Study Book for Our Life and Preaching Meeting
© 2023 Watch Tower Bible and Tract Society of Pennsylvania
SEPTEMBER 4-10
FINE-FINE LESSON FROM BIBLE | ESTHER 1-2
“Try to Know Where You Fit Do Reach Like Esther”
w17.01 25 ¶11
You Fit Know Where to Do Reach Even When E Hard
11 Another thing wey fit make-am hard to know where we suppose do reach, na when them de praise us too much. Make we talk about the fine example of Esther wey this kind thing happen to. Esther fine well-well and e live big woman life for one year for Persia. E stay with many young women wey them carry come from different-different place for Persia. All of them want make Persia king see as them fine reach so that the king go like them. Even with all this one, Esther no stop to respect people and behave well. E no start to carry body up or de overdo, even after the king don choose-am as queen.—Esther 2:9, 12, 15, 17.
ia 130 ¶15
E Choose to Support God People
15 When time reach for Esther to meet the king, them give-am chance to choose anything wey e feel say e go need so that e go fit make imself fine well-well. Esther no overdo, na only the things wey Hegai tell-am make e carry e use, e no collect any other thing. (Esther 2:15) E fit be say Esther know say no be only to fine go make the king choose-am, but na to de carry body down and know where e suppose do reach. Na the correct thing e do?
w17.01 25 ¶12
You Fit Know Where to Do Reach Even When E Hard
12Person wey know where e suppose do reach, de always dress and behave well; e de respect imself and other people. E good make we know say people go love us when we dey “quiet and get cool mind,” no be when we de boast or de always do things to make people notice us. (Read 1Peter 3:3, 4; Jer. 9:23, 24) The kind person wey we really be for inside go show for the way we de do things. For example, we fit want make other people feel say we get level because of the kind privilege wey we get, the kind things wey we know, or the special friendship wey we get with brothers wey get special privilege for Jehovah organization. Or for work wey other people follow us do, we fit come de talk about-am like say na only we do-am so that people go de praise us. Jesus still show us better example for this matter. Almost everything wey e talk when e dey this earth na from Bible. E do like that so that people go know say na Jehovah teach-am everything, no be just from e own mind.—John 8:28.
Fine-Fine Things Wey You See for Bible
You Know?
Them see one writing for flat clay (Persian cuneiform writing) wey mention one man wey e name na Marduka (Mordecai for English). E work as person wey dey in charge of money for Shushan. One man wey de study things about this area wey e name na Arthur Ungnad, talk about this writing wey them see. E talk say na the first time wey them mention Mordecai for other writing wey no be part of Bible.
Some years after Ungnad write this one, some people wey go school well-well don translate plenty other writing wey them write for flat clay. Some of them na the small-small flat clay wey them see for the city of Persepolis wey don scatter. Them see them for the area wey near the place wey them de keep money wey dey close to the city wall. When them check the time wey this small-small flat clay don dey inside ground, them see-am say na for the time of Xerxes I. Them write-am for Elamite language and them see plenty names wey the Bible book of Esther talk about.
Plenty small-small flat clay wey them see for the city of Persepolis (Persepolis tablets) mention the name Marduka, and say e do secretary work for the palace for Shushan when Xerxes I de rule. One of the flat clay talk say Marduka na translator. This one match with wetin Bible talk about Mordecai. As Bible talk, na servant e be for the palace of King Ahasuerus. Mordecai de always sitdown for the gate of the palace of the king for Shushan. (Esther 2:19, 21; 3:3) This gate na big place wey the servants of the king de work.
Plenty things dey wey the Marduka wey the Persepolis tablets talk and Mordecai wey Bible talk about take resemble. Them live for the same time and for the same place, and them get the same position for the place wey them work. All this things wey people wey de dig ground see and wetin Bible book of Esther talk about Mordecai fit be proof say Marduka and Mordecai na the same person.
SEPTEMBER 11-17
FINE-FINE LESSON FROM BIBLE | ESTHER 3-5
“Help Other People to Fit Do Their Best for Jehovah”
it-2 431 ¶7
Mordecai
E No Gree Bow Down to Haman. Before this time, Ahasuerus don make Haman wey be Agagite prime minister, and e give order say make everybody for the king gate de bow down to Haman because of e new position. Mordecai no gree bow down to Haman and e talk say na because e be Jew. (Es 3:1-4) This reason wey Mordecai give show say e no go fit bow down to Haman because of e friendship with Jehovah as Jew wey don dedicate imself to Jehovah. Mordecai know say e for no bad to bow down for Haman since e get big position for government as Israel people de do for person wey get authority before. (2Sa 14:4; 18:28; 1Ki 1:16) But Mordecai get another good reason wey make-am no gree bow down to Haman. Haman na Amalek person, and Jehovah don show say e dey against Amalek people from one generation go reach another generation. (Ex 17:16; see HAMAN.) For Mordecai, this matter no be just to show respect for people wey de rule, but e still need to show say na Jehovah e de respect and serve.
it-2 431 ¶9
Mordecai
Them Use-Am Save Israel People. When them plan to destroy all the Jew people wey dey the whole kingdom, Mordecai do things to help Esther see say e don become queen for this time so that Jehovah go fit use-am save Jew people. Mordecai show Esther the big work wey e get to do. E encourage Esther make e beg the king to help them. Even though say this one go put Esther life for danger, e agree to do as Mordecai talk.—Es 4:7–5:2.
ia 133 ¶22-23
E Choose to Support God People
22 Esther heart go don cut as e hear that message. This one na the biggest thing wey go test e faith. E show say e really de fear when e de answer Mordecai. Esther tell Mordecai about the king law. Na death be the punishment for person wey show imself to the king when the king no ask for-am. Na only if the King raise e golden rod that kind person go fit dey free. You think say Esther get any reason to expect say the king go show-am favor especially after e don hear wetin happen to Vashti when e no obey the king command? Esther tell Mordecai say the king never invite-am for the next 30 days! This one fit don give Esther plenty reason to de wonder whether the king no really like-am again.—Esther 4:9-11.
23 To make Esther faith strong well-well, Mordecai use strong mind answer-am. E make Esther see say if e no do something to help Jew people, another way go come for Jew people to survive. But them go leave Esther if this plan to destroy all Jew people really happen? For this place, Mordecai really show say e get strong faith for Jehovah. E know say Jehovah no go ever allow them destroy im people, and say Jehovah no go fail for all the things wey e don promise. (Josh. 23:14) Then Mordecai ask Esther say, who know whether na because of time like this Jehovah make-am possible for you to become queen. (Esther 4:12-14) Mordecai na better example wey we fit copy. E really trust e God wey be Jehovah. What about us?—Prov. 3:5, 6.
Fine-Fine Things Wey You See for Bible
kr 160 ¶14
Fight for Freedom to Worship
14 Like Esther and Mordecai for past, Jehovah people today still de fight for freedom so that them go fit worship Jehovah for the way wey e want. (Esther 4:13-16) You go fit join them? Yes. You fit de pray all the time for your brothers and sisters wey de suffer this kind things. This kind prayer really de important and e de really help brothers and sisters when them de face hard times and when people de suffer them because them de serve Jehovah. (Read James 5:16.) Jehovah de hear this kind prayer? Many of the court case wey we don win show say Jehovah really de hear!—Heb. 13:18, 19.
SEPTEMBER 18-24
FINE-FINE LESSON FROM BIBLE | ESTHER 6-8
“Better Lesson From Better Talk”
ia 140 ¶15-16
E Do Things With Sense, Strong Mind, and E No Dey Selfish
15 Because Esther dey patient, e decide to wait for another one day to tell the king wetin e want. This extra one day give Haman chance to prepare for e own destruction. And you no think say na Jehovah make-am possible say the king no fit sleep that night? (Prov. 21:1) No wonder, God Word encourage us make we ‘sofri de wait’! (Read Micah 7:7.) When we wait for God, we fit see say the way e go take help us with our problem go better pass anything wey we fit don plan to do.
E Talk With Strong Mind
16 Esther no need to try the king patience again. For the second time wey e invite the king and Haman, e go need to talk everything. But how e go do-am? As time de go, the king give-am chance to talk. E ask-am again about the thing wey Esther want ask. (Esther 7:2) The time for Esther to talk don reach.
ia 140 ¶17
E Do Things With Sense, Strong Mind, and E No Dey Selfish
17 We fit imagine say Esther go don pray to God for e mind before e talk the things wey e talk. E say: “If I don gain favor for your eyes, O king, and if e go make the king happy, make I get my life and the life of my people back as wetin I de ask for.” (Esther 7:3) You see how Esther take show say e go respect the better decision wey the king go make? Esther really different from Vashti, the king former wife wey open eye do wetin the king no like! (Esther 1:10-12) Another thing be say, Esther no talk anything wey go make the king feel bad say e trust person like Haman. Instead, e beg the king make e protect-am from the danger wey fit take e life.
ia 141 ¶18-19
E Do Things With Sense, Strong Mind, and E No Dey Selfish
18The thing wey Esther ask for, really touch the king and e move-am. Who de try to put e queen life for danger? Esther continue to de talk. E say: “Because them don sell us, me and my people, so that them go finish us, kill us, and destroy us. If to say them sell us as slave, I for keep quiet. But the pain wey e go cause no good at all, because e go really affect the king for bad way.” (Esther 7:4) Know say Esther talk the problem as e be, but e still talk say e for keep quiet about the matter if to say the problem na just to make them slave. This destruction, go really bad for the king if e keep quiet about the matter.
19 Esther example teach us about how we fit talk for way wey go really touch person and move-am to do something. If e ever happen say you need to tell person wey you love about serious matter or maybe na person wey dey authority, e go good make you dey patient, show respect, and talk the truth about the matter. This one go really help.—Prov. 16:21, 23.
Fine-Fine Things Wey You See for Bible
w06 3/1 11 ¶1
Lessons From the Book of Esther
7:4—How e be say to destroy Jew people kpatakpata go “affect the king for bad way”? The things wey Esther talk show say e dey possible to sell Jew people as slave. As e talk this one, e de try use sense show the king say to destroy Jew people kpatakpata go affect the king for bad way. If to say Haman plan na to sell Jew people, the 10,000 silver money wey Haman promise no go reach anything for the king if them compare-am to the plenty-plenty money and property wey e go get. Another thing be say, to kill all Jew people mean say them go still kill the queen.
SEPTEMBER 25–OCTOBER 1
FINE-FINE LESSON FROM BIBLE | ESTHER 9-10
“E No Use E Authority for Selfish Way”
it-2 432 ¶2
Mordecai
Mordecai come replace Haman as prime minister and e come get the king ring wey them take de sign state document. Esther put Mordecai in charge of Haman house wey the king don give-am. Then Mordecai come use the king ring take make law and the law give Jew people right to fight and protect theirself. This one na really better thing for Jew people and e really make them happy. Many people for Persia support Jew people. When the day wey be Adar 13 wey them be plan to kill Jew people reach, them don already prepare theirself. Many officials stand for their side because Mordecai don get high position. Them even carry the fight for Shushan enter another day. The enemies of Jew people wey them kill pass 75,000, and Haman ten sons dey inside. (Es 8:1–9:18) As Esther don talk, Mordecai give command say make them do the celebration of the festival of the 14th and 15th days of Adar, wey be the “days of Purim” so that everybody go happy and them go give gift to each other and to poor people. Jew people agree, and them make sure say their children and the people wey dey with them join them celebrate the festival. As Mordecai don be the second most important person for the kingdom, God people wey be Jew continue to respect-am, and Mordecai continue to do things wey go favor them.—Es 9:19-22, 27-32; 10:2, 3.
it-2 716 ¶5
Purim
Why Them Do-Am. Some people wey de talk put for matter talk say the way Jew people today de celebrate the Festival of Purim dey different from the way them de do-am before. Before, them de do-am for religious way. But today, the way them de do-am no get anything to do with religion and sometimes, them de over do-am. Mordecai and Esther na servant of the true God wey be Jehovah, and them arrange the festival to honor Jehovah. Na Jehovah them go thank for the way e save Jew people that time, because the matter start when Mordecai no gree share Jehovah worship with anybody. E fit be say Haman na Amalek person, and Jehovah don curse the nation of Amalek and e don condemn them. Mordecai respect Jehovah decision, so e no gree bow down to Haman. (Es 3:2, 5; Ex 17:14-16) The thing wey Mordecai still tell Esther (Es 4:14) show say e put mind for power wey high pass to save Jew people. And as Esther do fasting before e go meet the king to tell-am the original thing wey dey e mind, and to invite-am to come chop with-am, show say e need God to help-am.—Es 4:16.
cl 101-102 ¶12-13
“De Copy the Example of God” for the Way You De Use Your Power
12 Jehovah don arrange elders wey go de take the lead for congregation. (Hebrews 13:17) All this men need to use the authority wey God don give them take help and make the sheep of God feel good. Their position as elders de give them power to carry theirself as master of God people? No, no be so! Elders need to dey balance and humble for the way them de see their work for congregation. (1Peter 5:2, 3) Bible tell elders say: “Care for the congregation of God, wey e buy with the blood of im own Son.” (Acts 20:28) This Bible verse get strong reason why elders need to treat each of God sheep with care.
13 Make we use this example talk about-am. One of your close friend give you something wey e value well-well, make you take care of-am. You know say your friend pay big money to get that thing. You no go take care of that thing well? Na so e still be, God don give elders the work to care for something wey e really value well-well: the congregation, wey be like sheep. (John 21:16, 17) Jehovah really value the sheep—e love them well-well sotey e buy them with the precious blood of e only Son wey be Jesus Christ. E no get another price wey high pass that one wey Jehovah for pay. Elders wey dey humble get that one for mind and them de treat Jehovah sheep well.
Fine-Fine Things Wey You See for Bible
w06 3/1 11 ¶4
Lessons From the Book of Esther
9:10, 15, 16—Why Jew people no gather property wey them get from the fight for theirself even though the law give them right to do-am? As them no gree collect the better-better things, e show say the reason why them go fight na to protect theirself. No be to go gather property wey go make them rich.
OCTOBER 2-8
FINE-FINE LESSON FROM BIBLE | JOB 1-3
“Continue to Show How Your Love for Jehovah Deep Reach”
w18.02 6 ¶16-17
Get Faith and De Obey Like Noah, Daniel, and Job
16The wahala wey Job face. Job na one person wey e life turn upside down. Before, na Job rich pass for all the people wey dey East. (Job 1:3) E get money, people know-am well-well, and them de respect-am well-well. (Job 29:7-16) But the things wey Job get no make-am start to de think say e better pass other people, or feel say e no need God again. Jehovah even call-am im “servant,” and E still talk say “e good, e de fear God, and e no de put hand for bad thing.”—Job 1:8.
17 Before Job know wetin de happen, everything for e life just change. E come poor well-well and e no get anything again. This thing wey happen to Job pain-am sotey life come tire-am. We know say na Satan make Job suffer like that. Satan talk say Job de serve God because of the things wey God de give-am. (Read Job 1:9, 10.) Jehovah take the matter serious. So wetin e do to show say Satan de lie? Jehovah allow Satan suffer Job. This one give Job the chance to show say e hold God tight, and e de serve-am because e love-am.
No Tire to Hold Jehovah Tight!
10 As e be for time of Job, Satan de talk the same thing about each of us today. How this thing manage concern you? The thing wey Satan mean be say, you no really love Jehovah, you go stop to serve God to save yourself, and any integrity wey you get na fake one! (Job 2:4, 5; Rev. 12:10) How that one make you feel? That kind thing de pain reach bone, no be so? But, think about this one: Jehovah trust you sotey e give you special chance. E let Satan test whether your service dey complete. Jehovah believe say you go give complete service and help to show say Satan de lie. And e talk say e go help you to fit do-am. (Heb. 13:6) For Jehovah, the Ruler of heaven and earth to trust you like this, na big favor! You don see why e dey important to hold Jehovah tight? When our service to God dey complete, or when we hold God tight we de show say Satan de lie. And we fit show say the name of God dey holy and we want de do the things wey e talk. Wetin we fit do so that we no go tire to hold God tight?
Fine-Fine Things Wey You See for Bible
Wetin We Learn From the Last Things Wey Jesus Talk?
9 Wetin Jesus talk? Small time before Jesus die, e shout say: “My God, my God, why you leave me?” (Matt. 27:46) Bible no tell us why Jesus talk like that. But think about wetin we fit learn from this thing wey Jesus talk. One thing wey we learn na say, this thing wey Jesus talk na wetin Psalm 22:1 don already talk say go happen. Another thing na say, this thing wey Jesus talk make-am clear say Jehovah no “protect” e Son this time. (Job 1:10) Jesus know say e Father allow make e enemies test e faith finish until e die. Nobody for this earth don ever face test reach the one wey Jesus face. Apart from that one, this thing wey e talk show say e no do any bad thing wey e suppose die for.
OCTOBER 9-15
FINE-FINE LESSON FROM BIBLE | JOB 4-5
“Run From Lie-Lie Information”
it-1 713 ¶11
Eliphaz
2. One of the three people wey come comfort Job. (Job 2:11) E na Teman person, and e fit be say e come from the family line of Esau first son wey still be Eliphaz, wey them talk about for No. 1. So, this one mean say e come from the family line of Abraham and e still relate to Job. E and e generation boast about the wisdom wey them get. (Jer 49:7) Among the three people wey come comfort Job, na Eliphaz them talk about as the most important and popular person. This one show say e fit be say na e old pass. For the three people wey talk, na e de first talk and na the things wey e talk de long pass.
w05 9/15 26 ¶2
Run From Bad Thinking!
As Eliphaz de try remember something wey happen to-am, e talk say: “One spirit pass my front; and the hair wey dey my body stand. The spirit come stand for one place, but I no know who e be. Something stand for my front; everywhere just quiet, then I hear one voice.” (Job 4:15, 16) Which kind spirit affect the way Eliphaz de think? The next thing wey the spirit talk make-am dey clear say no be one of God righteous angel de talk. (Job 4:17, 18) Na bad angel. If not, why Jehovah give Eliphaz and e two friends strong correction for the lie wey them talk? (Job 42:7) Yes e dey clear say demons don de control Eliphaz. The things wey e de talk show say the things wey e de think no agree with wetin God want.
w10 2/15 19 ¶5-6
Run From Satan Lie-Lie
Satan use Eliphaz wey be one of the people wey come comfort Job take talk say, human being dey weak and them no get hope. Eliphaz still talk about them as “people wey dey stay for mud house.” E tell Job say: “[Them] come from dust, [them] dey easy to destroy like insect! From morning go reach evening, them de scatter them to pieces; them de disappear forever and nobody de notice them.”—Job 4:19, 20.
Another place for inside Bible show say we be like “clay containers”—containers wey dey weak wey they use sand-sand make. (2Cor. 4:7) We dey weak because sin dey our body and we no dey perfect. (Rom. 5:12) If na only our power, e dey easy for Satan to fit attack us. But as Christians, we get person wey fit help us. Even though say we dey weak because of sin wey dey our body, God still value us well-well. (Isa. 43:4) In fact, Jehovah de give holy spirit to people wey de ask for-am. (Luke 11:13) Jehovah holy spirit fit give us “power wey pass our normal power.” This kind power de help us to fit handle any problem wey Satan de bring. (2Cor. 4:7; Phil. 4:13) If we no allow Devil shake us and we “get strong faith,” God go make us stand well and we go dey strong. (1Pet. 5:8-10) So, we no need to fear Satan wey be Devil.
Protect Yourself From Lie-Lie Information
● Think about where the story come from and wetin e de talk
Wetin Bible talk: “Check everything well.”—1Thessalonians 5:21.
Before you believe or send any story, even the one wey dey popular or wey them don repeat for news, check and dey sure say na true. How you fit do this one?
Think-am whether you fit trust where or who the story come from. News station and other organization fit change some things for story because of their business or who them de support for politics. Compare wetin you see for one news station with other ones. Sometimes, our friends fit make mistake send us message wey the story fit no be true for email or social media. So, no trust any news report unless you fit really check where e de come from.
Make sure say wetin dey the message na wetin dey correct and na wetin de happen. Check the date, check for things wey show say the story na true, and look for strong evidence wey support wetin them talk. You go really need to dey careful If them talk about serious matter like say e no mean anything or if them arrange the story to make you feel somehow.
Fine-Fine Things Wey You See for Bible
w03 5/15 22 ¶5-6
Stand Strong, and Win the Race for Life
To dey part of Jehovah Organization wey dey everywhere for this world fit really affect us for better way. Na really big blessing to dey among brothers and sisters wey love each other well-well! (1Peter 2:17) And we fit make our brothers and sisters stand strong.
See the better example of Job. The thing wey e do to help e friends, move Eliphaz wey no talk truth as e de comfort Job to talk say: “The things wey you de talk de raise anybody wey de fall, and knee wey don weak, you de make-am strong.” (Job 4:4) You de fit do this kind thing? All of us for Jehovah organization get work to help brothers and sisters so that them go fit de endure as them de serve Jehovah. Make the way we de do things with them show say we de do the thing wey Bible talk when e say: “Make the hand wey don weak strong, and make the knee wey de shake strong.” (Isaiah 35:3) So, e no go good if you decide say you go de try to encourage and make one or two brothers or sisters strong anytime wey you go meeting? (Hebrews 10:24, 25) Better word wey you talk to praise them and to thank them as them de try to make Jehovah happy, fit really help them to continue to de strong so that them go fit win the race for life.
OCTOBER 16-22
FINE-FINE LESSON FROM BIBLE | JOB 6-7
“When E Be Like Say Life Too Hard to Handle”
w06 3/15 14 ¶10
Lessons From the Book of Job
7:1; 14:14—Wetin e mean when Bible talk say person life be like “work wey them force person do”? The things wey Job suffer plenty well-well sotey e come de feel say life too hard and e be like work wey them force person do. (Job 10:17, footnote) Since the time wey person go stay for Grave wey be from the time wey person die go reach the time of e resurrection, na time wey the person no fit run from, Job talk say that time be like work wey them force person do.
“Jehovah . . . De Save People Wey Life Don Tire”
SOMETIMES, we fit de think about how our life dey short and how our days full with “so-so trouble.” (Job 14:1) This one de make life tire us sometimes. Many servants of Jehovah for Bible feel like that too. Some of them even want die. (1Ki. 19:2-4; Job 3:1-3, 11; 7:15, 16) But Jehovah, the God wey them trust, always give them comfort and make them strong. Their story dey for Bible so that as we de read about them, we go fit get comfort and learn from them.—Rom. 15:4.
g 1/12 16-17
When Life Don Tire You Sotey You Want Die
Even though say your problem be like say hope no dey, remember say you no dey alone and say almost everybody get problem wey them still de face today. Bible talk say: “All the things wey God make continue to cry inside their heart together and de feel pain together.” (Romans 8:22) Sometimes, e fit be like say the problem wey you de face no go ever get end, but things fit still better as time de go. But for now, wetin fit help you?
Tell your friend wey you trust how you de feel. Bible talk say: “Real friend de show love all the time, and na brother wey you fit trust when problem dey.” (Proverbs 17:17) Job wey be righteous man, talk about e problem when e de face serious wahala. When the way e de feel don de make-am “hate e life,” e talk say: “I go talk-am as e take de vex me. I go talk-am as e take de pain me for mind!” (Job 10:1) To tell our friend about our problem, fit reduce the way we de feel about-am, and e fit help us start to see the problem for another way.
Tell God everything wey dey your heart for prayer. Some people de think say prayer na wetin person de do just to feel ok, no be say person de answer the prayer. But no be wetin Bible talk be that. Psalm 65:2 call Jehovah God “[Person] wey de hear prayer,” and 1Peter 5:7 talk say: “E de care about una.” Plenty times, Bible show say e dey important make we de always trust God. For example:
“Trust Jehovah with all your heart, and no trust the things wey you know. Remember-am for all the things wey you de do, and e go make your road dey straight.”—PROVERBS 3:5, 6.
“People wey de fear [Jehovah] de get wetin they want . . . ; e de hear as them de beg make e help them, and e go save them.”—PSALM 145:19.
“And na wetin we dey sure about-am be this, say anything wey we beg-am for, wey agree with wetin e want, e de hear us.”—1 JOHN 5:14.
“Jehovah no de listen to wicked people prayer, but e de answer righteous people prayer.”—PROVERBS 15:29.
If you tell God the things wey you de face for life, e go help you. Bible get better reason wey make-am encourage you to “trust God everytime . . . Make [you] pour [your] heart to God.”—Psalm 62:8.
Fine-Fine Things Wey You See for Bible
Show Say You Get Interest for People and Feel for Them
10 When we try to understand our brothers and sisters, we de copy Jehovah. Try your best to know more about your brothers and sisters. Talk with them before meeting start and after meeting don finish. Work with them for preaching. And if e dey possible, invite them come chop for your house. If you do this one, e fit surprise you to know say, that sister wey you think say e de do somehow before, na shame be e problem. That brother wey you think say e like money too much because na big man, de help people. Or that sister wey de come late to meeting many times with e children, de face serious problem. (Job 6:29) The truth be say, we no go be “busy-body for other people matter.” (1Tim. 5:13) But e good make we know something about our brothers and sisters, and the things wey them don face for life. This one go help us understand them more.
OCTOBER 23-29
FINE-FINE LESSON FROM BIBLE | JOB 8-10
“God Love Wey No De Fail De Protect Us From Satan Lie”
w15 7/1 12 ¶3
We Fit Really Make God Happy?
Job suffer plenty different kind of problem for life wey be like say e no suppose face. This one affect the way e de think. Na e make-am talk say God no care whether e get faith for-am or whether e no get. (Job 9:20-22) Job really dey sure say e dey righteous sotey other people come de feel say e de carry imself as person wey righteous pass God.—Job 32:1, 2; 35:1, 2.
Wetin You De Gain From Jehovah Love Wey No De Fail?
14 Because of e love wey no de fail, Jehovah de protect e friendship with us. King David pray to Jehovah say: “Na you be the place wey I de run go hide; You go protect me from trouble. You go surround me with people wey de shout with happiness because you don save me. . . . Jehovah de surround people wey trust-am with e love wey no de fail.” (Ps. 32:7, 10) For Bible time, when them fence city round, e de protect people wey dey inside the city, from their enemy. The special love wey Jehovah get for us be like that fence. E de protect us from anything wey fit spoil our friendship with Jehovah. Another thing na say, na this love de make Jehovah draw us come e side.—Jer. 31:3.
Fine-Fine Things Wey You See for Bible
w10 10/15 6-7 ¶19-20
“Who Fit Know the Mind of Jehovah?”
19 Wetin we don learn about “the mind of Jehovah”? We need to allow God Word to help us understand Jehovah mind. Make we no ever blame Jehovah for the things wey we no fit do or use the way we de think take de judge-am. Job talk say: “[God] no be man like me wey I go de answer-am, wey we go come carry ourself go court.” (Job 9:32) When we start to understand Jehovah mind like Job, e go move us to talk say: “See! This things na just small part of the things wey e de do; na only small part about who e be we don hear! So who go fit understand the mighty thunder wey e get?”—Job 26:14.
20 When we de read Bible and we see place wey de hard us to understand, especially if e concern the way Jehovah de think, wetin we go do? After we don do research and the answer no still clear, make we see-am as something wey want test the kind trust wey we get for Jehovah. Remember say sometimes, some kind statement dey wey de give us chance to show say we get faith for Jehovah character. Make we dey humble and tell ourself say we no understand everything about the way Jehovah de do things. (Eccl. 11:5) This one go move us to agree with wetin apostle Paul talk when e say: “The better-better things of God and im sense and the things wey e know really dey deep no be small! Person no fit really understand the way e de judge and person no fit really know im ways! Because ‘who don know the mind of Jehovah, or who fit advice-am?’ Or, ‘who don first give God something, so that e must pay the person back?’ Because everything come from God and everything dey because of God and for God. Make e get the glory forever. Amen.”—Rom. 11:33-36.
OCTOBER 30–NOVEMBER 5
FINE-FINE LESSON FROM BIBLE | JOB 11-12
“Three Ways to Get Wisdom and Gain From-Am”
w09 4/15 6 ¶17
Job Value the Name of Jehovah Well-Well
17 Wetin help Job to fit stand well for Jehovah side? E clear say before all this problem start, Job don already do things to make e friendship with Jehovah tight well-well. Even though say we no see anything wey show say Job know say Satan don challenge Jehovah, Job still make up e mind to hold Jehovah tight. E talk say: “I no go ever leave God till I die!” (Job 27:5) How Job take get this kind tight friendship with God? The truth be say, Job value the things wey e don hear about how God take do things with Abraham, Isaac, and Jacob, wey still be e family people. And as e de see and de think about the things wey God don make, e come know the plenty character wey Jehovah get.—Read Job 12:7-9, 13, 16.
You No Go Ever Dey Alone, Jehovah Dey With You
10 Dey tight with brothers and sisters for congregation. Make friends with brothers and sisters for congregation wey you fit learn from. Them fit senior you or you fit senior them and una fit no come from the same place. Bible remind us say: “Old people de get sense.” (Job 12:12) Old people fit learn plenty things from young servants of Jehovah too. Jonathan senior David by far, but this one no make the two of them no dey tight as friends. (1Sam. 18:1) David and Jonathan help each other serve Jehovah well even with the serious problem wey them face. (1Sam. 23:16-18) One sister wey e name na Irina and wey be the only Witness for e family talk say: “Our brothers and sisters for congregation fit really be like our papa and mama, or real brothers and sisters from the same mama. Jehovah fit use them to be the family wey we need.”
11 To make new friends fit no dey easy, especially if you de shame. One sister wey e name na Ratna and wey de shame, learn the truth even with trouble from people. The sister talk say, “I just need to accept say I need brothers and sisters for congregation to help me.” E fit no dey easy to tell another person how you de feel. But when you do like that, that person fit become your tight friend. Your friends dey ready to encourage and support you. Even with that one, them need you to tell them how them fit do this one.
12 One fine way to make friend na when we de preach with other people for congregation. Carol wey we talk about before talk say: “I don get plenty good friends as I de spend time with sisters for preaching and de do other work together for Jehovah. For many years now, Jehovah don use this friends help me.” To make friends with faithful brothers and sisters na really better thing. Jehovah de use this kind better friends to help you when you really dey sad, like when you dey lonely.—Prov. 17:17.
it-2 1190 ¶2
Wisdom
Better sense From God. Na Jehovah God get complete wisdom and na only e de wise. (Ro 16:27; Re 7:12) To get knowledge na to know something. And since na Jehovah create everything and na e be “from everlasting go reach everlasting” (Ps 90:1, 2), na e know everything wey person suppose know about the whole world, the way e take make-am, the things wey dey inside, and even things wey don happen for past go reach now. The laws and the rules wey men need to follow to fit do their research and to make new things wey them de make, na Jehovah still make them. Without all this things, men no go fit do anything for this world at all. (Job 38:34-38; Ps 104:24; Pr 3:19; Jer 10:12, 13) So e make sense to talk say, the rules and laws wey God don put for Bible dey very important for us to fit stand well, de reason well, and succeed for life. (De 32:4-6; check JEHOVAH [A God of moral standards].) Nothing too big for-am to understand. (Isa 40:13, 14) Even though say e fit allow things wey no agree with wetin e law talk to happen and succeed for some time, the things wey go happen for future still dey e hand and e go agree well with wetin e want. And the things wey e don talk “must succeed.”—Isa 55:8-11; 46:9-11.
Fine-Fine Things Wey You See for Bible
w08 8/1 11 ¶5
How to Talk to Young People
▪ ‘I de think about the main message wey dey the word wey them talk?’ Job 12:11 talk say: “Ear no de test word just as tongue de taste food?” E dey important now pass before make you “de test” the things wey your son or daughter de talk. Young people no de always talk things well, the way them really de feel. For example, your son or daughter fit say, “You de always treat me like small pikin!” or “You no de ever listen to me!” Instead of you to come de think about the way them take talk the “always” and “ever,” try think about the main thing wey your pikin de try talk. For example, “You de always treat me like small pikin!” fit mean say “I de feel say you no trust me,” and “You no de ever listen to me!” fit mean say “I want tell you how I de feel.” Try to know the main message wey de inside the thing wey them de talk.