Study Book for Life and Preaching Meeting Workbook
© 2022 Christian Congregation of Jehovah’s Witnesses
JANUARY 2-8
FINE-FINE LESSON FROM BIBLE | 2 KINGS 22-23
“Why E Good to Dey Humble?”
w00 9/15 29-30
Josiah Get Favor From Jehovah Because E Dey Humble
People wey de repair the temple just de work hard for the temple since early morning. Josiah really de thank Jehovah say the people wey de work de repair the things wey e wicked forefathers damage for God house. As them de do the work de go, Shaphan come report something to Josiah. Wetin be that? E hold scroll for e hand! E talk say Hilkiah wey be the High Priest don see the book of the law wey Moses use e hand write. (2 Chronicles 34:12-18) This one na really good news! Them see the original copy of the law!
E de hungry Josiah to hear everything wey they write for the book. As Shaphan de read-am, the king de try to see how the things wey them write take concern e and the people. The one wey really touch-am na the way the book talk about true worship and the way the book talk about the bad things wey go happen to them if them put hand for lie-lie worship. When Josiah see say no be everything wey God command for the book them de do, e tear e cloth and e command Hilkiah, Shaphan, and other people say: ‘Go, ask Jehovah about the things wey they write for the book wey them see; because the anger of Jehovah wey go pour ontop our head plenty no be small. Because our forefathers them no listen to the things wey dey this book.’—2 Kings 22:11-13; 2 Chronicles 34:19-21.
w00 9/15 30 ¶2
Josiah Get Favor From Jehovah Because E Dey Humble
The people wey Josiah send go Jerusalem go meet Huldah wey be Prophetess, come back with the report from Huldah. Them tell the king say all the things wey Jehovah don talk, go really happen as them don turn their back on Jehovah. But because Josiah humble eself for Jehovah eye, e no go need to see how this bad things go take happen. E go die before that time and them go carry-am go e grave in peace.—2 Kings 22:14-20; 2 Chronicles 34:22-28.
Fine-Fine Things Wey You See for Bible
w01 4/15 26 ¶3-4
No Matter Wetin Happen as You De Grow, You fit Succeed
Even though say many bad things happen the time wey Josiah de grow, e still do wetin good for Jehovah eye. E really succeed when e de rule sotey Bible talk say: “No king ever dey like this one before. E turn back to Jehovah with all e heart and all e body and all e power just as the law of Moses talk. And no king ever be like this one after.”—2 Kings 23:19-25.
Josiah example na really better one for people wey get bad experience as them de grow. Wetin we fit learn from e example? Wetin help Josiah to choose wetin good and continue to do am?
JANUARY 9-15
FINE-FINE LESSON FROM BIBLE | 2 KINGS 24-25
“No Waste Time Do Wetin Jehovah Want”
w01 2/15 12 ¶2
The Day Wey Jehovah Go Judge Don Near!
2 The thing wey Prophet Zephaniah talk say go happen go don make Josiah see say e no need to waste time to comot lie-lie worship for Judah. But even though say e succeed do this one, some of the people no stop to do wicked things, and this one no cover for the sin of e grandpapa wey be King Manasseh, wey kill plenty innocent people for Jerusalem. (2 Kings 24:3, 4; 2 Chronicles 34:3) So the day wey Jehovah go judge go surely come.
w07 3/15 11 ¶10
Lessons From the Book of Jeremiah
The year na 607 B.C.E. and this na the 11th year wey Zedekiah don de rule as king. King Nebuchadnezzar wey de rule Babylon don surround Jerusalem for 18 months now. For the seventh day of the fifth month wey be the 19th year wey Nebuchadnezzar don de rule as king, Nebuzaradan wey be the chief of the bodyguard come Jerusalem. (2 Kings 25:8) E fit be say e come from their camp wey dey outside Jerusalem wall. Nebuzaradan check how the place be and e plan the next action wey them go take. Three days later, on the tenth of the month, e enter Jerusalem and e burn the city.—Jeremiah 52:12, 13.
Fine-Fine Things Wey You See for Bible
w05 8/1 12 ¶1
Lessons From the Book of Second Kings
24:3, 4. Because Manasseh kill many innocent people, Jehovah no gree forgive Judah. God de value the blood of innocent people. We fit dey sure say Jehovah go surely destroy people wey de kill innocent people.—Psalm 37:9-11; 145:20.
JANUARY 16-22
FINE-FINE LESSON FROM BIBLE | 1 CHRONICLES 1-3
“Bible—Book Wey De Talk Truth, No Be Just Story-story”
w09 9/1 14 ¶1
Adam and Eve—Them Be Real People?
Take for example, the list wey dey the Bible book of First Chronicles chapter 1 go reach 9 and Luke chapter 3, wey show the family line of Jew people. The family line wey dey there cover 48 generations and 75 generations. Luke trace the family line wey Jesus Christ from come and Chronicles record the family line of kings and priest for the nation of Israel. The two list carry the name of people wey people know well-well like Solomon, David, Jacob, Isaac, Abraham, Noah, and even Adam. All the names wey dey the two list na names of real people, and na Adam be the original real person for the list.
w08 6/1 3 ¶4
Noah and the Flood—E Really Happen?
Two place for inside the list of the family line of Jew people for Bible show say Noah na real person. (1 Chronicles 1:4; Luke 3:36) Both Ezra and Luke wey arrange the list of the family line na people wey sabi do research well-well. Luke record show say Jesus Christ na from the family line of Noah.
w09 9/1 14-15
Adam and Eve—Them Be Real People?
Make we see one example. One thing wey Bible teach wey many church people today really like na the death of Jesus. This thing wey Bible teach help us see say Jesus Christ give e perfect life so that e go fit save people from their sin. (Matthew 20:28; John 3:16) As we know, to fit buy something back, we go need to use something wey get the same value with the thing wey lost. Na e make Bible talk say Jesus “use e life pay the exact price to save everybody.” (1 Timothy 2:6) We fit ask say wetin make-am be the exact price? Bible tell us the answer. E say: “Just as everybody de die because of Adam, na so everybody go still dey alive again because of Christ.” (1 Corinthians 15:22) The perfect life wey Jesus sacrifice to save people wey de obey God match the perfect life wey Adam lost when e sin for the Garden of Eden. (Romans 5:12) So e clear say If Adam no be real person, Jesus sacrifice go dey useless.
Fine-Fine Things Wey You See for Bible
it-1 911 ¶3-4
Family Lines
Name of Women. Sometimes, women name de show for the register wey talk about family lines. And their name de show when e get wetin happen wey concern this women. Genesis 11:29, 30 mention Sarai (Sarah), and e clear say na because the promise seed go come from-am. No be from the other wife wey Abraham marry. E fit be say Milcah name dey there because na she be the grandmother of Rebekah wey be Isaac wife. And this one show say Rebekah na part of Abraham family people. E be like that because Isaac no marry from the nations around them. (Ge 22:20-23; 24:2-4) For Genesis 25:1, them mention the name of the wife wey Abraham later marry wey be Keturah. This one show say Abraham marry again after Sarah die, and say Abraham fit still born children even after 40 years wey Jehovah do miracle wey help them fit born children. (Ro 4:19; Ge 24:67; 25:20) E still show the relationship wey Midian and other Arabian tribe get with Israel.
Leah, Rachel, Jacob concubines, and the name of all the son wey them born dey the register. (Ge 35:21-26) This one help us understand the way God later treat this sons. For the same reason, we see the name of other women for the register wey talk about family lines. And when inheritance come through this women, them fit put their name join. (Nu 26:33) And as we know, Tamar, Rahab, and Ruth case dey different. E get something wey dey special about the way this women name take join the family line of the Messiah wey be Jesus Christ. (Ge 38; Ru 1:3-5; 4:13-15; Mt 1:1-5) Some other places wey them mention women name for the list wey talk about family lines de 1 Chronicles 2:35, 48, 49; 3:1-3, 5.
JANUARY 23-29
FINE-FINE LESSON FROM BIBLE| 1 CHRONICLES 4-6
“Wetin My Prayer De Show About the Kind Person Wey I Be?”
w10 10/1 23 ¶3-7
Person “Wey De Hear Prayer”
Jabez na man of prayer. For e prayer, e first beg God make e bless-am. After e ask God for three things wey show say e really get faith.
First, e beg God say make e help-am make e territory big. (Verse 10) No be because say e na person wey de use force or wayo collect people land. The thing wey e really de pray for fit be about people, no be land. E fit don de ask say make God help am expand e territory with peace so that e go fit contain plenty people wey de worship Jehovah.
The second thing wey Jabez pray for na say make God “hand” dey with-am. The hand of God na the power wey e de use help people wey de worship-am. (1 Chronicles 29:12) To get the thing wey e want, Jabez trust Jehovah, the God wey e hand no too short to help people wey show say them get faith for-am.—Isaiah 59:1.
The third thing wey e pray for na make God save-am from problem so that the problem no go wound-am. When e talk say ‘so that the problem no go wound-am’, e no mean say make God comot the problem, but make God help-am so that the problem no go make-am de over sad and make-am leave Jehovah.
Jabez prayer show how e de see true worship. E still show the kind faith and trust wey e get for the Person wey de hear prayer. How Jehovah take answer-am? The way the story end show say Jehovah make everything wey e ask for happen.
Fine-Fine Things Wey You See for Bible
w05 10/1 9 ¶7
Lessons From the Book of First Chronicles
5:10, 18-22. For the days wey Saul de rule as king, the tribe wey dey the east side of the Jordan win the Hagrite people even though say e pass times two wey this Hagrite people take plenty pass them. This one happen because the strong men of war for the tribes wey dey the east side of the Jordan trust Jehovah to help them. Make we self put all our trust for Jehovah to help us as we de struggle to serve-am for this wicked world wey Satan de control.—Ephesians 6:10-17.
JANUARY 30–FEBRUARY 5
FINE-FINE LESSON FROM BIBLE | 1 CHRONICLES 7-9
“With Jehovah Help, You Fit Do Assignment Wey Hard”
w05 10/1 9 ¶8
Lessons From the Book of First Chronicles
9:26, 27. The Levite wey be gatekeepers get special assignment. They give them key to the gate of the holy areas for inside temple. Them really de do their work well everyday as them de always open the gate. Today, Jehovah don still give us the work to go help people come serve-am. We fit do the work well and show say them fit trust us like the Levite gatekeepers?
w11 9/15 32 ¶7
You Fit Be Like Phinehas When You De Face Problem?
Phinehas na person wey de do plenty work for Israel that time. Even with that one, e succeed face the problem wey e get because e get strong mind, deep sense and e trust God. And Jehovah bless-am because e do e best to care for God congregation well. Some 1,000 years later, Holy Spirit move Ezra to write say: “Na Phinehas wey be the son of Eleazer de lead them that time and Jehovah dey with-am.” (1 Chron. 9:20) Make e be like that with all the people wey de take the lead for Jehovah organization today, and even everybody wey de use all their heart serve-am.
Fine-Fine Things Wey You See for Bible
w10 12/15 21 ¶6
Sing to Jehovah!
6 Yes, Jehovah use E prophet tell E servant make them worship-am with song. Them no even de allow some people wey de sing wey come from the tribe of priest make them do the other work wey Levites suppose do. This one na to make sure say them get enough time to arrange the song wey them go sing and to practice-am well.—1 Chron. 9:33.
FEBRUARY 6-12
FINE-FINE LESSON FROM BIBLE | 1 CHRONICLES 10-12
“Make E De Hungry You to Do Wetin God Want”
w12 11/15 6 ¶12-13
“Teach Me How to Do Wetin You Want”
12 The way David value the advice wey dey the law and the way e really like to follow-am na something wey we need to copy. See wetin happen when e de hungry David to drink water from the well of Bethlehem. Three of David men use force enter the city where the Philistines de stay and them bring water come for David. But David no gree drink-am, e pour the water for ground give Jehovah. Why? David explain say: “God must no hear say I do something like this! I suppose drink the blood of this men wey risk their life? Because them put their life for danger to bring-am.”—1 Chron. 11:15-19.
13 David know say the law talk say make them no eat blood, but make them pour-am out to Jehovah. And e still understand why them suppose do-am like that. David know say “the life of everything wey e de live dey inside the blood.” But this one na water, no be blood. Why David no gree drink-am? E value the advice wey dey inside the law. For David eye, the water dey precious like the blood of the three men. So e no make sense for e eye to drink the water. Instead make e drink-am, e decide to pour-am for ground.—Lev. 17:11; Deut. 12:23, 24.
w18.06 17 ¶5-6
Train Your Conscience With Law and Advice From Bible
5 If we want make laws for Bible help us, we no go only read them, or know them. But our love for the laws need to de grow, and we go follow them. Bible talk say: “Hate bad thing and like good thing.” (Amos 5:15) But wetin go help us do that one? We go need to learn how to see things the way God de see them. For example, maybe you no de fit get better sleep. Then doctor tell you say make you de chop good food, de do exercise, and change some things for your life. When you follow the thing wey the doctor talk, you see say e work. You no go de happy say the doctor help you?
6 Na so e still be with the laws wey God don give us. This laws de protect us so that sin no go put us for trouble, and this law de help us live better life. For example, Bible talk say make we no de lie, de cheat, de thief, de put hand for sex matter wey God hate, de fight, and de put hand for things about demons. (Read Proverbs 6:16-19; Rev. 21:8) Na we de gain when we follow wetin Bible talk. And when we see the gain, our love for Jehovah and e law go strong pass as e dey before.
Fine-Fine Things Wey You See for Bible
it-1 1058 ¶5-6
Heart
Serve Jehovah With “Complete Heart.” For the heart wey dey our body to fit work well, all the different part of the heart must dey complete. But e dey possible make the heart wey we take de serve Jehovah no complete. David pray say: “Make my heart to be one to fear your name.” This one show say person heart fit divide for the way e de feel. (Ps 86:11) This kind person fit de use half heart worship God. (Ps 119:113; Re 3:16) Person fit still get double heart (meaning two different heart). This kind person fit de try to serve two oga or master, or e fit de talk one thing but wetin dey e mind different. (1Ch 12:33; Ps 12:2, ftn) Jesus really condemn this kind thing.—Mt 15:7, 8.
Person wey want make God happy must get complete heart, no be half heart or double heart. (1Ch 28:9) To fit do this one, we need to really work hard because the heart dey hard to control and e dey easy for bad things to enter-am. (Jer 17:9, 10; Ge 8:21) For us to fit continue to maintain this complete heart wey we take de worship Jehovah, we need to de pray (Ps 119:145; La 3:41), to de study God Word (Ezr 7:10; Pr 15:28), to de put body for our preaching work (compare Jer 20:9), and to de make friends with people wey de use all their heart worship Jehovah.—Compare 2Ki 10:15, 16.
FEBRUARY 13-19
FINE-FINE LESSON FROM BIBLE | 1 CHRONICLES 13-16
“We Go Succeed If We De Follow Direction”
w03 5/1 10-11
You De Ask, “Where Jehovah Dey?”
12 After them return the ark of the covenant go back to Israel, and them don keep-am for Kiriath-jearim for many years, King David decide to transfer-am go Jerusalem. E meet with the chief of the people and tell them say e go move the ark if e dey okay for them and if Jehovah accept-am. But e no really find out to know wetin Jehovah think about the matter. If to say e find out wetin Jehovah want, them for no use wagon carry the ark. Na Kohathite Levites for carry-am for their shoulder as God don first talk-am before. Na true say David de always find out wetin Jehovah think about matter before, but this time e no do-am well. And because of this one, bad thing happen. David come later talk say: “Jehovah our God vex for us, because we no find out the correct wey to carry-am.”—1 Chronicles 13:1-3; 15:11-13; Numbers 4:4-6, 15; 7:1-9.
w03 5/1 11 ¶13
You De Ask, “Where Jehovah Dey?”
13 When the Levites finally carry the Ark from Obed-edom house go Jerusalem, them sing one song wey David write. For inside the song, David write something wey we need to put for mind. E say: “Look for Jehovah and the power wey e get. Look for e face everytime. Remember the wonderful things wey e don do, the miracles wey e don do and the judgement wey e don give.”—1 Chronicles 16:11, 12.
Fine-Fine Things Wey You See for Bible
w14 1/15 10 ¶14
Worship Jehovah, the Everlasting King
14 David carry the holy ark of the covenant go Jerusalem. For this time wey them de happy, the Levites sing one song of praise. For the song, them talk something wey de important. E dey for 1 Chronicles 16:31. E talk say: “Tell everybody for the nations say: ‘Jehovah don be King!’ ” Person fit de ask say, ‘Since Jehovah na the everlasting King, how e come be say e become King that time?’ Jehovah de become King when e do something to show say na e de rule or when e arrange make person stand for-am for one particular time or to deal with some kind situation. This kind way wey Jehovah take de be king get meaning for different-different way. Before David die, Jehovah promise-am say e kingship go last forever. E say: “I go carry your pikin up after you, your own son, and I go make e kingdom stand.” (2 Sam. 7:12, 13) E later pass 1,000 years before this David “pikin” come. Who this “pikin” come be, and when e become King?
FEBRUARY 20-26
FINE-FINE LESSON FROM BIBLE | 1 CHRONICLES 17-19
“Continue to De Happy Even When Things No Go As You Expect”
w06 7/15 19 ¶1
Focus on the Good Things Wey Jehovah Organization De Do
DAVID of Israel that time, na one of the special people wey Hebrew Scriptures talk about. David na shepherd, musician, prophet, and king, and e really trust Jehovah no be small. Because of the way David love and dey close to Jehovah, e decide to build house for God. This kind house or temple, go be place wey them go de worship Jehovah for the correct way for Israel. David know say this arrangement to build the temple go make the people happy and e go make them get blessing. E come sing say: “Person wey you [Jehovah] choose and wey you carry near you to come stay for your temple go dey happy. The better things wey dey for your house go belleful us, those things wey dey your holy temple.”—Psalm 65:4.
De Get Joy From the Things Wey You Fit Do for Jehovah
11 For the same way, we fit get more joy when we put all our power for any work wey they give us to do for Jehovah organization. “Dey busy” for the preaching work, and work hard for congregation. (Acts 18:5; Heb. 10:24, 25) Prepare well for meeting so that you go fit encourage people with your comment. No play with any student assignment wey you get for Life and Preaching meeting. If they tell you make you help to do work for congregation, make you do the work for the correct time and show say they fit trust you. No treat any assignment wey they give you as if them de use-am waste your time. Make you try to sabi your work more. (Prov. 22:29) If you de really work hard for Jehovah, wuna go tight more-more and you go get more joy. (Gal. 6:4) And this one go make-am dey more easy for you to de happy with other people when they get privilege wey you for like to get.—Rom. 12:15; Gal. 5:26.
Fine-Fine Things Wey You See for Bible
w20.02 12, box
We Love Jehovah Our Papa, No Be Small!
Jehovah De Notice Me?
You don ever ask yourself say, ‘Out of all the billions of people wey dey alive for this earth, why Jehovah go notice me?’ If na so, make you know say plenty good people don ask that question. King David write say: “O Jehovah, wetin man be wey you go notice-am? Wetin ordinary man be wey you go think about-am?” (Ps. 144:3) David dey sure say Jehovah know-am well. (1 Chron. 17:16-18) And as you de show say you love Jehovah, e de use e Word and organization to make you dey sure say e de see-am. Think about some things wey Bible talk wey go help you believe say that one na true:
• Jehovah know you well even before they born you.—Ps. 139:16.
• Jehovah know wetin dey inside your heart, and e know wetin you de think.—1 Chron. 28:9.
• Na Jehovah de listen to all the prayer wey you de pray.—Ps. 65:2.
• The things wey you de do de affect the way Jehovah de feel.—Prov. 27:11.
• Na Jehovah draw you come e side.—John 6:44.
• If you die, Jehovah know you well sotey e go fit resurrect you. God go give you new body and new mind and they go just be like the one wey you get now. The things wey you know for your brain no go comot and the kind person wey you be no go change.—John 11:21-26, 39-44; Acts 24:15.
FEBRUARY 27–MARCH 5
FINE-FINE LESSON FROM BIBLE | 1 CHRONICLES 20-22
“Help Young People Succeed”
w17.01 29 ¶8
“Give This Things to Men Wey You Fit Trust”
8 Read 1 Chronicles 22:5. David fit de think for e mind say Solomon no reach to handle the building work of the temple. E think like that because the temple really need to “dey beautiful,” and Solomon still “young and e never know many things.” But David still know say Jehovah go give Solomon power to handle the work wey E don give-am. So, David put mind for wetin e fit do to help Solomon. E arrange plenty things wey them fit use for the work.
w17.01 29 ¶7
“Give This Things to Men Wey You Fit Trust”
7 David no talk say e no go support Solomon. E no begin de vex for e mind say na Solomon go get all the praise for the building work instead of-am. And true-true, na Solomon temple them come de call-am, no be David own. Even though say e fit don pain David say no be e build the temple, e still use e heart support the building work. E even organize group of people wey gather iron, copper, silver and gold and cedar timbers. E still encourage Solomon. E tell-am say: “Now my son, make Jehovah dey with you, and make you succeed and build the house of Jehovah your God, just as e don talk about you.”—1 Chron. 22:11, 14-16.
w18.03 11-12 ¶14-15
Papa and Mama, You De Help Prepare Your Pikin Make E Fit Baptize?
14 As shepherds, elders for congregation fit help papa and mama wey de try to help their children when them de talk better things about wetin person fit use e life do for Jehovah. One sister wey don serve as pioneer for more than 70 years remember wetin Brother Charles T. Russell tell-am when e de six years, and how this one help-am. E talk say: “Brother Russel talk with me for 15 minutes about the thing wey I plan to use my life do for Jehovah.” Yes, the better word wey we tell people and the encouragement wey we give them fit really help them even after many years don pass. (Prov. 25:11) Elders fit still encourage papa and mama and their children make them join when work dey for Kingdom Hall. And e good make them give young people work wey go match their age and wey them go fit handle.
15 Other people for congregation fit join hand help young children as them de use better mind do wetin go show say them really like the children. This one still mean say we go de put eye for things wey them de do wey show say them don de mature for Jehovah eye. For example, any young person give better comment or handle part for meeting? Any young person don hold Jehovah tight even when e face temptation or e use opportunity to preach for school well? No waste time to tell them say them do well. We fit make-am part of our plan to talk with young person and encourage-am before or after meeting? When we de do like that, we de let young people know say we value them and say them be part of Jehovah big congregation.—Ps. 35:18.
Fine-Fine Things Wey You See for Bible
w05 10/1 11 ¶6
Lessons From the Book of First Chronicles
21:13-15. Jehovah command the angel make e stop the disease because E de feel the pain of E people as them de suffer. True-true, Jehovah get pity no be small.