Study Book for Our Life and Preaching Meeting
MARCH 7-13
FINE-FINE LESSON FROM BIBLE | 1 SAMUEL 12-13
“Over-sabi De Make Person Lose Jehovah Favor”
w00 8/1 13 ¶17
Over-sabi De Make Person Lose Jehovah Favor
When you first look wetin Saul do, you fit think say e correct. This na because the people of God dey for trouble. Philistia people don gather to fight them, so them de fear. (1 Samuel 13:6, 7) Na true say some kind situation fit make us do something wey no be we suppose do. But remember say, Jehovah fit know wetin dey our heart and fit know the reason why we do something. (1 Samuel 16:7) So, Jehovah go don see some things about Saul wey Bible no talk about. For example, Jehovah fit don see say na because Saul dey proud, na e make e no wait make Samuel come. E fit be say Saul really vex say as king for the whole Israel why e go wait for one old prophet wey no de follow time! Anyhow e happen, because say prophet Samuel come late, Saul feel say e fit do as e like, and disobey the clear command wey e don receive. Wetin happen because of this one? Samuel no happy for wetin Saul do. E condemn wetin Saul do and tell-am say: “Your kingdom no go last . . . because you no obey wetin Jehovah command you.” (1 Samuel 13:13, 14) So, over-sabi make Saul lose Jehovah favor.
w07 6/15 27 ¶8
Jehovah De Happy When We De Obey
The story of King Saul for Bible teach us say e dey important make we de obey. When they make Saul king, e first dey humble and know where e suppose do reach. E no even ‘see e self as anything’ that time. But as time de go, e come dey proud and de do over-sabi. This one come de control how e de make decisions. (1 Samuel 10:21, 22; 15:17) E get the time wey Philistia people want fight Israel people. Samuel tell King Saul say make e wait for-am to come do sacrifice to Jehovah and still tell-am other things to do. But Samuel no come the time wey the people de expect, so they start to comot. Because of this one, Saul “do the sacrifice.” Jehovah no happy at all. At last, when Samuel come, King Saul come de give excuse why e do the sacrifice. E talk say as Samuel no quick come, e ‘tell e self say’ e go do the sacrifice to beg Jehovah for help. For King Saul mind, na to do the sacrifice dey important pass to obey the command wey Samuel give-am say make e wait for-am to do the sacrifice. Samuel tell Saul say: “Na foolish thing you do so. You no obey the command wey Jehovah your God give you.” Because Saul no obey Jehovah, e kingdom no last.—1 Samuel 10:8; 13:5-13.
Fine-Fine Things Wey You See for Bible
w11 7/15 13 ¶15
You Go Follow Jehovah Direction?
If Israel people think say to get king wey them de see better pass Jehovah wey them no de see, them de deceive theirself! And this one fit make them de follow many other lie-lie teaching wey come from Satan. Kings wey them de see, fit make-am easy for them to start to worship idols. For example, people wey de worship idols de think say things wey they fit see, like their gods wey them make with wood and stone, dey real and fit help them, pass Jehovah the God wey them no de see but wey make everything. But this one na big mistake! And as apostle Paul talk, idols “no be anything.” (1 Cor. 8:4) They no fit see, hear, talk, or do anything. You fit see them and touch them, but if you worship them, you go just be like person wey want catch breeze. And this one go only bring problem for you.—Ps. 115:4-8.
MARCH 14-20
FINE-FINE LESSON FROM BIBLE | 1 SAMUEL 14-15
“To Obey Jehovah Better Pass to Make Sacrifice”
w07 6/15 26 ¶4
Jehovah De Happy When We De Obey
Since na Jehovah make everything, na Jehovah get everything wey we get. So, e get anything wey we fit give Jehovah? Yes, we fit give Jehovah something wey really dey special. Wetin be that? Make we see the answer from this advice for Bible wey talk say: “Show say you get sense my pikin, and my heart go glad, so that I go fit answer the person wey de insult me.” (Proverbs 27:11) So, one thing wey we fit give Jehovah na to obey-am. Na true say our condition for life and the way they train us no be the same. But if we de obey Jehovah, we go fit answer all the lie-lie wey Satan de talk say nobody go fit hold Jehovah tight if problem come. This one na big honor wey we get!
it-2 521 ¶2
To De Obey
E no get any other thing wey we fit do to make Jehovah happy, than to obey-am. And we no fit gain e favor if we no obey. Na wetin Samuel tell King Saul when e say: ‘Which one de make Jehovah happy pass: Na to burn animal as sacrifice or to obey [wey still mean sha·maʽʹ] Jehovah? See! To obey [wey be, to listen] better pass sacrifice and to sofri listen better pass the oil wey dey ram meat.’ (1Sa 15:22) If we no obey, we don reject the word of Jehovah. And we de show say we no believe, we no trust, and we no get faith for the word of Jehovah and even Jehovah. So, person wey no de obey Jehovah na the same with person wey de worship idol or wey de find out about e tomorrow from demons. (1Sa 15:23; compare Ro 6:16.) If we talk say we go obey Jehovah, but we no obey, e dey useless because as we no obey e de show say we no trust or respect Jehovah. (Mt 21:28-32) People wey de like to hear the word of God and gree say na the truth, but no de do wetin God talk, de deceive theirself with lie-lie thinking and they no go get blessing from Jehovah. (Jas 1:22-25) Jesus make-am clear say even people wey de do things wey resemble wetin Jehovah command, but no de do the exact thing wey Jehovah talk or de do-am because of wetin them go gain, no go ever enter the Kingdom of God.—Mt 7:15-23.
Fine-Fine Things Wey You See for Bible
it-1 493
To Feel or Pity for Person
If we allow other people make us feel for or pity for person wey Jehovah don condemn, we go enter serious trouble. We learn this one from wetin happen to King Saul. When time reach for Jehovah to destroy Amalek people because they attack Israel people after they comot for Egypt, Jehovah tell Saul say make e no pity for them. But Saul listen to e people, and e no do everything wey Jehovah say make e do. Because of this one, Jehovah reject Saul as king. (1Sa 15:2-24) If to hold Jehovah tight na the number one thing for our life, and we really believe say everything wey Jehovah de tell us na the correct thing, we no go make the kind mistake wey Saul make, and lose Jehovah favor.
MARCH 21-27
FINE-FINE LESSON FROM BIBLE | 1 SAMUEL 16-17
“Na Jehovah Get the Fight”
wp16.5 11 ¶2-3
“Na Jehovah Get the Fight”
David make Saul mind come down when e tell-am how e kill lion and bear. Na boast David de boast? No. David know say na Jehovah help-am fit kill those animals. Na e make e talk say: “Jehovah wey save me from the hand of the lion and the hand of the bear, go still save me from the hand of this Philistia man.” So, Saul talk say: “Go, and make Jehovah dey with you.”—1 Samuel 17:37.
You go like make your faith strong like David own? Know say, David no get faith just because e de wish say e get faith. But e get faith because e know Jehovah well, and e don see Jehovah hand for e life. David know say Jehovah de protect e people, and e de do wetin e promise. If we want get faith like David, we need to continue to learn about Jehovah. As we de do wetin we de learn, the good things wey we go gain, go de make our faith de strong.—Hebrews 11:1.
wp16.5 11-12
“Na Jehovah Get the Fight”
Till today, wetin David tell Goliath de make many people get strong faith. Just imagine as David wey be young man that time de tell Goliath say: “You de come fight me with sword, spear and javelin, but I de come fight you with the name of Jehovah of army, the God of the army of Israel wey you don challenge.” David know say Goliath power and weapon no reach anything. Goliath don insult Jehovah and because of that one, Jehovah go deal with-am. Na wetin make David talk say, “na Jehovah get the fight.”—1 Samuel 17:45-47.
David know say Goliath na giant, and e still see e weapons. But e no gree make those things make-am fear. E no make the kind mistake wey Saul and e soldiers make. David no compare e self to Goliath. But e compare Goliath with Jehovah. Goliath tall reach nine and half feet (2.9 m), and e tall pass all the other people wey dey there. But, how Goliath big reach if we compare-am with Jehovah, the God wey High Pass? True-true, for Jehovah eye everybody be like ant. Na so Goliath still be for Jehovah eye! And Jehovah don ready to finish-am.
wp16.5 12 ¶4
“Na Jehovah Get the Fight”
Today, servants of God no de fight war. Jehovah no want make e people de fight war again. (Matthew 26:52) Even with this one, we still need to get faith like David. We need to believe say Jehovah really dey. And say na Jehovah be the only God wey we suppose worship and de fear. Sometimes, we fit de feel say our problem big pass us, but make we remember say our problems no reach anything when we compare-am with Jehovah power. If we choose Jehovah as our God, and we get faith for Jehovah like David, no problem go make us de fear. No problem pass Jehovah power!
Fine-Fine Things Wey You See for Bible
it-2 871-872
Saul
Na after this thing happen and after they anoint David as the future king of Israel, Jehovah spirit leave Saul. From that time, “bad spirit from Jehovah start to disturb Saul.” As Jehovah remove e spirit from Saul, e allow “bad spirit” or the bad things wey Saul de think and imagine to de disturb Saul. And because of this one, Saul no come get peace of mind again and e de always feel bad. As Saul no gree obey Jehovah e show say e get bad mind and heart. And Jehovah spirit no go stop-am make e no do the bad things wey dey e mind. But because Jehovah remove e spirit from Saul and allow “bad spirit” or Saul bad mind to de disturb-am, na e make Bible talk say the “bad spirit” come from Jehovah. Even the servants of Saul talk say na “bad spirit from God” de disturb Saul. As one of e servants talk, Saul gree make David come de play music for the palace so that anytime wey the “bad spirit” start to disturb Saul, David go play music to calm Saul down.—1Sa 16:14-23; 17:15.
MARCH 28–APRIL 3
FINE-FINE LESSON FROM BIBLE | 1 SAMUEL 18-19
“Continue to Dey Humble Even When You De Succeed”
w04 4/1 15 ¶4
Trust Jehovah to Help You When Things Change for Your Life
Small time this boy wey be shepherd go become big man for Israel. The king take David as e servant and still want make David de play music for-am. David kill Goliath wey be giant wey strong soldiers for Israel de fear. The king make David the leader of all the men wey de fight for Israel, and David fight and win Philistia people plenty times. Israel people love David. They even write songs to praise David. Before this time, one of King Saul servant talk say no be only harp David sabi play, but e still be ‘strong man wey sabi fight, wey sabi talk with people and wey fine.’—1 Samuel 16:18; 17:23, 24, 45-51; 18:5-7.
w18.01 28 ¶6-7
The Difference Between People Wey De Worship Jehovah and People Wey No De Worship-am
Some people de proud because they fine, people know them, they sabi music, and get power, or high position. David get all this things, but e still continue to dey humble for all e life. After David kill Goliath, King Saul promise David say e go marry e pikin. But David tell-am say: “Who I be, and who my family people and my papa family be for Israel, wey I go come be son-in-law to the king?” (1 Sam. 18:18) Wetin help David continue to dey humble? David get this better character, power, and position because Jehovah ‘bring e self down’ or humble e self to become David friend. (Ps. 113:5-8) David know say all the good things wey e get, come from Jehovah.—Compare 1 Corinthians 4:7.
7 Like David, Jehovah people for our time de show say them dey humble. E de surprise us say even though say na Jehovah high pass for heaven and earth, e still dey humble. (Ps. 18:35) We de try our best to follow this advice wey Bible give, say ‘make we wear deep love and feeling like cloth, get good heart, dey humble, dey gentle, and dey patient.’ (Col. 3:12) We still know say love ‘no de boast, e no de proud.’ (1 Cor. 13:4) When other people see say we dey humble, e fit move them to join us worship Jehovah. Just as the better character of woman wey de worship Jehovah fit make e husband start to worship Jehovah, na so other people fit come worship Jehovah because Jehovah people dey humble.—1 Pet. 3:1.
Fine-Fine Things Wey You See for Bible
it-2 695-696
Prophet
Na Jehovah de use e spirit make person prophet. But that one no mean say na Jehovah spirit de move the person to talk, anytime wey the person talk something. But when God get message for them, e spirit go ‘come ontop them’ and make them know wetin they go talk. (Eze 11:4, 5; Mic 3:8) The spirit go de push or move them, and make them talk wetin Jehovah want make them talk. (1Sa 10:10; Jer 20:9; Am 3:8) That time, prophets de do things wey strange. The way them de talk and do things, de really show say no be ordinary power de control them. This one fit be part of wetin Bible mean when e talk say some people “behave like prophet.” (1Sa 10:6-11; 19:20-24; Jer 29:24-32; compare Ac 2:4, 12-17; 6:15; 7:55.) Because of the way them de put body for their work and no de fear at all, e fit make people de feel say they don craze or say them no normal. Just as e be for some military commanders when Jehovah anoint Jehu. But when they know say the man na prophet, na once the military commanders accept e message, and they no take-am play. (2Ki 9:1-13; compare Ac 26:24, 25.) One time when King Saul de pursue David, God make Saul ‘behave like prophet.’ Saul remove e cloth and lie-down for the whole day and the whole night, and na that time David escape. (1Sa 19:18–20:1) This one no mean say prophets de always comot their cloth because Bible no show say them de always do-am. Apart from Saul, Bible still talk about two other times wey prophets comot their cloth, and they get reason why they do-am. Na to show how some things wey they talk about, go happen for future. (Isa 20:2-4; Mic 1:8-11) E fit be say Jehovah make Saul comot e cloth to show say Saul just be like any other person without e king cloth. Or to show say Saul no get power to stand against wetin God want. Or for other reason. But Bible no tell us.
APRIL 4-10
FINE-FINE LESSON FROM BIBLE | 1 SAMUEL 20-22
“Wetin Go Help You Be Better Friend?”
Dey Tight With Brothers and Sisters Before the End Come
Today, different-different things de make life hard for our brothers and sisters. For example, many of them de suffer when things like war happen or heavy rain scatter their property. When that kind thing happen, some of us fit tell this brothers and sisters make they come stay for our house. Other people go fit support this brothers and sisters with wetin they need. But all of us fit pray to Jehovah make e help our brothers and sisters. When we hear say one brother or sister don tire because of something, na true say we fit no know the thing wey we go talk or do. But all of us go fit do something to help. For example, we fit spend time with that our friend. We fit take our time listen to the brother or sister well when e de talk. And we fit tell the person about any Bible verse wey we like. (Isa. 50:4) The important thing be say, you dey with your friends to help them when they need you.—Read Proverbs 17:17.
w08 2/15 8 ¶7
Do Things the Way Jehovah Want
God want make we be the kind friend wey people fit trust. (Prov. 17:17) King Saul pikin wey be Jonathan make David e friend. When Jonathan hear say David don kill Goliath, ‘Jonathan become David tight friend, and Jonathan begin love David the way e love e self.’ (1 Sam. 18:1, 3) Jonathan even tell David say Saul want kill David. After David don run comot, Jonathan meet David and make agreement with David. When Jonathan de defend David, Saul almost kill-am. But David and Jonathan still meet again, and make their friendship strong pass as e first dey. (1 Sam. 20:24-41) The last time wey David and Jonathan meet, Jonathan “encourage David to trust Jehovah.”—1 Sam. 23:16-18.
w09 10/15 19 ¶11
For This World Wey Love No Dey, Wetin Go Help Our Friendship No Die?
Hold your friend tight. King Solomon write say: “Real friend de show love all the time, and na brother wey you fit trust when problem dey.” (Prov. 17:17) When Solomon de write this statement, e fit be say e de think about the kind friendship wey e papa David, and Jonathan enjoy. (1 Sam. 18:1) King Saul be want make e pikin Jonathan become king after e die. But Jonathan accept Jehovah decision to make David king after Saul. Jonathan no be like King Saul wey jealous David. E no come de vex say the people of Israel de praise David, and e no agree with King Saul for the bad things wey e talk about David. (1 Sam. 20:24-34) We de do like Jonathan? When them give our friends new assignment for Jehovah organization, we de happy with them? When them de suffer, we de comfort and support them? When people de talk bad things about our friend, we de quick believe-am? Or like Jonathan, we de defend our friends because we hold them tight?
Fine-Fine Things Wey You See for Bible
w05 3/15 24 ¶4
Lessons From the Book of First Samuel
21:12, 13. Jehovah expect us to use our sense handle hard situations for life. E don give us Bible wey de give us sense, help us make correct decision, and know the correct things to do. (Proverbs 1:4) E still give us congregation elders to help us.
APRIL 18-24
FINE-FINE LESSON FROM BIBLE | 1 SAMUEL 23-24
“Dey Patient and Wait Make Jehovah Handle the Matter”
w04 4/1 16 ¶8
Trust Jehovah to Help You When Things Change for Your Life
David no gree kill Saul. David show say e get faith and e dey patient. E no worry e self, e leave the matter for Jehovah hand. After King Saul comot from the cave, David call-am and tell-am say: “Make Jehovah judge between me and you, and make Jehovah pay you for wetin you don do me, but I no go do you bad.” (1 Samuel 24:12) Even though David know say wetin Saul do, really bad, e no fight for e self; e no insult Saul or talk bad things about Saul. And even when David face other problems, e control e self, e no handle the matter by e self. Instead, e leave-am for Jehovah to handle-am.—1 Samuel 25:32-34; 26:10, 11.
w04 6/1 22-23
Na Your Problems De Control Your Life?
The number three thing wey we learn be say, instead make we do wetin Bible no support to solve our problem, make we wait for Jehovah. The disciple James write say: “Allow endurance finish e work, so that wuna go complete and de do well for everything; yes, wuna no go lack any good character.” (James 1:4) E dey important make we “allow endurance finish e work.” How we go do-am? When we get problem, we no go do wetin Bible no support just to end our problem quick-quick. This one go test our faith and make-am better pass before. Na that time e go clear say we get faith. Joseph and David endure problems like this. They no try to end their problem the way e go make Jehovah vex. Instead, they use their condition for the best way. Them wait make Jehovah help them, and Jehovah really bless them. Jehovah use the two of them to save and lead e people.—Genesis 41:39-41; 45:5; 2 Samuel 5:4, 5.
We too fit face some kind problems wey fit tempt us to end-am the way Bible no support. For example, you de feel bad because you never see person wey de worship Jehovah wey you go marry? If na so e be for you, make you no do anything wey go tempt you to disobey Jehovah command say make we marry only person wey de worship Jehovah. (1 Corinthians 7:39) You de face problem for your marriage? No look for how to end your marriage or separate, like people for this world. Instead, make wuna handle the problems together. (Malachi 2:16; Ephesians 5:21-33) E de hard you to care for your family because of the way things hard? If you trust Jehovah to help you, you no go do any work wey dey against Jehovah law just to get money. (Psalm 37:25; Hebrews 13:18) All of us must do our best to do the correct thing when we de face problem and do everything wey we fit to give Jehovah reason to bless us. As we de do this one, make we make up our mind to wait for the time wey Jehovah go solve our problems forever.—Micah 7:7.
Fine-Fine Things Wey You See for Bible
w17.11 27 ¶11
No Allow Anything Make You No Get Everlasting Life
If we do our best to love people from our heart and get better mind, we no go de jealous them. Bible talk say: “Love dey patient and kind. Love no de jealous.” (1 Cor. 13:4) If we no want make jealousy de control us, we must do everything wey we fit do to see things the way Jehovah de see-am. We must see our Christian brothers and sisters the way we de see the different part of our body. This one go make us de feel for them just as Bible talk when e say: ‘If they honor one part of the body, all the other part go de happy with-am.’ (1 Cor. 12:16-18, 26) So, instead for us to de jealous other people, we suppose de happy when good things happen to them. Think about the example of Jonathan wey be Saul pikin. E no jealous when Jehovah choose David as the next king. Instead, e encourage David. (1 Sam. 23:16-18) We fit show love and get good heart like Jonathan?
APRIL 25–MAY 1
FINE-FINE LESSON FROM BIBLE | 1 SAMUEL 25-26
“You De Think Before You Do Something?”
ia 78 ¶10-12
Abigail Show Say E Get Sense
How David soldiers treat Nabal shepherds? E for easy for them to take any sheep anytime wey they like, but they no do like that. Instead they protect Nabal sheep and e servants. (Read 1 Samuel 25:15, 16.) Shepherds and their sheep de face plenty problems. Wicked animals fit attack the sheep, and because the boundary for the south side of Israel near their neighbors, the people de enter plenty times to thief their sheep and attack them.
11 E no really easy for David to give all e men food as them dey wilderness. So one day, David send ten men go meet Nabal say make e help them. David choose the correct time to ask Nabal for help. Na the time wey them de comot hair for sheep body, when Israel people de celebrate and give people things. David still take e time choose wetin e go talk to show say e respect Nabal. E even tell Nabal say “na your son David.” E fit be say David talk like that to show say e respect Nabal because Nabal senior-am. Wetin Nabal do?—1 Sam. 25:5-8.
12 Nabal really vex! The young man wey we don first talk about tell Abigail say ‘Nabal shout for them and insult them.’ Because Nabal stingy, e shout and complain say they want come take e food, water and animal wey e kill. E insult David and compare-am to slave wey run from e master. Nabal hate David just as Saul hate-am. Saul and Nabal no see things the way Jehovah de see-am. God love David and e see David as the next king for Israel, no be as slave wey run from e master.—1 Sam. 25:10, 11, 14.
ia 80 ¶18
Abigail Show Say E Get Sense
Abigail blame e self for wetin happen and beg David to forgive-am. E gree say e husband no get sense just as the meaning of e name show. E use this one show say David too big to fight that kind person. Wetin e talk show say e trust David as Jehovah messenger and say David de fight for Jehovah. E still talk wetin show say e know about Jehovah promise to make David king, because e talk say: ‘Jehovah go surely make you leader for Israel.’ E still beg David say make e no do anything wey go make blood dey e hand or wey go make-am later regret. (Read 1 Samuel 25:24-31.) This better things wey Abigail talk, really touch David.
Fine-Fine Things Wey You See for Bible
ia 80 ¶16
Abigail Show Say E Get Sense
This one mean say Abigail dey against e husband wey be the head of the family? No. Remember say Nabal no treat David well at all even though say David na person wey Jehovah don anoint. Wetin Nabal do, for don make many people for e family die for nothing. If to say Abigail no do anything, e for be like say e de support the bad thing wey e husband do. Wetin Abigail do show say to support Jehovah dey important to-am pass to support e husband.