wey e call his name. Samuel think say na High Priest Eli call his name. So he run go meet Eli and he talk say: “I don come, you call me.” But Eli talk say no be he call Samuel. The same thing happen two times again. Then Eli know say na God de call Samuel. So he tell the young boy the thing wey he go do, and he obey. Why Jehovah no use angel tell Samuel the first time say na he call his name? Bible no tell us. But from the way things happen, we fit talk say Jehovah care about Samuel. Why we talk so?
Na Almighty But E De Care About People
Read 1 Samuel 3:11-18. The Law of Jehovah talk say make children de respect old person, especially if the person de rule. (Ex. 22:28; Lev. 19:32) So how you think say e for be for Samuel to just go meet Eli for morning and tell Eli the strong message wey God want make he talk? E for no easy at all! No wonder Bible talk say: “Fear no make Samuel tell Eli the vision.” But God make-am clear to Eli say na he de call Samuel. So, Eli command Samuel make he talk. He talk say: “[No] hide anything from me for inside everything wey he tell you.” Samuel do wetin Eli talk and “he no hide anything.”
Fine-Fine Things Wey You See for Bible
w05 3/15 21 ¶6
Lessons From the Book of First Samuel
3:3—Samuel really sleep inside the Most Holy? No! Samuel na Levite from the family of Kohath, so e no be priest as e no come from the family of Aaron. (1 Chronicles 6:33-38) Because of this one, e no get right to enter the Most Holy and see the “holy things.” (Numbers 4:17-20) The only part of the tabernacle wey Samuel get right to enter na the courtyard. E fit be say na there e de sleep. E fit still be say na the courtyard Eli still sleep. As Bible talk say Samuel sleep for ‘where the ark of God dey,’ e de talk about the area around the tabernacle.
FEBRUARY 21-27
FINE-FINE LESSON FROM BIBLE | 1 SAMUEL 6-8
“Who Be Your King?”
it-2 163 ¶1
Kingdom of God
Israel People Reject Jehovah as King. Almost 400 years after Israel people comot from Egypt, and more than 800 years after God make agreement with Abraham, Israel people talk say they want make somebody become their king just like other nations. As they talk say they want make somebody become their king, e mean say they no want make God be their king again. (1Sa 8:4-8) The truth be say, the people of Israel be de expect say God go give them king just as e don promise Abraham and Jacob. Other things wey give them this hope na the thing wey Jacob talk about Judah before e die (Ge 49:8-10), the things wey Jehovah tell them after they comot for Egypt (Ex 19:3-6), one of the Law wey Jehovah give them (De 17:14, 15), and one of the things wey God use prophet Balaam talk (Nu 24:2-7, 17). Hannah wey be Samuel mama worship Jehovah well, and one time wey e de pray, e show say e get this hope too. (1Sa 2:7-10) But Jehovah never talk everything wey e get for mind about e Kingdom. E never talk when the Kingdom go come, how e go be, and whether e go be for heaven or for earth. So as the people talk say make Samuel appoint person as their king, na oversabi them do.
w11 1/1 27 ¶1
Samuel Endure Even When Things No Happen as E Want
When Samuel pray to Jehovah about the matter, Jehovah tell-am say: “Do everything wey the people tell you; because no be you they reject, but na me they don reject as their king.” This one go don make Samuel mind come down. But with this one, Israel people don really insult God! Jehovah tell prophet Samuel say make e warn Israel people about wetin go happen to them as they want get king like other nations. When Samuel tell them, they talk say: “No, we don make up our mind say we need king wey go de rule us.” Samuel de always obey Jehovah, so e anoint the person wey Jehovah don choose as king.—1 Samuel 8:7-19.
w10 1/15 30 ¶9
The Way Jehovah De Rule Na the Best!
Things wey don happen since Israel people talk say they want king, don show say wetin Jehovah tell Israel people na true. Israel people start to get plenty problems when person start to rule them, especially when the king no obey the Law of God. With the example of Israel people, e no de surprise us say when people wey no know Jehovah de rule, they no de fit do any better thing wey de last. Na true say some politicians de pray say make God help them fit bring peace and make fear no dey again. But how God go bless people wey no de support-am as King?—Ps. 2:10-12.
Fine-Fine Things Wey You See for Bible
w02 4/1 12 ¶13
Why You Suppose Baptize?
Before person fit baptize as Jehovah Witness, e must stop all the bad things wey e first de do. This one na wetin anybody wey don decide to use all e heart follow Jesus go do. No be say they go force-am. This person no go only stop all the bad things wey e de do, but e must decide say na only wetin God like, e go de do. For Bible, the Hebrew and Greek word wey they use describe wetin this person don do, mean say the person don turn back, or change e bad life and start to follow God. (1 Kings 8:33, 34) And e mean say the person go de ‘do things wey show say e don repent.’ (Acts 26:20) The person must comot from lie-lie religion, de do wetin God want and worship only Jehovah. (Deuteronomy 30:2, 8-10; 1 Samuel 7:3) This one still mean say the person must change the way e de think, e plans for life and e character. (Ezekiel 18:31) As we de change our bad character to the one wey God like, e show say we don “turn back” from our bad life.—Acts 3:19; Ephesians 4:20-24; Colossians 3:5-14.
FEBRUARY 28–MARCH 6
FINE-FINE LESSON FROM BIBLE | 1 SAMUEL 9-11
“Saul First Dey Humble and Know Where E Suppose Do Reach”
Dey Humble and Know Where You Fit Do Reach
Think about wetin happen to King Saul. Before, when Saul dey young, e know wetin e get right to do and wetin e no get right to do. E no even agree to accept more work. (1 Sam. 9:21; 10:20-22) But as time de go, Saul begin raise shoulder and de do things wey e no get right to do. E start to do like this after e don be king. One time dey wey e no dey patient as e de wait for prophet Samuel. Instead of Saul to trust Jehovah say E go help the people, Saul do sacrifice even though say e no get the right to do-am. Jehovah no happy because of this one and e reject Saul as king. (1 Sam. 13:8-14) This example na warning for us. And we de show say we get sense when we no do things wey we no get the right to do.
w14 3/15 9 ¶8
How We Fit Continue to Do Wetin Go Benefit Other People?
The story of King Saul na warning for us. Make we no just de think about only ourself because e go make us no do wetin go benefit other people. When they make Saul king, e know where e suppose do reach and e dey humble. (1 Sam. 9:21) Some Israel people talk bad things as they make-am king, but e no punish them, even though say e get the right to punish them because na God choose-am as king. (1 Sam. 10:27) King Saul allow the spirit of God to direct-am when e carry Israel people go fight Ammon people. And e show say e dey humble when e praise Jehovah as e help them win the war.—1 Sam. 11:6, 11-13.
w95 12/15 10 ¶1
Ammon People Use Bad Pay for Good
Another thing na say, Ammon people forget all the good things wey Jehovah don do for them. They talk say they go fight Jehovah people and Jehovah no happy at all! Bible talk say: “When Saul hear wetin [Nahash] talk, the spirit of God start to work for e body, and e vex no be small.” The spirit of God move Saul to gather 330,000 men wey sabi fight, and they kill Ammon people and the ones wey remain scatter sotey, you ‘no fit see two Ammon people wey dey together.’—1 Samuel 11:6, 11.
Fine-Fine Things Wey You See for Bible
w05 3/15 22 ¶8
Lessons From the Book of First Samuel
9:9—Why this verse talk say, “before-before them de call prophet, seer”? This one fit be because, as prophets de plenty for Samuel time and when kings for Israel de rule, people no come de call them “seer” again, instead they start to call them “prophet.” Na Samuel be the first person wey they start to call prophet.—Acts 3:24.