Study Book for Our Life and Preaching Meeting
MAY 2-8
FINE-FINE LESSON FROM BIBLE | 1 SAMUEL 27-29
“The Sense Wey David Use Fight for Jehovah People”
it-1 41
Achish
The time wey King Saul want kill David, na two times David run go the area wey Achish de rule. The first time, the servants of Achish tell-am say David na their enemy, so David come pretend say e don mad. Because of this one, King Achish leave David make e go. (1Sa 21:10-15; Ps 34:Sup; 56:Sup) The second time, David go there with e 600 warriors and their family and King Achish say make them stay for Ziklag. For the one year and four months wey David and e men stay for Ziklag, Achish believe say them de go attack the towns for Israel. But na the people of Geshur, Girzites, and Amalek them de attack. (1Sa 27:1-12) King Achish really believe say David de fight against Israel people sotey e make David e bodyguard when Philistia people de plan to go fight Israel people. Na when the other lords for Philistia no gree make David and e men follow them, King Achish send them back to Ziklag. (1Sa 28:2; 29:1-11) E dey clear say when David become king and de fight war against Gath, e no kill Achish. We know this one because King Achish still dey alive when Solomon become king for Israel.—1Ki 2:39-41; go check GATH.
How Young Brothers Fit Make People Trust Them?
8 Make we talk about another thing wey David face. After they anoint David to be king, e wait for many years before e start to rule as king for Judah. (1 Sam. 16:13; 2 Sam. 2:3, 4) That time, wetin help David to sofri wait? Instead of David to lose hope, e put e mind for the things wey e fit do. For example, the time wey David de hide from Saul, when e dey the land wey Philistine de control, e use the time fight people wey dey against Israel. Because of this thing wey David do, e protect the land wey Judah get.—1 Sam. 27:1-12.
it-2 245 ¶6
Lie
Na true say Bible condemn lie, but that one no mean say when people ask us about any matter, we must tell them everything wey we know even when they no get the right to know. Jesus Christ warn us say: “No give wetin dey holy to dogs, and no throw things wey dey special to you for pigs, so that they no go match-am with their leg, and turn round tear you open.” (Mt 7:6) Na e make Jesus no tell some people wey ask-am question everything wey e know or give them direct answer. Because e know say the answer fit put people life for danger. (Mt 15:1-6; 21:23-27; Joh 7:3-10) Na the same way we suppose see wetin Abraham, Isaac, Rahab, and Elisha do as they no give full information to people wey no be servants of Jehovah.—Ge 12:10-19; chap 20; 26:1-10; Jos 2:1-6; Jas 2:25; 2Ki 6:11-23.
Fine-Fine Things Wey You See for Bible
w10 1/1 20 ¶5-6
People Wey Don Die Fit Help Us?
Think-am, Bible make-am clear say when person die, they go bury-am and everything wey e get for mind to do, don end. (Psalm 146:4) Saul and Samuel know say Jehovah command e people say make they no do anything with people wey get connection with demons. And before this time, Saul don drive all this kind people comot from Israel.—Leviticus 19:31.
Make we reason the matter like this: We know say Samuel love Jehovah. So you think say if to say Samuel be dey alive as spirit, e for disobey Jehovah and cooperate with native doctor to meet Saul? Remember say Jehovah no gree talk with Saul. So na native doctor go force Jehovah wey be the Almighty God, to use Samuel wey don die talk with Saul? E no ever fit happen! So e clear say the “Samuel” wey talk with Saul no be the same prophet Samuel wey love Jehovah. But na demon wey pretend to be Samuel.
MAY 9-15
FINE-FINE LESSON FROM BIBLE | 1 SAMUEL 30-31
“Trust Jehovah Your God and E Go Help You Dey Strong”
w06 8/1 28 ¶12
Fear Jehovah So That You Go Happy
12 The respect and fear wey David get for Jehovah no only make-am make e no do bad things, but e still help-am fit make correct decision when things hard. Na one year and four months David and e men stay for Ziklag wey dey Philistia area, when them de run from King Saul. (1 Samuel 27:5-7) One time wey David and e men no dey, some people for Amalek attack the city, burn-am and carry all the women, children and animals go. When David and e men come back and see wetin happen, them cry! Before you know, David men wey de cry, start to vex for David and even talk say they go stone David to death. Even though say this things really worry David, e no lose hope. (Proverbs 24:10) Because of the fear and respect wey David get for Jehovah, e pray and trust Jehovah and that one make-am strong. Jehovah help David and e men fit attack those Amalek people and collect all their things back.—1 Samuel 30:1-20.
w12 4/15 30 ¶14
Jehovah De Help Us Fit Hold-am Tight Reach the End
14 David face plenty problem for e life. (1 Sam. 30:3-6) The things wey David write for Bible show say Jehovah know how e de feel. (Read Psalm 34:18; 56:8.) And Jehovah still know how we de feel today. Jehovah dey near us when we de feel say our “own don finish” or when “life don tire” us. This one fit make our mind come down as e happen to David. Na e make David sing to Jehovah say: “I go really dey happy because of your love wey no de fail, because you don see my suffer; you know the things wey de really worry me.” (Ps. 31:7) Jehovah no only de see the problems wey we de face, but e de comfort and encourage us so that we go fit continue to worship-am. And our Christian meetings na one way wey Jehovah de do this one.
Fine-Fine Things Wey You See for Bible
w05 3/15 24 ¶8
Lessons From the Book of First Samuel
30:23, 24. This decision wey David make na from wetin dey Numbers 31:27, and e show say Jehovah value people wey de do different-different work for our organization to support congregation. So anything wey we de do, make we do-am with all our “heart as if na for Jehovah, no be for people.”—Colossians 3:23.
MAY 16-22
FINE-FINE LESSON FROM BIBLE | 2 SAMUEL 1-3
“Wetin We Fit Learn From the Song Wey David Write When Saul and Jonathan Die?”
w00 6/15 13 ¶9
Respect the People Wey God Don Give Authority
9 How David feel when Saul de treat-am anyhow? David cry and tell Jehovah for prayer say: “Wicked people want kill me.” (Psalm 54:3) E still beg Jehovah say: “Save me, O my God, from my enemy them, . . . Strong men attack me even though say I no break any law or commit any sin, O Jehovah. Even though say I no do any bad thing, they run go prepare to attack me. Abeg come, come see wetin de happen and help me.” (Psalm 59:1-4) You don ever feel the way David feel? Person wey get authority don make life hard for you even when you no do anything to the person? David no stop to respect Saul. Even when Saul die, David no start to jump up de happy. Instead, e write one song wey show say e no happy. E write say: “Saul and Jonathan, people really love them . . . When them dey alive, they fast pass eagle and they strong pass lion. Wuna wey be daughters of Israel, make wuna cry say Saul don die.” (2 Samuel 1:23, 24) See the better example wey David set for us! E really respect Saul wey Jehovah anoint, even though say Saul no treat-am well.
w12 4/15 10 ¶8
To Betray Person Na Wicked Sign of This Last Days!
8 Bible still talk about many people wey hold their friends tight. Make we talk about two people and see wetin we fit learn from them. The first person wey we go talk about na Jonathan wey hold David tight. Jonathan na the first son of King Saul. And e suppose become the next king wey go rule Israel. But that one no be wetin Jehovah want. Jehovah choose David to become the next king. Jonathan respect wetin Jehovah don decide, and e no jealous David. Instead, e “love David the way e love e self” and promise David say e go support-am. Jonathan even give David e cloth, sword, bow and belt to show say e really want make David be king. (1 Sam. 18:1-4) Jonathan do everything wey e fit do to encourage David. E even put e life for danger when e de defend David for Saul front. Jonathan support David and tell-am say: ‘You go be king for Israel, and I go dey second position.’ (1 Sam. 20:30-34; 23:16, 17) No wonder David sing one song after Jonathan die, to show the love wey e get for Jonathan and how e pain-am reach say Jonathan die.—2 Sam. 1:17, 26.
Fine-Fine Things Wey You See for Bible
it-1 369 ¶2
Brother
People wey de work together with one mind to get one result, fit still call theirself “brothers.” For example, the king of Tyre wey e name na Hiram call King Solomon e brother. No be just because the two of them na king. But na still because the two of them work together to gather the wood and other things wey they use build the temple. (1Ki 9:13; 5:1-12) David write say: “Look! E really good and e really sweet when brothers dey together as one!” This one show say no be only when two people come from the same papa and mama them go fit dey as one and enjoy peace with each other. (Ps 133:1) So, David no call Jonathan e brother because say na the same papa and mama born them. But na because they really love each other and want make wetin Jehovah want happen. (2Sa 1:26) When people de work together to get one result, even if na for bad thing, they fit still call them brothers.—Pr 18:9.
MAY 23-29
FINE-FINE LESSON FROM BIBLE | 2 SAMUEL 4-6
“Continue to Show Say You De Fear to Do Wetin Jehovah Hate”
w05 5/15 17 ¶8
Lessons From the Book of Second Samuel
6:1-7. Na good thing David get for mind when e say e want move the Ark. But as e use wagon carry the Ark, e no follow the direction wey Jehovah give about how they go carry the Ark and that one cause problem. (Exodus 25:13, 14; Numbers 4:15, 19; 7:7-9) Na the same thing too with wetin happen to Uzzah. So, this one show say even if wetin we get for mind na good thing, Jehovah no go accept-am, if we no follow e direction.
w05 2/1 27 ¶20
Jehovah De Always Do the Correct Thing
20 Remember say Uzzah suppose know Jehovah law about the Ark well. The Ark de show say Jehovah dey among e people. The Law make-am clear say na only people wey Jehovah give the right, suppose touch the Ark. If any other person touch-am, e must die. (Numbers 4:18-20; 7:89) So to carry the Ark go another place no be work wey person suppose use play at all! Uzzah na Levite, but no be priest, so e suppose really know wetin the Law talk about the Ark. Even self, Israel people don keep the Ark for plenty years for e papa house to protect-am. (1 Samuel 6:20–7:1) And the Ark dey there for about 70 years, before David say make them carry-am go Jerusalem. So from when e small, Uzzah go don know the laws wey Jehovah give about the Ark.
w05 2/1 27 ¶21
Jehovah De Always Do the Correct Thing
21 As we don talk before, Jehovah know wetin dey our heart. Since Bible talk say wetin Uzzah do show say e no get ‘fear of God,’ e fit be say Jehovah don see the bad thing wey dey e mind even though say they no write-am for Bible. You think say Uzzah fit don be over sabi person wey no know where e suppose do reach? (Proverbs 11:2) Or e de feel say e too dey important as e join de lead the Ark wey e family don protect for plenty years? (Proverbs 8:13) Or na because Uzzah no get faith say Jehovah go fit hold the Ark wey represent say Jehovah dey among e people, make e no fall? No matter wetin dey Uzzah mind, we dey sure say wetin Jehovah do na the correct thing. E go don see something for Uzzah heart wey make-am kill Uzzah at once.—Proverbs 21:2.
Fine-Fine Things Wey You See for Bible
w96 4/1 29 ¶1
Always Trust Jehovah to Help You With Your Problem
As king, David still get hand for the problem. Wetin e do after Jehovah kill Uzzah show say sometimes even people wey their friendship with Jehovah tight, fit no handle problem the correct way. When Jehovah kill Uzzah, David first vex, then e come de fear. (2 Samuel 6:8, 9) Even though say David trust Jehovah, this problem really test e friendship with Jehovah. This time wey David no follow Jehovah command, e come be like say e no trust Jehovah to help-am with e problem. This kind thing fit affect us sometimes? We don ever blame Jehovah for the problem wey we get because we no follow e command?—Proverbs 19:3.
MAY 30–JUNE 5
FINE-FINE LESSON FROM BIBLE | 2 SAMUEL 7-8
“Jehovah Make Agreement With David”
w10 4/1 20 ¶3
“Your Kingdom Go Last Forever”
Wetin dey King David mind to do really make Jehovah happy. Because of the way David worship Jehovah and the things wey Jehovah don talk say go happen, Jehovah do something. E make agreement with David say one of e pikin go be king forever. Nathan tell David wetin Jehovah don promise say e go do. E talk say: “I go protect your family and your kingdom forever for you and nothing go shake your throne forever.” (Verse 16) Who be this David pikin wey Jehovah promise say e kingdom go last forever?—Psalm 89:20, 29, 34-36.
w10 4/1 20 ¶4
“Your Kingdom Go Last Forever”
Jesus grow for Nazareth and e come from the family of David. When the angel de tell Mary say e go born Jesus, e talk say: “Jehovah God go put the throne of David e papa for e hand. E go rule as King forever for the house of Jacob, and e Kingdom no go get end.” (Luke 1:32, 33) Na Jesus be that David pikin wey become king and e go rule forever just as Jehovah promise David. E go rule forever because of the promise wey Jehovah make, no be because say na people choose-am to rule. Make we remember say anything wey Jehovah promise de always happen.—Isaiah 55:10, 11.
w14 10/15 10 ¶14
Make Your Faith for the Kingdom No Ever Shake
14 Think about the promise wey Jehovah make to King David, wey we de call the agreement between Jehovah and David. (Read 2 Samuel 7:12, 16.) Na when David de rule for Jerusalem Jehovah make this agreement with-am, and promise-am say one of e pikin go be Messiah. (Luke 1:30-33) So Jehovah use this one make people know the family wey the Messiah go come from. Jehovah talk say na this David pikin go be the Messiah “wey get the right” to rule as King. (Ezek. 21:25-27) The kingdom of David ‘go last forever’ because, Jesus wey be David pikin ‘go live forever; and e go rule forever just as the sun dey forever.’ (Ps. 89:34-37) We dey sure say nothing go ever fit affect the way the Messiah go rule, and all the good things wey e go do, go last forever.
Fine-Fine Things Wey You See for Bible
it-2 206 ¶2
Last Days
The Thing Wey Prophet Balaam Talk. Before Israel people enter the Promise Land, prophet Balaam tell Balak the king of Moab say: “Come, make I tell you wetin this people [Israel] go do to your people for future. . . . One star go come out from Jacob, and one person with the rod of authority go come out from Israel. And e go surely break the forehead of Moab into two and the head of all the wicked warriors.” (Nu 24:14-17) When David be king, e win Moab people and make them e servants. This one show say David na the “star” wey Balaam talk about. And this na the first time wey wetin Balaam talk for the book of Numbers, happen. (2Sa 8:2) So e clear say the “last days” of wetin Balaam talk say go happen to Moab people, start when David become king. Since David de represent Jesus wey be the Messiah and King of God Kingdom, this prophecy go still happen when Jesus go destroy all e enemy.—Isa 9:7; Ps 2:8, 9.
JUNE 6-12
FINE-FINE LESSON FROM BIBLE | 2 SAMUEL 9-10
“David Show Say E Get Love Wey No De Fail”
w06 6/15 14 ¶6
You Fit Really De Happy
David write say: “Any person wey de help people wey need help go dey happy; Jehovah go save the person for the day of trouble. Jehovah go protect the person and E go save e life. They go talk say e dey happy.” (Psalm 41:1, 2) One example of how Jehovah want make we treat people wey need help, na the way David treat Mephibosheth. Mephibosheth na cripple and na the son of Jonathan wey be David dear friend. David really show say e love Mephibosheth.—2 Samuel 9:1-13.
w05 5/15 17 ¶12
Lessons From the Book of Second Samuel
9:1, 6, 7. David do wetin e promise. We too must do our best to do wetin we promise.
w02 2/15 14 ¶10
People Wey Endure Different Problems for Their Life
10 After some years, King David show love wey no de fail to Mephibosheth. E do this one because of the strong love wey e get for Jonathan. David return all the land wey Saul get to Mephibosheth. And e put Ziba wey be Saul servant as caretaker for the land. David still tell Mephibosheth say: ‘You go always de chop from my table.’ (2 Samuel 9:6-10) So e clear say the love wey David show Mephibosheth, go don make e mind come down. And still help-am reduce the pain wey e de feel because of e condition. This one na better lesson for all of us. Make we too, de show love to people wey de endure different-different problem for their life.
Fine-Fine Things Wey You See for Bible
it-1 266
Beard
Israel people and many people wey de live around them that time, de like to keep beards as sign of honor and respect for man. For the Law wey Jehovah give Israel people, e command them say make they no shave their ‘side beards’ and the edge of their beards. (Le 19:27; 21:5) The reason why Jehovah give them this command na because some idol worshippers de do this things as part of their worship.
JUNE 13-19
FINE-FINE LESSON FROM BIBLE | 2 SAMUEL 11-12
“No Allow the Bad Things Wey De Enter Your Mind Control You”
You Fit Run From the Traps of Satan!
10 Jehovah make David rich, e make David King and e help David to win plenty of e enemies for war. But because of long throat King David forget all the things wey e get from Jehovah. Na true say David thank God and e talk for Bible say the gifts wey God de give “plenty sotey person no go fit count them!” (Ps. 40:5) But one time dey wey David forget the things wey e don get from Jehovah. David come get long throat and e want get more. Even though say David get plenty wife, e start to want the wife of another man, something wey Jehovah condemn. The woman name na Bath-sheba and e husband name na Uriah wey be Hittite. David think about only e self and give Bath-sheba belle. The thing wey David do really bad. But e do wetin worse pass that one. David arrange make they kill Uriah. (2 Sam. 11:2-15) Wetin David be de think? E de think say Jehovah no fit see the thing wey e do? Even as David don serve Jehovah for long time, e begin get long throat and e really suffer because of this one. But the good thing be say, David confess e sin and e repent. David really dey happy say e become Jehovah friend again!—2 Sam. 12:7-13.
Obey Jehovah From Your Heart—Why and How?
15 Jehovah no only put David as family head, e still put David as head for the whole nation of Israel. That time, the power wey David get as King really plenty. Sometimes, e no use the power well, and e make serious mistakes. (2 Sam. 11:14, 15) But e show say e de obey Jehovah because e accept correction. E pray to Jehovah with all e heart. And e try e best to obey wetin Jehovah talk. (Ps. 51:1-4) Another thing be say, David really dey humble. E no only take advice from men, but e still take advice from women. (1 Sam. 19:11, 12; 25:32, 33) David learn from the mistakes wey e do. This one help David put e worship to Jehovah as the first important thing for e life.
w18.06 17 ¶7
Use Wetin You De learn From Bible De Train Your Conscience
7 We no need to first suffer because say we no obey Jehovah, before we get sense. We fit learn from other people wey they write their mistake for Bible. Proverbs 1:5 talk say: “Person wey get sense go listen and learn more.” True-true, we de learn from Jehovah, the best teacher when we de read and think about the story of people for Bible. For example, think of the kind suffer wey King David suffer after e disobey Jehovah and sleep with Bath-sheba. (2 Sam. 12:7-14) As you de read the story, ask yourself say: ‘Wetin King David for do to run from this problem wey e suffer because e sleep with Bath-sheba? Wetin I go do if I face this kind problem? I go fit run comot like Joseph, or fall for the temptation like David?’ (Gen. 39:11-15) If we think about the kind problems wey sin fit cause for us, e go help us to get the mind to “hate wetin bad” more-more.
Fine-Fine Things Wey You See for Bible
it-1 590 ¶1
David
But, when all this things de happen, Jehovah see-am. And e expose the matter. If to say na the elders for Israel that time handle this matter, according to wetin the Law talk, David and Bath-sheba and even the pikin wey dey e belle for die. (De 5:18; 22:22) But na Jehovah handle the case by e self. And e show David mercy because (1) e don make agreement with David say one of e pikin go rule as king forever (2Sa 7:11-16), (2) David self don show other people mercy (1Sa 24:4-7; compare Jas 2:13) and (3) Jehovah see say David and Bath-sheba really regret wetin they do and they repent. (Ps 51:1-4) But they still suffer for wetin they do. Jehovah use prophet Nathan tell David say: ‘I go allow problem come meet you, and the problem go come from your own house.’—2Sa 12:1-12.
JUNE 20-26
FINE-FINE LESSON FROM BIBLE | 2 SAMUEL 13-14
“Amnon Allow Wetin E Body Want Cause Serious Problem for Their Family”
it-1 32
Absalom
Absalom kill Amnon. Tamar na Absalom sister and e really fine. This one make their half brother Amnon wey senior them come de put eye for Tamar body. Amnon pretend say e de sick, and tell their papa say make e tell Tamar make e come cook for-am for e house. When Tamar come, Amnon rape-am. After Amnon do this bad thing, e come really hate Tamar and drive Tamar comot for e house. Because of this one, Tamar tear the gown wey e wear, wey all the daughters of the king wey be virgin de wear and put ashes for head. As e de cry de go, e meet Absalom for road. Absalom reason the matter, and wetin e talk show say e don de suspect Amnon before. Absalom tell e sister say make e leave the matter. And from that time, Tamar start to stay for Absalom house.—2Sa 13:1-20.
w17.09 5 ¶11
Learn to Control Yourself
11 Bible talk about some people wey no control theirself for sex matter. Their example na warning for us. E still show the bad things wey fit happen when person no fit control e self for this kind thing. Anybody wey de face the kind problem wey Kim face, need to think about the story of the foolish young man wey Proverbs chapter 7, talk about. E still need to think about wetin Amnon do, and the problems wey follow-am. (2 Sam. 13:1, 2, 10-15, 28-32) Papa and mama need to help their children learn how to control theirself and really de use sense for man and woman matter. When them de do family worship, they fit use the Bible verse them wey we just talk about to help them.
it-1 33 ¶1
Absalom
Two years don pass since Amnon rape Tamar. Now time don reach wey people for Israel de remove hair for sheep body and na still time for celebration and party. So Absalom arrange party for Baal-hazor wey dey 22 km (14 mi) NNE from Jerusalem and invite King David and all e sons. When David talk say e no go fit go, Absalom beg-am say make e allow e first son Amnon come as e no go fit come. Absalom beg David until e gree. (Pr 10:18) For the party, when Amnon don de happy and de enjoy e self with wine, Absalom tell e servants make they kill Amnon. Because of this one, the other sons of King David run go back to Jerusalem, but Absalom run go meet e grand papa wey be king of Geshur for the land of Syria. Geshur dey the east side of the Sea of Galilee. (2Sa 13:23-38) The “fight-fight and death” wey prophet Nathan talk about, don enter David family, and e go dey like that for the rest of e life.—2Sa 12:10.
Fine-Fine Things Wey You See for Bible
g04 12/22 8-9
How You Fit Really Dey Fine for Jehovah Eye
Make we compare David with one of e pikin wey be Absalom. Even though say Absalom really fine, for the end e become person wey people no really like. Bible talk say: “Now for the whole Israel, they no de praise any man reach the way them de praise Absalom because e really fine. From the down of e foot go reach the center of e head, e no get any problem.” (2 Samuel 14:25) Even as e fine reach, long throat for wetin no be e own, make-am turn against e papa and try to take over the throne. E even sleep with some of e papa wife. Because of this one, Jehovah really vex for Absalom and the way e die really bad.—2 Samuel 15:10-14; 16:13-22; 17:14; 18:9, 15.
You go like make person wey be like Absalom be your friend? No! Because of wetin e do, Absalom no be person wey people want talk about. We no fit talk say because e too fine make we forget about e bad character and the way e turn against e papa. And that one no stop-am say make e no die. Instead for Bible, we don see plenty example of people wey show say they get sense, and wey get better character but Bible no talk whether they fine or wor-wor. E really clear say wetin dey important pass na say they fine for Jehovah eye.
JUNE 27–JULY 3
FINE-FINE LESSON FROM BIBLE | 2 SAMUEL 15-17
“Because Absalom Dey Proud, E Turn Against E Papa”
it-1 860
Forerunner
For the time of Israel people, na their culture for some people to de run for the front of king chariot to clear road, to tell people say the king de come and to do other things for the king. (1Sa 8:11) Absalom and Adonijah, do this kind thing when them de try take over their papa throne. They put 50 men wey go de run for front of their chariot. They do this one, so that e go be like say na the king give them right to do-am and so that people go respect them.—2Sa 15:1; 1Ki 1:5; go check RUNNERS.
w12 7/15 13 ¶5
Worship the God Wey De Give Freedom
5 Bible get plenty example of people wey be bad example to other people. One of them na Absalom one of King David pikin. Absalom really fine. But as time de go, e allow long throat for wetin no be e own enter e heart just like Satan. E want take over e papa throne when e be say e no get the right to take over the throne. Absalom start to do like say e really care about other Israel people, and de make them feel say King David and the people for the palace no de care about them. All this one na cunning way to take over the throne. Absalom really do wetin Satan do for garden of Eden. E make the people feel say e want help them and use that chance de spoil e papa name.—2 Sam. 15:1-5.
it-1 1083-1084
Hebron
After some years, Absalom one of David pikin come back to Hebron. Na for there e start e plan to take over e papa throne, but e no work. (2Sa 15:7-10) E fit be say e choose Hebron because na there be the capital of Judah before and because na there they born-am. Later, King Rehoboam, wey be David grand pikin build Hebron again. (2Ch 11:5-10) Some Jews wey come back to Judah plenty years after Babylon people destroy-am, start to live for Hebron (Kiriath-arba).—Ne 11:25.
Fine-Fine Things Wey You See for Bible
You Really Know About the Matter?
11 When people talk half-truth, or story about us wey e no complete, this one fit make us suffer. Make we see the example of King David and Mephibosheth. Saul na grandpapa to Mephibosheth. So David return all the land wey Saul get to Mephibosheth. (2 Sam. 9:6, 7) But after, person tell David lie about Mephibosheth. David no check whether wetin e hear na true. So e decide to take all the land wey e don give Mephibosheth. (2 Sam. 16:1-4) When David come talk with Mephibosheth, e notice say e don do mistake. So e give part of the property back to Mephibosheth. (2 Sam. 19:24-29) If to say David take time check whether wetin e hear na true, e no for hurry take all the property wey Mephibosheth get.