Study Book for Our Life and Preaching Meeting
SEPTEMBER 5-11
FINE-FINE LESSON FROM BIBLE | 1 KINGS 9-10
“De Thank Jehovah for the Sense Wey E De Give”
w99 7/1 30 ¶6
Visit Wey Bring Better Blessing
When queen of Sheba meet King Solomon, e start to ask-am strong-strong questions to test-am. (1 Kings 10:1) The word wey them translate as strong-strong questions for Hebrew language mean “riddles.” But this one no mean say na play-play question queen of Sheba ask Solomon. For Psalm 49:4, they use the same Hebrew word describe serious questions wey concern sin, death and salvation. The way Solomon answer this strong-strong questions wey queen of Sheba ask, really show how e wise reach. Bible talk say “e tell Solomon everything wey dey e mind.” And, “Solomon answer all the questions wey e ask. E no get wetin e ask wey the king no fit explain.”—1 Kings 10:2b, 3.
w99 11/1 20 ¶6
When Person Get Open Hand
When queen of Sheba reach there, the thing wey e see and hear really surprise-am, this one make-am humble and e talk say: “All this your people and your servants wey always dey with you and de hear your word of wisdom, go really dey happy!” (1 Kings 10:4-8) E no talk say na the money and property wey Solomon get go make the servants of Solomon de happy. But na blessing for them to de gain from the wisdom wey God give Solomon. Queen of Sheba na better example for us today wey de enjoy the wisdom wey de come from Jehovah and e son, Jesus Christ.
w99 7/1 30-31
Visit Wey Bring Better Blessing
When queen of Sheba see the kind wisdom wey Solomon get and how Jehovah don bless e kingdom for Jerusalem, e really surprise-am. (1 Kings 10:4, 5) Some people talk say this one mean say the things wey e see shock-am sotey e no fit talk. One professor even talk say the things wey e see fit don make-am faint! No matter wetin happen, the thing wey the queen hear and see really surprise-am. E talk say servants of Solomon de happy because of the wisdom wey them de enjoy from Solomon. E still praise Jehovah as E make Solomon king for Israel. Then e give the king plenty gift wey cost well-well. Only the gold wey e give-am fit reach $40,000,000. Solomon still give the queen plenty gift. All the things wey the queen like and ask for, Solomon give-am.—1 Kings 10:6-13.
Fine-Fine Things Wey You See for Bible
w08 11/1 22 ¶4-6
You Know?
How the gold wey King Solomon get plenty reach?
Bible talk say Hiram wey be king of Tyre send 4,000kg of gold give Solomon and na that kind amount of gold queen of Sheba give Solomon. Solomon ships bring more than 15,000kg of gold from Ophir. Bible talk say the weight of the gold wey Solomon get for one year na about six hundred and sixty-six talents of gold or more than 25,000kg of gold. (1 Kings 9:14, 28; 10:10, 14) This one really dey possible? How the gold wey kings de get for bible times fit plenty reach?
One olden days document wey professors believe say e dey correct, talk say Pharaoh Thutmose III of Egypt (second millennium B.C.E), give 13,500kg of gold for the temple of Amun-Ra wey de for Karnak. For eighth century B.C.E., people of Tyre give Assyrian King Tiglath-pileser III about 4,000kg of gold, and Sargon II give the same amount of gold as gift to the gods of Babylon. One report talk say King Philip II of Macedonia (359-336 B.C.E.) get more than 28,000kg of gold every year from the mines of Pangaeum wey dey for Thrace.
When Alexander the Great (336-323 B.C.E.) wey be Philip son attack the city of Susa for Persia, e collect about 1,180,000kg of gold from them and about 7,000,000kg of gold from the whole of Persia. So when we compare this report with wetin Bible talk about the amount of gold wey Solomon get, e dey clear say Bible dey correct.
SEPTEMBER 12-18
FINE-FINE LESSON FROM BIBLE | 1 KINGS 11-12
“Use Better Sense Choose Who You Go Marry”
“Who De Support Jehovah?”
7 We fit learn plenty things from the example of Solomon. E hold Jehovah tight when e dey young. So God give Solomon sense and blessing. God still say make e build one fine and big temple for Jerusalem. But after, Solomon come leave Jehovah. (1 Ki. 3:12; 11:1, 2) God command say make king for Israel no “marry plenty wife, so that e heart no go leave God.” (Deut. 17:17) Solomon no follow wetin Jehovah talk. E marry 700 wife and carry other 300 women come e house. (1 Ki. 11:3) Many of the women wey e marry no be from Israel, and they no de worship Jehovah. So Solomon still no obey the law wey talk say make anybody for Israel no marry person from another place.—Deut. 7:3, 4.
How You Fit Protect Your Heart?
6 Satan want make we copy e example. E no de ever do the things wey Jehovah want, and e de do things only because of wetin e go gain. But Satan no fit force us to de think and do things the way e de do. So e de try other ways to make e plan work. For example, Satan de surround us with people wey e de control. (1 John 5:19) Satan de hope say we go spend time with them. But we know say when we de spend time with bad people, they go “spoil” the way we de think and do things. (1 Cor. 15:33; ftn.) King Solomon fall for that trap. E marry plenty women and they no de serve Jehovah. As time de go, Solomon start to de do as them de do and small-small, they comot e heart from Jehovah side.—1 Ki. 11:3; ftn.
“Who De Support Jehovah?”
9 Jehovah no de see bad thing close mouth. Bible tell us say: “Jehovah really vex for Solomon because e heart don comot from Jehovah . . . , wey appear to-am two times and give-am warning about this thing, say make e no follow other god. But e no obey wetin Jehovah don talk.” Na this one make God vex and e no support Solomon again. Because of this one, e children no rule Israel when the tribes of Israel dey together. And they suffer many things for many years.—1 Ki. 11:9-13.
Fine-Fine Things Wey You See for Bible
w18.06 14 ¶1-4
E for Enjoy Favor From Jehovah
Because Israel people turn against King Rehoboam, e gather e army to go fight them. But Jehovah no allow Rehoboam make e go fight Israel people. E send prophet Shemaiah, make e tell King Rehoboam say: “Make wuna no go up go fight wuna brothers, they be Israel people. Make each of wuna go e house back, because na me cause the thing wey don happen.”—1 Ki. 12:21-24.
So this kind thing go happen, and they no go fight? Just imagine how this one go don make King Rehoboam feel. Wetin people go think about this king wey don first threaten the people say na iron hand e go use handle them, now wey e no fit do anything? (Check 2 Chronicles 13:7.) Even with this one, the king and e army obey Jehovah. All of them go “back to their house as Jehovah don tell them.”
Wetin we fit learn from this story? E good make we de obey Jehovah even if that one fit make people laugh us. When we obey God, e go bless us and e go favor us.—Deut. 28:2.
Wetin happen as Rehoboam obey Jehovah? As e obey Jehovah and no fight the new nation again, e come use e time and power start to do other better things. E start to build different-different city for the land of Judah and Benjamin wey e de rule over. And e still do many things to protect some cities. (2 Chron. 11:5-12) And the one wey dey important pass na say, e obey Jehovah law for sometime. As the ten-tribe kingdom wey Jeroboam de rule de worship idols, plenty people from there travel go the two-tribe kingdom wey Rehoboam de rule so that they go fit worship Jehovah for there. (2 Chron. 11:16, 17) As Rehoboam obey Jehovah, e make the two-tribe kingdom wey e de rule really strong.
SEPTEMBER 19-25
FINE-FINE LESSON FROM BIBLE | 1 KINGS 13-14
“Value Wetin You Get and Know Where You Suppose Do Reach”
w08 8/15 8 ¶4
Continue to Trust Jehovah With All Your Heart
4 Then Jeroboam tell the man of the true God say: “Follow me go my house, make I give you food and gift.” (1 Ki. 13:7) Wetin the prophet go do? E go accept the food and gift from the king after e don tell the king the bad things wey go happen to-am? (Ps. 119:113) Or e go reject the food and gift from the king even though say the king de do like say e dey sorry? Jeroboam na rich man so e fit share expensive gift for e friends. If the prophet don de put mind for money and property before, the things wey the king want give-am for really catch e eye. But Jehovah don warn the prophet say: “No eat bread or drink water, and when you de go, make you no pass the same road wey you pass come.” So the prophet no waste time to tell the king say: “Even if you give me half of everything wey you get, I no go follow you go eat bread or drink water for this land.” And the prophet pass another road when e de comot for Bethel. (1 Ki. 13:8-10) How this thing wey the prophet do teach us to de trust Jehovah with our all heart?—Rom. 15:4.
w08 8/15 11 ¶15
Continue to Trust Jehovah With All Your Heart
15 Which other thing we fit learn from the mistake wey the prophet from Judah make? Proverbs 3:5 talk say: “Trust Jehovah with all your heart, and no trust the things wey you know.” Instead make the prophet from Judah obey the command wey Jehovah give-am as e do before, this time e do wetin dey e mind. Because of this mistake, e lose e life and and e friendship with God. This thing wey happen to the prophet show say e dey important make we always de obey Jehovah and know where we suppose do reach.
w08 8/15 9 ¶10
Continue to Trust Jehovah With All Your Heart
10 The prophet from Judah no suppose fall enter the trap of the old prophet. E for ask e self say: ‘Jehovah don tell me wetin I go do before, so Why e go send e angel go tell another person make I do different thing?’ The prophet for ask Jehovah whether wetin the old prophet talk na true, but Bible no talk say e do this one. Instead, ‘e follow the old man go e house to eat bread and drink water.’ Jehovah no happy with wetin the prophet do. When the prophet wey them deceive de go back to Judah, one lion kill-am for road. The way the prophet die really bad. And na so e work for Jehovah end!—1 Ki. 13:19-25.
Fine-Fine Things Wey You See for Bible
w10 7/1 29 ¶5
Jehovah De Find The Better Character Wey We Get
The one wey important pass na wetin Bible talk for 1 Kings 14:13 wey teach us one better thing about Jehovah and how e de see us. Remember say Jehovah notice something good about Abijah. Jehovah sofri check the kind person wey Abijah be and e see something wey good about-am. When one professor de talk about Abijah, E talk say Abijah na the only good person for e family. Jehovah really happy with the good wey e see for Abijah, so even though say Abijah come from wicked family, e still show-am mercy.
SEPTEMBER 26–OCTOBER 2
FINE-FINE LESSON FROM BIBLE | 1 KINGS 15-16
“You Get Strong Heart Like Asa?”
w12 8/15 8 ¶4
“God Go Bless Wuna For The Work Wey Wuna De Do”
E don reach twenty years wey Israel and Judah divide into two kingdom. For this time, lie-lie worship full everywhere for Judah. When Asa become king for 977 B.C.E., even some people wey de live and work for the king palace don de worship Baal, the god of Canaan people. But Bible talk say Asa ‘do wetin good and wetin correct for Jehovah eye.’ Asa ‘remove all the altar wey people de use worship lie-lie god and the high place them. E scatter the pillars wey them de use for worship; and the poles wey them de use for worship, e cut them fall.’ (2 Chron. 14:2, 3) Asa still pursue the male temple prostitute comot from Judah. This people na the men wey de sleep with other men for the temple and them de do this one to worship their god. No be only this one Asa do o! He still encourage the people “of Judah say make them look for Jehovah, the God of their grandpapa them. And make them obey the Law and the commandment.” of God.—1 Ki. 15:12, 13; 2 Chron. 14:4.
w17.03 19 ¶7
Serve Jehovah With All Your Heart!
7 All of us need to check ourself to see if we really de serve Jehovah with all our heart. Ask yourself say, ‘I don make up my mind to always de make Jehovah happy, defend true worship, and to protect e people from anything wey fit spoil their friendship with God?’ Think of the strong heart wey Asa need to get as e challenge Maacah wey be queen mother for the land! You fit no know anybody wey de do like Maacah, but you fit still get situation for your life wey you fit do like Asa. For example, what if person for your family or your close friend do bad thing, e no gree repent, and them disfellowship-am? You go stop to be e friend and stop to de do things with-am? Wetin your heart go move you to do?
it-1 184-185
Asa
Even though say sometimes Asa no use e sense well, e dey clear say the good character wey e get, and the way e fight against lie-lie worship big pass e mistake. This one make them know Asa as one of the kings wey serve Jehovah well wey come from the family line of Judah. (2Ch 15:17) The 41 years wey Asa rule Judah cover the same time wey eight different kings rule Israel. This kings them na: Jeroboam, Nadab, Baasha, Elah, Zimri, Omri, Tibni (wey rule one part of Israel wey dey against Omri), and Ahab. (1Ki 15:9, 25, 33; 16:8, 15, 16, 21, 23, 29) When Asa die, e son Jehoshaphat become king.—1Ki 15:24.
Fine-Fine Things Wey You See for Bible
w98 9/15 21-22
God Dey Real to You?
For example, read the prophecy about wetin Bible talk say go happen to anybody wey build Jericho again and think about how wetin the prophecy talk later happen. Joshua 6:26 talk say: “Joshua make the people swear this oath for that particular time say: ‘For front of Jehovah, make curse follow anybody wey go build this city of Jericho again. If e build the foundation, make e firstborn die and if e put the door make e lastborn die.’ ” This one happen 500 years later because we read for 1 Kings 16:34 say: “When Ahab be king, Hiel wey come from Bethel build Jericho again. As e build the foundation, e firstborn wey be Abiram die, and as e put the door, e lastborn wey be Segub die. Just like the word of Jehovah wey Joshua the son of Nun talk.” Na only God wey dey real go move person to talk that kind thing and make sure say e happen.
OCTOBER 3-9
FINE-FINE LESSON FROM BIBLE | 1 KINGS 17-18
“How Long E Go Take Wuna to Decide Wetin Wuna Want?”
w17.03 14 ¶6
Your Faith Go Help You Choose Wetin Good
6 When Israel people don reach the promise land, they go need to choose if them go serve Jehovah or other gods. (Read Joshua 24:15.) Person fit think say this na simple thing to choose. But, wetin they go choose fit make them live or die. For the time wey Judges de rule Israel, the people no choose the correct thing, plenty times them leave Jehovah go worship other gods. (Judg. 2:3, 11-23) Even after the time wey Isreal people get Judges, they still need to choose who them go serve. That time, prophet Elijah tell them make they choose wether them go serve Jehovah or another god wey be Baal. (1 Ki. 18:21) Elijah vex for the people because them get double mind. Since e make sense and gain dey to serve Jehovah, you fit think say e go dey easy for the people to choose. E no make sense say person go like to worship Baal. Still, some Israel people dey get double mind about who them go worship. Na e make Elijah advise them to choose the correct thing wey be to worship Jehovah.
ia 88 ¶15
E Support Pure Worship
15 Because of this one, The priest of Baal come start to “shout and cut theirself with dagger and spear until blood start to comot and cover all their body just as them de do for their side.” But nothing work! “Them no hear any voice and nobody answer them; nobody even de listen to them.” (1 Ki. 18:28, 29) True-true Baal no dey real. Baal na just something wey satan want use to comot people mind from Jehovah. The truth be say if we choose to serve any other thing apart from Jehovah, we go regret-am and na we go suffer-am..—Read Psalm 25:3; 115:4-8.
ia 90 ¶18
E Support Pure Worship
18 Before Elijah pray, the people for there fit de think whether Jehovah go do like Baal wey no fit answer. As the prayer finish, them no get time to think-am. Bible talk say: “Then, fire come from Jehovah and start to burn all the offering and the wood and the stone and the dust and the fire dry all the water wey dey for the hole wey e dig round the altar.” (1 Ki. 18:38) See the better way wey Jehovah answer! How this one affect the people?
Fine-Fine Things Wey You See for Bible
w08 4/1 19, box
E Watch and E Wait
For Elijah Time, When the Rain Start to Fall Again?
Elijah wey be Jehovah prophet tell King Ahab say the rain wey never fall since, go soon start to fall. When Elijah tell Ahab this one, three years don already pass wey Elijah talk say rain no go fall. (1 Kings 18:1) Jehovah make rain fall after Elijah talk say rain go soon start to fall. Some people fit talk say the dry season stop before three years complete and say e no reach exactly three years. But Jesus and James talk say the dry season reach “three years and six months.” (Luke 4:25; James 5:17) Confusion dey inside?
No, for olden days dry season for Israel de long well-well, e de reach six months. Elijah come tell Ahab say rain no go fall when the dry season don de long pass as e suppose be. This one mean say the dry season wey Elijah talk about don start nearly six months before the time wey Elijah talk about-am. So if we count from when Elijah first talk about the dry season to the time wey rain fall, e go be three years but if we count from when the dry season just start e go be nearly three years and six months. The three year and six month don complete when all the people gather together for Mount Carmel to see how Jehovah answer Elijah.
Think about the time wey Elijah first go visit Ahab. The people believe say na Baal de control the weather, say na e be the god wey de bring rain to end dry season. So if the dry season over long, people go de ask say where Baal dey? When e go make rain fall? E go really pain the people wey de worship Baal when they hear Elijah talk say rain go fall only when e talk so.—1 Kings 17:1.
OCTOBER 10-16
Fine-Fine Lesson From Bible | 1 KINGS 19-20
“Put Mind Say Jehovah Go Make Your Mind Come Down”
Trust Jehovah When You De Face Stress
5 Read 1 Kings 19:1-4. But when Queen Jezebel talk say e go kill Elijah, Elijah begin fear. So e run go the area of Beer-sheba. And then e tire for life sotey “e talk say e want die.” Wetin make Elijah feel like that? E no dey perfect, “na person with feeling like us.” (Jas. 5:17) Maybe the stress too much for Elijah and e over tire. Maybe e think say everything wey e de do to encourage people make they worship Jehovah na waste of time. E fit de think say nothing for Israel don better, and na only him still de serve Jehovah. (1 Ki. 18:3, 4, 13; 19:10, 14) We fit de surprise say this faithful prophet de feel like this. But Jehovah understand the way Elijah de feel.
ia 103 ¶13
Jehovah Comfort Elijah
13 How you think say Jehovah feel as e look from heaven and see e prophet wey e love de sleep under one tree for inside wilderness and e de beg Jehovah say e want die. We know say Jehovah go don feel bad. So, after Elijah don sleep, Jehovah send angel to-am. The angel sofri wake Elijah and e tell-am say “wake up come chop.” So Elijah wake up, the angel don prepare simple food for-am—fresh warm bread with water. Elijah even thank the angel? Bible only tell us say Elijah chop and drink and sleep again. To talk tire-am because of how e de feel? Even with that one the angel wake-am the second time, maybe for early morning. Again the angel tell-am say “wake up, come chop,” e still tell-am something wey dey important say, “the journey no go easy for you.”.”—1 Ki. 19:5-7.
ia 106 ¶21
Jehovah Comfort Elijah
21 This story remind us say even though na Jehovah power e use do all this things, Jehovah no need to dey there before e fit do this things. Elijah know say Jehovah no be like other lie-lie god like Baal wey e worshippers de hail say na e de control the weather and de bring rain. Na only Jehovah get real power and we de see e power for all the things wey e don make. E even big pass the heaven wey we dey see! (1 Ki. 8:27) How this one help Elijah? Remember say e be de fear. But with God like Jehovah for e side, the God wey get power pass, Elijah no go fear Ahab and Jezebel again!—Read Psalm 118:6.
ia 106 ¶22
Jehovah Comfort Elijah
22 After the fire stop, everywhere just quiet and Elijah hear one cool voice. E tell Elijah to talk wetin dey e mind and Elijah talk wetin dey e mind for the second time. This one go don still help-am calm down small. But Elijah still get comfort from wetin e hear from the voice again. Jehovah tell Elijah say e value-am well-well. How Jehovah take show say e value-am? God tell Elijah about something wey e plan to do for future, to end Baal worship for Israel. Elijah see say e work no dey useless, because nothing fit stop Jehovah plan to move go front. Elijah go still join to make Jehovah plan work, so Jehovah tell-am say make e continue e work, and e give-am direction.—1 Ki. 19:12-17.
Fine-Fine Things Wey You See for Bible
w97 11/1 31 ¶2
People Wey Hold Jehovah Tight and Ready to Work for-am
Many servant of God today get good mind to do more for Jehovah like Elisha. Some don leave their ‘work’,—things wey them de do to fit survive, to go preach the good news for people wey dey far area, or to go serve for Bethel. Some other people don travel go another country to go do construction work for the organization. Some of our brothers don agree to do small-small work. Even with all this one, nobody wey de work for Jehovah de do work wey too small. Jehovah de happy with anybody wey serve-am from e mind and e go bless them as they no think of only theirself.—Mark 10:29, 30.
OCTOBER 17-23
FINE-FINE LESSON FROM BIBLE | 1KINGS 21-22
“Copy How Jehovah De Use E Power”
it-2 21
Jehovah Of Armies
When Joshua see one angel wey come visit-am for near Jericho, e ask-am if e dey for their side or for their enemy side. The angel talk say: “No, but I don come as prince of Jehovah army.” (Jos 5:13-15) Prophet Micaiah tell King Ahab and King Jehoshaphat say, “I see Jehovah de sitdown for e throne and all the army for the heavens de stand near-am, some dey for e right side, and some dey for e left side.” E dey clear say na the angels for heaven Micaiah de talk about so. (1Ki 22:19-21) As them talk “Jehovah of armies”, e really dey correct because e show say them no only divide the angel to groups like cherubs, seraphs, and angels, (Isa 6:2,3; Ge 3:24; Re 5:11) but them still arrange them to other groups. Na the reason why Jesus fit talk say e get 12 legions of angels wey go come if e call them. (Mt 26:53) When Hezekiah de beg Jehovah to help-am, e call-am “Jehovah of armies, the God of Israel, you de sitdown for up of the cherubs.” E dey clear say Hezekiah de talk about the ark of the covenant and the image of the cherub wey dey on top the cover wey be sign of Jehovah throne for heaven. (Isa 37:16; compare 1Sa 4:4; 2Sa 6:2.) Jehovah show Elisha servant vision because e de fear. For the vision, the servant see say the mountains around the area wey Syria soldiers surround, full with “horse and war motor of fire”. This one na part of Jehovah angels.—2Ki 6:15-17.
“The Head of Every Man Na Christ”
9 To dey humble. Na Jehovah get sense pass for heaven and earth. Even with that one, e de listen to e servants when them de talk their mind. (Gen. 18:23, 24, 32) Jehovah get authority but e allow the angels talk wetin dey their mind about one matter. (1 Ki. 22:19-22) Jehovah dey perfect, but e no expect say we go dey perfect now. Instead, e de help us succeed even as we no dey perfect. (Ps. 113:6, 7) Bible even talk about Jehovah as “person wey de help.” (Ps. 27:9; Heb. 13:6) King David talk say e fit do the big work wey Jehovah give-am to do only because Jehovah dey humble.—2 Sam. 22:36.
it-2 245
Lie
For people wey like to believe lie-lie, Jehovah de allow other people to deceive them so that them go believe the lie instead of the good news about Jesus Christ. (2Th 2:9-12) Wetin happen to King Ahab many-many years before, really show say this one na true. Many prophets lie to-am say e go win the war if e go fight against Ramoth-gilead, but Jehovah prophet tell-am the truth. As Micaiah see for the vision, Jehovah allow one spirit to go deceive Ahab through Ahab prophets. Wetin this one mean be say, the spirit use e power control the prophets so that them go talk the lie wey been dey their heart and wey Ahab go like hear. Even though say them warn Ahab, e no gree listen because na the lie e wan follow, and e later die because of the lie.—1Ki 22:1-38; 2Ch 18.
Fine-Fine Things Wey You See for Bible
Wetin E Mean to Really Repent?
4 At last, time reach when Jehovah decide to do something about the matter. Jehovah send Elijah to tell Ahab and Jezebel how e go punish them. E go kill their whole family. The things wey Elijah talk really touch Ahab! Bible talk say this proud man “humble e self.” This one no surprise you?—1 Ki. 21:19-29.
5 Even though say Ahab humble e self that time, the thing wey e do after show say e no really repent. E no try to make people stop to worship Baal for e kingdom, and e no encourage people to worship Jehovah. Other things wey Ahab do show say e no repent.
6 After, Ahab tell King Jehoshaphat of Judah make they go fight Syria people for war. King Jehoshaphat na good king, e trust Jehovah and so e talk say make they go ask the prophet of Jehovah wetin they suppose do before they go fight. Ahab no first gree, e talk say: “One man still dey wey we fit ask make e tell us wetin Jehovah talk. But I hate-am, because e no de ever prophesy good things about me, na only bad.” Even with that one, they still ask prophet Micaiah. The thing wey Ahab talk na true. The prophet prophesy bad news for Ahab. Wicked Ahab no repent and beg Jehovah for forgiveness. Instead, e put the prophet for prison. (1 Ki. 22:7-9, 23, 27) Even though say the king put the prophet of Jehovah for prison, e no fit stop the prophecy make e no happen, so Ahab later die.—1 Ki. 22:34-38.
OCTOBER 24-30
FINE-FINE LESSON FROM BIBLE | 2 KINGS 1-2
“Better Example About Training”
w15 4/15 13 ¶15
How Elders De Train People to Qualify
15 The story of Elisha wey take over from Elijah, still show how brothers today fit respect elders for their congregation. After Elijah and Elisha don visit some prophet for Jericho, the two of them waka reach the Jordan River. For there, “Elijah remove e cloth wey them use know-am as prophet, e role-am, and use-am hit the water, and the water divide.” After them cross for dry ground, the two of them continue to talk as them de go. E de clear say Elisha no think for e mind that time say e know everything. Elisha put everything wey Elijah talk for e mind untill the time wey them carry Elijah comot. Later, when Elisha reach the Jordan River, e hit the water with Elijah cloth, and e shout say: “Where Jehovah dey, wey be the God of Elijah?” Again, the water divide.—2Ki. 2:8-14.
w15 4/15 13 ¶16
How Elders De Train People to Qualify
16 You notice say the first miracle wey Elisha do na exactly the same thing as the last miracle wey Elijah do? Why that one matter to us? E de clear say Elisha no come de feel say, since e don be the oga now, e need to change how e go de do things sharp-sharp. No, e no do like that. E continue to do things just the way Elijah been de do-am. Elisha show say e respect e teacher, na this one come make other prophets like-am and trust-am. (2Ki. 2:15) Later, for the 60 years wey Elisha take be prophet, Jehovah use-am do many miracle. The miracle wey e do even pass the one wey Elijah do. You wey de learn, wetin this one teach you?
Fine-Fine Things Wey You See for Bible
w05 8/1 9 ¶1
Lessons From the Book of Second Kings
2:11—Wetin be the “heaven” wey Elijah go “inside strong breeze”? This one no be the place wey the moon, the sun, and the stars dey o. E still no be the place wey Jehovah and the angels de stay. (Deuteronomy 4:19; Psalm 11:4; Matthew 6:9; 18:10) The “heaven” wey Elijah go for inside strong breeze na the sky wey birds de fly. (Psalm 78:26; Matthew 6:26) As the chariot de fly for sky, e dey clear say e carry Elijah go another place for this earth, and na there e come de stay that time. In fact, after many years, Elijah write letter to Jehoram, wey be the king of Judah.—2Chronicles 21:1, 12-15.
OCTOBER 31–NOVEMBER 6
FINE-FINE LESSON FROM BIBLE | 2 KINGS 3-4
“Carry Your Son Up”
w17.12 4 ¶7
“I Know Say . . . E Go Come Back to Life.”
7 The second example of person wey Bible talk about wey them bring come back to life na for prophet Elisha time. E get one woman wey them know well-well for Shunem. The woman no get pikin. E really take care of Elisha well well. So because of this one, God bless e and e husband with pikin. After some years, the pikin come die. E pain the woman sotey e travel 19 miles (30 km) go meet Elisha for one mountain wey them dey call Mount Carmel. Prophet Elisha come send e servant, wey e name na Gehazi, make e go Shunem go resurrect the boy. But when Gehazi reach there, e no fit bring the boy come back to life. Later, Elisha and the woman come reach Shunem.—2 Ki. 4:8-31.
w17.12 4 ¶8
“I Know Say . . . E Go Come Back to Life.”
8 When Elisha reach where the pikin dey, e come pray to Jehovah. And Jehovah answer e prayer. The pikin wey don die come get up. When the mama see e pikin, e happy no be small! (Read 2 Kings 4:32-37.) The woman fit don remember wetin Hannah talk for prayer. Hannah no fit born pikin. But Jehovah bless-am with pikin wey e name na Samuel. When Hannah carry Samuel go tabernacle, e talk for prayer say: “Jehovah . . . de send person enter Grave, and e de raise person up.” (1 Sam. 2:6) As God take raise the boy wey don die come back to life, this one help us know say, true-true, God get power to bring people wey don die come life again.
Fine-Fine Things Wey You See for Bible
it-2 697 ¶2
Prophet
“Sons of the Prophets.” As one book wey be Gesenius’ Hebrew Grammar explain (Oxford, 1952, p.418), the Hebrew word ben (son of) or benehʹ (sons of) fit mean “to be member of one group of people (or tribe, or any other group).” (Check Ne 3:8. For there, “one of the people wey de mix medicine oil” na “one of the sons of people wey de mix medicine oil.”) So, “The sons of the prophets” fit de describe one school wey them de teach people wey be prophet or e fit be group of people wey be prophet. Them mention say that kind group of prophet dey for Bethel, Jericho, and Gilgal. (2Ki 2:3,5; 4:38; check 1Sa 10:5, 10.) Samuel lead one group of prophet for Ramah (1Sa 19:19, 20), and e be like say Elisha self lead that kind group for e time. (2Ki 4:38; 6:1-3; check 1Ki 18:13.) Bible talk say them build the place wey them go de stay and them borrow wetin them take build the place. This one fit mean say them live simple life. Na true say them de stay together and de chop together, but each of them fit get assignment to go do prophet work.—1Ki 20:35-42; 2Ki 4:1, 2, 39; 6:1-7; 9:1,2.